Foe san ede wi moesoe gi trawan pardon?

WAN LEISI a djoe sabiman nanga skrifiman Josef Jacobs ben taki foe a gi di sma e gi trawan pardon leki „a moro hei èn a moro moeilek sani di sma e leri ini a tori foe boen gwenti nanga wet”. Ija, foeroe sma e feni den wortoe, „mi e gi joe pardon”, wan toemoesi moeilek sani foe taki.

A gi di sma e gi trawan pardon, gersi moni boen foeroe. Na wan sari-atifasi, wan sma kan gi trawan wan lo moni foe en noso na wan gridifasi a kan hori en gi ensrefi. A fosi fasi na a fasi foe Gado. Wi moesoe kweki gwenti foe lobi foe gi, te disi abi foe doe nanga a gi di wi moesoe gi trawan pardon. Foe san ede? Foe di Gado e gi deki-ati foe doe disi èn foe di na afersi kan kon moro takroe, te wan sma no wani gi trawan pardon èn wani foe teki refensi.

Den wortoe di sma e jere nofotron na: „Mi no e kisi atibron; mi e teki refensi!” Na wan sari, taki ini a ten disi foeroe sma e meki den wortoe disi tiri a libi foe den. Foe eksempre, moro leki seibi jari wan oema ben weigri foe taki nanga a wefi foe en brada, foe di, so leki fa na oema e taki, „a ben doe mi boen foeroe ogri èn noiti mi no ben man foe gi en pardon”. Ma te sma e gebroiki so wan fasi, foe no e taki nanga wan tra sma, leki wan wrokosani foe dwengi a sma, di den e gi a fowtoe, foe a taki dati a e firi sari noso te den e gebroiki dati leki wan wrokosani foe strafoe sma, dan pikinmoro noiti a e satisferi na angri di wan sma abi foe teki refensi. Na presi foe dati, a kan meki a trobi e go nanga langa nomo èn a e gi pasi taki wan boen bigi firi foe bita-ati gro kon. Efoe a sma no e loesoe ensrefi foe ala den firi disi, dan a bigi makti foe a teki di sma wani teki refensi, kan pori matifasi èn srefi a gosontoe foe wan sma.

Na ogri di e kon foe a gi di wan sma no e gi trawan pardon

Te wan sma no e gi trawan pardon, dan a trobi di e kon leki baka pisi foe dati, e meki stress doe kon. Foe en sei, stress kan meki sma kisi serjoesoe siki. Datra William S. Sadler ben skrifi: „No wan sma kan froestan so krin leki fa wan datra kan froestan, a froewondroe bigi nomroe foe siki nanga pina di libisma e pina èn di e kon langalanga foe broko-ede, frede, trobi . . . fasi foe denki di no boen èn a libi di sma e libi na wan fasi di no krin.” Ma troetroe, omeni ogri e kon foe emotioneel broeja? Wan boekoe di e taki foe datratori, e piki: „Nomroe di skrifi na ini boekoe . . . ben sori, taki toe foe a di foe dri pisi foe den sma di siki èn di ben go na wan datra, ben abi siki di ben kon foe stress na froestan sei noso di ben kon moro takroe foe stress ede.”

Ija, bita-atifasi, sari, èn a hori di sma e hori trawan na ati, troetroe de sani di e doe sma ogri. Den firi disi di e betibeti, de neleki froestoe di e pori a skin foe wan wagi safrisafri. A wagi kan sori moi foe dorosei, ma ondro a ferfi a wagi e pori e gowe.

San de moro prenspari srefi, na taki te wi e weigri foe gi trawan pardon, efoe wan fondamenti de foe sori sari-ati, dan a kan doe wi ogri toe na jeje fasi. Ini den ai foe Jehovah Gado, wi ben sa kan tron leki a srafoe ini na agersitori foe Jesus. A srafoe ben kisi pardon foe wan kefarlek bigi paiman di a ben abi na en masra. Tokoe di a kompe srafoe foe en ben begi en foe gi en pardon, foe wan paiman di pikin srefisrefi, te joe ben sa teki dati gersi nanga di foe en, dan a ben de sondro firi èn a no ben wani foe gi pardon. Jesus ben tjari kon na krin taki efoe na a srefi fasi wi no wani foe gi trawan pardon, dan Jehovah sa weigri foe gi wi pardon foe den sondoe foe wi (Mateus 18:21-35). Foe dati ede, efoe wi no e gi trawan pardon, dan wi sa kan lasi wi krin konsensi na fesi foe Gado èn srefi a howpoe di wi abi foe libi foe têgo! (Teki gersi 2 Timoteus 1:3.) San wi kan doe, foe dati ede?

Leri foe gi trawan pardon

Foe gi trawan pardon troetroe, e kon foe na ati. A abi na ini toe foe gi wan sma di doe fowtoe, pardon èn foe no abi wan angri moro foe teki refensi. So boen, a de na ini na anoe foe Jehovah foe tjari geregtighèit kon te foe kaba èn foe a gi strafoe kande. — Romesma 12:19.

Ma wi moesoe taki, dati foe di „na ati de feradelek moro leki iniwan tra sani èn a no e frede no wan sani”, dan na ati no wani foe gi pardon ala ten, srefi te a moesoe (Jeremia 17:9). Jesus srefi ben taki: „Ogri prakseri, a kiri foe sma, soetadoe, hoeroedoe, foefoeroe, falsi kotoigi, blasfemia, e kon foe na ati.” — Mateus 15:19.

Kolokoe taki wi ati kan leri foe doe san joisti. Ma a leri di wi abi fanowdoe moesoe kon foe wan moro hei fonten. Wi no kan doe en wi wawan (Jeremia 10:23). Wan psalm singiman di Gado ben meki skrifi sani, ben erken disi èn a ben begi foe Gado gi en tiri. Ini begi a ben aksi Gado tranga: „Leri mi den reglementi foe joe. Meki mi froestan a pasi foe joe eigi komando.” — Psalm 119:26, 27.

So leki fa wan tra psalm e taki, dan kownoe David foe Israèl foe owroeten, ben kon „froestan a pasi” foe Jehovah. A ben ondrofeni en foe Gado srefi èn a ben teki leri foe dati. Foe dati ede a ben man foe taki: „Jehovah abi sari-atifasi èn boenfasi, a no e atibron esi-esi èn a abi lobi boen-atifasi pasa marki. Leki fa wan papa e sori den manpikin foe en sari-ati, na so Jehovah sori sari-ati na den wan di e frede en.” — Psalm 103:8, 13.

Wi moesoe leri neleki fa David ben leri. Studeri, na ondro begi, a volmaakti eksempre foe a gi di Gado e gi trawan pardon èn di foe en Manpikin toe. So boen, wi kan leri foe gi trawan na wan opregti fasi.

Tokoe wan toe sma sa kan aksi: Fa a de nanga serjoesoe sondoe? Ala sondoe moesoe kisi pardon?

Soekoe foe de ini balansi

Te wan sma doe wan trawan wan serjoesoe ogri, dan a pen kan hebi srefisrefi. Disi de spesroetoe so, efoe a sma na wan sma di den ben doe wan serjoesoe sondoe teige en sondro foe a ben fowtoe. Wan toe sma sa aksi srefi: ’Fa mi kan gi wan trawan pardon di ben tori mi na wan takroe fasi èn ben doe mi ogri?’ Ini a kefal foe wan serjoesoe sondoe di ben sa warti foe den sluit a sma uit, a sma di trawan doe en wan bigi ogri, moesoe gebroiki kande a rai ini Mateus 18:15-17.

Awansi fa a no fa, foeroe e anga foe a sma di doe na ogri. Marki ben de foe opregti berow, sensi di na ogri doe? A sondari kenki, kande foe di a ben proeberi srefi foe meki en boen baka troetroe? Ini den ai foe Jehovah, a sortoe berow dati na a sroto foe kisi pardon, srefi te wan sma doe troetroe ogri sondoe. Foe eksempre, Jehovah ben gi Manase pardon, di ben de wan foe den moro ogri kownoe ini a historia foe Israèl. Tapoe a gron foe sortoe sani? Gado ben doe disi, foe di te foe kaba Manase ben saka ensrefi èn ben abi berow foe den ogri pasi foe en. — 2 Kroniki 33:12, 13.

Ini bijbel, troetroe berow abi foe doe nanga wan opregti kenki ini a fasi fa wan sma e handri, wan sari di e kon foe na ati foe iniwan fowtoe di a doe. Pe a fiti èn pe a man, berow e go makandra nanga wan moeiti di wan sma e doe foe pai a sma baka, di a doe wan sondoe teige en (Lukas 19:7-10; 2 Korentesma 7:11). Pe so wan berow no de, Jehovah no e gi pardon.a Boiti dati, Gado no e froewakti foe kresten foe den gi denwan pardon di wan ten kaba ben kisi froelekti na jeje fasi, ma di now foe espresi èn sondro foe abi berow, e tan doe ogri (Hebrewsma 10:26-31). Ini toemoesi aparti kefal, a no e fiti srefisrefi kande foe gi wan trawan pardon. — Psalm 139:21, 22; Esekièl 18:30-32.

Efoe wan sma man kisi pardon efoe no, a sma di trawan doe serjoesoe sondoe teige en, wani foe loekoe wan tra aksi kande: Mi moesoe tan ini bigi emotioneel broeja, te leki na afersi loesoe krinkrin, ala di mi e firi hebi pen èn abi atibron? Prakseri foe wan eksempre. Kownoe David ben firi hebi pen di Joab, a legre-edeman foe en, ben kiri Abner nanga Amasa, „toe man di ben de regtfardiki èn boen moro [Joab]” (1 Kownoe 2:32). Nanga wortoe èn sondro foe tweifri David ben sori en bigi atibron na Jehovah na ini begi. Ma baka wan pisi ten, a faja di den firi foe David ben faja, so leki fa a ben sori, ben kon moro mendri. Te na a lasti dei foe en libi, a no ben meki bigi atibron tiri en. David ben go doro srefi foe wroko nanga Joab, ma a no ben gi a kiriman disi di no ben abi berow, pardon nomo. David ben sorgoe taki te foe kaba, a ben hori anoe na geregtighèit. — 2 Samuèl 3:28-39; 1 Kownoe 2:5, 6.

A kan teki pikinso ten nanga moeiti, fosi den sma di den serjoesoe sondoe foe trawan doe den ogri, man foe wini na atibron di den abi ini a bigin. A pisi ten foe kon boen baka kan de moro makriki te a sma di doe na ogri, e erken taki a ben fowtoe èn taki a abi berow. Ma wan sma di trawan doe wan sondoe teige en, moesoe man foe feni trowstoe nanga korostoe, foe a sabi di a sabi a geregtighèit foe Jehovah nanga a koni foe en èn ini a kresten gemeente, awansi fa a sma di doe a fowtoe e tjari ensrefi.

Loekoe toe, taki te joe e gi wan sondari pardon, dan disi no wani taki, dati joe e tapoe joe ai gi a sondoe. A gi di wan kresten e gi wan trawan pardon wani taki, dati a moesoe libi na afersi gi Jehovah, foe di a e froetrow na en tapoe. En na a reti Kroetoeman foe a heri universum, èn a sa doe geregtighèit na a joisti ten. Dati sa wani taki toe dati a sa kroetoe feradelek „soetaman nanga hoeroeman”. — Hebrewsma 13:4.

Den wini di wi e kisi te wi e gi trawan pardon

A psalm singiman David ben singi: „Bika joe, o Jehovah, boen èn joe de klariklari foe gi pardon; èn a lobi boen-atifasi gi ala den sma di e kari joe de pasa marki” (Psalm 86:5). Joe de „klariklari foe gi trawan pardon”, neleki Jehovah? Foeroe wini de.

Ini a fosi presi, te wi e gi trawan pardon, dan dati e meki boen matifasi kon. Bijbel e gi kresten tranga: „Kon kisi switifasi gi makandra, lobi safoefasi, e gi makandra pardon pasa marki, neleki fa Gado e gi oenoe pardon toe pasa marki nanga jepi foe Krestes.” — Efeisesma 4:32.

Ini a di foe toe presi, a e tjari vrede kon te wi e gi trawan pardon. Disi a no a vrede nomo nanga kompe libisma, ma a de a vrede toe na inisei foe wan sma. — Romesma 14:19; Kolosesma 3:13-15.

Ini a di foe dri presi, te wi e gi trawan pardon, dan dati e jepi wi foe memre taki wisrefi moesoe kisi pardon. Ija, „ala sma sondoe èn den no e doro a glori foe Gado”. — Romesma 3:23.

Te foe kaba, te wi e gi trawan pardon, dan dati e opo a pasi foe Gado gi wi pardon foe den sondoe foe wi. Jesus ben taki: „Efoe oenoe e gi pardon na den fowtoe foe libisma, dan oen hemel Tata sa gi oenoe pardon toe.” — Mateus 6:14.

Prakseri foe den foeroe sani di ben moesoe foe hori a prakseri foe Jesus tapoe a bakadina foe en dede. A ben broko en ede nanga den disipel foe en, a preikiwroko, èn spesroetoe en soifri retifasi na Jehovah. Tokoe foe san a ben taki, srefi di a ben njan hebi pina na a pina-oedoe? Wan toe foe den lasti wortoe di a ben taki ben de: „Tata, gi den pardon” (Lukas 23:34). Wi kan waka baka a volmaakti eksempre foe Jesus, foe di wi e gi makandra pardon na wan opregtifasi.

[Foetoewortoe]

[Prenki na tapoe bladzijde 5]

Joe ben froestan san na agersitori foe Jesus ben wani taki, ini a tori foe a srafoe di no ben wani gi trawan pardon?

[Prenki na tapoe bladzijde 7]

Foe gi trawan pardon e meki boen matifasi kon èn a e tjari kolokoe kon