„Leri wi fa fu begi”

„Wan fu en disipri ben taygi en: ’Masra, leri wi fa fu begi.’” — LUKAS 11:1.

1-3. (a) Fu san-ede Yeyses disipri ben aksi en fu kisi leri fa fu begi? (b) Sortu aksi di e go fu begi e kon a fesi?

SON sma kisi wan moy sten fu singi. Trawan abi wan natuurlijk talenti fu prey poku. Ma fu doro a moro hey marki fu san den man, dan den singiman nanga pokuman disi srefi abi leri fanowdu. A de a srefi nanga begi. Den disipri fu Yeyses Krestes ben kon frustan taki den abi leri fanowdu, efu den ben wani fu Gado yere na begi fu den.

² Yeyses ben gwenti fu go ini begi na en Tata en wawan, so leki a ben du dati wan heri neti bifo a ben piki den twarfu apostru puru (Lukas 6:12-16). Ala di a ben taki tranga nanga en disipri fu den begi den srefi, toku den ben yere a e begi na publiki èn den ben si taki a no ben de leki den kerki hoygriman di ben begi so taki sma ben kan si den (Mateyus 6:5, 6). A ben de fu dati-ede wan logisch sani taki Yeyses bakaman ben wani kisi moro leri fa fu begi. Na so wi e leysi: „Wan dey now a ben de na wan seyker presi e begi, èn di a ben kba, dan wan fu en disipri ben taygi en: ’Masra, leri wi fa fu begi, so leki Yohanes [na Dopuman] ben leri en disipri tu.’” — Lukas 11:1.

³ Fa Yeyses ben du tapu disi? San wi kan leri fu na eksenpre fu en? Èn fa wi kan nyanbun fu a leri fu en di e go fu begi?

Leri gi wi

4. Fu san-ede wi musu begi ’sondro fu tapu’ èn san a wani taki fu du dati?

⁴ Wi kan leri furu fu Yeyses wortu èn eksenpre leki wan man fu begi. Wán leri de taki efu Gado volmaakti Manpikin ben feni en fanowdu fu begi ala ten, dan wan moro bigi fanowdu de gi en onvolmaakti disipri fu luku go na Gado doronomo fu kisi tiri, trowstu nanga yeye yepi. Fu dati-ede wi musu ’begi sondro fu tapu’ (1 Tesalonika sma 5:17). A no de fu taki, taki disi no wani taki taki wi musu de ala ten letterlijk na tapu wi kindi. A wani taki moro furu taki wi musu abi ala ten wan yeye fasi fu begi. Ini ala pisi fu a libi wi musu luku go na Gado fu kisi tiri so taki wi kan handri nanga inzicht èn ala ten kan abi a bun-ati fu en. — Odo 15:24.

5. San kan abi krakti tapu na ten di wi ben sa musu gi ini begi, èn san wi musu du na dati?

⁵ Ini den „lasti dey” disi furu sani de di e teki a ten di wi ben sa musu kobroyki ini begi (2 Timoteyus 3:1). Ma efu sorgu fu oso, bisnis problema nanga ala den sortu sani dati e tapu wi fu begi wi heymel Tata ala ten, dan wi e meki den sorgu fu na libi disi pers wi tumusi go na ondro. So wan situwâsi sondro draydray musu poti kon leti, bika fu no poti ten a wan sey fu begi e tyari a lasi fu bribi kon. Wi musu meki òfu wi grontapu fruplekti kon moro mendri, òfu tyari den sorgu fu na libi kon ini balansi nanga na dray di wi musu dray wi ati moro seryusu èn ala ten baka go na Gado fu kisi tiri. Wi musu ’de na ay ini na tori fu begi’. — 1 Petrus 4:7.

6. Sortu begi wi sa stuka now, èn nanga sortu prakseri?

⁶ Ini san den e kari na Modelbegi, Yeyses ben leri en disipri fa fu begi, no soyfri san den musu taki. Na tori fu Lukas e kenki pikinso fu di fu Mateyus fu di difrenti okasi ben de ini a tori. Wi sa stuka leki Yeyses bakaman èn leki kotoygi fu Yehovah na begi disi leki wan eksenpre fu fa a musu de nanga den begi fu wi.

Wi Tata nanga en nen

7. Suma abi na grani fu kari Yehovah „wi Tata”?

⁷ „Wi Tata na ini heymel” (Mateyus 6:9; Lukas 11:2). Fu di Yehovah de a Mekiman fu na libismafamiri èn e libi na ini heymel, meki a de yoysti fu taki nanga en leki „wi Tata na ini heymel” (1 Kownu 8:49; Tori fu den Apostru 17:24, 28). Te wi kobroyki na wortu „wi”, dan wi e erken taki trawan tu abi wan krosibey matifasi nanga Gado. Ma suma abi den grani di no skotu fu taki nanga en leki den Tata? Soso sma na ini en osofamiri fu anbegiman di gi den srefi abra èn teki dopu. Fu kari Yehovah „wi Tata” e meki wi si taki wi abi bribi ini Gado èn e frustan taki na wán enkri fondamenti fu kon de ini vrede nanga en de fu teki krinkrin na frulusu ofrandi fu Yeyses. — Hebrew sma 4:14-16; 11:6.

8. Fu san-ede wi musu angri fu gi ten na ini begi na Yehovah?

⁸ O krosibey wi musu firi wi srefi nanga wi heymel Tata! Leki pikin di no e weri noyti fu go na den tata, wi musu angri fu psa ten na ini begi nanga Gado. Dipi grantangi gi den blesi na yeye nanga skin fasi musu pusu wi fu taki en tangi fu en bunfasi. Wi musu firi fu tyari den lay go na en di e druk wi, na ini a frutrow taki a sa horibaka gi wi (Psalm 55:22). Wi kan de seyker fu en taki efu wi de kotrow, ala sani te fu kba sa kon bun fu di a e broko-ede nanga wi. — 1 Petrus 5:6, 7.

9. Fu san wi e aksi efu wi e begi fu na nen fu Gado kon santa?

⁹ „Yu nen musu de santa” (Mateyus 6:9; Lukas 11:2). Na wortu „nen” e sori sontron tapu na sma srefi, èn „santa” wani taki „meki kon santa, poti aparti ofu si leki santa”. (Teki gersi Openbaring 3:4.) Wan begi fu santa Gado nen de taki wi e aksi fu Yehovah opo du wan sani fu santa en srefi. Fa? Fu puru ala syen di oyti wan ten ben poti na tapu en nen (Psalm 135:13). Fu du dati dan Gado sa puru ogri, meki en srefi bigi èn meki den nâsi kon sabi taki en na Yehovah (Eseykiyel 36:23; 38:23). Efu wi e angri srefisrefi fu si na dey dati èn e warderi trutru Yehovah mayesteyti, dan ala ten wi sa go na en na ini na respeki yeyefasi di e kon a fesi na ini den wortu „yu nen musu de santa”.

Gado kownukondre nanga en wani

10. San a wani taki te wi e begi fu a kownukondre fu Gado musu kon?

¹⁰ „Yu kownukondre musu kon” (Mateyus 6:10; Lukas 11:2). Na Kownukondre dya wani taki na soeverein tirimakti fu Yehovah, so leki disi e kon na doro nanga yepi fu na heymel Mesiyas tiri ini anu fu Yeyses Krestes èn den „santawan” di de nanga en (Daniyel 7:13, 14, 18, 27; Yesaya 9:6, 7; 11:1-5). San a wani taki efu wan sma e begi efu a mag ’kon’? Disi wani taki taki wi e aksi efu Gado kownukondre mag kon teyge ala grontapu gensman fu na tirimakti fu Gado. Baka te na Kownukondre ’sa masi ala kownukondre èn tyari den kon a wan kba’, dan a sa kenki na grontapu kon na ini wan paradèys na a heri grontapu. — Daniyel 2:44; Lukas 23:43.

11. San wi sa du efu wi e angri taki Yehovah wani musu du na ini a heri universum?

¹¹ „Yu wani musu psa, so leki na ini heymel so tu na grontapu” (Mateyus 6:10). Disi na wan aksi di wi e aksi taki Gado musu du a prakseri fu en, di a abi nanga a grontapu, èn so srefi fu puru den feyanti fu en (Psalm 83:9-18; 135:6-10). Te yu luku en bun, a e sori taki wi e angri taki na wani fu Gado du na a heri universum. Efu disi e libi na ini wi ati, dan ala ten wi sa du Yehovah wani so bun leki wi kan. Wi no ben sa kan begi so wan begi ini opregtifasi efu wi no e feti seryusu a baka fu du a wani fu Gado wi srefi. Efu wi e begi fu dati-ede na a fasi disi, dan nanga reti wi musu sorgu fu no du sani di de kontrari a wani dati, so leki fu skèyn wan sma di no de ini bribi ofu fu teki den pasi fu na grontapu abra (1 Korente sma 7:39; 1 Yohanes 2:15-17). Na presi fu dati, wi musu abi ala ten na ini prakseri: ’San de na wani fu Yehovah ini na afersi disi?’ Iya, efu wi lobi Gado nanga wi heri ati, dan na ini ala afersi fu wi libi wi sa suku a tiri fu en. — Mateyus 22:37.

Wi aladey brede

12. Sortu bun krakti a abi tapu wi efu wi e aksi soso nomo fu wi ’aladey brede’?

¹² „Gi wi tide wi brede fu tide” (Mateyus 6:11). A tori fu Lukas e taki: „Gi wi wi brede fu na dey leki fa a dey e aksi dati” (Lukas 11:3). Fu aksi Gado fu sorgu gi fanowdu nnyan „fu tide”, e meki bribi na ini a makti fu en fu sorgu dey fu dey gi wi fanowdu kon moro bigi. Den Israèl sma ’ibriwan ben musu tyari dey fu dey na mana di den ben abi fanowdu’ kon makandra, no fu wan wiki ofu moro langa (Exodus 16:4). Disi a no wan begi fu kisi switi sani nanga bogobogo nnyan psa marki ma fu wi aladey fanowdu leki fa disi e sori en srefi. Fu aksi soso fu wi aladey brede, sa yepi wi tu fu no de nanga bigi-ay. — 1 Korente sma 6:9, 10.

13. (a) San a wani taki na wan moro bradi fasi efu wi e aksi fu wi aladey brede? (b) Fa wi yeyefasi musu de srefi efu wi e wroko tranga èn toku ete nanga muyti e psa a libi?

¹³ Fu luku en na wan moro bradi fasi, te wi e aksi fu wi aladey brede dan dati e sori taki wi no e feni taki wi de srefidensi ma taki wi e luku ala ten go na Gado fu kisi nnyan, dringi, krosi nanga tra fanowdu sani. Leki memre fu en osofamiri fu anbegiman di gi den srefi abra, wi e poti frutrow na wi Tata, ma wi no e sdon nomo e wakti te leki en sorgu gi den fanowdu sani fu wi na wan wondru fasi. Wi e wroko èn e kobroyki ala sani di wi abi ini wi makti fu kisi nnyan nanga tra fanowdu sani. Toku ete nanga leti wi e taki Gado tangi na ini begi fu di wi e si na baka den sani disi na lobi, koni èn makti fu wi heymel Tata (Tori fu den Apostru 14:15-17; teki gersi Lukas 22:19). Na faya di wi abi fu wroko kan abi leki bakapisi taki wi e kon abi en bun. Ma srefi efu wi e wroko tranga èn kande nanga muyti abi nofo, dan meki wi de grantangi èn tevrede (Filipi sma 4:12; 1 Timoteyus 6:6-8). Te yu luku en bun, dan wan sma di gi en srefi na ini a dini fu Gado kan de moro koloku nanga kowôn nnyan nanga eenvoudig krosi leki son sma di gudu. Meki wi no firi broko saka awinsi wi no abi furu fu omstandigheden ede di no de na ini wi makti. Toku ete wi kan de gudu na yeye fasi. Wi no abi fu de pôtiman na ini bribi, howpu nanga lobi gi Yehovah, a Sma di na prèyse nanga tangi fu wi e go na en ini opregti begi.

Gi wi pardon fu wi payman

14. Fu sortu payman wi e aksi fu kisi pardon, èn san Gado e kobroyki fu dati?

¹⁴ „Èn gi wi pardon fu wi payman, so leki wi tu e gi pardon na den sma di de ini payman na wi” (Mateyus 6:12). A tori fu Lukas e meki wi si taki den payman dati na sondu (Lukas 11:4). Sondufasi di wi kisi e tapu wi fu du ala sani akruderi na volmaakti wani fu wi Tata. Na wan seyker marki dan den swakifasi disi de fu dati-ede den payman fu wi, ofu fruplekti fu wi na Gado, fu di wi ben bigin ’fu libi èn fu waka nanga yepi fu yeye’ (Galasiya sma 5:16-25; teki gersi Rome sma 7:21-25). Wi abi den payman disi fu di wi de onvolmaakti èn no kan doro now na wan volmaaktifasi den markitiki fu Gado. A de a grani fu wi fu begi fu kisi pardon fu den sondu disi. Koloku taki Gado kan kobroyki na waarde fu Yeyses frulusu-ofrandi gi den payman disi ofu sondu. — Rome sma 5:8; 6:23.

15. Sortu yeyefasi wi musu abi gi fanowdu tranga leri?

¹⁵ Efu wi e fruwakti taki Gado e gi wi pardon fu wi payman ofu sondu, dan wi musu abi berow èn de klariklari fu teki tranga leri (Odo 28:13; Tori fu den Apostru 3:19). Fu di Yehovah lobi wi meki a e gi wi na tranga leri di wi srefi abi fanowdu so taki wi kan poti den swakifasi fu wi kon reti (Odo 6:23; Hebrew sma 12:4-6). A no de fu taki, taki wi kan de koloku, efu te wi e gro na ini bribi nanga sabi wi ati e tyari kon so bun leki a kan ini akruderi nanga den wèti nanga gronprakseri fu Gado, so taki wi noyti e sondu nanga wan seyker marki fu espresifasi. Ma efu wi e si wan pikinso espresifasi na ini a ogri di wi du? Dan a musu hati wi srefisrefi èn wi musu begi seryusu fu kisi pardon (Hebrew sma 10:26-31). Te wi e poti a ray di wi kisi na ini wi libi, dan wi musu poti a libifasi fu wi kon reti esi-esi.

16. Fu san-ede a de bun gi wi taki wi e tan aksi Gado fu gi wi pardon fu wi sondu?

¹⁶ Fu aksi Gado ala ten fu pardon wi sondu, de wan bun sani gi wi. Nanga disi wi e hori na sondufasi fu wi ala ten na wi fesi èn disi musu meki wi de nanga sakafasi (Psalm 51:3, 4, 7). Wi abi en fanowdu taki wi heymel Tata „e gi wi pardon fu wi sondu èn e krin wi fu ala onregtfardikifasi” (1 Yohanes 1:8, 9). Boyti fu dati, te wi e taki fu wi sondu na ini begi dan dati e yepi wi fu tan feti nanga sondu nanga ala wi makti. Na so disi e memre wi ala ten tu na a fanowdu di wi abi fu na frulusu-payman èn na waarde fu Yeyses brudu di lon. — 1 Yohanes 2:1, 2; Openbaring 7:9, 14.

17. Fa te wi e begi fu kisi pardon, dati e yepi wi na ini wi matifasi nanga trawan?

¹⁷ Begi fu kisi pardon e yepi wi tu fu de nanga sari-ati, fu firi sari èn fu de klari fu gi sani na den sma di kande de ini ala sortu bigi nanga pikin afersi ini payman na wi. A tori fu Lukas e taki: „Gi wi pardon fu wi sondu, bika wi tu e gi ibriwan sma pardon di de ini payman na wi” (Lukas 11:4). Te yu luku en bun, wi kan kisi pardon soso fu Gado efu wi gi „pardon kba na den sma di de ini payman na wi [sma di sondu na wi]” (Mateyus 6:12; Markus 11:25). Yeyses ben taki moro fara: „Bika efu yu e pardon den sma den sondu fu den, dan yu heymel Tata sa gi yu pardon tu fu den sondu fu yu” (Mateyus 6:14, 15). Te wi e begi fu kisi pardon fu wi sondu dan disi musu buweygi wi fu frudrage trawan èn fu gi den pardon. Na apostru Paulus ben skrifi: „So leki Yehovah ben gi yu pardon na wan fri fasi, du so srefi.” — Kolose sma 3:13; Efese sma 4:32.

Tesi èn na ogriwan

18. Fu san-ede noyti wi musu gi Gado na fowtu fu den tesi nanga kori fu wi?

¹⁸ „Èn no tyari wi go na ini tesi” (Mateyus 6:13; Lukas 11:4). Den wortu disi no wani taki taki Yehovah e tyari wi go na ini tesi fu du sondu. Na beybri e taki sontron taki Gado e du sani ofu e meki sani psa di a e gi pasi nomo fu dati (Rut 1:20, 21; teki gersi Preykiman 11:5). Ma „ogri sani no kan tesi Gado, èn so tu a no e tesi wan sma tu”, na disipri Yakobus ben skrifi (Yakobus 1:13). Meki fu dati-ede noyti wi gi wi heymel Tata a fowtu taki a e tesi èn kori sma nanga ogri sani, bika Satan na a Tesiman di e pruberi fu dray wi, so taki wi sondu na Gado. — Mateyus 4:3; 1 Tesalonika sma 3:5.

19. Fa wi ben sa kan begi ini a tori fu tesi?

¹⁹ Nanga na aksi „fu no tyari wi go na ini tesi”, wi e aksi te yu luku en bun fu Yehovah no gi pasi taki wi broko saka te tesi e miti wi ofu te wi e kon na ondro druk fu trangayesi en. Wi kan begi wi Tata tranga fu poti wi futu so, taki no wan tesi kon na wi pasi tapu, di de tumusi hebi gi wi. Na ini disi Paulus ben skrifi: „No wan tesi ben kon na unu tapu boyti san de gi ala sma. Ma Gado de kotrow, èn a no sa gi pasi taki yu kisi tesi psa san yu kan tyari, ma nanga a tesi a sa sorgu tu gi na pasi fu komoto, so taki yu kan frudrage en” (1 Korente sma 10:13). Wi kan begi taki Yehovah tyari wi so, taki wi no e kisi tesi psa san wi kan tyari, èn taki a e gi wan pasi fu komoto te wi de tumusi ondro druk. Tesi e kon fu Ddibri, wi eygi sondu skin èn den swakifasi fu trawan, ma wi lobi Tata kan tyari wi, so taki den no e wini wi.

20. Fu san-ede wi e begi fu kon fri fu „na ogriwan”?

²⁰ „Ma puru wi fu na ogriwan” (Mateyus 6:13). Gado seyker kan stóp Satan, „na ogriwan”, fu wini wi (2 Petrus 2:9). Èn noyti wan moro tranga fanowdu ben de fu kon fri fu Ddibri leki now, bika ’a abi bigi ati-bron, fu di a sabi taki a ten fu en syatu’ (Openbaring 12:12). Wi no de sondro sabi fu den bedoeling fu Satan, ma a no de so tu taki a no sabi den swakifasi fu wi. Fu dati-ede meki wi musu begi taki Yehovah puru wi fu den anu fu na gensman fu wi di yu kan teki gersi nanga wan lew (2 Korente sma 2:11; 1 Petrus 5:8, 9; teki gersi Psalm 141:8, 9). Efu na belangstelling fu wi fu eksenpre de fu trow, dan kande wi musu aksi Yehovah fu fri wi fu den triki fu Satan èn fu na tesi fu kweki grontapu matifasi di kan tyari wi go na ini hurudu ofu trangayesi Gado fu di wi go trow nanga wan sma di no de ini bribi (Deuteronomium 7:3, 4; 1 Korente sma 7:39). Wi e angri fu kon gudu? Dan begi kan de fanowdu fu yepi wi fu kakafutu gi den tesi fu dobbel ofu bidrigifasi. Fu di Satan de nomonomo fu broko na matifasi fu wi nanga Yehovah meki a sa kobroyki ibri fetisani fu en maksin fu tesi. Meki wi tan fu dati-ede ala ten fu begi wi heymel Tata, di noyti sa libi den regtfardikiwan te den kisi tesi èn di e sorgu fu wi kon fri fu na ogriwan.

Begi e bow bribi nanga howpu

21. Fa wi nyanbun fu en taki wi e begi fu a Kownukondre?

²¹ Wi heymel Tata, di e fri wi fu na ogriwan, e prisiri fu blesi wi psa marki. Fu san-ede a meki en lobi pipri begi so langa kba „Yu kownukondre musu kon”? We, a begi disi fu wi fu someni yari meki wi lostu èn warderi gi na Kownukondre gro. So wan begi e memre wi na a bigi fanowdu fu na nyun heymel tiri disi. A e hori na wi fesi tu na howpu fu libi na ondro na Kownukondre tirimakti. — Openbaring 21:1-5.

22. Sortu yeyefasi wi musu tan abi ini a tori fu begi wi heymel Tata, Yehovah?

²² A de so sondro fu degedege taki begi e bow bribi na ini Yehovah. Na banti fu wi nanga en e kon tranga te a e yere wi begi. Meki wi no weri noyti fu dati-ede fu go ala dey na en nanga prèyse, taki tangi èn tranga begi. Èn meki wi de grantangi gi na yepi fu Yeyses tapu na aksi fu en disipri: „Masra, leri wi fa fu begi.”

Yu kan memre disi ete?

◻ Sortu leri wi kan kisi fu Yeyses wortu nanga eksenpre leki wan man fu begi?

◻ Fu san wi musu begi ini a tori fu wi heymel Tata nanga en nen?

◻ Fu san wi e aksi te wi e begi efu Gado kownukondre mag kon èn taki en wani musu psa na grontapu?

◻ Fu san wi e begi te wi e begi fu wi aladey brede?

◻ San a wani taki te wi e begi fu kisi pardon fu wi payman?

◻ Fu san-ede a de so prenspari fu begi ini a tori fu tesi, fu kon fri fu Satan, na ogriwan?

[Prenki na tapoe bladzijde 29]

Yeyses bakaman ben aksi en fu leri den fa fu begi. Yu sabi fa yu kan nyanbun fu a leri fu en di e go fu begi?