Man „nanga den srefi firi leki di foe wi”

A BEN de wan kownoe nanga wan profeiti ma a ben de wan lobi-ati papa toe. Wan manpikin foe en ben kon kisi bigifasi nanga heimemre. A manpikin disi ben abi a fasti bosroiti foe proeberi teki a kownoe-stoeroe abra èn a ben bigin wan borgoefeti, nanga na prakseri foe kiri en papa. Ma na ini a feti di ben kon baka dati, a ben de a manpikin di dede. Di a papa ben kon sabi taki en manpikin dede, a ben go en wawan na wan dak-kamra èn a ben krei: „Mi manpikin Absalom, mi manpikin, mi manpikin Absalom! O moro betre mi ben dede, misrefi, na presi foe joe, Absalom mi manpikin, mi manpikin!” (2 Samuèl 18:33) A papa ben de kownoe David. Neleki den tra profeiti foe Jehovah, a ben de „wan man nanga den srefi firi leki di foe wi”. — Jakobus 5:17.

Na ini bijbel ten, den man nanga oema di ben taki gi Jehovah, ben abi ala sortoe posisi na sociaal èn na ekonomia sei èn den ben de gewoon sma. Neleki wi, den ben abi problema èn den ben pina foe onvolmaaktifasi ede. Soema ben de wan toe foe den profeiti disi èn fa den firi foe den ben de den srefi firi leki di foe wi?

Moses ben de wan sma di fosi ben froetrow toemoesi na tapoe ensrefi, ma di ben kon tron wan sma di ben abi safri-ati

Wan prenspari profeiti na ini den ten bifo den kresten, ben de Moses. Ma ala di a ben abi 40 jari kaba, a no ben de srekasreka ete foe wroko leki Jehovah en takiman. Foe san ede? Na ini a ten di Farao foe Egipti ben kwinsi den brada foe Moses, Moses ben gro kon bigi na ini na osofamiri foe Farao èn a ben de „krakti na ini den wortoe foe en nanga den doe foe en”. A tori e froeteri wi: „A ben prakseri taki den brada foe en ben o froestan taki nanga jepi foe en, Gado ben e gi den froeloesoe.” Foe di a ben froetrow toemoesi foeroe tapoe ensrefi, meki a ben opo feti gi wan Hebrew srafoe nanga tranga, èn a ben kiri wan Egiptisma. — Tori foe den Apostel 7:22-25; Exodus 2:11-14.

Now Moses ben moesoe lowe èn den fotenti jari baka dati a ben tan leki wan skapoeman na ini Midian di ben de farawe (Exodus 2:15). Na a kaba foe a ten dati, Jehovah ben gi Moses di ben abi 80 jari now, a wroko foe wan profeiti. Ma Moses no ben froetrow toemoesi foeroe tapoe ensrefi moro. A ben firi taki a no ben de bekwaam kwetikweti, taki a ben tweifri na a gi di Jehovah ben gi en a wroko foe wan profeiti, foe di a ben taki den sani soleki: „Soema na mi, taki mi moesoe go na Farao?” èn: „San mi sa taigi?” (Exodus 3:11, 13) Moses, di ben kisi Jehovah en lobi-ati djaranti nanga jepi, ben go doe en wroko nanga foeroe boen bakapisi.

Oiti a pasa taki foe di joe, neleki Moses, ben froetrow toemoesi foeroe na tapoe joesrefi, joe doe noso joe taki sani di ben sori foe de law sani baka ten? Efoe dati de so, abi a sakafasi foe teki moro leri. Noso joe ben firi taki joe no de bekwaam foe doe son kresten frantiwortoe? Na presi foe weigri, teki a jepi di Jehovah nanga en organisâsi e gi. A Sma di ben jepi Moses, kan jepi joe toe.

Elia ben abi den srefi firi leki di foe wi na ini wan ten foe tranga leri

„Elia ben de wan man nanga den srefi firi leki di foe wi, èn tokoe a ben begi na ini begi foe alen no kon, èn dri jari nanga siksi moen langa alen no ben fadon na tapoe a kondre” (Jakobus 5:17). A begi foe Elia ben de akroederi a wani foe Jehovah foe gi wan nâsi di ben gowe libi En, tranga leri. Ma tokoe Elia ben sabi taki a dreiten gi san a ben begi, ben o meki libisma pina. Israèl ben de wan kondre pe moro foeroe sma ben wroko gron; dow nanga alen ben hori a pipel na libi. Wan dreiten di ben o hori, ben o tjari foeroe pina kon. Den prani ben o drei gowe; groentoe nanga froktoe no ben o gro. Den osometi di sma ben gebroiki gi wroko èn leki sani foe njan ben o dede, èn son osofamiri ben o kon ini a kefar taki den ben o dede foe angri. Soema ben o pina moro foeroe? A gewoon pipel. Wan weduwe ben taigi Elia baka ten, taki a ben abi soso wan pikinso blon nanga wan pikinso oli. A ben de seiker taki heri esi en nanga en manpikin ben o dede foe angri (1 Kownoe 17:12). Foe begi leki fa Elia ben doe dati, ben wani taki dati a ben moesoe abi a tranga bribi taki Jehovah ben o sorgoe gi den foetoeboi foe En — goedoewan noso pôtiwan — di no ben libi a troe anbegi. Soleki fa a tori e sori, dan Elia en froewakti ben kon troe. — 1 Kownoe 17:13-16; 18:3-5.

Dri jari baka dati, di Jehovah ben sori taki baka wan sjatoe pisi ten a ben o tjari alen kon, den tranga begi di Elia ben begi ibritron baka e sori taki a ben wani troetroe foe dreiten kon na wan kaba, ala di a ben „kindi nanga en fesi go na gron èn ben tan hori en fesi na mindri en kindi” (1 Kownoe 18:42). Ibritron baka a ben gi en foetoeboi tranga: „Grantangi, kren go na tapoe. Loekoe go na sei foe a se” foe si efoe Jehovah ben arki den begi foe en (1 Kownoe 18:43). A moesoe ben breiti troetroe di te foe kaba, leki wan piki na tapoe den begi foe en, „hemel ben gi alen èn a gron ben meki en froktoe gro”! — Jakobus 5:18.

Efoe joe na wan papa noso mama noso wan owroeman na ini a kresten gemeente, dan joe abi foe feti nanga dipi firi kande te joe e gi tranga leri. Ma den firi dati di libisma abi, moesoe tjari kon ini balansi nanga na overtoigi di joe abi taki tranga leri de fanowdoe son leisi èn taki te a gi nanga lobi, dan „a e meki froktoe foe vrede gi den wan di oefen densrefi nanga dati, namkoe regtfardikifasi” (Hebrewsma 12:11). Den boen bakapisi di e kon te wi e gi jesi na den wet foe Jehovah na sani di wi wani ala ten. Neleki Elia, wi e begi nanga wi heri ati taki wi kan hori wisrefi na den.

Jeremia ben sori foe de nanga deki-ati, ala di a ben lasi-ati

Foe ala bijbel skrifiman di ben de, Jeremia ben de kande a wan di ben skrifi foe en eigi firi moro leki ala den trawan. Leki wan jongoeman a no ben wani teki a wroko di a ben kisi foe doe (Jeremia 1:6). Ma tokoe a ben go doro foe meki a wortoe foe Gado bekènti nanga foeroe deki-ati èn a ben kisi hebi gens foe kompe Israèlsma — foe kownoe te go miti gewoon sma. Son leisi, a gens dati ben meki a kisi atibron èn a ben meki en krei (Jeremia 9:3; 18:20-23; 20:7-18). Na difrenti okasi, bigi groepoe sma ben fon en, sma ben naki en, den ben fasi en nanga neki èn nanga anoe na ini blòk, den ben trowe en na strafoe-oso, den ben pramisi foe kiri en, èn den ben libi en meki a dede na ini tokotoko na ondrosei foe wan leigi peti. Son leisi srefi a boskopoe foe Jehovah ben hati en, soleki fa wi kan si na den wortoe foe en: „O mi inibere, o mi inibere! Den skotoe foe mi ati e hati mi troetroe.” — Jeremia 4:19.

Tokoe, a ben lobi a wortoe foe Jehovah, èn a ben taki: „Joe wortoe e tron gi mi a prisiri èn a sani di e breiti mi ati” (Jeremia 15:16). Na a srefi joeroe, bigi broeja ben meki en bari gi Jehovah: „Foe troe joe e tron gi mi leki wan bedrigi sani, neleki watra di sori foe de sani di no de foe froetrow”, neleki a watra foe wan kriki di e drei esi-esi (Jeremia 15:18). Ma tokoe Jehovah ben froestan den firi di ben trobi en èn A ben tan gi en jepi so taki a ben kan doe a wroko di a ben kisi foe doe. — Jeremia 15:20; loekoe so srefi 20:7-9.

Te joe e doe joe diniwroko, dan neleki Jeremia, joe e kisi foe doe nanga bigi broeja noso gens? Froetrow tapoe Jehovah. Tan waka baka a tiri foe en, èn Jehovah so srefi sa pai joe foe den moeiti di joe e doe.

Jesus ben abi den srefi firi leki di foe wi

A moro bigi profeiti foe ala ten ben de Gado en eigi Manpikin, Jesus Krestes. Ala di a ben de wan volmaakti man, tokoe a no ben hori den firi foe en foe no sori. Nofotron wi e leisi taki a ben abi dipi firi, di moesoe ben de foe si na en fesi èn na a fasi fa a ben doe nanga trawan. Nofotron Jesus „ben kisi sari”, èn a ben gebroiki den srefi wortoe dati foe taki foe den sma na ini den agersitori foe en. — Markus 1:41; 6:34; Lukas 10:33.

A moesoe ben opo en sten di a ben jagi den bisnisman èn den meti poeroe foe a tempel nanga den wortoe: „Poeroe den sani disi gowe foe dja!” (Johanes 2:14-16) Di Petrus ben gi en a rai: „De boen gi joesrefi, Masra”, a ben gi a krakti piki: „Komoto na mi fesi, Satan!” — Mateus 16:22, 23.

Jesus ben abi spesroetoe lobi gi wan toe foe den sma di ben de troetroe krosibei na en. Den ben taki foe na apostel Johanes leki a „disipel di Jesus ben lobi” (Johanes 21:7, 20). Èn wi e leisi: „Jesus now ben lobi Marta nanga en sisa nanga Lasarus.” — Johanes 11:5.

Sani ben kan hati a firi foe Jesus toe. Di Jesus ben firi sari foe di Lasarus ben dede, „Jesus ai ben lon watra” (Johanes 11:32-36). Jesus, di ben sori taki en ati ben sari foe di Judas Iskariòt ben tori en, ben taki den toemoesi sari wortoe di komoto na den Psalm: „A sma di ben gwenti njan mi brede, opo en iri kontrari mi.” — Johanes 13:18; Psalm 41:9.

Srefi di Jesus ben abi boen bigi skin-ati na a pina-oedoe, a ben sori taki a ben abi troetroe firi gi sma. Na wan safoe-ati fasi a ben gi en mama na „a disipel di a ben lobi” (Johanes 19:26, 27). Di Jesus ben man si krin taki wan foe den ogriman di ben anga na en sei ben abi berow, dan Jesus ben taki na wan sari-atifasi: „Joe sa de nanga mi na ini Paradijs” (Lukas 23:43). Wi kan firi a fasi fa den firi foe en ben broko kon wantronso di a ben bari: „Mi Gado, mi Gado, foe san ede joe gowe libi mi?” (Mateus 27:46) Èn den wortoe di a ben taki di a ben de foe dede, e sori taki a abi troetroe lobi nanga froetrow: „Tata, na ini joe anoe mi e poti mi jeje.” — Lukas 23:46.

Fa ala den sani disi de wan bigi djaranti gi wi! „Bika wi no abi leki granpriester, wan sma [Jesus] di no kan firi nanga wi na ini den swakifasi foe wi, ma wan sma di den ben tesi neleki wi na ini ala fasi, ma sondro sondoe.” — Hebrewsma 4:15.

A froetrow di Jehovah abi

Noiti Jehovah ben sari foe den takiman di a ben teki. A ben sabi taki den ben de loyaal na en, èn na wan sari-ati fasi a ben loekoe pasa den swakifasi foe den sma di ben de onvolmaakti. Ma tokoe a ben froewakti taki den ben o doe a wroko di den ben kisi foe doe. Nanga a jepi foe en den ben man doe disi.

Meki wi abi a pasensi foe sori taki wi e froetrow den loyaal brada nanga sisa foe wi. Den sa de onvolmaakti ala ten na ini a seti foe sani disi, neleki wi. Ma tokoe, noiti wi no moesoe si den brada foe wi leki sma di no warti foe kisi wi lobi èn di no warti foe wi teki notisi foe den. Paulus ben skrifi: „Ma wi di tranga, moesoe tjari den swakifasi foe den wan di no tranga, èn wi no moesoe plisi wisrefi.” — Romesma 15:1; Kolosesma 3:13, 14.

Den profeiti foe Jehovah ben abi ala den firi di wi abi. Ma tokoe den ben froetrow tapoe Jehovah, èn Jehovah ben jepi den. Moro srefi, Jehovah ben gi den reide foe de nanga prisiri — wan boen konsensi, a sabi di den ben sabi taki a ben feni den boen, loyaal kompe di ben horibaka gi den, èn a djaranti taki den ben o kisi wan kolokoe tamara (Hebrewsma 12:1-3). Meki wi so srefi tan krosibei na Jehovah ala di wi de nanga froetrow dorodoro, èn abi a srefi bribi leki di foe den profeiti foe owroeten, man „nanga den srefi firi leki di foe wi”.

Datra, kroetoeman, nanga Jehovah Kotoigi

MAART 1995, Jehovah Kotoigi ben orga toe konmakandra na Brasjonkondre. San ben de a marki? Foe soekoe wan fasi foe wroko makandra nanga datra, nanga sma di e doe datrawroko èn nanga kroetoeman, afkati nanga sma di e doe den sortoe wroko dati te wan sikisma di de na ini ati-oso na wan Kotoigi foe Jehovah èn no man teki broedoetransfusie. — Tori foe den Apostel 15:29.

Na wan sari, taki son leisi datra no ben hori den winsi foe sikisma di ben de Kotoigi na prakseri èn den ben soekoe primisi foe kroetoebangi foe dwengi a sma foe teki broedoetransfusie. Na ini den situwâsi dati pe disi man, den Kotoigi ben gebroiki ibri fasi gi san a wet e gi pasi foe man kibri densrefi. Ma tokoe den ben feni en moro betre foe wroko makandra, na presi foe feti. So boen, den konmakandra ben poti krakti na tapoe taki foeroe fasi de foe dresi sma sondro foe gebroiki broedoetransfusie nanga a srefi sortoe broedoe èn taki Jehovah Kotoigi e teki den fasi disi nanga prisiri.a

Wan konmakandra foe a Regionale Raad foe Datratori foe São Paulo ben horibaka kaba gi a prakseri foe den Kotoigi. Na ini januari 1995 den ben bosroiti taki efoe wan sikisma abi wan problema nanga a fasi fa wan datra wani dresi en, dan a sma dati abi a reti foe weigri dati èn a abi a reti foe teki wan tra datra.

A de foe prèise, taki hondrohondro sma de now na ini a Brasjon datra libimakandra di wani dresi sikisma di di wani dati sondro foe gebroiki broedoe. Sensi den konmakandra ben hori na ini maart 1995, a wrokomakandra na mindri datra, kroetoeman, nanga Jehovah Kotoigi na Brasjonkondre kon de moro betre troetroe. Na ini 1997 a Brasjon tijdschrift di e taki foe datratori, Âmbito Hospitalar, tjari wan artikel kon na doro pe den ben poti krakti na tapoe a reti di Jehovah Kotoigi abi foe sma lespeki a prakseri foe den ini a tori foe broedoe. Now sma na ala sei e erken taki, soleki fa den Regionale Raad foe Datratori na ini den distrikt Rio de Janeiro nanga São Paulo ben taki, dati „a plekti di wan datra abi foe kibri a libi foe sikisma no moesoe de moro tranga leki a plekti di a abi foe horibaka gi a reti di a sikisma abi foe teki en eigi bosroiti”.