Joe e bribi na ini reïncarnatie?

„JOE e memre a birmeisje di joe ben lobi, di joe ben e gro kon bigi djaso na India?”, Mukundbhai ben skrifi gi en manpikin, wan universiteit studenti na Amerkankondre. „Baka wan toe wiki a o trow. Mi ben denki taki joe ben moesoe sabi dati.”

Foe san ede a papa ben froeteri en manpikin a njoensoe disi? Foeroe jari pasa, nanga tranga Mukundbhai ben tjari wan kaba kon na a lobi matifasi foe den toe tini disi. Boiti dati, a manpikin ben de siksi jari kaba na Amerkankondre foe kisi moro hei skoro. Na ini a ten dati a no ben miti nanga a meisje, èn Mukundbhai ben sabi dati.

Ma foe san ede a ben broko en ede dan? A ben broko en ede bika Mukundbhai ben bribi na ini reïncarnatie, noso a gebore di wan sma e gebore agen.a Efoe a ben de so, taki a lobi matifasi foe den toe pikin disi ben de foe di den ben de trowpatna kaba na ini den fosi libi, dan a ben sa de wan ogri sani foe hori den aparti now di den doro a jari taki den mag trow. Mukundbhai ben wani nomo foe meki en manpikin sabi foe a trow di ben o de, bifo a meisje ben sa tron a wefi foe wan tra sma na ini a libi disi.

Loekoe wan tra kefal. Wan meisje di ben abi fo jari ben didon difrenti leisi nanga pen na ini wan ati-oso na Mumbai, India. En problema ben de taki a ben abi wan klep di no ben wroko boen na ini en ati. A goedoe papa nanga mama foe en no ben man si fa a pikin e pina. Ma den ben prakseri: „Wi moesoe teki en leki fa a de. A moesoe de so, taki a ben doe wan sani na ini a fosi libi foe en, meki a e froedini disi.”

A bribi na ini reïncarnatie e plèi wan prenspari ròl na ini a libi foe miljoenmiljoen sma na ini a Hindoe bribi, a Boeda bribi, a Jainisme bribi, a bribi foe den Sikh, nanga tra relisi di bigin na India. Sma e si den ondrofeni na ini a libi — foe a lobi di wan sma kon lobi wan trawan, te go miti a njan di wan sma e njan pina serjoesoe — leki bakapisi foe sani di sma ben doe na ini wan fosi libi noso na ini den fosi libi foe en.

Foeroe sma na ini den Westsei kondre abi belangstelling gi a leri foe reïncarnatie. Shirley MacLaine, wan Amerkan oema di e plèi kino, e taki dati a e bribi na ini reïncarnatie. A skrifiman, Laurel Phelan, foe Vancouver, British Columbia na Kanada, e froeklari taki a e memre sani foe 50 fosi libi di a ben abi. Na ini wan ondrosoekoe di ben doe gi CNN/USA Today na ini 1994 foe si fa sma e prakseri moro leki 270 foe den 1016 bigisma ben taki dati den e bribi na ini reïncarnatie. A bribi na ini reïncarnatie na so srefi wan pisi foe a New Age-beweging. Ma sortoe boeweisi e horibaka gi a bribi disi?

„Den sani di wi e memre foe wan fosi libi!”, na so den sma di e bribi na ini reïncarnatie e taki. Foe dati ede, di Ratana di ben abi dri jari, na Bangkok, ben bigin „memre sani foe wan libi di a ben abi bifo leki wan kerki oema di ben dede di a ben owroe moro leki 60 jari”, dan foeroe foe den sma di ben loekoe a tori ben erken a kefal foe en leki wan troetroe boeweisi gi reïncarnatie.

Ma tokoe foeroe sma e tweifri. Èn a kan so srefi taki tra froeklari de gi den sani di sma e memre foe den fosi libi.b Na ini en boekoe Hinduism: Its Meaning for the Liberation of the Spirit, a Hindoe filosoof, Nikhilananda, e taki dati ’den ondrofeni di sma ben abi na baka dede, no man boeweisi nanga a froestan’. Tokoe a e froeklari taki „a leri di abi foe doe nanga a gebore di wan sma e gebore agen, na wan sani di kan, moro leki wan sani di no kan”.

Ma bijbel e horibaka gi a leri disi? Èn sortoe howpoe gi den dedewan a Wortoe foe Gado di skrifi nanga en santa jeje, e gi?

[Foetoewortoe]

[Prenki na tapoe bladzijde 4]

A e kisi strafoe bika foe den sondoe di a ben doe na ini wan fosi libi?

Joe moesoe bribi na ini reïncarnatie?

A GRIKI filosoofman Plato ben taki dati a lobi di wan sma e kon lobi wan trawan, abi foe doe nanga na idea foe reïncarnatie. A ben bribi taki baka te a skin dede, dan a sili di no man dede, e froisi go na a „kontren foe soso materia skin pe a kan go na ini”. Sondro wan materia skin, a e tan drape gi wan pisi ten, ala di a e prakseri dipi foe den materia skin pe a kan go na ini. Te baka ten a sili go na ini wan tra skin, dan a sili e memre frafra èn e angri foe go na a kontren foe materia skin pe a kan go na ini. Soleki fa Plato e taki, sma e kon lobi wan trawan, bika den e si a sma di den lobi leki a joisti sortoe moi materia skin di den e memre frafra èn e soekoe.

Kon sabi a bigin èn a fondamenti foe reïncarnatie

Foe man leri sma a reïncarnatie dan a sili no moesoe man dede. Foe dati ede, wi moesoe go baka foe soekoe a bigin foe reïncarnatie na den pipel noso nâsi di ben bribi na ini wan sili di no man dede. Tapoe a gron foe a gronprakseri disi, son sma e denki taki a ben bigin na Egipti foe owroeten. Tra sma e bribi taki a ben bigin na Babilon foe owroeten. Foe meki a relisi foe Babilon kisi nen, den priester foe Babilon ben kon nanga a leri taki a sili e froisi go na wan tra presi. Na so wan fasi den ben kan froeklari taki den relisi barinen man foe den ben de reïncarnatie foe den prenspari fositen tata foe den, ala di den dede langa ten kaba.

Ma a ben de na India, taki a bribi na ini reïncarnatie ben gro srefisrefi. Den Hindoe koniman ben feti nanga den problema di de na heri grontapoe, foe ogridoe èn foe a pina foe libisma. ’Fa den sani disi kan de akroederi a prakseri taki a Kriaman de regtfardiki?’, den ben aksi. Den ben proeberi foe loesoe a streipenti di de na mindri a de di Gado de regtfardiki èn den rampoe na ini grontapoe di sma no man si na fesi èn a de di sma no de a srefi na grontapoe. Baka wan pisi ten den ben meki „a wet foe karma”, a wet foe oorzaak nanga gevolg — ’san wan man e sai, na dati a sa koti’. Den ben meki wan ’balansi nanga finifini bodoi na tapoe’ pe den boen sani èn den takroe sani na ini a libi foe wan sma, e kisi pai noso strafoe na ini a tra libi.

„Karma” wani taki nomo „a fasi fa wan sma e tjari ensrefi”. Wan Hindoe abi wan boen karma te a e libi akroederi den sociaal èn relisi markitiki, èn wan takroe karma te a no e libi akroederi dati. A fasi fa a e tjari ensrefi, noso karma, e bepaal fa en libi sa de na ini ibriwan foe den leisi te a sa gebore baka. „Ala sma gebore nanga wan programa foe eigifasi di bepaal na fesi kaba èn di sreka moro foeroe nanga jepi foe den sani di den ben doe na ini den fosi libi, ala di den eigifasi foe den na skin sei anga foe san den kisi foe den papa nanga mama”, na so a filosoofman Nikhilananda e taki. „[Na so fasi] wan libisma na wan architect foe a fasi fa en eigi libi sa de te foe kaba, en na a sma di e bow en eigi tamara.” Ma a troetroe marki na foe kon fri foe a froisi di a sili e froisi ibritron baka èn foe kon na ini wánfasi nanga Brahman — a moro hei sani di de. Soleki fa den e bribi, den kan doro disi te den e doe moeiti foe tjari densrefi na wan fasi di a libimakandra e feni boen èn te den e doe moeiti foe kon sabi a spesroetoe fasi fa Hindoe e denki.

So boen, a leri foe a reïncarnatie abi en fondamenti na tapoe a leri taki a sili no man dede èn den e gebroiki a wet foe karma foe go moro fara. Meki wi go loekoe san a Wortoe foe Gado, bijbel, di skrifi nanga en santa jeje, abi foe taki foe den idea disi.

A sili no man dede?

Foe piki na aksi disi, meki wi go na a moro prenspari sabiman foe a tori disi — a Wortoe foe a Kriaman, di skrifi nanga en santa jeje. Na ini a fosi boekoe kaba foe bijbel, Genesis, wi e leri san „sili” wani taki krinkrin. Foe a kria di Gado ben kria a fosi libisma, Adam, bijbel e taki: „Jehovah Gado ben go moro fara foe teki doti foe a gron meki libisma èn foe bro a libibro na ini en noso-olo, èn libisma ben tron wan libi sili” (Genesis 2:7). A de krin foe si taki, a sili a no wan sani di wan sma abi, ma san wan sma de. A Hebrew wortoe di ben gebroiki djaso gi sili na neʹphesh. A e kon pikinmoro 700 tron na ini bijbel, èn noiti a abi foe doe nanga wan aparti pisi foe wan libisma, di wi no man fasi, ma ala ten a e taki foe wan sani di wi man fasi èn di de na skinfasi. — Job 6:7; Psalm 35:13; 107:9; 119:28.

San e pasa nanga a sili te wan sma dede? Loekoe san ben pasa nanga Adam di a dede. Di a ben sondoe, Gado ben taigi en: „Joe [sa] drai go baka na a gron, bika na drape [Gado] ben teki joe poeroe. Bika doti joe de èn na doti joe sa drai go baka” (Genesis 3:19). Prakseri san dati wani taki. Bifo Gado ben kria en foe doti, Adam no ben de. Baka di a dede, Adam ben drai go baka na a srefi fasi di a no ben de.

Foe taki en makriki, bijbel e leri wi, taki dede de a kontrari foe libi. Na Preikiman 9:5, 10 wi e leisi: „Den libiwan sabi ete, taki den sa dede; ma foe a sei foe den dedewan, den no sabi notinoti, èn den no abi wan paiman moro, bika sma frigiti srefi foe memre den. Ala san joe anoe feni foe doe, doe dati nanga joe krakti srefi, bika no wan wroko noso prakseri noso sabi noso koni no de na ini Sjeol, a presi pe joe e go.”

Disi wani taki dati den dedewan no man doe noti moro noso no man firi noti moro. Den no abi no wan prakseri moro, èn den no man memre noti moro. A psalm singiman e taki: „No poti oen froetrow tapoe heiheisma, noso tapoe a manpikin foe libisma na grontapoe, di no abi froeloesoe. En jeje e komoto gowe, a e go baka na en gron; na a dei dati den prakseri foe en e lasi gowe.” — Psalm 146:3, 4.

Bijbel e sori krinkrin taki te wan sma dede, a sili no e froisi go na ini wan tra skin, ma a e dede. „A sili di e sondoe, ensrefi sa dede”, bijbel e taki foe poti krakti na tapoe (Esekièl 18:4, 20; Tori foe den Apostel 3:23; Openbaring 16:3). So boen, a leri di e taki dati a sili no man dede — a fondamenti foe a leri foe reïncarnatie — no abi noti di e horibaka gi en na ini den Boekoe foe bijbel. Sondro dati, a reïncarnatie leri e fadon broko. Ma fa a doe kon dan taki a pina di wi e si na grontapoe, de?

Foe san ede sma e njan pina?

A prenspari reide foe san ede libisma e njan pina, na a onvolmaaktifasi di wi alamala kisi foe a sondari Adam. „Nanga wán man, sondoe ben kon na grontapoe èn nanga sondoe dede kon, èn na so dede panja go na ala libisma, foe di den alamala ben sondoe”, bijbel e taki (Romesma 5:12). Foe di wi gebore foe Adam, meki wi alamala e kon siki, e owroe, èn e dede. — Psalm 41:1, 3; Filipisma 2:25-27.

Moro fara, a moreel wet foe a Kriaman, di no man kenki, e taki: „No kori oensrefi: Gado no e meki sma spotoe nanga en. Bika san wan sma e sai, na dati a sa koti toe; bika a sma di e sai nanga en skin na prakseri, sa koti porifasi foe en skin” (Galasiasma 6:7, 8). So boen, wan sma di e libi wan jajo libi, kan kisi pen na emotioneel sei, a kan kisi bere di a no ben wani, èn siki di e panja nanga jepi foe seks. „Smoko de foenamkoe frantiwortoe gi wan nomroe, di e gi foe froewondroe, foe 30 procent foe den kanker di e kiri sma [na Amerkankondre], èn a fasi fa sma e libi, spesroetoe den fasi fa den e njan èn na oefen di den no e oefen den skin nofo, de frantiwortoe gi so srefi 30 procent foe den kanker di e kiri sma”, na so a tijdschrift Scientific American e taki. Wan toe rampoe di e meki sma e njan pina, de wan bakapisi foe a fowtoe fasi fa libisma e tiri den sani di de na grontapoe. — Teki gersi Openbaring 11:18.

Ija, libisma de frantiwortoe foe foeroe foe den pina foe den. Ma foe di a no de so, taki a sili no man dede, meki a wet ’koti san joe e sai’ no man gebroiki foe meki a njan di libisma e njan pina, abi foe doe nanga wan karma — sani di wan sma ben doe na ini wan fosi libi di a e prakseri taki a ben abi. „A sma di dede, fri foe a sondoe foe en”, bijbel e taki (Romesma 6:7, 23). So boen, a froktoe foe sondoe no e tjari go abra na wan libi na baka te wan sma dede.

Satan Didibri so srefi e meki taki foeroe pina de. Foe taki en leti, Satan e tiri a grontapoe disi (1 Johanes 5:19). Èn soleki fa Jesus ben taki na fesi, den disipel foe En ben sa tron ’sani di no wan sma wani si na ai, foe en nen ede’ (Mateus 10:22). Leki wan bakapisi foe dati, den regtfardikisma nofotron e miti moro problema leki den godelowsoe sma.

Na ini a grontapoe disi, sani e pasa foe san wi no sabi wantewante foe san ede den e feni presi. A moro gaw lonman kan stotoe en foetoe èn lasi a wega. Wan tranga legre kan lasi wan feti di a feti nanga moro swaki legre. Wan koni man kande no man kisi wan boen wroko èn foe dati ede a kan pina foe angri. Sma kan abi kefalek boen sabi fa foe tiri wan bisnis, ma a kan taki, foe omstandigheid ede, den no man gebroiki a sabi foe den èn foe dati ede den e pina. Koni sma kan wiki na atibron foe sma di abi makti èn kan taki den sma disi no feni den boen. Foe san ede disi de so? „Bika ten nanga sani di e pasa èn di sma no sabi na fesi, e miti den alamala”, na so a koni Kownoe Salomo e piki. — Preikiman 9:11.

A libisma famiri ben pina langa ten kaba bifo den Hindoe koniman ben proeberi foe froeklari foe san ede pina de. Ma howpoe de gi wan moro betre tamara? Èn sortoe pramisi bijbel abi gi den dedewan?

Wan tamara foe vrede

A Kriaman pramisi taki heri esi a sa tjari wan kaba kon na a disiten grontapoe libimakandra di de na ondro a tiri foe Satan (Odo 2:21, 22; Danièl 2:44). Na a ten dati, wan regtfardiki njoen libisma libimakandra — „wan njoen grontapoe” — sa de wan troetroe sani (2 Petrus 3:13). Na a ten dati, „no wan sma di e libi drape sa taki: ’Mi siki’” (Jesaja 33:24). Srefi a hebi pen di dede e tjari kon, no sa de moro, bika Gado „sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba”. — Openbaring 21:4.

Foe den sma di sa libi na ini a njoen grontapoe di Gado ben pramisi, a psalm singiman ben taki na fesi: „Na den regtfardiki sma sa abi grontapoe, èn den sa libi na tapoe foe têgo” (Psalm 37:29). Boiti dati, den safoe-ati sma „sa feni troetroe switi prisiri na ini vrede pasa marki”. — Psalm 37:11.

Mukundbhai, foe soema wi ben taki na ini a fosi artikel, dede sondro foe sabi den toemoesi moi pramisi foe Gado. Ma miljoenmiljoen sma di dede sondro foe sabi Gado, abi a froewakti foe wiki baka na ini so wan njoen grontapoe foe vrede, bika bijbel e pramisi: „Wan opobaka o de foe den regtfardikiwan nanga den onregtfardikiwan.” — Tori foe den Apostel 24:15; Lukas 23:43.

A wortoe „opobaka” vertaal djaso foe a Griki wortoe a·naʹsta·sis, di wani taki troetroe „na opo di wan sma e opo tanapoe baka”. So boen, opobaka abi foe doe nanga a wroko di a fasi foe libi foe a sma o wroko baka.

A Kriaman foe hemel nanga grontapoe no abi wan kaba na koni (Job 12:13). A no de wan moeilek sani gi en foe memre den fasi foe libi di den dede sma ben abi fosi. (Teki gersi Jesaja 40:26.) Jehovah Gado abi so srefi bogobogo lobi (1 Johanes 4:8). Foe dati ede, a kan gebroiki a volmaakti fasi fa a e memre sani, no foe strafoe den dede sma gi na ogri di den doe, ma foe meki den kon na libi baka na tapoe wan paradijs grontapoe nanga a persoonlijkheid di den ben abi bifo den ben dede.

Gi miljoenmiljoen sma soleki Mukundbhai, wan opobaka sa wani taki dati den sa de baka nanga den lobiwan foe den. Ma prakseri san a kan wani taki gi den wan di e libi nownow. Teki leki eksempre, a manpikin foe Mukundbhai, di kon sabi a toemoesi moi waarheid foe Gado èn den prakseri foe En. A e gi en foeroe trowstoe foe sabi taki en papa no fasi na ini wan cyclus pe sma e gebore baka, di pikinmoro no abi wan kaba, èn di lai nanga godelowsoe fasi nanga pina! A e sribi nomo na ini dede, èn e wakti wan opobaka. A e naki en ati srefisrefi foe prakseri dipi foe na okasi di a sa abi foe froeteri en papa san ensrefi leri foe bijbel!

A de a wani foe Gado taki „ala sortoe sma moesoe kisi froeloesoe èn kon kisi wan soifri sabi foe a waarheid” (1 Timoteus 2:3, 4). Now na a ten foe leri fa joe, makandra nanga miljoenmiljoen tra sma di e doe a wani foe Gado kaba, kan libi foe têgo na tapoe wan paradijs grontapoe. — Johanes 17:3.

[Prenspari pisi na tapoe bladzijde 7]

„Ten nanga sani di e pasa èn di sma no sabi na fesi, e miti den alamala.” — Preikiman 9:11

[Faki na tapoe bladzijde 6]

A persoonlijkheid foe Gado nanga a wet foe karma

„A wet foe karma”, na so Mohandas K. Gandhi ben froeklari, „no man kenki èn sma no man komoto na en ondro. So boen, a no de fanowdoe srefisrefi taki Gado moesoe kon ini a tori. A ben meki a wet foe karma èn a ben hari ensrefi poeroe, foe taki en so.” Gandhi ben feni taki a froeklari disi na wan sani di e gi broko-ede.

Na a tra sei, a pramisi foe na opobaka e sori taki Gado abi foeroe belangstelling gi en kriatoeroe. Foe man tjari wan dede sma kon baka na libi na wan paradijs grontapoe, dan Gado moesoe sabi èn moesoe man memre ibri sani foe a sma dati. Gado e broko en ede troetroe nanga ibriwan foe wi. — 1 Petrus 5:6, 7.

[Prenki na tapoe bladzijde 5]

A Hindoe cyclus foe libi

[Prenki na tapoe bladzijde 8]

A Wortoe foe Gado e leri na opobaka