ben begi: „Sori wi finifini fa fu teri den dei fu wi na so wan fasi taki wi kan kisi wan ati fu koni.” Gado en profeiti di ben abi sakafasi ben wani meki Yehovah sori en noso leri en nanga a pipel Israèl fu abi a koni fu warderi ’den dei fu den yari fu den’ èn fu gebroiki den na wan fasi di Gado feni bun.—Psalm 90:10, 12.

21. San wi musu du efu wi wani teri den dei fu wi fu gi Yehovah glori?

²¹ Spesrutu den yongu Kresten musu abi a fasti bosroiti fu arki a rai fu a sma di e tyari sani kon na wán, taki den musu prakseri a Kriaman. ¡Den abi tumusi moi okasi fu du santa diniwroko gi Gado! Ma awansi o owru wi de, efu wi e leri fa fu teri den dei fu wi fu gi Yehovah glori na ini „a ten [disi] fu a kaba”, dan wi sa man tan teri den fu têgo (Danièl 12:4; Yohanes 17:3). Ma fu du dati, wi musu memre a Gran Kriaman fu wi. Wi musu du wi heri fruplekti na Gado tu.

¿Yu E Du Ala Plekti Di Yu Abi na Gado?

„A tru Gado srefi sa krutu ibri sortu wroko di abi fu du nanga ibri sani di kibri, fu si efu a bun noso efu a takru.”—PREIKIMAN 12:14.

1. Sortu sani Yehovah sreka gi a pipel fu en?

YEHOVAH e yepi den sma di e tan memre en leki a Gran Kriaman fu den. En Wortu di skrifi nanga yepi fu santa yeye e gi den a sabi di den abi fanowdu fu plisi en dorodoro. A santa yeye fu Gado e tiri den fu du a wani fu en èn fu „tyari froktu ini ibri bun wroko” (Kolosesma 1:9, 10). Boiti dati, Yehovah e gebroiki „a getrow èn koni srafu” fu gi nyanyan na yeye fasi èn fu tiri den na theokrasia sei (Mateus 24:45-47). So bun, a pipel fu Gado e kisi blesi fu hemel na furu fasi, fu di den e dini Yehovah èn den e du a prenspari wroko fu preiki a bun nyunsu fu a Kownukondre.—Markus 13:10.

2. Sortu aksi kan opo kon di abi fu du nanga a diniwroko gi Yehovah?

² Den tru Kresten breiti taki den abi furu fu du na ini a santa diniwroko gi Yehovah. Ma son sma e lasi-ati kande èn den e denki taki a muiti fu den na fu soso. Son leisi fu eksempre, Kresten di gi densrefi abra na Gado e aksi densrefi kande efu na opregti muiti fu den warti trutru. Te wan osofamiri edeman e prakseri na osofamiri studie nanga den tra sani di e du, dan den sortu aksi disi kan kon na ini na ede fu en: ’¿Den sani di wi e du e plisi Yehovah trutru? ¿Wi e du ala plekti di wi abi na Gado?’ Den koni wortu fu a sma di e tyari sani kon na wán kan yepi wi fu gi wan piki na tapu den sortu aksi dati.

¿Ala Sani Na fu Soso?

3. San na wan tumusi bigi soso sani, soleki fa Preikiman 12:8 e taki?

³ Son sma e denki kande taki den wortu fu a koni man no e gi no wan sma furu deki-ati — awansi den na yongu sma noso owru sma. „’¡A moro bigi soso sani!’ na so a sma di e tyari sani kon na wán ben taki, ’Ala sani na fu soso’” (Preikiman 12:8). Fu taki en leti, a de a moro bigi soso sani fu no prakseri a Gran Kriaman na ini den yongu yari, fu kon owru sondro fu dini en, èn fu abi soso na owrudei leki buweisi taki den doro wan sani na ini a libi. Gi so wan sma ala sani ben de fu soso, noso no ben abi waarde, srefi te a dede leki wan sma di gudu èn di pôpi na ini a grontapu disi di de ini a makti fu a godelowsuwan Satan Didibri.—1 Yohanes 5:19.

4. Fu san ede wi kan taki dati a no ala sani na fu soso?

⁴ A no ala sani na fu soso gi den sma di e poti gudu na hemel leki getrow futuboi fu Yehovah (Mateus 6:19, 20). Den abi nofo fu du na ini a wroko fu Masra di e gi den prisiri, èn a wroko disi no de fu soso kwetikweti (1 Korentesma 15:58). ¿Ma efu wi de Kresten di gi wisrefi abra na Gado, dan wi e tan wroko tranga na a wroko di wi kisi fu Gado na ini den lasti dei disi? (2 Timoteus 3:1) ¿Noso wi e libi na wan fasi di no e difrenti furu fu a libi fu moro furu fu den sma na wi sei? Kande den abi kontakti nanga difrenti relisi èn kande den de fayafaya trutru ini a relisi fu den, fu di den go doronomo na den oso pe den e anbegi èn den e pruberi fu du san a fasi fu anbegi fu den e aksi fu den. A no de fu taki dati den a no preikiman fu a Kownukondre boskopu. Den no abi a soifri sabi taki disi na „a ten fu a kaba” èn den no e si taki a ten pe wi e libi na ini, na wan tumusi prenspari ten.—Danièl 12:4.

5. San wi musu du efu den aladei sani fu a libi tron a moro prenspari sani di wi e prakseri?

⁵ Yesus Krestes ben taki fu a muilek ten fu wi: „Neleki fa den dei fu Noa ben de, na so a denoya fu a Manpikin fu libisma sa de. Neleki fa den ben du na ini den dei dati bifo a frudu, den ben e nyan èn den ben e dringi, mansma ben e trow èn umasma den ben e gi fu trow, te leki a dei taki Noa ben go na ini na ark, èn den no ben poti prakseri na tapu te leki a frudu ben kon èn ben figi den alamala puru, na so a denoya fu a Manpikin fu libisma sa de” (Mateus 24:37-39). Te wan sma e nyan èn e dringi na wan bescheidenfasi, dan dati no fowtu, èn a trowlibi na wan sani di Gado srefi seti (Genesis 2:20-24). Ma te wi e frustan taki den aladei sani fu a libi tron a moro prenspari sani di wi e prakseri, dan fu san ede wi no e taki fu a tori disi na ini begi? Yehovah kan yepi wi fu poti Kownukondre afersi na a fosi presi, a kan yepi wi fu du san bun èn fu ala plekti di wi abi na en.—Mateus 6:33; Romesma 12:12; 2 Korentesma 13:7.

A Gi Di Wi Gi Wisrefi Abra na Gado èn den Plekti Di Wi Abi na En

6. Na sortu prenspari fasi son sma di dopu no e du a plekti di den abi na Gado?

⁶ Son Kresten di dopu musu begi fayafaya, bika den no e du den plekti fu a diniwroko di den ben teki na den tapu di den ben gi densrefi abra na Gado. Moro leki 300.000 sma dopu ibri yari wan tu yari kaba, ma a nomru fu ala den Kotoigi fu Yehovah di de aktief no e gro akruderi a nomru dati. Son sma di ben tron Kownukondre preikiman tapu fu meki a bun nyunsu bekènti. Ma ibriwan sma musu abi wan bun prati na a Kresten diniwroko bifo den e dopu. So bun, den sabi san na a wroko di Yesus ben gi ala den bakaman fu en: „Go . . . èn meki disipel fu sma fu ala nâsi, èn dopu den na ini a nen fu a Tata èn fu a Manpikin èn fu a santa yeye, èn leri den fu du ala den sani di mi komanderi unu” (Mateus 28:19, 20). Efu wan tumusi aparti sani soleki a gosontu noso wan tra sani pe den no man du noti na en no e hori den sma di dopu èn di no de wan aktief Kotoigi fu Gado nanga Krestes moro, dan den no e du ala plekti di den abi na a Gran Kriaman fu wi.—Yesaya 43:10-12.

7. Fu san ede wi musu kon makandra doronomo fu anbegi?

⁷ Israèl fu owruten ben de wan nâsi di ben gi ensrefi abra na Gado, èn akruderi a Wet frubontu, a pipel fu a nâsi disi ben abi plekti na Yehovah. Fu eksempre, ala mansma ben musu kon makandra gi den dri alayari fesa, èn den ben musu „kiri” wan man „puru” di fu espresi no ben hori a Paskafesa (Numeri 9:13; Lefitikus 23:1-43; Deuteronomium 16:16). Fu den Israèlsma ben kan du a plekti fu den na Gado leki en pipel di ben gi densrefi abra na en, dan den ben musu kon makandra fu anbegi en (Deuteronomium 31:10-13). No wan sani na ini a Wet ben taki: ’Du disi efu a makriki gi yu.’ Gi den sma di gi densrefi abra na Yehovah na ini a ten disi, a komando disi fu kon makandra trutru e meki den wortu fu Paulus de moro prenspari: „Meki wi poti ai na makandra, fu gi makandra deki-ati fu sori lobi èn du bun wroko, fu no libi a kon di wi e kon makandra, soleki fa son wan abi a gwenti fu du, ma fu gi makandra deki-ati, èn dati moro furu, fu di unu e si a dei e kon krosibei” (Hebrewsma 10:24, 25). Iya, fu abi a fasti gwenti fu kon makandra nanga tra bribiman, na wan pisi fu a plekti di wan Kresten abi na Gado.

¡Luku Bun Sortu Bosroiti Yu E Teki!

8. Fu san ede wan yongu sma di gi densrefi abra na Gado musu prakseri na ini begi fu a santa diniwroko fu en?

⁸ Kande yu na wan yongu sma di gi ensrefi abra na Yehovah. Yu sa kisi furu blesi efu yu e poti Kownukondre afersi na a fosi presi ini yu libi (Odo 10:22). Te yu e begi èn yu e prakseri bun fu sani, dan seiker yu kan gebroiki den yongu yari fu yu na ini a furuten diniwroko — disi na wan moi fasi fu sori taki yu e memre a Gran Kriaman fu yu. Efu yu no ben sa du dati dan yu ben sa kan bigin gebroiki kande moro furu fu yu ten èn yu prakseri gi materia afersi. Neleki fa a de nanga moro furu sma, na so yu o trow fruku kande èn yu e teki paiman na yu tapu fu di yu wani bai materia sani. Wan wroko di e pai ben o teki furu fu yu ten kande èn fu yu krakti. Efu yu abi pikin, dan yu sa musu teki osofamiri frantwortu na yu tapu someni tenti yari langa (1 Timoteus 5:8). Kande yu no frigiti a Gran Kriaman fu yu, ma a bun te yu e frustan taki a prakseri di yu e prakseri bun fu sani fosi, noso a du di yu no e du dati nofo, sa abi krakti na tapu a fasi fa yu libi sa waka te yu kon bigi. Te yu kon moro owru, dan yu ben sa kan prakseri fu sani baka èn dan yu ben o winsi taki yu ben gebroiki den yongu yari fu yu moro furu fu du santa diniwroko gi a Gran Kriaman fu wi. Fu san ede yu no e taki nownow na ini begi fu den sani di yu abi na prakseri, so taki yu sa prisiri fu du santa diniwroko gi Yehovah na ini den yongu yari fu yu?

9. San wan sma kan du di kon owru èn di ben abi bigi frantwortu fosi na ini a gemeente?

⁹ Luku wan tra situwâsi — a di fu wan man di ben de wan skapuman fosi fu „na ipi fu Gado” (1 Petrus 5:2, 3). Wan sani ben meki, taki fu ensrefi a no ben wani den grani dati moro. A tru taki a kon owru now, èn a moro muilek gi en kande fu go doro na ini a diniwroko fu Gado. ¿Ma a ben kan de so, taki a musu pruberi baka fu kisi theokrasia grani? ¡So wan man ben sa kan de wan bigi blesi gi trawan efu a man teki moro frantwortu ini a gemeente! Èn fu di no wan sma e libi gi ensrefi wawan, meki mati nanga lobiwan sa prisiri efu a man du moro ini a diniwroko, fu gi Gado glori (Romesma 14:7, 8). A moro prenspari sani na taki Yehovah no sa frigiti san wan sma e du na ini a diniwroko fu en (Hebrewsma 6:10-12). So bun, san kan yepi wi fu memre a Gran Kriaman fu wi?

Sani Di E Yepi Wi fu Memre a Gran Kriaman fu Wi

10. Fu san ede a sma di e tyari sani kon na wán ben abi wan heri bun okasi fu gi heri tirilin di e sori wi fa fu memre a Gran Kriaman fu wi?

¹⁰ A sma di e tyari sani kon na wán ben abi wan heri bun okasi fu gi wi tirilin di e sori wi fa wi kan memre a Gran Kriaman fu wi. Yehovah ben piki den opregti begi fu en fu di A ben gi en wan tumusi aparti sortu koni (1 Kownu 3:6-12). Salomo ben ondrosuku ala den afersi fu libisma finifini. Boiti dati, Gado ben meki en skrifi nanga yepi fu santa yeye san a ben kon si, so taki tra sma ben kan kisi wini fu dati. A ben skrifi: „Èn boiti taki a sma di ben tyari sani kon na wán ben kon koni, a ben tan leri a pipel so srefi fu kon sabi sani doronomo, èn a ben prakseri dipi èn ben ondrosuku sani finifini, so taki a ben sa kan sreka furu odo na wan orde fasi. A sma di e tyari sani kon na wán ben suku fu feni den switi wortu èn fu skrifi den yoisti wortu fu waarheid.”—Preikiman 12:9, 10.

11. Fu san ede wi musu bribi a koni rai fu Salomo?

¹¹ A Griki Septuagint vertaling fu den Wortu disi e taki: „Èn boiti dati, fu di a preikiman ben koni, fu di a ben leri libisma koni; so taki a yesi ben sa kan feni wan moi sani na ini den agersitori, meki a preikiman ben suku sani fayafaya fu feni switi wortu èn fu skrifi regtfardiki sani — wortu fu waarheid” (The Septuagint Bible, di Charles Thomson vertaal). Salomo ben du muiti fu gebroiki prisiri wortu nanga tori di ben moi èn warti trutru fu kon sabi den, so taki a ben kan doro na ati fu den sma di ben leisi den sani fu en. Fu di a skrifi den wortu fu en di de fu feni na ini Bijbel nanga yepi fu Gado en santa yeye, meki wi kan bribi den sani di a ondrosuku èn a koni rai fu en sondro fu tweifri.—2 Timoteus 3:16, 17.

12. Fa yu ben sa taki nanga yu eigi wortu san Salomo ben taki soleki fa a skrifi na Preikiman 12:11, 12?

¹² Ala di den disiten fasi fa sma e druk buku no ben de ete, toku heri ipi buku ben de kaba na ini a ten fu Salomo. Fa sma ben musu prakseri fu den buku dati? A ben taki: „Den wortu fu den koni sma de leki srapu tiki di e pusu mankaw fu waka, èn den sma di e poti furu prakseri na wan heri ipi prakserilin de leki spikri di naki go na ini wan sani; den kisi den fu wán skapuman nomo. Èn fu ala tra sani boiti den sani disi, mi manpikin, arki wan warskow: Noiti sma no e kaba fu meki furu buku, èn te wan sma e gi ensrefi tumusi furu na den, dan dati e weri a skin.”—Preikiman 12:11, 12.

13. Fa a kan sori taki den wortu fu den sma di abi a koni fu Gado, de leki srapu tiki di e pusu mankaw fu waka, èn suma de leki „spikri di naki go na ini wan sani”?

¹³ A sori taki den wortu fu den sma di abi a koni fu Gado de leki srapu tiki di e pusu mankaw fu waka. Fa so? Den e pusu den leisiman nanga den arkiman fu go na fesi akruderi den koni wortu di den leisi noso yere. Boiti dati, den sma di e poti furu prakseri na „wan heri ipi prakserilin”, noso wortu di koni èn warti trutru, de leki „spikri di naki go na ini wan sani”, noso di fasi bun tranga. Disi kan so fu di den moi wortu di den sma dati e taki, e sori a koni fu Yehovah èn dati kan meki den leisiman noso arkiman e tanapu kánkan èn a kan yepi den. ¿Efu yu na wan papa noso mama di e frede Gado, dan yu no musu du furu muiti fu poti so wan koni go dipi na ini a prakseri èn na ini na ati fu a pikin fu yu?—Deuteronomium 6:4-9.

14. (a) Na sortu buku a no bun fu no ’gi wisrefi tumusi furu na den’? (b) Na sortu buku wi musu poti prakseri moro furu, èn fu san ede?

¹⁴ Ma fu san ede Salomo ben taki den sani dati fu buku? We, te yu teki den heri ipi buku fu a grontapu disi gersi a Wortu fu Yehovah, dan na soso den prakseri fu libisma de na ini. Furu fu den prakseri disi e sori a fasi fa Satan Didibri e denki (2 Korentesma 4:4). Fu dati ede, „te wan sma e gi ensrefi tumusi furu” na den sortu buku disi fu grontapu, dan dati no abi furu waarde èn a de fu wan syatu ten nomo. Fu taki en leti, furu fu den sani disi kan pori wan sma na yeye fasi. Neleki Salomo, meki wi prakseri dipi fu san Gado Wortu e taki fu a libi. Disi sa tranga a bribi fu wi èn meki taki wi e kon moro krosibei na Yehovah. Te wi e poti tumusi furu prakseri na tra buku noso na sani di kan gi wi leri, dan dati kan weri wi skin. Spesrutu te den sortu buku dati e kon fu grontapu denki èn te den no e kruderi nanga a koni fu Gado, dan den sani disi no e tranga wi èn den kan pori a bribi di wi e bribi na ini Gado èn na ini den prakseri fu en. So bun, meki wi memre fu dati ede taki den wortu na ini a ten fu Salomo èn na ini a ten fu wi di e gi wi moro bun wini, na den wortu di e sori a koni fu a „wán skapuman”, Yehovah Gado. A gi wi den 66 buku fu den Santa Buku fu Bijbel, èn na den disi wi musu poti moro furu prakseri. Bijbel nanga den buku fu a ’getrow srafu’ di kan yepi wi, e meki taki wi kan kisi „a sabi fu Gado srefi”.—Odo 2:1-6.

Ala Plekti Di Wi Abi na Gado

15. (a) Fa yu ben sa taki den wortu fu Salomo di e taki fu „ala plekti di libisma abi”? (b) San wi musu du efu wi musu du den plekti di wi abi na Gado?

¹⁵ Salomo, a sma di e tyari sani kon na wán, e taki syatu fu ala den sani di a kon si: „A bosroiti fu a tori, now di sma yere ala sani, na: Frede a tru Gado èn hori den komando fu en. Bika disi na ala plekti di libisma abi. Bika a tru Gado srefi sa krutu ibri sortu wroko di abi fu du nanga ibri sani di kibri, fu si efu a bun noso ogri” (Preikiman 12:13, 14). Wan gosontu frede noso lespeki èn grani gi a Gran Kriaman fu wi sa kibri wi, èn wi howpu taki a sa kibri wi osofamiri tu, so taki wi no e feti na baka wan libi sondro fu prakseri den bakapisi di kan gi wi nanga den lobiwan fu wi wan heri ipi problema nanga sari. A gosontu frede gi Gado de soifri èn a de a bigin srefi fu koni èn fu sabi (Psalm 19:9; Odo 1:7). Efu wi abi inzicht di gron tapu Gado Wortu èn di skrifi nanga yepi fu Gado en santa yeye èn efu wi e gebroiki a rai fu en na ini ala sani di wi e du, dan wi sa du „ala plekti” di wi abi na Gado. Nôno, a no wani taki dati wi musu meki wan lijst fu plekti di wi abi. Ma san wi musu du na taki wi musu suku tiri na ini Bijbel te wi wani lusu den problema na ini a libi èn ala ten wi musu du sani na Gado fasi.

16. San Yehovah sa du fu krutu sma?

¹⁶ Wi musu frustan taki a Gran Kriaman fu wi, e si ala sani (Odo 15:3). A „sa krutu ibri sortu wroko”. Iya, a Moro Hei Sma sa krutu ala sani, so srefi den sani di libisma ai no man si. Efu wi sabi den sani disi, dan dati kan gi wi deki-ati fu hori wisrefi na den komando fu Gado. Ma a sani di musu pusu wi moro leki ala tra sani na a lobi di wi lobi wi Tata na hemel, bika na apostel Yohanes ben skrifi: „Bika disi na san a lobi gi Gado wani taki, dati wi e hori den komando fu en; èn toku den komando fu en no de wan hebi lai” (1 Yohanes 5:3). Èn fu di den komando fu Gado meki fu gi wi têgo bun, dan a de seiker taki a no de wan yoisti sani nomo, ma a de trutru wan koni sani tu fu hori wisrefi na den. Gi sma di lobi a Gran Kriaman, disi a no wan hebi. Den wani du a plekti di den abi na en.

Du Ala Plekti Di Wi Abi

17. San wi sa du efu wi wani trutru fu du ala plekti di wi abi na Gado?

¹⁷ Efu wi koni èn wi trutru wani du ala plekti di wi abi na Gado, dan boiti taki wi e hori wisrefi na den komando fu en, wi sa abi wan lespeki frede fu no du wan sani di no plisi en. Iya, „a frede gi Yehovah na a bigin fu koni”, èn den sma di e hori densrefi na den komando fu en, abi wan „bun inzicht” (Psalm 111:10; Odo 1:7). Fu dati ede, meki wi handri na wan koni fasi èn gi yesi na ala sani di Yehovah taki. A de prenspari, spesrutu na ini a ten disi, bika Kownu Yesus Krestes de noya, èn a dei te a sa krutu sma leki a Krutuman di Gado poti, de krosibei.—Mateus 24:3; 25:31, 32.

18. San sa de a bakapisi gi wi efu wi e du ala plekti di wi abi na Yehovah Gado?

¹⁸ Gado e ondrosuku ibriwan fu wi now. ¿Wi wani du sani na yeye fasi, noso wi meki taki a krakti di grontapu abi na tapu sma, swaki a banti di wi abi nanga Gado? (1 Korentesma 2:10-16; 1 Yohanes 2:15-17) Awansi wi yongu noso wi owru, meki wi du ala san wi man fu plisi a Gran Kriaman fu wi. Efu wi e gi yesi na Yehovah èn wi e hori wisrefi na den komando fu en, dan wi no sa teki den soso sani fu na owru grontapu disi di e pasa gowe. Dan wi kan abi a howpu fu libi fu têgo na ini a nyun seti fu sani di Gado pramisi (2 Petr. 3:13). ¡Trutru disi na moi howpu gi ala den sma di e du ala plekti di den abi na Gado!

San Yu Ben Sa Piki?

◻ Fu san ede yu ben o taki dati a no ala sani na fu soso?

◻ Fu san ede wan yongu Kresten musu prakseri na ini begi fu en santa diniwroko?

◻ Na sortu buku a no ben o bun fu gi „wisrefi tumusi furu na den”?

◻ San na „ala plekti di libisma abi”?

[Prenki na tapu bladzijde 20]

A no ala sani na fu soso gi den sma di e dini Yehovah

[Prenki na tapu bladzijde 23]

Tra fasi leki furu buku fu a grontapu disi, a Wortu fu Gado e tranga sma èn a e gi den wini