gi wi ati seikerfasi foe ala sani di wi ati e kroetoe wi, bika Gado bigi moro wi ati èn a sabi ala sani.”

Ma wi no abi foe de na ini bigi nowtoe, foe kan njan boen foe a broko di Gado e broko en ede nanga wi na wan lobi-ati fasi. Jehovah abi belangstelling gi iniwan sani di ben sa kan abi krakti na tapoe wi jejefasi nanga wi emotioneel tanboen. Ija, noiti wi no moesoe denki taki den firi foe wi, den prakseri, nanga broko-ede foe wi pikin toemoesi foe taki foe den na ini begi (Filipisma 4:6). Te joe de nanga wan krosibei mati, dan joe e taki soso foe den bigi sani di e pasa na ini joe libi? Joe no e taki toe foe pikin sani di joe e broko joe ede nanga dati? Na so joe kan firi fri toe foe taki nanga Jehovah foe iniwan sani na ini joe libi, foe di joe sabi taki „a e sorgoe gi oenoe”. — 1 Petrus 5:7

A no de foe taki dati wan matifasi no sa tan langa kande efoe joe e taki soso foe joesrefi. So srefi, den begi foe wi no moesoe poti prakseri na tapoe wi wawan. Wi moesoe taki toe foe a lobi èn a belangstelling di wi abi gi Jehovah èn den afersi foe en (Mateus 6:9, 10). Begi no wawan de wan okasi foe aksi jepi foe Gado, ma so srefi wan okasi foe taki tangi nanga prèise (Psalm 34:1; 95:2). ’Foe teki sabi na ini wi’ nanga jepi foe doronomo persoonlijk studie sa jepi wi na ini disi, foe di a e jepi wi foe kon sabi Jehovah nanga den pasi foe en moro betre (Johanes 17:3). Joe kan feni en wan jepi spesroetoe te joe e leisi a boekoe Psalm èn e si fa tra getrow foetoeboi ben taki nanga Jehovah.

A matifasi foe Jehovah na troetroe wan diri presenti. Meki wi sori taki wi e warderi en foe di wi e meki den begi foe wi kon moro krosibei, opregti, èn persoonlijk. Dan wi sa feni a kolokoe di a psalm singiman ben taki foe en, di ben froeklari: „Kolokoe foe a sma di joe e froekisi èn e meki kon krosibei.” — Psalm 65:4.

Aksi foe leisiman

Wi ben prisiri nanga a studeri di wi ben studeri Jesus agersitori foe den skapoe nanga bokoboko. Te wi e loekoe a njoen fasi foe froestan a tori, soleki fa dati ben kon na ini „A Waktitoren” foe 1 oktober 1995, dan wi kan taki ete dati Jehovah Kotoigi na ini a ten disi e doe wan pratiwroko?

Ija. Wi kan froestan taki foeroe sma prakseri foe disi, foe di Mateus 25:31, 32 e taki: „Te a Manpikin foe libisma e doro na ini en glori, èn ala den engel makandra nanga en, dan a sa go sidon na tapoe en glori kownoestoeroe. Èn ala den nâsi sa tjari kon makandra na en fesi, èn a sa prati sma foe makandra, neleki fa wan herder e prati den skapoe foe den bokoboko.” A Waktitoren foe 1 oktober 1995 ben sori foe san ede den vers disi e kon troe baka te a bigi banawtoe e bigin. Jesus sa doro na ini en glori nanga den engel foe en, èn a sa sidon na tapoe en kownoestoeroe foe kroetoe sma. Dan a sa prati sma. Na sortoe fasi? A sa teki bosroiti tapoe a gron foe san sma ben doe noso no ben doe bifo a ten dati.

Wi kan teki disi gersi den sani di e doe foe sreka a pasi na ini wan kroetoe proces di sa abi wan kroetoe-afersi leki bakapisi. A e teki wan langa pisi ten foe tjari boeweisi kon na wán, bifo a kroetoe e teki wan bosroiti san na a strafoe di a sma kisi èn e leisi en. Wan langa pisi ten kaba den boeweisi di e sori efoe sma di e libi nownow, sa de skapoe noso bokoboko, tjari kon na wán. Èn moro boeweisi e kon ete. Ma te Jesus e sidon na tapoe en kownoestoeroe, dan a kroetoe-afersi sa kon na wan kaba. A sa de klariklari foe leisi strafoe. A sa prati sma foe koti den poeroe foe têgo noso foe gi den têgo libi.

Ma foe di a wroko foe prati sma foe den kisi libi noso foe den kisi dede, soleki fa den e taki foe en na ini Mateus 25:32 de gi a tamara ete, dan a no wani taki dati no wan pratiwroko e pasa bifo dati. Na ini Mateus kapitel 13, bijbel e taki foe wan pratiwroko di o pasa fosi. A moi foe si, taki a boekoe Verenigd in de aanbidding van de enige ware God (De wán ini na anbegi foe a wan-enkri troe Gado), bladzijde 179 nanga 180, e poti disi na ondro na ondro-edeprakseri „A prati foe sma”.a A boekoe e taki: „Tra prenspari sani e pasa toe di Jesus ben kroederi na wan aparti fasi nanga a bosroiti foe a seti foe sani. Wan foe den sani disi di pasa na a wroko foe prati den ’manpikin foe a kownoekondre’ foe den ’manpikin foe a godelowsoewan’. Jesus ben taki foe disi na ini en agersitori foe wan tarwe gron pe wan feanti ben sai takroe wiwiri na tapoe.”

A boekoe ben e taki foe Jesus en agersitori di e kon na krin na ini Mateus 13:24-30 èn ben tjari kon na krin na ini vers 36-43. Loekoe na ini vers 38 taki den boen tarwe siri e prenki den manpikin foe a Kownoekondre, ma a takroe wiwiri wani taki den manpikin foe a godelowsoewan. Vers 39 nanga 40 e sori taki na ini a ’kaba foe a seti foe sani’ — na ini a ten pe wi e libi na ini now — den e tjari a takroe wiwiri kon na wán. Den e poti den aparti èn den e bron den te foe kaba, pori den.

Na agersitori e taki foe salfoe kresten (di den e kari den brada foe Jesus, na ini na agersitori foe den skapoe nanga den bokoboko). Tokoe a penti de krin taki wan prenspari pratiwroko e pasa na ini a ten foe wi, foe di den e poti salfoewan aparti foe den sma di e taki dati den na kresten, ma di e sori taki den na „manpikin foe a godelowsoewan”.

Jesus ben gi tra eksempre foe sma di den e prati. Memre taki a ben taki foe a bradi pasi di e tjari go na pori: „Foeroe sma de di e pasa go na ini” (Mateus 7:13). A sani dati di taki no ben abi foe doe nomo nanga san ben o pasa te foe kaba. A ben taki foe wan sani di ben o go doro, neleki fa dati de now nanga den wan toe sma di e feni a smara pasi di e tjari go na libi. Memre toe, taki di Jesus ben seni den apostel go, a ben taki dati den ben o feni son sma di ben o warti en. Trawan no ben o warti en, èn den apostel ben moesoe seki a doti poeroe na den foetoe „leki wan kotoigi teige” den sma dati (Lukas 9:5). A no de so, taki so wan sortoe sani e pasa te kresten e doe a poebliki diniwroko foe den na ini a ten disi? Son sma e doe wan sani na tapoe, ala di trawan e weigri foe teki a boskopoe foe Gado di wi e tjari go gi den.

Den artikel na ini A Waktitoren di ben e taki foe den skapoe nanga den bokoboko, ben taki: „Ala di a kroetoewroko soleki fa den skrifi foe dati na ini na agersitori, de na ini a krosibei tamara, tokoe now srefi wan prenspari sani e pasa. Wi kresten abi prati na wan wroko foe froeloesoe sma èn foe meki wan boskopoe bekènti di e meki wan prati kon na mindri sma (Mateus 10:32-39).” Ini a pisi dati na ini Mateus kapitel 10, wi e leisi taki Jesus ben taki dati te sma ben o waka na en baka, dan a bakapisi ben o de taki sma ben o prati foe makandra — papa kontrari manpikin, oemapikin kontrari mama.

Te foe kaba, Krestes brada di kisi salfoe nanga santa jeje, teki fesi na ini a wroko di e doe na heri grontapoe foe preiki a Kownoekondre boskopoe. Te sma e jere disi èn e doe wan boen sani na tapoe efoe no, dan den e sori sma soema den de troetroe. Wi libisma no kan, èn wi no moesoe, taki: ’A sma disi na wan skapoe; a wan dati na wan bokoboko’, na a fasi di e kon na krin na ini Mateus kapitel 25. Ma te wi e meki sma jere a boen njoensoe, dan dati e gi den na okasi foe sori pe den e tanapoe — sortoe sma den de èn san den e doe na tapoe den sani foe den brada foe Jesus. So boen, neleki boeweisi di e kon moro nanga moro na ini wan kroetoe-afersi, na so a prati di e kon na mindri den sma di e horibaka gi den brada foe Jesus èn den sma di e weigri foe horibaka gi den, e kon de krin foe si (Maleaki 3:18). Soleki fa A Waktitoren ben sori, dan djonsro Jesus sa sidon na tapoe en kownoestoeroe foe leisi strafoe, èn dan na ini wan kroetoe-afersi sma sa prati foe makandra wan lasti leisi foe kisi libi noso foe kisi koti poeroe.

[Foetoewortoe]