Papa Nanga Mama, San Pikin E Leri fu na Eksempre fu Unu?

„Kon de sma di e waka na baka Gado, leki lobi pikin, èn tan waka na ini lobi.”—EFEISESMA 5:1, 2.

1. Sortu tirilin Yehovah ben gi a fosi libisma paar?

YEHOVAH na a Sma pe a seti fu na osofamiri bigin. Na fu En ede meki ibri osofamiri de, bika a ben seti a fosi osofamiri èn ben gi a fosi libisma paar a krakti fu meki pikin (Efeisesma 3:14, 15). A ben gi Adam nanga Eva den fondamenti tirilin di abi fu du nanga den frantiwortu fu den èn A ben gi den nofo okasi tu fu gebroiki den eigi denki fu du den sani disi (Genesis 1:28-30; 2:6, 15-22). Baka di Adam nanga Eva ben sondu, dan den situwâsi di den osofamiri ben musu kakafutu gi, ben kon moro muilek. Toku na wan lobi-ati fasi Yehovah ben gi tirilin di ben o yepi den futuboi fu en fu kakafutu gi den sortu situwâsi disi.

2. (a) Fa Yehovah poti krakti na rai di skrifi nanga yepi fu tirilin di ben gi nanga mofo? (b) Sortu aksi papa nanga mama musu poti gi densrefi?

² Leki a Gran Leriman fu wi, Yehovah du moro furu leki fu gi bodoi di skrifi nomo di abi fu du nanga san wi musu du èn san wi no musu du. Na ini owruten a ben gi tirilin di skrifi, makandra nanga tirilin di taki nanga mofo, nanga yepi fu den priester nanga den profeiti èn nanga yepi fu den edeman fu den osofamiri. Suma A e gebroiki fu gi den sortu leri nanga mofo na ini a ten disi? Kresten owruman èn papa nanga mama. ¿Efu yu na wan papa noso mama, yu e du yu pisi fu leri yu osofamiri na ini den pasi fu Yehovah?—Odo 6:20-23.

3. San edeman fu osofamiri kan leri fu Yehovah fu gi leri nanga bun bakapisi?

³ Fa a tirilin disi musu gi na ini na osofamiri? Yehovah e gi na eksempre. A e taki krinkrin san bun èn san ogri, èn a e taki dati furutron ibri leisi baka (Exodus 20:4, 5; Deuteronomium 4:23, 24; 5:8, 9; 6:14, 15; Yosua 24:19, 20). A e gebroiki aksi di e meki sma prakseri (Yob 38:4, 8, 31). Nanga yepi fu agersitori èn nanga trutru eksempre na ini a libi, a e wiki den firi fu wi èn e vorm na ati fu wi (Genesis 15:5; Danièl 3:1-29). ¿Papa nanga mama, te yu e gi den pikin fu yu leri, yu e pruberi fu waka na baka na eksempre dati?

4. San wi e leri fu Yehovah te a e gi trangaleri, èn fu san ede trangaleri de prenspari?

⁴ Yehovah e hori faste na san reti, ma a e frustan den bakapisi fu onvolmaaktifasi. So bun, bifo a e gi strafu, a e gi leri èn e gi warskow nanga frumane na onvolmaakti libisma ibritron baka (Genesis 19:15, 16; Yeremia 7:23-26). Te a e gi trangaleri dan a e gi yoisti san de fanowdu, no tumusi furu (Psalm 103:10, 11; Yesaya 28:26-29). Efu dati na a fasi fa wi e handri nanga den pikin fu wi, dan a e sori taki wi sabi Yehovah èn a sa de moro makriki gi den fu kon sabi en tu.—Yeremia 22:16; 1 Yohanes 4:8.

5. San papa nanga mama kan leri fu Yehovah fu a fasi fa A e arki?

⁵ A moi srefisrefi taki Yehovah e arki leki wan lobi-ati Tata na hemel. A no e gi komando nomo. A e gi wi deki-ati fu taki nanga en fu ala san de tapu wi ati (Psalm 62:8). Èn efu den sani di wi e taki no de so leki fa a musu de, dan a no e krasi wi bun tranga komoto na hemel. Nanga pasensi a e gi wi leri. A rai fu na apostel Paulus e fiti fu dati ede: ¡„Kon de sma di e waka na baka Gado, leki lobi pikin”! (Efeisesma 4:31–5:1) ¡Yehovah e gi wan tumusi moi eksempre na papa nanga mama te den e suku fu gi den pikin fu den leri! Na wan eksempre di e doro na ati fu wi èn e meki wi wani waka en pasi fu libi.

A Krakti Di wan Eksempre Abi

6. Fa a fasi fa papa nanga mama de èn na eksempre fu den abi krakti tapu den pikin fu den?

⁶ Boiti tirilin di e gi nanga mofo, eksempre abi wan tranga krakti tapu den yonguwan. Awansi papa nanga mama lobi en noso no lobi en, den pikin fu den o waka na baka na eksempre fu den. A kan plisi papa nanga mama — son tron a kan skreki den — te den e yere taki den pikin fu den e taki sani di densrefi taki. Te a fasi fa papa nanga mama e tyari densrefi èn a fasi fa den de, e sori taki den abi bigi warderi gi yeye afersi, dan disi abi wan bun krakti tapu den pikin.—Odo 20:7.

7. Sortu eksempre leki papa, Yefta ben gi en umapikin, èn nanga sortu bakapisi?

⁷ A krakti fu na eksempre fu papa nanga mama tyari bun kon na krin na ini Bijbel. Yefta, di Yehovah ben gebroiki fu meki Israèl wini den Amonsma ben de wan papa tu. A tori fu a piki di a ben gi a kownu fu Amon e sori taki Yefta ben musu leisi a historia fu a fasi fa Yehovah ben handri nanga Israèl furutron. A ben kan taki krin baka fu a historia dati, èn a ben sori taki a ben abi tranga bribi na ini Yehovah. Seiker, na eksempre fu en ben yepi na umapikin fu en fu kweki a bribi nanga a yeye fu òfer ensrefi di a ben sori fu di a ben fruplekti ensrefi fu dini Yehovah en heri libi langa leki wan loyaal uma di no ben trow.—Krutubakra 11:14-27, 34-40; teki gersi Yosua 1:8.

8. (a) Sortu tumusi moi fasi a papa nanga a mama fu Samuèl ben sori? (b) Fa dati ben abi wini gi Samuèl?

⁸ Samuèl ben de wan bun eksempre leki wan pikin èn en heri libi langa a ben de getrow na Gado leki wan profeiti. ¿Yu ben sa wani taki den pikin fu yu kon de neleki en? Ondrosuku na eksempre di a papa nanga a mama fu Samuèl, Elkana nanga Hana ben gi. Ala di a situwâsi na ini den osofamiri no ben de volmaakti, toku den ben e go doronomo na Silo fu go anbegi, na a presi pe a santa tabernakel ben de (1 Samuèl 1:3-8, 21). Poti prakseri na den dipi firi fu Hana di a ben e begi (1 Samuèl 1:9-13). Luku fa den ala tu ben e denki fu a prensparifasi fu hori densrefi na iniwan pramisi di den ben du Gado (1 Samuèl 1:22-28). A tumusi moi eksempre fu den seiker ben yepi Samuèl fu kweki den eigifasi di ben meki taki a ben tan waka a yoisti pasi — srefi te sma na en lontu di ben du leki den ben e dini Yehovah, no ben sori lespeki gi den pasi fu Gado. Te fu kaba, Yehovah ben gi Samuèl srefi a frantiwortu leki En profeiti.—1 Samuèl 2:11, 12; 3:1-21.

9. (a) Sortu krakti na oso ben abi bun bakapisi gi Timoteus? (b) Sortu sma Timoteus ben tron?

⁹ ¿Yu ben sa wani taki yu manpikin kon de leki Timoteus, di leki wan yonguman ben tron wan kompe fu na apostel Paulus? A papa fu Timoteus no ben de wan bribiman, ma a mama nanga a granmama fu en ben gi wan tumusi moi eksempre fu warderi gi yeye sani. Seiker disi ben yepi poti wan bun fondamenti gi a libi fu Timoteus leki wan Kresten. Wi e kisi fu yere taki en mama, Eunice, nanga en granmama Lois ben abi „bribi . . . sondro wan enkri hoigrifasi”. Den no ben hoigri leki Kresten; den ben e libi trutru akruderi san den ben taki den ben e bribi, èn den ben leri a yongu Timoteus fu du a srefi sani. Timoteus ben sori taki den ben kan bow tapu en èn taki a ben e broko en ede opregti nanga a bun fu trawan.—2 Timoteus 1:5; Filipisma 2:20-22.

10. (a) Sortu eksempre di de dorosei fu na oso kan abi krakti tapu den pikin fu wi? (b) Fa wi musu handri te den sani disi di abi krakti na tapu a fasi fu taki noso fasi fu den pikin fu wi?

¹⁰ A no na oso wawan den pikin abi eksempre di abi krakti tapu den. Pikin de di e go nanga den na skoro, skoromeester di abi leki wroko fu vorm den yongu frustan, sma di wani srefisrefi taki ibriwan sma musu hori ensrefi na sani di rutu dipi na ini den gwenti fu wan lo noso fu wan libimakandra, pôpi sportman di den e prèise na alasei fu den sani di den du, èn lanti tiriman di de na ini a nyunsu fu a fasi fa den tyari densrefi. Milyunmilyun pikin ondrofeni na ogri-ati fasi fu orloku tu. ¿A musu fruwondru wi te den sani disi di abi krakti tapu den, de fu si na ini a taki noso fasi fu den pikin fu wi? Fa wi e handri te disi pasa? ¿Wan krasi piri-ai noso seryusu preek e lusu a problema? Na presi taki wi e piki den pikin fu wi gawgaw, a no ben sa moro betre fu aksi wisrefi, ’¿Wan sani de na a fasi fa Yehovah e handri nanga wi, di ben kan yepi fu sabi fa fu handri na ini a situwâsi disi?’—Teki gersi Romesma 2:4.

11. Te papa nanga mama e meki fowtu, fa disi kan abi krakti tapu a fasi fa den pikin fu den de?

¹¹ A no de fu taki dati onvolmaakti papa nanga mama no o handri den situwâsi na a moro bun fasi ala ten. Den o meki fowtu. ¿Te pikin e frustan dati, dan dati o meki taki den o lasi lespeki gi a papa nanga mama fu den? A kan, spesrutu te papa nanga mama e pruberi fu regtfardiki den eigi fowtu fu den fu di na wan krasifasi den e sori go na a makti di den abi. Ma a bakapisi kan de heri tra fasi efu papa nanga mama abi sakafasi èn na wan frifasi e erken den fowtu fu den. Na so den kan de wan prenspari eksempre gi den pikin fu den, di musu leri fu du a srefi sani.—Yakobus 4:6.

San na Eksempre fu Wi Kan Leri Trawan

12, 13. (a) San den pikin musu leri fu lobi, èn san na a moro bun fasi fu leri den a sani disi? (b) Fu san ede a prenspari taki pikin musu kisi leri fu lobi?

¹² Furu warti sani de di wan sma kan leri moro bun te a sma di e gi tirilin nanga mofo, e gi wan bun eksempre. Luku wan tu fu den.

¹³ Sori lobi di no e prakseri ensrefi: Wan fu den moro prenspari sani di wi kan leri fu wan eksempre di gi, na san lobi wani taki. „Wi lobi, bika [Gado] ben lobi wi fosi” (1 Yohanes 4:19). A de a Fonten èn a moro bun eksempre fu lobi. A lobi disi di abi en gron tapu gronprakseri, a·gaʹpe, kari na ini Bijbel moro leki 100 tron. Na wan eigifasi di e sori suma na tru Kresten (Yohanes 13:35). So wan lobi wi musu sori gi Gado nanga Yesus Krestes èn so srefi gi libisma makandra — srefi gi libisma di wi no lobi kande (Mateus 5:44, 45; 1 Yohanes 5:3). A lobi disi musu de na ini wi ati èn musu de krin fu si na ini a libi fu wi bifo wi kan leri en nanga bun bakapisi na den pikin fu wi. A no san wan sma e taki de prenspari, ma na san a sma e du. Na ini na osofamiri, pikin musu si lobi èn kisi lobi èn srefi tra sortu eigifasi, soleki dipi lobifiri. Sondro den sani disi, dan a gro fu wan pikin e tapu na skin sei, na frustan sei èn na emotioneel sei. Pikin musu si so srefi fa lobi nanga lobifiri e sori na wan yoisti fasi gi kompekresten dorosei fu na osofamiri.—Romesma 12:10; 1 Petrus 3:8.

14. (a) Fa papa nanga mama kan leri den pikin fu du bun wroko di e gi satisfaksi? (b) Fa disi kan du na ini na osofamiri fu yu?

¹⁴ Leri fa fu wroko: Wroko na wan tumusi prenspari pisi fu a libi. Fu abi wan firi fu eigi waarde, wan sma musu leri fa fu du bun wroko (Preikiman 2:24; 2 Tesalonikasma 3:10). Efu wan pikin kisi wroko fu du pe a no kisi furu tirilin èn baka dati e kisi kosikosi fu di a no du en bun, dan seiker a no sa leri fu du bun wroko. Ma te den pikin e leri fu di den e wroko makandra nanga den papa nanga mama fu den èn e kisi prèise di fiti, dan furutron den sa leri fa fu du wroko di e gi satisfaksi. Efu papa nanga mama e gi na eksempre èn e tyari sani kon na krin, dan den pikin kan leri fu no sabi wawan fu du a wroko, ma so srefi fu wini problema, fa fu tan du wan wroko teleki a kaba, èn fa fu rideneri èn teki bosroiti. Na a fasi disi den kan yepi den pikin fu frustan taki Yehovah e wroko tu, taki a e du bun wroko, èn taki Yesus e waka na baka en Tata (Genesis 1:31; Odo 8:27-31; Yohanes 5:17). Efu wan osofamiri e du gronwroko noso e drai wan bisnis, dan wan tu memre fu na osofamiri kan wroko nanga makandra. Noso kande a mama kan leri a manpikin noso na umapikin fu en fu bori èn fa fu krin sani te den kaba nyan. Wan papa di e wroko fara fu oso kan sreka sani fu du wroko na oso nanga en pikin. ¡A e gi wini te papa nanga mama abi na prakseri no wawan fa fu du wan wroko di musu du nownow, ma so srefi fu gi den pikin san den abi fanowdu na ini den heri libi!

15. Na sortu fasi wi kan leri sma fu bribi? Gi wan eksempre fu dati.

¹⁵ Tan abi bribi te gens de: Bribi na wan prenspari pisi tu fu a libi fu wi. Te osofamiri e taki fu bribi na a osofamiri-studie, dan den pikin kan leri fu taki san dati wani taki. Den kan kon sabi buweisi tu di e meki taki bribi e bigin gro na ini den ati. Ma te den e si a papa nanga mama fu den e sori tranga bribi te den e kisi hebi tesi, dan disi kan abi bakapisi di e tan den heri libi langa. Na ini Panama a masra fu wan bijbelstudenti ben warskow en taki a ben o yagi en gowe fu oso efu a no ben tapu fu dini Yehovah. Toku, a ben waka 16 kilometer doronomo nanga den fo yongu pikin fu en èn baka dati a ben rei wan bus ete 30 kilometer fu go na a moro krosibei Kownukondre zaal. Fu di memre fu en famiri ben kisi deki-ati fu na eksempre fu en, meki so wan 20 memre fu en famiri ben teki a pasi fu waarheid.

Gi wan Eksempre fu Leisi Bijbel Ala Dei

16. Fu san ede wi kan taki dati a de prenspari fu leisi Bijbel leki osofamiri ala dei?

¹⁶ Wan fu den moro prenspari gwenti di iniwan osofamiri kan seti — wan gwenti di sa abi wini gi a papa nanga a mama èn di sa de wan eksempre gi pikin fu waka na baka — na a leisi fu a Bijbel doronomo. Efu a kan srefi, leisi wan pisi fu Bijbel ibri dei. A moro prenspari sani a no o furu yu e leisi. San moro prenspari, na a faste gwenti èn a fasi fa a sani disi e du. Boiti fu leisi Bijbel nanga den pikin, papa nanga mama kan poti den cassette-lolo fu Mi boekoe nanga bijbel tori gi den pikin fu arki efu a de fu feni na ini a tongo fu den. Te wi e leisi a Wortu fu Gado ibri dei dan a e yepi wi fu poti den prakseri fu Gado na a fosi presi. Èn te a no ibri sma wawan e leisi Bijbel, ma na osofamiri, dan disi kan yepi heri osofamiri fu waka den pasi fu Yehovah. Na a gwenti disi a drama Osofamiri — Meki a Leisi di Unu E Leisi Bijbel Ibri Dei De wan Fasi fu Libi” na den „Gado Pasi fu Libi” Kongres, di hori no so langa pasa, ben gi deki-ati fu du.—Psalm 1:1-3.

17. Fa a leisi fu Bijbel leki osofamiri èn a hori na ede fu prenspari bijbeltekst e yepi fu gebroiki a rai na Efeisesma 6:4?

¹⁷ Fu leisi Bijbel leki osofamiri de akruderi a sani di na apostel Paulus ben skrifi na ini a brifi fu en di a skrifi nanga yepi fu Gado en santa yeye gi Kresten na ini Efeise, namku: „Unu, papa, no tanteri den pikin fu unu, ma tan kweki den na ini a trangaleri èn a seryusu frumane fu Yehovah” (Efeisesma 6:4). San dati wani taki? „Seryusu frumane” wani taki trutru, „poti a prakseri na ini”; so bun, Kresten papa e kisi tranga fu poti a prakseri fu Yehovah Gado na ini den pikin fu den — fu yepi den pikin fu kon sabi den prakseri fu Gado. Te wi e gi den pikin deki-ati fu hori prenspari bijbeltekst na ede, dan dati kan yepi fu doro a marki dati. A marki na fu meki den prakseri fu Yehovah tiri a denki fu den pikin so taki den winsi fu den nanga a fasi fa den e tyari densrefi, safrisafri e prenki den markitiki fu Gado awansi a papa nanga mama de nanga den pikin noso no de nanga den pikin. Bijbel na a fondamenti gi a sortu denki dati.—Deuteronomium 6:6, 7.

18. Te wi e leisi Bijbel, san kan de fanowdu fu (a) frustan en krinkrin? (b) kisi wini fu a rai di de na ini? (c) handri na tapu san a e sori fu den prakseri fu Yehovah? (d) kisi wini fu den sani di a e taki fu a fasi fa sma de èn sani di sma du?

¹⁸ A no de fu taki, dati efu Bijbel musu abi krakti tapu a libi fu wi dan wi musu frustan san a e taki. Gi furu sma disi kan aksi taki fu leisi den pisi fu Bijbel moro leki wán leisi. Fu frustan son wortu krinkrin dan wi kan suku den wortu na ini wan wortubuku noso na ini Inzicht in de Schrift. Efu a bijbeltekst abi rai noso wan komando na ini, dan teki ten fu taki fu den situwâsi na ini wi ten di e meki taki a tekst e fiti. Dan yu ben sa kan aksi yusrefi: ’Fa a fiti di mi e fiti a rai disi kan gi mi wini?’ (Yesaya 48:17, 18) Efu a bijbeltekst e taki fu wan penti fu a prakseri fu Yehovah, aksi yusrefi: ’Fa disi abi krakti tapu a libi fu wi?’ Kande yu e leisi wan tori di e fruteri fu a fasi fa sma de èn den sani di den du. Sortu druk na ini a libi den ben e ondrofeni? Fa den ben handri nanga disi? Fa wi kan teki wini fu na eksempre fu den? Meki ten ala ten fu taki san a tori wani taki na ini wi libi na ini a ten disi.—Romesma 15:4; 1 Korentesma 10:11.

19. Te wi de sma di e waka na baka na eksempre fu Gado, dan san wi sa gi den pikin fu wi?

¹⁹ ¡Disi na wan tumusi moi fasi fu poti den prakseri fu Gado na ini a prakseri nanga na ati fu wi! Na so wi sa kisi yepi trutru fu tron „sma di e waka na baka Gado, leki lobi pikin” (Efeisesma 5:1). Èn wi sa gi wan eksempre di warti trutru taki den pikin fu wi waka na baka.

¿Yu E Memre Disi Ete?

◻ Fa papa nanga mama kan kisi wini fu na eksempre fu Yehovah?

◻ Fu san ede tirilin di gi nanga mofo musu gi makandra nanga wan bun eksempre fu papa nanga mama?

◻ San na wan tu sani di papa nanga mama kan leri den pikin a moro bun fasi fu di den e gi na eksempre?

◻ Fa wi kan kisi wini doronomo te wi e leisi Bijbel leki osofamiri?

Studeri Gado Wortu Leki Osofamiri Doronomo

„Libisma no musu libi fu brede wawan, ma fu ibri wortu di e kon fu Yehovah en mofo.”—MATEUS 4:4.

1. San Bijbel e taki fu a frantiwortu fu osofamiri edeman fu gi den pikin fu den leri na ini den pasi fu Yehovah?

YEHOVAH GADO ben memre den edeman fu osofamiri nofotron na a frantiwortu di den abi fu gi den pikin fu den leri. Den sortu tirilin disi ben o sreka den pikin gi a libi fu now èn ben sa kan yepi so srefi fu sreka den gi a libi di e kon. Wan engel di ben e teki presi gi Gado ben sori Abraham a frantiwortu di a ben abi fu gi leri na a osofamiri fu en so taki den ben sa „hori a pasi fu Yehovah” (Genesis 18:19). Den papa nanga mama fu Israèl ben yere taki den ben musu fruteri den pikin fu den fa Gado ben frulusu Israèl fu Egipti èn fa a ben gi den a Wet fu en na a Sina-i bergi na ini Horeb (Exodus 13:8, 9; Deuteronomium 4:9, 10; 11:18-21). Kresten osofamiri edeman e kisi a frumane fu kweki den pikin „na ini a trangaleri èn a seryusu frumane fu Yehovah” (Efeisesma 6:4). Srefi efu a papa noso a mama wawan e dini Yehovah, dan toku a musu du muiti fu leri den pikin den pasi fu Yehovah.—2 Timoteus 1:5; 3:14, 15.

2. ¿A de fanowdu fu hori osofamiri studie efu pikin no de na ini a oso? Fruklari dati.

² Disi no wani taki dati osofamiri studie fu a Wortu fu Gado na soso gi osofamiri di abi pikin. Te wan masra nanga en wefi abi wan osofamiri studie srefi efu den no abi pikin na oso, dan disi e sori taki den abi furu warderi gi yeye sani.—Efeisesma 5:25, 26.

3. Fu san ede a de prenspari fu hori na osofamiri studie doronomo?

³ Fu man abi moro bun bakapisi, dan tirilin musu gi doronomo akruderi a sani di Yehovah ben leri Israèl na ini a sabana: „Wan sma no e libi fu brede wawan, ma fu ibri wortu fu Yehovah en mofo” (Deuteronomium 8:3). A e anga fu a situwâsi fu na osofamiri, taki son osofamiri kan seti sani gi wan alawiki studie; trawan kan studeri ibri dei na ini wan moro syatu pisi ten. Awansi sortu seti yu abi, no studeri te yu feni ten. ’Bai a ten’ gi dati. Fu pai a prijs di de fanowdu gi so wan ten na wan ten di gebroiki na wan koni fasi. A libi fu den memre fu yu osofamiri de ini a tori.—Efeisesma 5:15-17; Filipisma 3:16.

Marki Di Musu Hori na Prakseri

4, 5. (a) Nanga yepi fu Moses, san Yehovah ben poti gi papa nanga mama leki wan prenspari marki te den e leri den pikin fu den? (b) San dati wani taki na ini a ten disi?

⁴ Te yu e hori na osofamiri studie, dan a moro bun fasi fu kisi wini fu en na te yu abi krinkrin marki na prakseri. Luku wan tu fu den marki di yu kan poti.

⁵ Suku fu bow lobi gi Yehovah Gado na ibri studie. Di Israèl ben kon makandra na den lagipresi fu Moab, bifo den ben go na a Pramisi Kondre, dan Moses ben poti a prakseri fu den na san Yesus Krestes ben o kari baka ten „a moro bigi komando na ini a Wet”. San ben de disi? „Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan” (Mateus 22:36, 37; Deuteronomium 6:5). Moses ben gi den Israèlsma tranga fu poti disi na tapu den eigi ati èn fu leri disi na den pikin fu den. Dati ben sa aksi fu den taki den musu taki disi ibritron baka, poti prakseri na den reide fu san ede den pikin musu lobi Yehovah, e du wan sani na den maniri, nanga fasi fu tyari densrefi di ben kan hendri den fu sori so wan lobi, èn fu sori lobi gi Yehovah na ini den eigi libi. ¿Den pikin fu wi abi a srefi sortu tirilin fanowdu? ¡Iya! Èn den abi yepi fanowdu tu fu ’besnij na ati fu den’, dati wani taki, fu puru ala sani di ben sa tapu den fu lobi Gado (Deuteronomium 10:12, 16; Yeremia 4:4). Na mindri den sortu sani disi di ben kan tapu den, na angri kan de gi sani fu grontapu èn gi den okasi fu gi densrefi na den sani fu grontapu (1 Yohanes 2:15, 16). A lobi gi Yehovah musu de fayafaya, a musu de wan sani di wi e sori, èn a musu buweigi wi fu du den sani di e plisi wi hemel Tata (1 Yohanes 5:3). Efu yu wani na osofamiri studie fu yu abi winimarki gi wan langa pisi ten, dan ibri studie musu hori na wan fasi di e tranga a lobi disi.

6. (a) San de fanowdu fu gi soifri sabi? (b) Fa den Buku fu Bijbel e poti krakti tapu a prensparifasi fu soifri sabi?

⁶ Gi den a soifri sabi fu den sani di Gado e aksi fu wi. San disi abi na ini? A abi moro na ini leki nomo fu man leisi wan piki puru fu wan tijdschrift noso fu wan buku. Moro furu wan takimakandra de fanowdu fu sorgu taki prenspari wortu nanga prenspari idea e frustan krin. Soifri sabi na wan tumusi prenspari sani fu poti a nyun persoonlijkheid, fu tan poti prakseri na den trutru prenspari sani te wi e kisi fu du nanga problema na ini a libi, èn na so wan fasi, fu du sani di e plisi Gado trutru.—Filipisma 1:9-11; Kolosesma 1:9, 10; 3:10.

7. (a) Sortu aksi kan poti fu yepi na osofamiri fu gebroiki san den leri na ini a studie? (b) Fa den Buku fu Bijbel e poti krakti tapu a waarde fu so wan marki?

⁷ Yepi den fu si fa den kan gebroiki den sani di den leri. Nanga a marki disi na prakseri, aksi na ibri osofamiri studie: ’Fa a sani disi di wi studeri musu abi krakti tapu a libi fu wi? ¿A e meki a de fanowdu taki wi musu tyari wan kenki kon na ini den sani di wi e du now? Fu san ede wi musu wani fu tyari kenki kon?’ (Odo 2:10-15; 9:10; Yesaya 48:17, 18) Te wi e poti nofo prakseri na a fasi fa wi kan gebroiki den sani di wi leri, dan dati kan de wan prenspari fasi fu meki den memre fu na osofamiri gro na yeye fasi.

Gebroiki den Wrokosani fu Gi Leri na wan Koni Fasi

8. Sortu wrokosani gi bijbelstudie a srafu grupu gi?

⁸ „A getrow èn koni srafu” sorgu gi bun furu wrokosani di wi kan gebroiki fu studeri. A tijdschrift A Waktitoren, di wi kan gebroiki nanga Bijbel, de fu kisi na ini 131 tongo. ¡Buku gi bijbelstudie de na ini 153 tongo, brochure na ini 284 tongo, cassette-lolo na ini 61 tongo, videocassette na ini 41 tongo, srefi computer programa fu ondrosuku Bijbel na ini 9 tongo!—Mateus 24:45-47.

9. Fa wi ben kan gebroiki a rai na ini den Buku fu Bijbel di kari na ini a paragraaf disi te wi abi wan osofamiri Waktitoren-studie?

⁹ Furu osofamiri e gebroiki a ten fu na osofamiri studie fu sreka densrefi gi a gemeente Waktitoren-studie. ¡Disi kan de wan bigi yepi srefisrefi! A Waktitoren abi a moro prenspari nyanyan na yeye fasi di e gi fu tranga a pipel fu Yehovah na heri grontapu. Te yu e studeri A Waktitoren leki wan osofamiri, dan du moro leki fu leisi den paragraaf èn fu piki den aksi di skrifi nomo. Suku fu frustan en fayafaya. Teki ten fu luku den tekst di kari ma di no skrifi. Aksi den memre fu na osofamiri fu fruteri fa den tekst disi abi fu du nanga a paragraaf dati. Buweigi na ati fu den.—Odo 4:7, 23; Tori fu den Apostel 17:11.

10. San wi kan du fu meki den pikin abi wan prati na ini a studie èn fu meki a de wan prisiri ten gi den?

¹⁰ Efu pikin de na ini yu osofamiri, dan san yu kan du fu meki a studie fu yu no de soso wan plekti, ma wan ten di e tranga den, di den lobi èn wan prisiri ten? Du muiti fu meki ibriwan sma abi wan bun prati so taki a prakseri e tan tapu a sani di unu e studeri. Efu a kan, seti sani fu meki ibri pikin abi en eigi Bijbel nanga tijdschrift di o studeri. Neleki fa Yesus ben sori lobi firi, na so wan papa noso wan mama kan meki wan yongu pikin sidon krosibei fu en èn kande poti en anu lontu a yongu pikin. (Teki gersi Markus 10:13-16.) Wan edeman fu na osofamiri kan meki wan yongu pikin fruteri fu wan prenki di de na ini a studie. Wan yongu pikin kan kisi a toewijzing na fesi fu leisi wan bijbeltekst. Wan moro owru pikin ben kan kisi a toewijzing fu kari okasi pe den kan gebroiki den sani di den leri na ini a studie.

11. Sortu tra wrokosani fu gi leri ben gi, èn te den de fu feni, fa den ben kan gebroiki na wan bun fasi na ini na osofamiri studie?

¹¹ Ala di yu kan gebroiki A Waktitoren leki fondamenti fu a takimakandra fu yu, toku yu no musu frugiti den tra studie wrokosani di de na ini furu tongo. Efu yu wani sabi a background noso a fruklari fu wan Bijbel wortu, dan Inzicht in de Schrift kan gi dati. Yu kan feni piki na tapu tra aksi te yu e gebroiki na Index van Wachttoren-publikaties noso te yu e gebroiki a computer ondrosuku programa di a Genootschap meki. Efu yu e leri fu gebroiki den wrokosani disi, efu den de fu kisi na ini yu tongo, dan dati kan de wan warti pisi fu na osofamiri studie. Nanga a marki fu wiki a belangstelling fu den yonguwan, yu kan poti wan pisi fu yu studie ten na wan sei so srefi fu luku wan pisi fu wan fu den video fu a Genootschap di e leri sma sani, noso arki wan pisi fu wan drama na tapu cassette-lolo èn dan taki fu en. Te yu e gebroiki den studie wrokosani disi na wan bun fasi, dan yu kan yepi meki na osofamiri studie fu yu de wan moi sani èn meki a abi wini gi a heri osofamiri.

Fiti Yusrefi na den Sani Di Yu Osofamiri Abi Fanowdu

12. Fa na osofamiri studie kan prei wan rol fu handri nanga prenspari fanowdu fu na osofamiri?

¹² A kan taki na osofamiri fu yu moro furu e studeri a Waktitoren artikel fu a wiki. Ma sabi den problema nanga fasi fu denki fu na osofamiri. Efu a mama no abi grontapu wroko, dan kande a man gebroiki ten fu de nanga den pikin ibri dei te den kon na oso baka skoro. Na a okasi disi wan sani kan du na son sani; a kan taki a de fanowdu fu poti moro prakseri na tra situwâsi. Te prenspari sani de di na osofamiri abi fanowdu, no du leki yu no e si den (Odo 27:12). Den no abi fu du wawan nanga problema na skoro, ma so srefi nanga tra situwâsi. Teki a yoisti materiaal èn taigi na osofamiri na fesi san un sa studeri.

13. Fu san ede a ben kan gi wini fu taki nanga na osofamiri fu kakafutu gi pôtifasi?

¹³ Fu eksempre, wan bigi pisi fu grontapu pôti; fu dati ede na furu presi a kan de fanowdu fu taki fa fu du nanga dati. ¿Wan osofamiri studie di e taki moro furu fu sani di e feni presi trutru na ini a libi èn fu Bijbel gronprakseri kan abi wini gi yu osofamiri?—Odo 21:5; Preikiman 9:11; Hebrewsma 13:5, 6, 18.

14. Sortu situwâsi ben sa kan meki taki a yoisti fu taki nanga na osofamiri fu a fasi fa Yehovah e si ogri di e du nanga tranga, orloku, nanga fu a de di Kresten de neutraal?

¹⁴ Wan tra tori di e aksi taki yu taki fu en, na ogri di du nanga tranga. Wi alamala musu abi a fasi fa Yehovah e si sani, bun na ini wi frustan nanga wi ati (Genesis 6:13; Psalm 11:5). Wan osofamiri studie fu a tori disi kan de wan okasi fu taki fa fu du nanga ogri pikin di e tanteri trawan na skoro, èn wi kan taki efu a bun fu leri karate feti, èn fa fu teki a yoisti ontspanning. Ogri-ati feti kon de wan gewoon sani; pikinmoro ibri kondre abi fu du nanga borgufeti, politiek strei noso strei fu ras, noso feti fu gangster grupu. Fu dati ede na osofamiri fu yu kan abi wan takimakandra fanowdu fu tan tyari densrefi leki Kresten ala di den de na mindri grupu di e feti nanga makandra.—Yesaya 2:2-4; Yohanes 17:16.

15. Fa tirilin fu seks èn fu a trowlibi musu gi na den pikin?

¹⁵ Te den pikin e gro kon bigi dan den abi leri fanowdu fu seks nanga fu a trowlibi akruderi a yari fu den. Na ini son kulturu furu papa nanga mama noiti e taki fu seks nanga den pikin fu den. Pikin di no kisi leri fu a tori disi kan kisi wan fowtu denki fu tra yonguwan, èn den bakapisi kan takru srefisrefi. ¿A no ben sa de moro bun fu du neleki Yehovah, di e gi krinkrin rai ma di gi na wan koni fasi fu na afersi disi na ini Bijbel? A rai fu Gado sa yepi den pikin fu wi fu tan abi lespeki gi densrefi èn fu handri den wan di de mansma noso umasma nanga lespeki (Odo 5:18-20; Kolosesma 3:5; 1 Tesalonikasma 4:3-8). Srefi efu yu taki fu den tori disi kaba, no draidrai fu du dati baka. Fu di nyun situwâsi e opo kon, a de tumusi prenspari fu du dati ibritron baka.

16. (a) O ten osofamiri studie e hori na ini difrenti osofamiri? (b) Fa yu handri nanga den problema fu man hori wan osofamiri studie doronomo?

¹⁶ O ten osofamiri studie kan hori? Neleki den Bethel famiri na heri grontapu, furu osofamiri poti den osofamiri studie na munde neti. Gi trawan a de tra fasi. Na ini Argentina wan osofamiri fu 11 sma, pe 9 pikin ben de na ini, ben e opo doronomo ibri mamanten feifi yuru, fu hori na osofamiri studie fu den. Fu di den abi difrenti wroko schema, dan no wan tra ten ben kan. A no ben makriki, ma a ben poti a prensparifasi fu osofamiri studie na ini a frustan èn na ini na ati fu den pikin. Na ini den Filippijnen wan owruman ben man hori wan osofamiri studie doronomo nanga en wefi èn nanga den dri pikin fu den di ben e gro kon bigi. Mindri wiki a papa nanga mama ben e studeri nanga ibriwan fu den pikin tu so taki ibriwan ben sa sabi a waarheid. Na ini Amerkankondre wan sisa di a masra fu en no de wan Kotoigi, e waka nanga den pikin fu en go na a skorobus ibri mamanten. Te den e wakti na tapu a bus dan a e gebroiki tin miniti nanga makandra fu leisi èn fu taki fu bijbelstudie pisi di e fiti, èn dan a mama e begi syatu nanga den fosi den go na ini a bus. Na ini a Demokrasia Republiek fu Kongo, wan uma di a masra fu en gowe libi na osofamiri, musu wroko tranga na a studie fu di a no kisi nofo skoro. A bigi manpikin fu en e yepi fu di a e fisiti na osofamiri ibri wiki fu teki fesi na ini a studie fu en mama nanga den yongu brada fu en. A mama e gi wan moi eksempre fu di a e sreka ensrefi fayafaya na fesi. ¿Wan situwâsi de di e meki a doronomo osofamiri studie muilek na ini yu osofamiri? No tapu. Suku a blesi fu Yehovah fayafaya gi den muiti di yu e du fu man hori wan doronomo bijbelstudie.—Markus 11:23, 24.

Den Pai te Wi E Horidoro

17. (a) San de fanowdu fu man hori wan osofamiri studie doronomo? (b) Sortu ondrofenitori e sori a waarde fu gi tirilin fu den pasi fu Yehovah doronomo na ini na osofamiri?

¹⁷ A de fanowdu fu meki wan plan. Wi musu horidoro. Ma den pai di e kon fu wan osofamiri studie di e hori doronomo warti moro dati (Odo 22:6; 3 Yohanes 4). Franz nanga Hilda na ini Doisrikondre, ben kweki wan osofamiri fu 11 pikin. Furu yari na baka, na umapikin fu den, Magdalena ben taki: „San mi e si leki a moro prenspari sani tide na taki no wan dei srefi ben e pasa sondro taki wi ben e kisi wan noso tra fasi fu wan tirilin na yeye fasi.” Di a firi fu nationalisme ben kon faya na ondro a tiri fu Adolf Hitler, a papa fu Magdalena ben gebroiki Bijbel fu sreka na osofamiri fu en gi den tesi di a ben frustan taki ben e kon. Baka ten, sma ben teki den moro yongu memre fu na osofamiri èn ben tyari den go wan strafu-skoro; den ben aresteri tra memre fu na osofamiri èn ben poti den na ini strafu-oso èn na ini strafuman-kampu. Den ben kiri wan tu fu den. A bribi fu den alamala ben tan tranga — no wawan na ini a ten dati fu fayafaya frufolgu, ma so srefi, gi den wan di tan na libi, na ini den yari di ben kon na baka.

18. Fa den muiti fu papa nanga mama sondro patna ben kisi pai?

¹⁸ Furu papa noso mama di de sondro patna èn so srefi den wan di abi wan patna di no abi a srefi bribi leki den, sosrefi ben gi den pikin fu den tirilin fu Bijbel doronomo. Wan mama di ben de sondro patna, wan weduwe na ini India, ben wroko tranga fu poti lobi gi Yehovah na ini den tu pikin fu en. Ma en ati ben sari di a manpikin fu en ben tapu fu abi demakandra nanga a pipel fu Yehovah. A ben begi Yehovah fu gi en pardon fu iniwan sani di a ben mankeri fu gi en manpikin di a ben leri en. Ma a manpikin no ben frugiti trutru san a ben leri. Baka moro tin yari, a ben drai kon baka, ben go moi na fesi na yeye fasi, èn ben tron wan gemeente owruman. Now en nanga en wefi e dini leki furuten pionier bedinari. ¡Den papa nanga mama di ben teki a rai fu Yehovah nanga en organisâsi fu gi bijbel leri doronomo na ini na osofamiri, de tangi srefisrefi! ¿Yu e gebroiki a rai dati na ini yu osofamiri?

¿Yu Kan Tyari Disi Kon na Krin?

◻ Fu san ede a prenspari fu man hori wan osofamiri studie doronomo?

◻ San den marki fu wi musu de na ibri osofamiri studie?

◻ Sortu wrokosani fu gi leri ben seti gi wi?

◻ Fa wi kan fiti a studie na den fanowdu fu na osofamiri?

[Prenki na tapu bladzijde 15]

Krinkrin marki di poti sa meki na osofamiri studie fu yu go na fesi

Osofamiri, Prèise Gado Leki wan Pisi fu En Gemeente

„Na mindri den ipi sma di kon makandra, mi sa blesi Yehovah.”—PSALM 26:12.

1. San na wan prenspari pisi fu a tru anbegi, boiti fu studeri èn begi na oso?

NA ANBEGI fu Yehovah no wani taki wawan fu begi èn studeri Bijbel na oso, ma so srefi fu du wroko leki wan pisi fu a gemeente fu Gado. Israèl na owruten ben kisi a komando fu „tyari a pipel kon na wan, den mansma nanga den umasma nanga den pikin-nengre”, fu leri a wet fu Gado so taki den kan waka en pasi (Deuteronomium 31:12; Yosua 8:35). Owrusma èn sosrefi ’yonkuman nanga nyunwenke’ ben kisi deki-ati fu prèise a nen fu Yehovah (Psalm 148:12, 13). Den srefi sortu seti disi de na ini a Kresten gemeente. Na ini den Kownukondre zaal na heri grontapu, mansma, umasma nanga pikin-nengre abi wan prati na wan fri fasi na den pisi pe den arkiman kan gi piki, èn furu fu den abi furu prisiri fu abi wan prati.—Hebrewsma 10:23-25.

2. (a) Fu sani ede a sreka di wi e sreka wisrefi de wan prenspari sani fu yepi yonguwan fu nyan bun fu den konmakandra? (b) Na eksempre fu suma de prenspari?

² A tru taki a kan de wan tyalensi fu yepi yongu wan fu kisi a bun gwenti fu du gemeente wroko. Efu a e sori taki son pikin di e fisiti a konmakandra nanga den papa nanga mama fu den no e prisiri nanga den konmakandra, dan san kan de a problema? A no de fu taki dati furu pikin no man poti prakseri langa ten na wan sani èn den kan fruferi esi-esi. A sreka di den e sreka densrefi kan yepi fu lusu a problema disi. Sondro a sreka di den e sreka densrefi, pikin no man abi wan bun prati na den konmakandra (Odo 15:23). Sondro a sreka di den e sreka densrefi, a sa de muilek gi den fu gro na yeye fasi na wan fasi di e gi satisfaksi (1 Timoteus 4:12, 15). San papa nanga mama kan du? Tapu a fosi presi, papa nanga mama musu aksi densrefi efu den e sreka densrefi gi den konmakandra. Na eksempre fu den na wan tranga krakti (Lukas 6:40). Te den e sreka densrefi na osofamiri studie bun na fesi, dan dati kan de wan prenspari penti tu.

Tranga na Ati

3. Fu san ede spesrutu muiti musu du fu tranga na ati na a osofamiri studie, èn san disi e aksi?

³ Na osofamiri studie no musu de wan ten fu furu den ede wawan nanga sabi, ma so srefi fu tranga na ati fu den. Disi e aksi taki yu musu sabi den problema di den memre fu na osofamiri abi èn broko yu ede na wan lobi-ati fasi gi ibri wan fu den. Yehovah na „wan ondrosukuman fu na ati”.—1 Kroniki 29:17.

4. (a) San a wani taki fu „mankeri ati”? (b) San a wani taki fu „kisi ati”?

⁴ San Yehovah e si te a e ondrosuku na ati fu den pikin fu wi? Furu fu den ben o taki dati den lobi Gado, èn dati de fu prèise. Ma wan sma di yongu noso di e leri sabi Yehovah paspas, no abi nofo ondrofeni fu den pasi fu Yehovah. Fu di a no abi ondrofeni, a kan „mankeri ati” soleki fa Bijbel e taki fu dati. Kande a no ala den reide fu en takru, ma a e teki ten fu tyari na ati fu wan sma kon na ini wan kondisi di sa plisi Gado trutru. Disi wani taki fu tyari den prakseri, den winsi, sani si sma lobi, den firi, nanga den marki na ini a libi kon na ini kruderi nanga san Gado e feni bun, na a fasi fa onvolmaakti libisma kan du disi. Te wan sma e vorm na inisei sma di a de na wan fasi di Gado feni bun, dan a e „kisi ati”.—Odo 9:4; 19:8.

5, 6. Fa papa nanga mama kan yepi den pikin fu den fu „kisi ati”?

⁵ ¿Papa nanga mama kan yepi den pikin fu den fu „kisi ati”? A tru taki no wan libisma kan poti wan bun ati go na ini wan tra sma. Ibri wan fu wi kisi wan fri wani, èn furu e anga fu san wi e gi wisrefi pasi fu denki. Ma nanga a koni fu man si sani krin, papa nanga mama furutron kan meki a pikin fu den taki san a e firi èn e denki, fu kon sabi san de na ini na ati èn pe yepi de fanowdu. Gebroiki aksi soleki ’San yu e feni fu disi?’ èn ’San yu ben sa wani du trutru?’ Arki dan nanga pasensi. No meki wan tumusi bigi sani fu den sani di a taki (Odo 20:5). Wan sfeer fu switifasi, nanga wan sfeer pe unu e frustan makandra, èn fu lobi de prenspari efu yu wani doro na ati.

⁶ Fu tranga den bun gwenti, dan taki furutron fu den froktu fu a yeye — ibri pisi fu en — èn wroko makandra leki wan osofamiri fu kweki den froktu (Galasiasma 5:22, 23). Bow lobi gi Yehovah èn gi Yesus Krestes, no fu di wi e taki dati wi musu lobi den nomo, ma fu di wi e taki fu den reide fu san ede wi lobi den èn fa wi kan sori a lobi dati (2 Korentesma 5:14, 15). Tranga a winsi fu du san yoisti fu di yu e taki-go-taki-kon fu den winimarki di sa kon fu dati. Tranga na angri fu no abi takru prakseri, fu no taki fu sani di no bun, èn fu no abi takru maniri fu di yu e taki fu den takru bakapisi fu den sortu sani disi (Amos 5:15; 3 Yohanes 11). Sori fa prakseri, wortu nanga maniri — efu dati bun noso takru — kan abi krakti tapu a matifasi di wan sma abi nanga Yehovah.

7. San kan du fu yepi pikin fu lusu problema èn fu teki bosroiti na wan fasi di sa meki den tan krosibei fu Yehovah?

⁷ Te wan pikin abi wan problema noso a musu teki wan prenspari bosroiti, dan wi ben kan aksi en: ’Fa yu denki taki Yehovah e si disi? San yu sabi fu Yehovah di e meki taki yu e taki dati? ¿Yu begi en fu dati?’ Te yu e bigin so fruku leki a kan, dan yu kan yepi den pikin fu yu fu bow wan gwenti pe ala ten den e du seryusu muiti fu de seiker san Gado wani èn dan du en. Te den kon abi wan krosibei èn persoonlijk matifasi nanga Yehovah, dan den sa feni prisiri fu waka na ini den pasi fu en (Psalm 119:34, 35). Disi sa gi den warderi gi a grani di den abi fu abi demakandra nanga a gemeente fu a tru Gado.

A Sreka di Wi E Sreka Wisrefi gi den Gemeente Konmakandra

8. (a) San kan yepi wi fu du ala sani di wi musu du na ini na osofamiri studie fu wi? (b) O prenspari a studie disi de?

⁸ Furu sani de di wi musu poti prakseri na tapu na a ten fu na osofamiri studie. Fa yu kan du den alamala? A no kan fu du ala sani na a srefi ten. Ma kande yu sa feni en wan yepi fu meki wan lijst fu den sani di yu wani du (Odo 21:5). Wanwan leisi, luku a lijst baka èn luku san abi spesrutu prakseri fanowdu. Abi wan fayafaya belangstelling gi a gro fu ibri memre fu na osofamiri. A seti disi fu na osofamiri studie de wan prenspari pisi fu a leri di Kresten e kisi, wan seti di e sreka wi gi a libi now èn e sreka wi gi a têgo libi di e kon.—1 Timoteus 4:8.

9. Sortu marki di abi fu du nanga a sreka di wi e sreka wisrefi gi gemeente konmakandra wi ben sa kan wroko safrisafri na dati na den osofamiri studie fu wi?

⁹ ¿Yu e sreka den gemeente konmakandra tu te yu e studeri nanga yu osofamiri? Yu ben kan wroko na furu marki doronomo te yu e studeri makandra. Son wan fu den kan teki furu wiki, mun, noso srefi yari fu doro. Luku wan tu fu den marki disi: (1) ibriwan sma na ini na osofamiri sreka fu gi wan piki na den gemeente konmakandra; (2) ibriwan fu den e wroko fu gi komentaar nanga den eigi wortu; (3) e taki fu wan tekst na ini en komentaar; èn (4) e ondrosuku a tori nanga a marki fu gebroiki en gi ensrefi. Ala den sani disi kan yepi wan sma fu meki waarheid tron wan pisi fu en.—Psalm 25:4, 5.

10. (a) Fa wi ben kan poti prakseri na ibriwan fu den gemeente konmakandra fu wi? (b) Fu san ede disi warti?

¹⁰ Srefi efu na osofamiri studie fu yu furutron abi en gron tapu na artikel fu a Waktitoren-studie fu a wiki, dan no denki lekti fu a prensparifasi fu a sreka di yu e sreka yusrefi wawan noso leki osofamiri gi a Gemeente Bukustudie, a Theokrasia Diniwroko-skoro, nanga a Diniwroko-konmakandra. Den sani disi na prenspari pisi tu fu a programa fu leri wi fu waka a pasi fu Yehovah. Kande ten na ten yu man fu sreka den konmakandra leki osofamiri. Te yu e wroko makandra, dan den bekwaamfasi fu studeri e kon moro bun. Leki wan bakapisi fu dati, moro winimarki sa kon fu den konmakandra srefi. Boiti tra sani, taki fu den winimarki fu sreka den konmakandra disi doronomo èn a prensparifasi fu abi wan faste ten di poti na sei gi dati.—Efeisesma 5:15-17.

11, 12. Fa a sreka di wi e sreka wisrefi fu singi gi a gemeente ben sa gi wi wini, èn fa wi ben sa kan du disi?

¹¹ Na den „Gado Pasi fu Libi” Kongres, wi ben kisi a deki-ati fu sreka gi wan tra pisi fu den konmakandra fu wi — a singi di wi e singi. ¿Yu ben du dati? Te yu e du dati, dan dati kan yepi wi fu kerfu Bijbel waarheid na ini wi frustan nanga wi ati èn na a srefi ten meki a prisiri fu wi na den gemeente konmakandra e kon moro bigi.

¹² Te wi e sreka wisrefi tu fu leisi den wortu èn taki san den wortu wani taki na ini wan tu fu den singi di poti tapu schema, dan dati kan yepi wi fu singi nanga wi ati. Na ini Israèl fu owruten, moro furu den ben e gebroiki poku preisani moro furu na ini na anbegi (1 Kroniki 25:1; Psalm 28:7). ¿Wan sma na ini yu osofamiri e prei wan poku preisani? Yu ben kan gebroiki a preisani dati fu oefen wan fu den Kownukondre singi gi a wiki, èn dan singi a singi leki osofamiri. Wan tra sani na fu gebroiki den singi di de kaba tapu cassette-lolo noso cd. Na ini wan tu kondre den brada fu wi e singi heri moi sondro poku di e prei. Te den e waka tapu pasi noso e wroko na ini den veld, dan furutron den e nyan bun fu den singi di poti tapu schema gi den gemeente konmakandra na ini a wiki dati.—Efeisesma 5:19.

A Sreka Di Osofamiri E Sreka gi Velddienst

13, 14. Fu san ede osofamiri takimakandra di e sreka wi ati gi a velddienst, prenspari?

¹³ Fu gi trawan kotoigi fu Yehovah èn fu a prakseri fu en, na wan prenspari pisi fu wi libi (Yesaya 43:10-12; Mateus 24:14). Efu wi yongu noso owru, wi e nyan bun moro fu a wroko disi èn wi kan du moro bun sani efu wi sreka. Fa wi kan du disi na ini na osofamiri?

¹⁴ Soleki fa a de nanga ala tori di abi fu du nanga na anbegi fu wi, a de prenspari fu sreka na ati fu wi. Wi no musu taki wawan san wi sa du, ma so srefi fu san ede wi o du dati. Na ini a ten fu Kownu Yosafat, a pipel ben e kisi tirilin na ini a wet fu Gado, ma Bijbel e fruteri wi taki den no „ben sreka den ati ete”. Disi ben meki taki sani ben kan kori den puru fu a tru anbegi (2 Kroniki 20:33; 21:11). A marki fu wi no de fu poti den yuru nomo di wi ben man wroko na ini a velddienst, èn a no de fu prati lektuur nomo. A diniwroko fu wi musu de wan fasi fu sori a lobi fu wi gi Yehovah èn gi sma di musu kisi na okasi fu teki a libi (Hebrewsma 13:15). Na wan wroko pe wi de „kompe-wrokoman fu Gado” (1 Korentesma 3:9). ¡Disi na wan bigi grani! Te wi e du a diniwroko, dan wi e du dati makandra nanga den santa engel (Openbaring 14:6, 7). ¡Sortu moro bun ten ben kan de fu bow warderi gi a sani disi, leki na ini den osofamiri takimakandra, efu na ini na alawiki studie fu wi noso te wi e taki fu wan bun tekst fu na Ondrosoekoe den Boekoe foe bijbel ala dei fu wi!

15. O ten wi ben sa kan sreka gi a velddienst leki wan osofamiri?

¹⁵ ¿Yu e gebroiki ten sontron fu na osofamiri studie fu yepi den memre fu yu osofamiri fu sreka gi a velddienst fu a wiki? A kan gi yu furu wini te yu e du dati (2 Timoteus 2:15). A kan yepi fu meki a diniwroko fu den abi wan marki èn bun bakapisi. Sontron yu ben kan gebroiki wan heri studie fu sreka so wan sani. Moro furu yu ben kan taki fu difrenti pisi fu a velddienst na ini syatu takimakandra na a kaba fu na osofamiri studie noso na wan tra ten na ini a wiki.

16. Taki fu a waarde fu ibriwan fu den stap di skrifi na ini a paragraaf.

¹⁶ Osofamiri studie ben sa kan poti prakseri na wan tu difrenti stap, soleki den wan disi: (1) Sreka wan pristeri di oefen bun èn wan tekst fu leisi na ini Bijbel efu na okasi de gi dati. (2) Sorgu taki ibriwan sma abi, efu a kan, en eigi velddienst tas, wan Bijbel, wan buku fu meki notisi, wan pen noso potlood, traktaat, nanga tra lektuur di de na ini wan bun kondisi. A velddienst tas no abi fu diri, ma a musu krin. (3) Taki pe èn fa fu du okasi kotoigi. Wroko nanga makandra na ini a velddienst ibri leisi baka te yu gi a tirilin disi. Gi bodoi di kan de wan yepi, ma no gi rai na tapu tumusi furu penti.

17, 18. (a) Sortu sreka leki wan osofamiri kan yepi fu meki wi abi moro bun bakapisi na ini a velddienst fu wi? (b) Sortu pisi fu a sreka disi wi ben sa kan du ibri wiki?

¹⁷ Wan prenspari pisi fu a wroko di Yesus Krestes ben gi den bakaman fu en, ben de a meki fu disipel (Mateus 28:19, 20). A meki fu disipel wani taki moro leki fu preiki. A e aksi taki wi musu gi leri. Fa na osofamiri studie fu yu kan yepi yu fu man abi bun bakapisi fu du disi?

¹⁸ Leki wan osofamiri, taki na suma a ben sa bun fu tyari gobaka. Son wan fu den ben kan teki lektuur; son wan kande ben arki nomo. Kande wi ben miti den ini na oso-fu-oso wroko noso na okasi preiki na a wowoyo noso na skoro. Meki a Wortu fu Gado tiri yu (Psalm 25:9; Esekièl 9:4). Bosroiti suma ibriwan fu unu wani fisiti na ini a wiki dati. Fu san yu sa taki? Takimakandra nanga na osofamiri kan yepi ibri memre fu sreka densrefi. Meki notisi fu spesrutu tekst fu taki nanga sma di abi belangstelling èn so srefi fu bun penti na ini a brochure San Gado e aksi foe wi? noso a buku Sabi di e tjari joe go na têgo libi. No pruberi fu taki fu tumusi furu sani na wán gobaka. Libi wan aksi gi na ososma di sa kisi piki na a tra fisiti. Yu ben kan meki en wan pisi fu na alawiki gwenti fu na osofamiri fu sreka na fesi sortu gobaka ibriwan sma o tyari, o ten a o du dati èn san a e howpu fu doro nanga dati. Te yu e du disi dan dati kan yepi meki a velddienst fu a heri osofamiri abi moro bun bakapisi.

Go Doro fu Leri den a Pasi fu Yehovah

19. Efu den memre fu osofamiri wani tan waka na tapu a pasi fu Yehovah, san den musu ondrofeni, èn san kan de wan yepi gi disi?

¹⁹ A de wan tyalensi fu de wan edeman fu wan osofamiri na ini a godelowsu grontapu disi. Satan nanga den ogri yeye fu en e du tranga muiti fu pori a yeyefasi fu den dinari fu Yehovah (1 Petrus 5:8). Boiti dati, na ini a ten disi furu druk de tapu unu papa nanga mama, spesrutu unu papa nanga mama di de sondro patna. A muilek fu feni ten fu du ala den sani di unu ben sa wani du. Ma a warti a muiti, srefi te unu kan gebroiki wán bodoi nomo na ibri leisi, èn safrisafri e meki na osofamiri studie programa fu unu kon moro bun. Te wi e si den wan di de krosibei fu wi e waka na wan loyaal fasi na tapu a pasi fu Yehovah, dan disi na wan pai di e prisiri na ati. Fu waka nanga bun bakapisi na tapu a pasi fu Yehovah, dan den memre fu osofamiri musu feni en wan prisiri sani fu de na den gemeente konmakandra èn fu abi wan prati na ini a velddienst. Fu man meki dati pasa, dan den musu sreka densrefi — wan sreka di e tranga na ati èn di e sreka ibri sma fu abi wan bun prati.

20. San kan yepi moro papa nanga mama fu ondrofeni a prisiri di skrifi na 3 Yohanes 4?

²⁰ Fu den wan di a ben yepi na yeye fasi, na apostel Yohanes ben skrifi: „Mi abi no wan moro bigi reide fu de nanga tangi, leki den sani disi taki, mi e yere dati den pikin fu mi e tan waka na ini waarheid” (3 Yohanes 4). Osofamiri studie di e hori nanga krinkrin marki na prakseri èn edeman fu osofamiri di e handri na wan switi fasi, na wan fasi di e yepi den fanowdu di ibri memre fu na osofamiri abi, kan du furu fu meki na osofamiri abi so wan prisiri. Te wi e bow warderi gi Gado pasi fu libi, dan a papa nanga a mama e yepi den osofamiri fu den fu nyan bun fu a moro bun pasi fu libi.—Psalm 19:7-11.

¿Yu Kan Tyari Disi Kon na Krin?

◻ Fu san ede a de so prenspari gi den pikin fu wi fu sreka gi den konmakandra?

◻ Fa a papa nanga a mama kan yepi den pikin fu den fu „kisi ati”?

◻ Fa na osofamiri studie fu wi kan yepi fu sreka gi ala den konmakandra?

◻ Fa a sreka gi velddienst leki wan osofamiri ben kan yepi wi fu abi moro bun bakapisi?