Gado de wan troetroe sma gi joe?

TE JOE e ondrofeni problema di e meki joe firi brokosaka, joe de klariklari dan foe go taki nanga Gado na ini begi? Efoe joe e doe dati, joe e froestan taki joe e taki nanga wan troetroe Sma?

Di Jesus Krestes ben poti sma prakseri tapoe en hemel Tata, a ben taki: „A Sma di seni mi de troetroe” (Johanes 7:28). Ija, Jehovah Gado de wan troetroe Sma, èn te sma e begi en a de leki a sma e drai go taki nanga wan krosibei libisma mati foe kisi jepi noso rai. Foe Gado kan jere wi, dan a no de foe taki dati den begi foe wi moesoe doro a marki foe san bijbel e aksi foe wan begi di a kan teki. Foe eksempre, wi moesoe go nanga sakafasi na a „Jereman foe begi”, nanga jepi foe en Manpikin, Jesus Krestes. — Psalm 65:2; 138:6; Johanes 14:6.

Kande son sma e prakseri taki foe di sma no man si Gado, a no de wan persoon. Gi den a kan gersi leki Gado no de wan troetroe Sma. Srefi son kresten di leri foe den wondroe eigifasi foe Gado, kan feni en hebi son tron foe froestan o troetroe a de. Disi na san joe ondrofeni? Efoe dati de so, san kan jepi foe meki Jehovah de wan troetroe Sma gi joe?

Studeri den Boekoe foe bijbel

Joe e studeri den Santa Boekoe foe bijbel ala ten? O moro foeroe èn o moro dipi den pisi ten de di joe e studeri bijbel, o moro Jehovah sa kon de wan troetroe Sma gi joe. So boen a bribi foe joe sa kisi krakti, te joe loekoe en boen a sa kan meki a de neleki joe ’e si a Wan di wi no kan si’ (Hebrewsma 11:6, 27). Na a tra sei, studie foe bijbel di e doe wanwan tron noso studie di e doe te wi e kisi wan firi foe doe en no man abi wan prenspari krakti tapoe a bribi foe wi.

Meki wi agersi en: Kon meki wi taki dati joe datra e taigi joe foe gebroiki wan spesroetoe dresi toe tron wan dei foe meki wan krasikrasi di e horidoro nomo gowe. A krasikrasi foe joe o gowe efoe joe e gebroiki a dresi wan tron noso toe tron wan moen nomo? A no sori so. Na a srefi fasi, a psalm singiman e gi wi wan „dresi di skrifi” gi gosontoe na jejefasi. Leisi a Wortoe foe Gado „nanga wan safri sten dei nanga neti” (Psalm 1:1, 2). Efoe wi wani kisi a wini di e kon moro nanga moro, dan wi moesoe handri akroederi a „dresi di skrifi” — poti boen prakseri ibri dei na tapoe a Wortoe foe Gado nanga jepi foe kresten poeblikâsi. — Josua 1:8.

Joe ben sa wani foe meki den pisi ten di joe e studeri tranga joe bribi moro? Djaso joe abi wan rai: Baka te joe e leisi wan kapitel na ini a Nieuwe-Wereldvertaling van de Heilige Schrift (Njoen-Grontapoevertaling foe den Santa Boekoe foe bijbel) noso wan tra bijbel di abi verwijstekst, dan teki wan vers di moi srefisrefi èn soekoe den bijbeltekst di den e sori go na den. A sani disi sa meki a studie foe joe kon abi moro wini, èn sondro degedege a wánfasi di de na ini bijbel sa naki joe ati. Na a tra sei, a sa meki taki a Skrifiman foe en, Jehovah Gado, kon de wan moro troetroe Sma gi joe.

Te joe e gebroiki den verwijstekst, dan dati kan meki joe kon sabi den profeititori foe bijbel moro boen èn a kontroe foe den toe. Kande joe sabi prenspari bijbel profeititori boen, soleki den wan di abi foe doe nanga a pori di den Babilonsma ben o pori Jerusalem. Ma bijbel abi wan heri groepoe profeititori nanga a kontroe foe den di abi foe doe nanga makandra. Son wan foe den disi sma no sabi srefisrefi.

Foe eksempre, leisi a profeititori di e taki foe a strafoe di ben o gi te wan sma ben o bow Jerikow baka èn baka dati loekoe fa a kon troe. Josua 6:26 e taki: „Josua ben sweri na a spesroetoe ten dati, foe di a ben e taki: ’A man di e opo taki a e bow a foto Jerikow baka, floekoe sa de na tapoe en na fesi foe Jehovah. Te a meki a fondamenti foe en a sa kostoe en a fosi geborewan foe en èn te a anga den doro dan dati sa kostoe en a moro jongoewan foe en.’ ” A kontroe feni presi so wan 500 jari na baka, bika wi e leisi na 1 Kownoe 16:34: „Na ini den dei foe [Kownoe Akab] Hièl a Bethelsma ben bow Jerikow baka. Di a meki a fondamenti foe en, a lasi Abiram a fosi geborewan foe en, èn di a anga den doro, a lasi a moro jongoewan foe en, akroederi den wortoe foe Jehovah di a ben taki nanga jepi foe Josua, a manpikin foe Nun.”a Wan troetroe Gado wawan ben kan meki den profeititori dati taki nanga jepi foe en santa jeje èn sorgoe taki den e kon troe.

Ala di joe e leisi bijbel, kande joe kan kisi wan tranga lostoe foe kon sabi wan spesroetoe penti. Foe eksempre, kande joe sa aksi joesrefi omeni jari de na mindri wan profeititori nanga en kontroe. Na presi foe joe go aksi wan sma nomo, foe san ede joe no e doe moeiti joesrefi foe feni a piki? Nanga jepi foe tabel nanga bijbelstudie jepisani, soekoe den piki te leki joe feni den neleki joe ben sa meki serjoesoe moeiti foe man wroko nanga wan karta di e sori joe pe foe feni wan goedoe (Odo 2:4, 5). Efoe joe feni den piki dan dati sa wroko dipi tapoe a bribi foe joe èn a sa meki Jehovah Gado de wan moro troetroe Sma gi joe.

Begi doronomo èn nanga faja

No loekoe pasa a prenspari di begi nanga bribi prenspari. Den disipel foe Jesus ben poti a wantewante aksi disi: „Gi wi moro bribi” (Lukas 17:5). Efoe Jehovah no ben gersi troetroe gi joe, foe san ede joe no e begi en foe di joe abi moro bribi fanowdoe? Aksi joe hemel Tata, na wan fasi di e sori taki joe abi froetrow, foe en jepi joe foe en kon de wan troetroe Sma gi joe.

Efoe wan problema e gi joe broko-ede, teki joe ten foe taki na wan waran fasi nanga joe hemel Mati. Di Jesus ben e kon krosibei foe a dede di a ben o dede, a ben begi nanga faja. Ala di a ben kroetoe a relisi gwenti foe taki langa begi di ben abi a marki foe sma kan si na poebliki, a ben pasa wan heri neti en wawan na ini begi bifo a piki den 12 apostel a mindri trawan (Markus 12:38-40; Lukas 6:12-16). Wi ben sa kan leri wan lès toe foe Hana, na oema di ben tron a mama foe a profeiti Samuèl. Di a ben e angri foe kisi wan bakapikin di ben sa de man-nengre, „a ben e poeroe en heri ati kon na doro na ini begi na fesi Jehovah”. — 1 Samuèl 1:12.

San na a prenspari lès ini ala den sani disi? Efoe joe e howpoe foe kisi piki tapoe den begi foe joe, dan joe moesoe begi serjoesoe, nanga faja, doronomo — èn a no de foe taki, akroederi a wani foe Gado (Lukas 22:44; Romesma 12:12; 1 Tesalonikasma 5:17; 1 Johanes 5:13-15). Efoe joe e doe disi dan dati sa jepi joe foe Gado de wan troetroe Sma gi joe.

Poti prakseri na tapoe a kriawroko

A sortoe sma di wan artist de e tjari kon na krin na ini den skedrei di a e meki. Na a srefi fasi den „eigifasi . . . di sma no kan si nanga ai” foe Jehovah, a Sma di e denki fa foe seti sani èn a Kriaman foe na universum, sma e si krin na ini den sani di kria (Romesma 1:20). Te wi e poti prakseri soifri na tapoe a wroko foe Jehovah en anoe, dan wi e kisi wan moro boen froestan foe a sma di a de èn na so fasi a e kon de wan moro troetroe Sma gi wi.

Efoe joe e poti prakseri dipi na tapoe den sani di Gado ben kria, dan kande a troetori foe den eigifasi foe en sa naki joe ati srefisrefi. Foe eksempre, bodoi foe a man di fowroe man feni den pasi na loktoe pe den moesoe go kan meki a warderi di joe abi gi a koni foe Jehovah gro. Te joe e leisi foe na universum joe kan leri taki a Merki Pasi Sistema, di de so wan 100.000 leti-jari koti pasa a mindri foe en, na nomo wan foe miljardmiljard stari sistema na ini a heri universum. A sani dati no e naki joe ati srefisrefi foe a troefasi foe a koni foe a Kriaman?

Foe troe, a koni foe Jehovah na wan troetroe sani! Ma san dati wani taki gi joe? We, foe troe a no kan broeja foe den problema di iniwan foe wi sa tjari kon na en fesi na ini begi. Ija, srefi pikinso sabi foe kriatoeroe nomo kan meki taki Jehovah de wan moro troetroe Sma gi joe.

Waka nanga Jehovah

Joe srefi kan ondrofeni o troetroe Jehovah de? Ija, efoe joe de leki a getrow famiri edeman Noa. Ala ten a ben e gi jesi na Jehovah sote taki den ben kan taki: „Noa ben waka nanga a troe Gado” (Genesis 6:9). Noa ben libi leki Jehovah ben de leti na en sei. Gado kan de so wan troetroe Sma gi joe.

Efoe joe e waka nanga Gado, dan joe e poti froetrow na ini pramisi foe bijbel èn joe e handri akroederi den. Foe eksempre, joe e bribi den wortoe foe Jesus: „Tan soekoe fosi a kownoekondre nanga Gado regtfardikifasi, èn ala den tra sani disi [sani di wi abi fanowdoe na skinfasi] oenoe sa kisi toe” (Mateus 6:25-33). Foe troe, a no ala ten Jehovah kande sa gi joe den sani na a fasi di joe e froewakti foe kisi den. Tokoe, te joe begi èn baka dati e ondrofeni a jepi foe Gado, en sa de so wan troetroe Sma gi joe leki iniwan tra sma di de na joe sei.

So wan krosibei matifasi nanga Jehovah e gro te wan sma e horidoro foe waka nanga Gado. Loekoe Manuela, wan Kotoigi di e taki Spanjoro, di ondrofeni foeroe tesi. A e taki: „Ibritron te sani e gi mi broko-ede noso te mi de na ini nowtoe, mi poti a gronprakseri di de foe feni na Odo 18:10 na ini mi libi. Mi e lon go na Jehovah foe kisi jepi. Ala ten a de ’wan tranga toren’ gi mi.” Manuela kan taki disi baka 36 jari di a e froetrow tapoe Jehovah èn di a e ondrofeni a hori di Gado horibaka gi en.

A bigin joe bigin foe meki Jehovah tron a sma di joe e poti joe froetrow na tapoe? No lasi-ati efoe a matifasi nanga en no de ete san joe wani taki a moesoe de. Libi ibri dei leki wan sma di e waka nanga Gado. Te joe e bow wan fasi foe libi di e sori getrowfasi, dan joe sa njanboen foe wan moro krosibei matifasi nanga Jehovah. — Psalm 25:14; Odo 3:26, 32.

Wan tra fasi foe waka nanga Gado na foe meki a diniwroko foe en teki wi krinkrin abra. Te joe teki prati na ini a Kownoekondre preikiwroko, dan joe na wan kompe wrokoman nanga Jehovah (1 Korentesma 3:9). Efoe joe sabi disi dan dati kan jepi joe foe meki Gado de wan troetroe Sma srefisrefi gi joe.

A psalm singiman e gi deki-ati: „Poti joe pasi na tapoe Jehovah, èn froetrow na en tapoe, èn ensrefi sa handri” (Psalm 37:5). Noiti joe no moesoe mankeri foe poti awansi sortoe hebi noso broko-ede di joe abi na Jehovah tapoe. Ala ten joe moesoe loekoe na en foe kisi jepi nanga tiri. Efoe joe e froetrow na tapoe Gado foe di joe e tan begi doronomo èn ala ten joe e froetrow en sondro foe tweifri, joe sa abi wan firi foe seikerfasi bika joe sabi taki a no sa misi foe handri foe a boen foe joe. Joe abi froetrow te joe e go na Jehovah nanga den broko-ede foe joesrefi? Joe sa abi a froetrow — efoe Gado de wan troetroe Sma gi joe.

[Foetoewortoe]

[Prenki na tapoe bladzijde 21]

Meki den pisi ten te joe e studeri tranga joe bribi

[Prenki na tapoe bladzijde 22]

Meki ten gi doronomo, fajafaja begi

[Prenki na tapoe bladzijde 23]

Loekoe fa den eigifasi foe Gado e kon na krin ini kriatoeroe

[Sma di abi a reti foe a prenki]

Kownoebri: U.S. Fish and Wildlife Service, Washington, D.C./Dean Biggins; stari: fowtow: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands