Fa wi e tron boen bedinari di e doro na marki?

„Foe dat’ede meki mi e seni Timotéus go na joe . . . bikasi a sa tjari kon na ini joe prakseri den methode foe mi di abi foe doe nanga Kristus Jezus, soleki mi e leri sma ala pe na ini ibri gemeente.” — 1 KORINTESMA 4:17.

1, 2. Wan sma moe doro sortoe fanowdoe factor efoe a wani hari kon na a waarheid? (Tori foe den apostel 8:12)

BAKA DI nanga Pinksteren foe 33 G.T. Gado kanti santa jeje, na kristen gemeente ben gro na wan boen fasi èn ben panja go alape es’esi (Tori foe den apostel 2:40-42; 4:4; 6:7; 11:19-21). San ben de na sroto dati den sani disi waka boen? Foe san-ede meki so foeroe djoe èn bakaten ooktoe Samariasma nanga heidensma ben teki Kristus nanga na boskopoe foe Gado kownoekondre? — Tori foe den Apostel 8:4-8; 10:44-48.

² Efoe wan sma wani teki na kristen boen njoensoe, dan a moe doro bepaalde faktor. Ini a fosi presi wan sma moe ferstan fa Jehovah ben sori no-ferdini-boen-fasi gi a libismafamiri foe di a ben teki fesi èn ben seni en Manpikin kon na grontapoe leki wan loesoepaiman-ofrandi. Na bijbelskrifiman Johannes e tjari disi kon na a fasi disi ondro wortoe: „Nanga disi na lobi foe Gado ben kon na krin na ini wi geval, dati Gado ben seni en wan enkri gebore Manpikin kon na grontapoe, sodati nanga jepi foe en wi ben sa libi. Na lobi no ben de na ini a fasi disi, dati wi ben lobi Gado, ma dati en ben lobi wi èn ben seni en Manpikin kon leki zoenofrandi foe wi sondoe.” — 1 Johannes 4:9, 10.

3. Foe san-ede meki a de fanowdoe dati wan sma ferstan en jeje nowtoe?

³ Ete wan kefarlek prenspari faktor de a fasi fa wan sma e si jeje waarde. Jezus ben taki: „Kolokoe den sma de, di e ferstan den jeje nowtoe foe den, bikasi a kownoekondre foe hemel na foe den. Kolokoe den sma de di e angri èn dré watra foe kisi regtvaardikifasi, bikasi den bere sa foeroe” (Mattéus 5:3, 6). Wan sma di e firi leki a doro kaba èn di e regtvaardiki ensrefi, gewoonlek no e ferstan no wan enkri jeje nowtoe foe en èn en no e opo ensrefi moro gi na waarheid. Te Jehovah Kotoigi e tjari na kownoekondre boskopoe gi sowan sma dan nototron a sa piki: ’Mi no abi belangstelling. Mi abi mi égi kerki.’ Na so srefi toe wan sma di e gi ensrefi krinkrin abra a goedoe no sa abi ten gi jeje sani. — Mattéus 6:33, 34; 7:7, 8; Lukas 12:16-21.

4. Sortoe aksi wi sa go loekoe now?

⁴ Ma fa a de nanga den sma di „e ferstan na jeje nowtoe foe den boen” èn di de klari foe soekoe Gado nanga en kownoekondre? Fa wi kan feni den èn kon sabi den leki so? Wan sani de di wi leki bedinari foe Gado Wortoe kan doe foe meki na boskopoe foe oenoe kon de wan sani di den kan ferstan moro boen? Fa wi kan wroko leki bedinari moro boen foe doro wan marki?

A methode foe soema wi moe gebroiki?

5. San Timotéus ben sa leri den Korintesma soleki Paulus ben taki?

⁵ Di na apostel Paulus ben skrifi den fosi brifi gi den Korintesma, a ben taigi den taki a ben go seni Timotéus go, di ’ben sa tjari en [Paulus] methode kon ini prakseri gi den di abi foe doe nanga Kristus Jezus’. Na presi foe „methode” son vertaling e gebroiki djaso „leri foe libi” noso wortoe leki ’fa mi e libi’ èn ’fa mi e tjari misrefi’. Professor Thayers Greek-English Lexicon of the New Testament e leg a tekst disi uit na a fasi disi: „Den methode di mi e gebroiki leki Kristus dinari nanga apostel ini a doe foe mi wroko.” Foe di Paulus e kaba na zin nanga den wortoe „soleki mi e gi leri ala pe na ini ibri gemeente”, meki a de redelek foe konkluderi dati den wortoe foe en abi foe doe nanga na actief diniwroko èn no soso nanga en persoonlek kristen libifasi. — 1 Korintesma 4:17.

6. Foe san-ede meki a diniwroko foe Jezus ben doro en marki?

⁶ Jezus no ben e doe en diniwroko fa a go a go. Ooktoe ensrefi ben gebroiki methode na ini en prékiwroko. Na so foe eksempre a ben leri en apostel, èn bakaten den sébitenti evangelium-prékiman finifini fa den ben moe préki taki a waka boen. A gebroiki di a ben gebroiki alaten agersitori, aksi nanga sani di a ben teki poeroe foe den santa boekoe ben de wan eksempre gi den. Dati de ooktoe na ini na ten disi te now ete na moro boen methode. — Lukas 9:1-6; 10:1-11.

7. Fa wi kan tjari na boen njoensoe go abra na so wan bigi groepoe foe sma leki a kan?

⁷ Foe di na kristen diniwroko de wan afersi foe tégo libi noso tégo dede, fa wi kan tjari na boen njoensoe go na wan so bigi nomroe foe sma leki a kan? Ija, fa wi kan de ’krin foe na broedoe foe ala sma’? Te wi o gebroiki ibri mogelekheid foe préki, makandra nanga na diniwroko „oso foe oso”, soleki na apostel Paulus ben taki. Wan Spanjoro kommentaar tapoe Tori foe den Apostel 20:20 e taki: „Djaso wi abi na prékiwroko methode di Paulus ben gebroiki na ini Efese.” — Tori foe den Apostel 20:20-27.

Na fosi moeilekheid

8, 9. (a) San de nofotron na fosi moeilekheid ini na diniwroko? (b) Foe san-ede meki Jezus ben kan taki fri èn sondro frede?

⁸ A de so dati foeroetron wisrefi de na fosi moeilekheid di wi moesoe wini na a diniwroko. Son sma abi na firi foe sjensjen, e firi leki den no de bekwaam èn no de ontwikkeld nofo gi den sma di den o miti. Ma fa Jezus ben firi ensrefi? A ben pasa den skoro foe den rabbi? A ben kisi wan moro hé leri? Fa den sma foe en égi kondre ben doe te a ben préki? Mattéus e ferteri wi: „Den ben ferwondroe . . . èn ben taki: ’Pe a man disi kisi na koni dati èn den krakti wroko disi?’” A troe, dati Jezus ben de volmaakti, na manpikin foe Gado, ma en methode ben de ooktoe praktis gi a moro bigi pisi foe discipel di no ben de ontwikkeld èn di ben moe waka na en baka. Sortoe reactie den ben meki kon srefi a mindri den kerki féjanti foe den? „Di den si now fa Petrus nanga Johannes ben taki fri èn sondro frede èn den ben si dati den ben de gewoon sma di no ben kisi leri, den ben ferwondroe. Den ben kon herken den leki sma di ben de nanga Jezus.” — Mattéus 13:54; Tori foe den Apostel 4:13.

⁹ Ma pe Jezus ben teki ala den sani poeroe di a ben leri sma? Foe san-ede meki sani ben waka boen gi en na ini en diniwroko? A ben gebroiki neleki den modern TV prékiman wortoe di e wiki na firi foe den sma di e arki psa marki nanga na prakseri foe hari den kon? Eenvoud ben de na fundamenti foe na prékiwroko foe Jezus. A ben taki na tongo foe na gewoon pipel, a ben sabi a jeje nowtoe foe den, èn san ben de a moro prenspari sani ben de dati Jezus ben sabi taki en Tata ben de a baka en. A ben tjari disi kon na krin di a ben ferteri na ini na djoe kerki foe na foto pe a ben gro, Nazarath ini Galiléa, dati na diniwroko ben de a sani foe san Gado seni en kon. A ben lési foe na lolo foe na proféti Jesaja: „’Jehovah jeje de tapoe mi, foe di a ben salfoe mi foe meki boen njoensoe bekenti gi den pótiwan, a ben seni mi go foe préki fri gi den sma na ini straf’oso èn gi den breniwan foe si baka, foe seni den wan di den ben masi broko go na ini fri, foe préki Jehovah jari foe fri sma.’ . . . Ne a ben bigin taki gi den: ’Tide den wortoe disi kon troe di oenoe ben jere djonsro de.’” — Lukas 4:16-21.

10, 11. (a) Fa wi moe denki foe wi diniwroko? (b) Sortoe piki Pualus ben gi?

¹⁰ Na ini a ten disi wi abi na srefi sma di tanapoe na wi baka na ini wi diniwroko — Jehovah Gado, na Soeverein Masra foe na Universum. Wi e préki en boskopoe, en koni, wi e bow tapoe en Wortoe leki fundamenti èn wi e meki gebroiki foe en na ini wi takmakandra srefsrefi. Wi moe abi wan komplex na ini a tori foe a préki awasi wi kon tanapoe na fesi foe sma di kisi moro leri noso di goedoe moro leki wi?

¹¹ Paulus e piki: „Pe na koniman de? Pe na meester foe wet? Pe na debatman foe na seti foe sani disi? Gado no ben meki na koni foe na grontapoe disi de wan law sani? Dan oenoe e si a kari foe oen brada, dati a no foeroe koniwan na skinfasi den ben kari, a no foeroe maktiwan, a no foeroe sma foe hé gebortoe, ma Gado ben teki den lawsani foe grontapoe foe gi den koniwan sjen; èn Gado ben teki den swaki sani foe grontapoe foe gi den tranga sani sjen; èn Gado ben teki den sani di no de so grani na grontapoe, èn den sani di sma e broko ai gi, den sani di no de, foe tjari den sani di de kon a wan kaba sodati no wan skin ben sa kan meki bigi na fesi foe Gado.” — 1 Korintesma 1:18-29.

12. Dati wi diniwroko e waka boen e kon foe san?

¹² Dati a diniwroko e waka boen gi wi, no de foe na opleiding foe wi ofoe foe wi afkomst ma foe na kownoekondre boskopoe ede srefi, di e go na ini na ati foe den sma di e ferstan wan bepaalde jeje nowtoe foe den. Ete wan sani di de na Jehovah boen wani di a e sori a sma dati, bika Jezus ben taki: „No wan sma kan go na mi Tata, efoe na Tata di ben seni mi kon no hari en kon.” — Johannes 6:44.

13. (a) Fa Paulus nanga Barnabas ben teki gens di den kon? (b) Fa wi kan abi alaten prisiri na ini na diniwroko?

¹³ Soboen nanga foeroe fertrow na ini na jepi foe Jehovah wi kan doe wi diniwroko nanga overtoigi, net soleki Paulus nanga Barnabas ben doe disi na ini na fosi jarhondro. Di den ben e préki na ini Ikonium, dan na diniwroko foe den ben meki bigi difrenti foe prakseri ben kon èn ooktoe pikinso gens. Disi ben de gi den wan réde foe kikbak? A tori foe Lukas e ferteri wi: „Wan heri pisten den ben de drape èn ben taki fri èn sondro frede nanga na makti foe Jehovah, di ben kotoigi foe na wortoe foe en no-ferdini-boenfasi, foe di nanga jepi foe na anoe foe den a ben meki marki nanga wondroe psa.” Efoe ooktoe wi teki wan positief houding a fesi den sma na ini wi gebied èn libi den bakapisi abra gi Jehovah, dan alaten na diniwroko sa de wan prisiri èn no wan hebi. — Tori foe den Apostel 14:1-3; Jakobus 1:2, 3.

Fa sma e teki a boskopoe

14. Fa sma ben doe tapoe na prékiwroko foe Paulus?

¹⁴ A no alaten sma ben teki na préki foe Jezus noso Paulus na wan boen fasi. Fa na publiki ben doe foe eksempre di Paulus ben préki na Athene? Na tori e ferteri wi: „Son wan foe den Epikurische leki den Stoïsche filosoofman ben bigin go stré nanga en èn sonwan ben taki: ’San na taktak mofoman disi wani foe ferteri?’ Trawan: ’A gersi a de wan prékiman foe freemde gado.’ Disi ben de foe di a ben meki bekenti na boen njoensoe foe Jezus èn na opobaka. Foe dat’ede meki den ben graboe en èn ben tjari en go na na Aréópagus èn den ben taki: ’Wi kan konsabi san de a njoen leri disi di joe e taki foe en? Bikasi joe e tjari wantoe sani kon na fesi di de vreemd na ini wi jesi.’” — Tori foe den Apostel 17:18-20.

15. Fa sma e doe tapoe na diniwroko foe joe? Ma san wi moe abi na ini prakseri?

¹⁵ Wi moe erken dati na boskopoe foe wi èn na fasi fa koranti radio TV nanga so moro fara e tjari en èn den gensman foe en, de ini na disi ten publiki ooktoe wan vreemde sani ini den jesi. Leki wan bakapisi foe dati meki foeroe sma e kroetoe wi a fesi sondro foe arki na wi, foe di den teki èn bribi den mofo-koranti di e panja. Trawan, soleki den sma dati na ini Athene, wani sabi moro bifo den teki wan bosroiti. Natuurlek a kan de so, dati ooktoe den baka te den arki na kownoekondre howpoe e spotoe den leki wan sani di no kan kande foe drégi. Ma hori na ini prakseri dati den e trowe Kristus nanga en boskopoe èn no joe. — Tori foe den Apostel 17:32-34; Mattéus 12:30.

Foe freemde sma kon tron mati

16. (a) Fa wi e doe sontron te vreemde sma e kon na wi doro? (b) San den bigin wortoe foe wi moe doe?

¹⁶ Fa joe e firi joe srefi te wan freemde sma kon a joe doro? Sortoe aksi e kon ini joe ede? Kande: Soema na den sma dati? San den wani? Den e tjari moeilekheid gi mi? Te wi e ferteri na den sma doro taki wi na bedinari, wi moe hori disi na prakseri. Ini den fosi wortoe foe wi wi moe meki den firi korostoe tapoe a punt disi. Ma fa? We, sortoe bigin wortoe Jezus ben gi rai foe gebroiki? A ben taki: „Te joe e go na ini na oso, taki na osofamiri odi dan; èn efoe na oso de en warti, na vréde di joe ben winsi en e kon na tapoe, ma efoe na oso no de en warti, dan na vréde foe joe e drai na joe.” — Mattéus 10:12, 13.

17. Fa den bigin wortoe foe wi kan meki wan sma firi switi?

¹⁷ „Na so na vréde di joe winsi en e kon na tapoe en.” San disi wani taki? Dati wi na ini wi diniwroko e winsi ibri sma nanga ibri osofamiri vréde. Na ini den fosi wortoe foe wi moe kon na krin kaba dati wi de bedinari foe Gado di lobi vréde. Srefi now ete den djoe nanga moslim e gebroiki den odi leki „Vréde moe de nanga joe” noso „Vréde” („Sjalom aleichem” noso „Sjalom” ini Hebrewtongo nanga „Assalam ’alaikum” noso „Salam” na ini Arabtongo). A no de foe taki dati na odi di wi e gi e anga foe na gwenti foe a presi èn e kenki foe kondre go miti kondre. Ma na prakseri de a srefi — foe meki a sma firi switi, sodati a sa arki na a kownoekondre boskopoe. Ini a pis watra disi a ben sa de boen foe taki fosi fa joe nen èn kande srefi foe taki pe joe e libi. Nanga dati joe e sori taki joe no abi noti foe kibri. Na marki di joe abi na joe fesi èn na eerlek fasi foe doe sa de krin gi ala sma. Dan joe e handri leki fa Paulus ben e gi rai: „Sorgoe dati no wan fowtoe ben feni na tapoe joe na fesi foe ala sma. Libi so fara leki a de anga foe joe, nanga ala sna na ini vréde.” — Romeini 12:17, 18, Philips.

18. Na sortoe marki wi moe hori wisrefi alaten na ini wi diniwroko?

¹⁸ Efoe wi e doe wi diniwroko now oso foe oso noso tapoe strati, den sma e si wi. Den takmakandra foe wi nanga wi libifasi moe de alaten sondro fowtoe èn no noesoe meki sma naki foetoe. Ma ala di na tapoe wan safri-atifasi nanga wan redelekfasi wi sa tjari sani kon na krin, tokoe den sma no moe firi noso denki leki wi e pardon wisrefi. Wi no e sjen foe de bedinari foe Gado foe ala sma. — Markus 8:38.

19, 20. (a) Fa wi kan waka miti sma na strati di e hori densrefi pikinso aparti? (b) Foe san-ede meki Jezus ben sabi foe taki nanga sma na okasi?

¹⁹ Na ini son kondre den sma e hori densrefi pikinso a bakabaka èn de moro conservatief. (dati wani taki den e hori na san den abi kaba). Son sma e ferlégi te wan sma di e hori den tijdschrift dati na loktoe, e waka na mindri den. Foe san-ede efoe dati de so, no waka go na tapoe den sma na tapoe wan moro konifasi? Na tapoe wan tactvol fasi wi kan bigin wan takmakandra nanga wan sma di no abi haast èn baka dati meki ofoe tjari den boekoe di e go foe a bijbel kon a doro.

²⁰ Jezus séker ben sabi foe préki na tapoe so wan sortoe fasi. Foe di den djoe ini algemeen ben broko-ai gi Samaritaansma nanga oemasma, meki Jezus ben handri na wan koni fasi, di a ben bigin wan takmakandra nanga na hoeroe Samaritaanoema di ben de na a peti foe Jakob. A takmakandra foe en de wan model gi na okasi préki èn na préki na strati. Ooktoe a de wan toemsi moi eksempre foe na fasi fa wan sma kan leri sma nanga sari-ati èn bow den. — Johannes 4:5-30.

21. Sortoe tra prenspari factor na diniwroko foe Paulus de leki eksempre?

²¹ Te wi e waka mindri sma nanga na boen njoensoe foe na kownoekondre dan wi moe hori ete wan prenspari sani na ini prakseri. Paulus ben de wan basi na ini dati. Loekoe pikinso efoe joe kan herken na sani dati ini wantoe foe en inleiding, di joe e feni na ini Tori foe den Apostel 13:16-20; 17:22 nanga 22:1-3. Loekoe taki na ibri okasi a ben e soekoe na punt foe akroederi nanga en arkiman. A ben firi ensrefi leki den èn a ben prakseri na achtergrond foe den. Na bakapisi de dati den ben arki, aladi den no ben agri nanga en ooktoe. Na so ooktoe na inleiding foe oenoe kan poti wan kontakti na mindri na wan sma nanga trawan nanga wan punt foe akroederi a mindri na ososma èn wi. Kande joe si dati pikin e libi drape èn joesrefi abi pikin ooktoe. Dan joe abi sani di e akroederi nanga makandra, wan fundamenti foe matifasi de. Joe abi wan punt foe takmakandra di kan de na inleiding foe na kownoekondre boskopoe! — Mattéus 18:1-6.

22. Sortoe aksi moe kisi now wan piki?

²² Ma den rai disi de soso nomo a bigin. Sortoe tra stap de fanowdoe foe meki te foe kaba wan njoen discipel? San de moro ete fanowdoe foe jepi wan tra sma nanga jepi foe Kristus foe kon na ini wan boen matifasi nanga Gado? Sortoe égifasi sa meki joe diniwroko kan de moro boen?

San joe ben sa piki?

◻ San na wantoe foe den faktor di e pré wan rol te wan sma wani teki na Kownoekondre-boskopoe?

◻ Fa wi kan wini fredefrede fasi nanga sjensjen na ini na diniwroko?

◻ San wi abi ini na prakseri foe doro nanga den bigin wortoe foe wi na ini na velddienst?

◻ Fa den eksempre foe Jezns nanga Paulus kan jepi wi foe waka go miti sma?

[Prenki na tapoe bladzijde 6]

Jezus ben leri en discipel boen fasi foe doe a diniwroko

[Prenki na tapoe bladzijde 8]

Sortoe aksi e kon na ini joe prakseri te joe e si wan freemde sma tanapoe na joe doro?

Wan diniwroko di e doro en marki e tjari moro discipel kon

„Disi de den presenti foe en: son wan de . . . evangeliprékiman, herder noso leriman. Na so fasi den sma di de foe Gado e kon de srekasreka foe dini en.” — EFESESMA 4:11, 12, Groot Nieuws Bijbel.

1. Fa Kristus ben de nanga tra sma?

CHRISTUS JEZUS no ben de wan kluizenaar (wan sma di poeroe ensrefi a mindri tra sma go libi en wawan). A diniwroko foe en ben abi foe doe spesroetoe nanga sma. Na ini den fo evangeliumtori wi e si Jezus pikinmoro alaten bezig nanga sma. Na tapoe den reis foe en a ben si na ini sortoe situwasi den ben de, te joe loekoe en boen, èn a ben abi dipi sari nanga den. Joe abi leki kristen bedinari sari nanga den sma di joe e miti? — Mattéus 9:35, 36.

2. Fa Jehovah Kotoigi e waka baka na eksempre foe Jezus?

² Na a kristen diniwroko na ini a ten disi a de go foe libisma. Foedi Jehovah Kotoigi e ferstan disi, meki den de plooibaar na ini na dienst foe den gi Gado. Alape na ini grontapoe wan sma kan si den e taki nanga den sma, na strati, na den doro, na ini druk wenkri kontren, ini na birti foe bus èn na ini bisnis kontren. Ala pe sma de foe feni, Jehovah Kotoigi de bezig nanga na evangeliumwroko. Foe san-ede? Foe di a wortoe „evangelium” komoto foe na Griki wortoe euaggelion, san wani taki „boen njoensoe”. Ibri Kristen Kotoigi foe Jehovah net leki Kristus moe de wan bedinari foe na boen njoensoe, wan evangeliumprékiman. Foe dat’ede meki ibri kotoigi moe hori ensrefi ooktoe bezig nanga sma. — 2 Timotéus 4:5; Efesesma 4:11, 12.

3. San ben de a moro boen methode gi na kristen diniwroko?

³ San de a moro boen fasi foe doe na evangeliumwroko disi? Radio nanga TV-methode di foeroe kerki e gebroiki de na troetroe piki? We, aksi joesrefi pikinso: Radio nanga TV kan piki den aksi foe joe spontaan? Nono, bikasi den sani disi ini wan séker marki de onpersoonlek kommunikatie jepisani. Na moro boen diniwroko de te now ete san Jezus nanga en discipel ben gebroiki, pe na préki man e go taki fesi nanga fesi nanga na sma di e soekoe waarheid. Ma dati e kostoe ten nanga moeiti, soleki Paulus e sori disi nanga wan eenvoudig agersitori: „Mi ben prani, Apóllos ben nati, Ma Gado ben meki a gro; sodati no a sma di ben prani de wan sani, no a sma di ben nati, ma Gado di ben meki a gro.” — 1 Korintesma 3:5-7.

4. Sortoe dri stap na diniwroko di e doro a marki sabi?

⁴ Den wortoe disi e sori dati na kristendiniwroko de ini dri pisi — prani, a sorgoe foe san joe prani, èn a koti foe den froktoe. Fa so? Fosi oen moesoe prani, na fosi kontakti nanga a boen njoensoe foe na kownoekondre. Dan e kon now na sorgoe foe san ben prani, èn ini dati joe abi na nati foe san ben prani. Fa dati e psa? Te joe e abi moro takmakandra nanga a sma, e piki en aksi, e tjari punt pe a e degedege a ini kon a krin. Disi nofotron e meki wan geregelde bijbelstudie kon, sodati na bijbelwaarheid e prani dipi go na ini wan sma ferstan nanga ati; nanga na blesi foe Gado na proces foe gro e bigin. Na bakapisi te foe kaba de wan njoen actief discipel foe Kristus Jezus, wan njoen bedinari. Now, fa wi leki bedinari kan njan boen foe na kefarlek bigi blesi foe koti wan discipel leki froktoe?

5. San sa jepi wi foe de bedinari di e doro na marki?

⁵ Soleki wi ben taki na ini na artikel na fesi dan Jezus ben leri en discipel na praktis fasi foe doe den diniwroko. Paulus ben taki foe en „methode” di de ini verband nanga Kristus Jezus (1 Korintesma 4:17). Na lo foe gemeente di a ben jepi foe opo na ini ala sortoe presi na ini Klein-Azië nanga Grikikondre, e sori foe na succes foe en. Wi taki kaba foe wantoe foe en methode (èn foe Jezus), ma moro methode de ete di wi kan gebroiki boen na ini a ten disi?

San de a fundamenti? Èn na boskopoe?

6. San moesoe de na oekoeston foe wi diniwroko?

⁶ Tapoe sortoe fundamenti na kristen boskopoe moe didon? Tapoe libisma koni èn filosofie? Paulus brifi gi Timotéus e gi krin a piki: „Ma oenoe moe tan na ini den sani di oen ben leri èn di oenoe ben go bribi na ini nanga jepi foe overtoigi, sabi. . . . dati sensi joe jongoe jari joe ben sabi den santa boekoe di kan meki joe koni foe kisi jepi nanga jepi foe na bribi di de ini verband nanga Kristus. Gado ben meki den skrifi ala den boekoe nanga en santa jeje èn den de boen foe leri sma.” A de krin taki na bijbel, a Wortoe foe Gado, moe de na oekoeston foe wi wroko. — 2 Timotéus 3:14-17.

7, 8. Sortoe eksempre Jezus nanga Paulus ben gi wi ini na gebroiki foe tekst foe a bijbel?

⁷ Na ini a pisi tori disi Jezus ben teki fesi — ala ten baka a ben teki pisi poeroe foe na bijbel èn na apostel Paulus ooktoe. Foe eksempre, na ini Thessalonika a ben bigin foe leri sma Griki filosofie? No, bikasi a tori e taigi wi: „Paulus dan ben go leki fa a ben gwenti drape na den èn dri sabbat baka makandra a tak-go-tak-kon nanga den nanga jepi foe den boekoe, sodat nanga jepi foe verwijzing a ben gi verklari èn ben bewijsi dati Jezus ben moe njan pina èn ben moe opo baka foe dede.” — Tori foe den Apostel 17:1-3.

⁸ San ben de a bakapisi? ’Sonwan foe den ben tron bribiman.’ Foe dat’ede meki a prékiwroko foe wi ooktoe na ini a ten disi, moe abi en fundamenti tapoe na Wortoe foe Gado efoe wi e waka na baka na methode foe Paulus. Dati de na réde foe san-ede den e rikomanderi wi gi wi diniwroko wan bepaalde tori foe takmakandra. Tapoe na fasi dati, a waarheid foe Gado kan feni jesi a den sma di e ferstan a jeje nowtoe foe den. — Tori foe den Apostel 17:4.

9, 10. (a) San moe de na ini na ten disi na thema foe wi prékiwroko? (b) Gi eksempre foe na diniwroko foe Paulus.

⁹ Na tra aksi de now: Sortoe boskopoe wi moe préki? We, san ben de a thema foe Kristus diniwroko? Jezus ben ferstan san a zending foe en ben de foe san a ben taki: „Mi moe meki ooktoe na boen njoensoe foe na kownoekondre bekenti na tra foto, bikasi na foe dat’ede Gado ben seni mi kon.” Ini a tori foe den laatste dé foe na disiten seti foe sani foe wi a ben taki: „Na boen njoensoe disi foe na kownoekondre sa préki na a heri grontapoe pe libisma e libi leki wan kotoigi gi ala naatsi, èn dan na kaba sa kon.” — Lukas 4:43; Mattéus 24:14.

¹⁰ A srefi thema Paulus e poti krakti a tapoe na ini na prékiwroko. Nanga den djoe na ini wan djoe kerki foe eksempre a ben taki: „Dri moen langa, fri èn sondro frede, aladi a ben hori lezing èn a ben gebroiki krakti foe overtoigi sma ini a tori foe na kownoekondre foe Gado”. Gi den sma di ben kon fisiti en ini Rome, ’a ben tjari na afersi kon na krin foe di a ben gi kotoigi finifini ini a tori foe na kownoekondre foe Gado’. Foe dat’ede meki „na kownoekondre foe Gado” moe de na thema pe a heri disiten kristen diniwroko foe wi moe drai lontoe. — Tori foe den Apostel 19:8; 28:23, 31.

Joe e feti nanga sma noso joe e hari sma kon?

11. Fa sma nofotron e doe te den kon tanapoe na fesi wan kotoigi, èn fa wi kan doe wan sani na ini disi? (Tori foe den Apostel 17:17, 18)

¹¹ Na ini na fosi jarhondro, dan fasi foe bribi, ras nanga nationaliteit ben de densrefi sortoe krakti di ben tjari pratifasi kon leki ini a ten disi (Tori foe den Apostel 2:7-11). Disi wani taki dati a moro bigi pisi foe den sma na tapoe kontren foe na fasi foe bribi ben abi den égi denki di den ben e poti a fesi. Nofotron den e firi densrefi leki den de ini kefar èn den e go abra foe verdedig densrefi te den miti wan kotoigi. Fa wi kan tjari wan kenki kon na ini disi? Te wi e gebroiki switifasi nanga takt èn e fiti wisrefi na a sma.

12, 13. Fa Paulus ben taki nanga anbegiman foe kroektoe gado na ini Athene? Fa den ben doe?

¹² Loekoe pikinso fa Paulus ben doe nanga sowan situwasi na a afkodré Athene. Di a ben si someni kroektoe gado, dan disi ben tergi en biginbigin. Ma a ben fadon go wantewante a tapoe den afkodré anbegi foe den di a ben opo foe taki tapoe na Aréopagus? Den bigin wortoe foe en ben de: „Oen man foe Athene, mi e si na ini ala sani dati moro leki tra sma oen gi oensrefi abra na a frede foe den gado. Di foe eksempre mi ben waka lontoe èn mi ben loekoe finifini den sani foe oenoe di oen e gi grani, mi ben feni ooktoe wan alatari nanga den wortoe: ’Gi wan gado di wi no sabi.’ San oenoe foe dat’ede e gi grani na en sondro foe oen sabi, na dati mi e meki bekenti gi oenoe.” — Tori foe den Apostel 17:16-23.

¹³ Nanga den bigin wortoe disi Paulus ben opo poti wan skotoe na mindri en nanga den sma di ben arki en? Kwetikweti. A fasi fa a ben bigin taki nanga den ben de tactvol, no dogmatis. A no ben kroetoe den awasi na anbegi foe den te joe e loekoe en foe na sé foe Gado ben de wan soso sani. A ben de drape foe préki a kownoekondre boskopoe èn no foe fadon na tapoe den sma. A ben erken na tranga firi foe den foe anbegi èn a ben gebroiki dati leki wan broiki foe en takmakandra foe na troe Gado nanga en vertegenwoordiger, di ben opo baka foe dede, Jezus. San ben de a bakapisi foe na tactvol fasi disi foe taki nanga sma? Ala di son sma ben spotoe nanga en, trawan ben taki: „Wi sa jere foe joe baka wan tra ten.” Ija, a ben kisi na kari foe ben go fisiti den ete wan tron! — Tori foe den Apostel 17:22-32.

14. Fa wi kan gebroiki na eksempre foe Paulus na ini wi diniwroko?

¹⁴ Fa wi kan gebroiki na methode disi na ini wi diniwroko na ini a ten disi? Na ini a fosi presi wi moe poti prakseri boen tapoe bepaalde sani di wi e si èn di de wan marki foe a kerki denki foe wan sma — kande wan sani foe en bribi di a e weri noso di de foe si na en doro noso na a dromofo foe en oso, Nanga dati, net leki na apostel Paulus, nofotron wi kan kisi wan boen prenki foe na fasi foe anbegi di a tra sma abi. Disi e gi oenoe wan bigin foe taki switi wortoe di e wiki na belangstelling ma di no e tjari wan stré kon. Hori na ini prakseri dati wi e fisiti na sma moro foeroe foe taki foe na kownoekondre foe Gado èn no foe go wantronwantron kaba na ini wan takmakandra foe kerkileri. Wi wani wini sma, no soso foe abi wan takmakandra. — Teki gersi 2 Timotéus 2:23-26.

15. Sortoe boen les wi kan leri moro foe na diniwroko foe Jezus? (Lukas 10:38-42)

¹⁵ San wi kan leri moro foe na eksempre foe Kristus? Te wi go ondrosoekoe en diniwroko, dan en overtoigi nanga en eenvoud moesoe kon na fesi gi wi. A no ben meki no wan enkri situwasi broeja en ma na ondro ala omstandigheid, efoe a ben de boen ofoe no boen, a ben taki fri foe a kownoekondre foe Gado. A ben kan taki na ini na beslotenheid foe wan oso noso hori wan lezing gi wan ipi sma sondro aantekening, bijbel noso microfoon! Jezus ben kan de ooktoe so „gewoon”. Sakafasi sma ben firi dati joe ben kan go na en. A ben taki a tongo foe den foe di a ben e taki foe gron nanga koti foe njanjan, foe srepi nanga fisi. Den agersitori foe en ben de eenvoudig èn krin, ma den ben wani taki dipi sani. Wi e sori na ini wi diniwroko den srefi moi égifasi disi? — Mattéus 4:18-25; 13:1-33; Lukas 5:1-3.

Fa foe doro na ati

16. Foe san-ede wi moe de bekwaam leriman?

¹⁶ Foe taki en normaal, dan a de so dati a e teki ten nanga wan soifri studie bifo wan sma kon de overtoigi foe na bijbel boskopoe foe na kownoekondre foe Gado. Foe dat’ede meki na regeling de dati wi e studeri geregeld èn sondro kostoe èn sondro wan ferprekti na bijbel geregeld na ibri sma oso, di wani ondrosoekoe den pramisi foe Gado nanga jepi foe Kristus. Nanga den sortoe studie disi wan boen langa pisten de ini a tori èn foeroe tori nanga aksi e kon a fesi. Foe disi wi moe abi séker bekwaam leriman. Ma san a leri foe sma wani taki troetroe? — 1 Timotéus 4:16.

17. San ben de wán methode di Jezus ben gebroiki foe doro na ati?

¹⁷ Ete wantron wi e go na Jezus foe kisi a piki. Fa en ben leri sma? Loekoe den tekst di e kon now pikinso èn loekoe efoe joe kan si na sempel sistema di Jezus ben gebroiki te a ben leri tra sma: Lukas 6:9, 32-34, 39-42. San ben de a sistema dati? A ben pot aksi di ben tjari sani kon na krin. Foe san-ede a ben doe dati? Foe tjari en arkiman go so fara foe redeneer èn foe jepi den, foe ondrosoekoe densrefi na ini na leti foe na leri foe en. Nanga den aksi foe en a ben doro na ati foe den na tapoe wan tactvolfasi. Den ben moe sori efoe den ben de troetroe en bakaman efoe dati den ben arki frafra nomo. — Mattéus 13:10-17; Markus 8:34-38.

18. (a) Foe san-ede meki Jehovah Kotoigi nofotron e meki gebroiki foe den aksi na ini den boekoe foe den? (b) Wi moe loekoe boen foe na fadon go na ini sortoe gwenti te wi e leri tra sma?

¹⁸ Pikinmoro ala jepisani foe bijbelstudie di Jehovah Kotoigi e gebroiki na ini na diniwroko foe den, abi aksi na ibri paragraaf nanga verklarend materiaal. Na techniek disi foe leri sma e jepi den sma di e studeri na bijbel foe taki nanga den égi wortoe. Dan e kon na krin efoe wan sma ferstan a tori efoe a no ferstan en. Ma ala di Jezus na foeroe okasi ben poti aksi tokoe a no ben fadon go noiti na ini wan laipré foe di a ben kari na fosi wortoe ofoe na fosi lettergreep foe wan piki. Joe ben si wan dé na joesrefi dati na son bijbelstudie joe ben fadon go na ini na gwenti dati? Foe san-ede meki a no boen foe gebroiki geregeld na methode disi? Foe di sabi foe Gado nanga Kristus di moe tjari sma foe go kisi jepi moe abi en fundamenti na tapoe redenatie èn logica èn no tapoe laitori di no wani taki noti. — Johannes 17:3; 1 Johannes 5:20.

Discipel foe soema?

19, 20. Sortoe wortoe foe warskow de boen foe teki dja? Foe san-ede?

¹⁹ Tapoe na punt disi foe a takmakandra dan a boen foe gi wan warskow wortoe. Efoe wi e préki èn e leri sma na wan boen fasi ini gebied pe froktoe e kon, dan te foe kaba wi o meki discipel, ma den discipel foe soema den de? Wi moe si den leki „mi discipel”? Èn wi moe meki den poti wi na tapoe wan hé presi leki bedinari? Loekoe pikinso fa Paulus èn Barnabas ben doe di den sma foe Listra ben wani handel nanga den leki gado. Den ben bari gi na ipi sma: „Oen man foe san-ede oenoe e doe den sani disi? Ooktoe wi na libisma èn abi densrefi swakifasi leki oenoe èn wi e meki a boen njoensoe bekenti gi oenoe, sodati oenoe ben sa drai-libi den soso sani disi èn ben sa drai go na a libi Gado.” — Tori foe den Apostel 14:14, 15.

²⁰ Paulus nanga Barnabas no ben e proberi foe poti na prakseri na tapoe densrefi. Awasi Paulus ben gi kristensma na rai foe waka na en baka soleki en ben waka na Kristus baka, tokoe a no ben wani dati den ben de bakaman foe en. Na diniwroko di wi e doe, moe de alaten leki wan grani gi Gado èn no gi libisma. — 1 Korintesma 3:6, 7; 11:1.

21. Foe san-ede meki discipel e tron ooktoe bedinari?

²¹ Te foe kaba dan discipel e tron bedinari. Fa dati e doe kon? We, san e psa te wi abi troetroe boen njoensoe foe ferteri? Wi kan hori en gi wisrefi? Kontrari foe dati, wi ati e lostoe foe ferteri den na tra sma. Soleki Jezus ben taki: „Wan boen sma e tjari poeroe foe na boen goedoe foe en ati boen sani, . . . bikasi san a ati foeroe nanga en na mofo e taki.” A so a de ooktoe nanga na boen njoensoe foe na kownoekondre. Na discipel di den doro en ati, wani foe leri tra sma èn teki prati geregeld èn na tapoe wan friwani fasi na a diniwroko, èn baka dati a e gi ensrefi abra na Gado èn e teki dopoe. Na sofasi na keti foe bedinari e herhaal ensrefi, ini akroederi nanga gronprakseri di de na ini na rai foe Paulus gi Timotéus: „Fertrow den [sani] dati na getrow sma, di foe na sé foe den de bekwaam nofo foe leri tra sma.” — Lukas 6:45; 2 Timotéus 2:2.

22. (a) Foe san-ede meki Jehovah ben meki wan organisaatsi foe leriman nanga evangeliumprékiman de? (b) Sortoe wroko moe doe ete na ini a ten di e kon?

²² Na ini a ten disi Jehovah Gado abi na alape na grontapoe na organisaatsi foe leriman, evangeliumpréiman nanga bedinari foe na di foe twenti jarhondro di abi a moro boen opleiding. Moro leki 2.600.000 foe den e teki prati na a laatste kotoigi di e gi bifo na kaba foe na ogri seti disi kon. Fa na ipi foe sma disi di e gro dé foe dé den e sreka gi wan moro bigi tjalansi — na leri foe miljardmiljard sma di sa drai kon baka na ini na opobaka. Joe de srekasreka foe teki prati na ini na wondroe grani dati? Na diniwroko foe joe de wan di e meki froktoe now? Meki wi begi dati a leti foe wi mag skijn foe gi Gado grani foe di wi e doe wi wroko leki bedinari di e doro na marki. — Mattéus 5:16; Johannes 5:28, 29.

Punt di wi taki foe den

◻ San de a moro boen fasi foe préki a boen njoensoe?

◻ Tapoe sortoe fundamenti na leri foe wi sidon? San de na boskopoe?

◻ Sortoe égifasi de fanowdoe efoe sma wani arki na wi?

◻ Fa Jezus ben doro na ati foe en arkiman?

◻ Foe sortoe sani wi moe loekoe boen te wi e leri sma?

[Prenki na tapoe bladzijde 11]

Jehovah Kotoigi e préki alape pe sma de foe feni

[Prenki na tapoe bladzijde 13]

Te wi e préki wi moesoe poti prakseri tapoe den sani foe anbegi di e sori sortoe religie a sma abi