De ini wanfasi na ondro wan marki fu lobi

„Abi moro furu tranga lobi gi makandra.” — 1 PETRUS 4:5

1. Sortu lobi wi e si a mindri a pipel fu Gado na ini a ten disi, èn san den salfu kristen e meki bekenti fu sensi 1922?

WI E si sowan lobi a mindri Gado pipel na ini a ten disi? Disi na wan lobi pe na erkenning èn na hori baka gi Yehovah soevereiniteit de a mamatori, soleki ooktu David ben de wan sma di ben hori baka gi Yehovah Soevereiniteit. Spesrutu fu sensi 1922 den salfu brada fu Yesus Kristus, „na Manpikin fu David”, e meki na a heri grontapu bekenti taki Gado Kownukondre kon krosbei èn taki den fesiman fu Satan tiri di e kwinsi sma e wakti strafu fu na sei fu na krutuman di Gado poti, Yesus Kristus. — Mattéus 21:15, 42-44; Openbaring 19:11, 19-21.

2. Fu san-ede den ben kan kari David ’wan man di e prisiri Yehovah ati’?

² David ben de wan man di ben ’prisiri na ati fu Yehovah’. Disi ben kon na krin na ini en lobi gi Yehovah èn En regtvaardiki eigifasi — eigifasi di srefi na lagi ati kownu Saul ben piki taki David ben abi den — iya eigifasi soleki en deki-ati, a gi di a ben gi en srefi na a dini fu Yehovah krinkrin, fu de wan tiriman, èn a saka di a ben saka en srefi na ondro theokratis orde. — 1 Samuël 13:14; 16:7, 11-13; 17:33-36; 24:9, 10, 17.

3. Fa na yeyefasi fu Yonathan ben de nanga David, èn fu fu san -ede?

³ Bakadi David ben kiri Goliath, a ben drai go baka na Saul fu fruteri san psa. Na a okasi dati, ete wan sma ben sori en srefi di ben lobi regtfardikifasi. Dati ben de Yonathan, na moro owru manpikin fu Saul. „Now a ben psa taki sodra [David] ben stop fu taki nanga Saul, na sili fu Yonathan ben kon tai krosbei na a sili fu David, èn Yonathan ben kon lobi en leki en eigi sili” (1 Samuël 28:1). No soso na deki-atifasi fu David leki libisma èn en koni fu wroko nanga na slenger, ma moro furu na faya fu en fu soifri Gado nen fu syen, en fasi fu no denki na en srefi moro, èn en frutrow na ini Yehovah sondro fu poti kondisi ben meki Yonathan luku en nanga respeki. — Teki gersi nanga Psalm 8:1, 9; 9:1, 2.

4. San Yonathan ben du fu sori taki a e erken taki David ben de a sma di Gado ben salfu leki kownu?

⁴ Aladi Yonathan ben de sowan dri tenti yari moro owru leki David, toku a ben kon na ini wan matifasi di ben tan nanga na yongu fetiman disi. „Yonathan nanga David ben sroto na a ten dati wan ferbontu, fudi a ben lobi en leki en eigi sili. Ooktu Yonathan ben puru na skowrumantel di a ben abi èn a ben gi en na David èn ooktu en krosi èn srefi en feti-owru nanga en bo nanga en leri-buba” (1 Samuël 18:3, 4). Fa disi de wan tumsi moi sori fu erkenninf fu na sei fu Yonathan! Te yu luku en bun dan Yonathan ben sa de Saul erfgenaam. Toku a ben sori wan waran lobi gi David di ben abi en fondamenti tapu gronprakseri èn ben saka en srefi na en ondro leki a sma di ben kisi salfu fu tron kownu, na sma di na fesi fu ala sani ben abi na prakseri fu hori Yehovah nen nanga soevereiniteit hei. — 2 Samuël 7:18-24; 1 Kronieken 29:10-13.

5. San Yonathan ben erken te a e kon tapu a tori fu theokratis feti?

⁵ Yonathan srefi ben de ooktu wan fetiman fu regtvaardikifasi. A ben fruklari: „Gi Yehovah nowan sani de di kan tapu en fu ferlusu nanga yepi fu furu sma ofu nanga yepi fu weiniki sma.” Fu san-ede? Fudi Yonathan ben erken taki alaten a ben de fanowdu fu suku na tiri fu Gado fu wini ini theokratis feti. Di Yonathan sondro a ben sabi ben pasa wan wet pe Saul ben leisi strafu taki a ben mu dede, a ben teki na strafu dati nanga sakafasi. Koloku taki na pipel ben bai en fri. — 1 Samuël 14:6, 9, 10, 24, 27, 43-45.

Sori loyaal lobi

6. Fa na loyaal lobi fu Yonathan ben kon yepi David?

⁶ Saul ben dyarusu tapoe a barinen fu David leki srudati, èn a ben suku fu kiri en. Ma Yonathan loyaal lobi ben kon yepi en. A tori e taki: „Fu na sei fu Yonathan, a manpikin fu Saul, a ben feni furu prisiri na ini David. Fu dati-ede meki Yonathan ben fruteri en na David èn a ben taki: ’Saul, mi papa, e suku wan fasi fu kiri yu. Now dan, grantangi luku bun tamara mamanten, èn yu mu tan na ini wan kibripresi èn hori yusrefi kibri.’” Na a okasi dati Yonathan ben man fu safu na ati fu Saul, so taki David libi ben kibri. Ma den tra wini fu David di a „ben feti nanga den Filistijnsma èn. . . ben tyari wan bigi srakti kon a mindri den”, ben wiki agen den feyanti firi fu Saul baka. Agen a ben teki a bosroiti fu kiri David, so taki David ben lon gwe. — 1 Samuël 19:2-10.

7. San Yonathan nanga na loweman David ben taki na ini wan miti di den ben miti makandra fu meki na frubontu fu den kon steifi baka?

⁷ Baka wan pisiten na loweman David ben miti nanga Yonathan, di ben fruklari: „San yu sili mag taki ooktu, mi sa du gi yu.” Den tu agen ben meki a frubontu fu den a fesi fu Yehovah kon steifi, èn David ben pramisi taki noiti a ben sa koti a lobi bunatifasi puru fu Yonathan oso — wan pramisi di a ben hori getrow. „Yonathan dan ben sweri agen gi David fu en lobi ede gi en; bika a ben lobi en leki en eigi sili”. — 1 Samuël 20:4-17; 2 Samuël 21:7.

8. Fu san-ede Yonathan nanga David ben kon na kibrifasi na ini wan busi makandra, èn san ben feni presi na a okasi dati?

⁸ Kownu Saul ben de ini en bosroiti sondro sari-ati fu kiri David. Iya, Saul ben slenger srefi wan lansri go na en eigi manpikin Yonathan di a ben opo taki gi David! Fu dati-ede Yonathan na kibrifasi ben go miti David ini wan busi. „Fu na sei fu David a ben fadon na en fesi na gron èn a ben boigi dritron na gron; dan den ben bosi makandra èn ben krei fu makandra, te leki David ben du en moro furu. Moro fara Yonathan ben taigi David ’go ini vrede fudi wi, wi alatu, ben sweri na ini na nen fu Yehovah na a fasi disi: „Meki Yehovah srefi te ten di no abi marki sori taki a de a mindri mi nanga yu èn mindri mi bakapikin èn yu bakapikin.”’” Na so den ben prati pasi èn David ben tron wan loweman na ini na sabana fu Zif. — 1 Samuël 20:41, 42.

9, 10. (a) Fa Yonathan ben gi David moro fara deki-ati na ini kande na lasti miti di den ben miti makandra? (b) Sortu kragisingi David ben meki di Yonathan nanga Saul ben dede na ini na feti teigi den Filistijnsma, èn na sortu winimarki a ben tyari a singi dati kon?

⁹ Na wan lobifasi Yonathan ben kan gi David deki-ati. Soleki na tori e fruteri: „Yonathan, na manpikin fu Saul, ben opo tanapu now èn a ben go na David na Choresa, èn a tranga en anu ini a tori fu Gado. Moro fara a ben taigi en: ’No frede; bika na anu fu mi papa Saul no sa feni yu, èn yu sa de kownu fu Israël, èn mi sa tron baka yu nomru tu; èn ooktu mi papa Saul sabi dati.’ Ne den tu ben sroto wan frubontu na fesi fu Yehovah.” — 1 Samuël 23:15-18.

¹⁰ A de krin taki disi ben de na lasti miti di David nanga en loyaal kompe Yonathan ben miti. Bakaten, di Yonathan nanga Saul alatu ben dede na ini na feti teigi den Filistijnsma, David ben meki wan kragisingi, „Na bo”. Na ini dati a ben sori respeki gi Saul leki Yehovah salfuwan, ma a ben tyari na singi fu en kon na wan heimarki nanga den wortu: „Yonathan ben dede na ini na feti tapu yu heipresi! Mi e benawtu fu yu ede mi brada Yonathan. Yu ben de tumsi prisiri gi mi. Yu lobi ben de moro fruwondru gi mi leki na lobi fu umasma. Fa den trangawan ben fadon èn den fetisani ben lasi gwe!” (2 Samuël 2:18, 21, 25-27) David tapu dati ben kisi salfu fu a di fu tutron, leki kownu tapu Yuda.

Disiten parallel

11, 12. (a) Fa a lobi ben de di ben de leki wan marki gi na banti mindri David nanga Yonathan? (b) San na tranga lobi mindri David nanga Yonathan e prenki?

¹¹ San wi e leri fudi „ala den Buku Gado ben meki den skrifi den èn den de bun fu leri sma”, fu na tori fu David nanga Yonathan? (2 Timóteus 3:16) Wi e si taki dyaso a e go fu wan lobi „di de moro fruwondru leki na lobi fu umasma”. Seiker, „na lobi fu umasma” kan switi èn gi satisfaksi te Yehovah wet ini a tori fu na trowlibi e hori hei (Mattéus 19:6, 9; Hebrewsma 13:4). Ma na banti mindri David nanga Yonathan ben sori tapu wan tumsi moi fasi fu lobi, di e kruderi nanga na komando: „Arki, o Israël: Yehovah, wi Gado, de wán Yehovah.Èn yu mu lobi Yehovah yu Gado nanga heri yu ati èn heri yu sili èn heri yu libikrakti.” — Deuteronomium 6:4, 5.

¹² David nanga Yonathan ini wanfasi ben sori a lobi dati ala di den ben feti fu soifri Yehovah nen fu ala syen di En feyanti ben poti a tapu. Fudi den ben du disi, meki den ben kweki ooktu na „tranga lobi gi makandra” (1 Petrus 4:8). Na matifasi di ben de na ini disi a mindri den, ben go srefi moro fara leki na komando fu Leviticus 19:18: „Yu mu lobi a sma na yu sei leki yu srefi.” Iya, a ben de wan prenki fu na sortu fu lobi di Yesus „[nyun] gebod” e sori a tapu, „taki yu mu lobi makandra; net soleki mi ben lobi yu, taki ooktu unu lobi makandra”. A lobi fu Yesus ben de wan pe a ben offer en srefi, no wawan ini a saka di a ben saka ensrefi krinkrin ondro Yehovah wani, ma ooktu ini a klari di a ben de klari fu srefi „gi en libi abra fu a bun fu en mati”. — Yohannes 13:34; 15:13.

Wan „ipi” di tyari kon na wan

13. Sortu grupu Kownukondre preikiman ben kon spesrutu fu sensi 1935 na fesi, èn sortu wanfasi de a mindri den salfu kristen nanga den?

¹³ Salfu kristen fu na „pikin ipi” ben tanapu na ini na faya pisi fu na strei teige na disiten Goliath. Ma fu sensi 1935 den ben kisi mati fu Kownukondre preikiman fu wan tra èn moro bigi „koi”. Den „tra skapu” disi de now ini wanfasi nanga den salfu „skapu” di tan abra leki „wan ipi” ondro na ’wan herder’ „na Manpikin fu David”, ini wan banti fu lobi wanfasi di e psa ala sani — soleki di ben de a mindri Yonathan nanga David. — Lukas 12:32; Yohannes 10:16; Ezechiël 37:24.

14. San ben de wan parallel nanga (a) den muiti fu Saul fu kiri David èn (b) na lobifasi fa Yonathan ben meki sma sabi en fa a de nanga David?

¹⁴ Yoisti na a ten di na Yonathan grupu disi ben bigin gro kon tron wan bigi ipi, na di fu tu Grontapufeti ben bigin, so taki den salfuwan èn den kompe fu den ben kon poti hebi tapu tesi. A ben de yari fu hebi frufolgu, nofotron fudi den kerki leriman ben sutu faya. Disi ben de wan parallel nanga na muiti fu Saul fu kiri na salfu David èn bakaten fu kiri ooktu Yonathan di disi na wan lobi fasi ben sori taki a de na a sei fu David. Fa na Davidklasse nanga Yonathanklasse ben sori wan tranga lobi gi makandra ini a ten dati! Na agersitori fu Yesus na ini Mattéus 25:35-40 nofotron ben kontru na wan letterlek fasi.a

15. (a) Sortu libifasi di den Kotoigi e waka a baka de krin fu si te yu sa teki dati èn agersi nanga a disiten Saulklasse? (b) San na ini wi ten ben sa kan akruderi nanga na „ogri yeye di ben kon fu Yehovah” èn di ben tapu skreki gi kownu Saul?

¹⁵ Fa na soifri-retifasi fu Yehovah Kotoigi e sori taki a de krin fu si te wi sa teki luku na waka nanga libi fu na disiten Saulklasse. Den Kotoigi, di no de wan pisi fu grontapu, e gi alape na grontapu yesi na Yesus komando fu kon makandra (Yohannes 15:17-19). Na a tra sei a de so taki den kerki leriman fu na kristenheid na ala tu sei fu na feti ben begi na a „gado” fu den fu kisi wini, aladi den kompe bribiman ini tra nâsi fu milyunmilyun srudati ben srakti den. Na „ogri yeye”, di ben kon fu Yehovah fu tapu skreki gi Saul, heri bun kan akruderi nanga krakti fu den plaag di skrifi na ini Openbaring kapitel 8 di den engel ben kanti trowe. A de tumsi krin taki Yehovah santa yeye no e rostu tapoe den kerki leriman fu na kristenheid. — 1 Samuël 16:14; 18:10-12; 19:10; 20:32-34.

16. (a) Fa den kerki leriman ben teki tu grontapufeti fu kwinsi Yehovah pipel? (b) Fu san-ede wi kan taki dati ini den yari di no psa so langa ete wan disiten Saul ben frufolgu Gado pipel hebi?

¹⁶ Na ini 1918 den kerki leriman ben grabu na muiliki ten fu na oorlog fu meki den politiki tiriman na ini den Verenigde Staten fu Amerkankondre de so fara fu handri teige den frantwortu sma fu na Wachttorengenootschap èn te fu kaba poti den na ini strafu-oso. (Den bijbelondrosukusma disi bakaten krinkrin ben kisi den bun nen baka.) Na ini na di fu Tu Grontapufeti lanti ben tapu Yehovah Kotoigi na ini den kontren fu den Asmogendheden èn na ini moro furu kondre fu na Ingrisi Gemenebest, nofotron leki wan bakapisi fu na druk fu na sei fu kerki. Luku pikinso fu eksempre na a facsimile di druk dya fu wan brifi di let bifo lanti ben tapu a wroko fu Yehovah Kotoigi na ini Australiakondre, na aartsbisschop fu Sedney (bakaten wan kardinaal) ben skrifi. Di den ben go na fesi na moro hei krutu fu Australiakondre fu aksi fu luku na tapu di den ben tapu a wroko fu Yehovah Kotoigi dan na krutubakra fu instructie, mr. Stark ben taki fu a tapu disi di den tapu a wroko fu Yehovah Kotoigi leki „no nanga reti, nanga eigiwani èn nanga a dwengi fu trawan”. Na wet di ben tapu a wroko fu Yehovah Kotoigi ben puru na tapu 14 yuni 1943 èn na tiri fu na kondre ben mu pai schadevergoeding. Na ini yari no so langa psa kaba dan druk fu kerki tapu wan lo tiri na ini Afrika nanga Asia ben tyari sondro sari-ati dwengi kon na tapu Yehovah Kotoigi. Na so fasi wan disiten Saul — den kerki leriman fu na kristenheid — ben tan frufolgu Gado pipel nanga tranga-ede.

17. (a) Fa Yehovah Kotoigi ben kaka futu doronomo gi na politiki èn kerki druk? (b) San na wanfasi fu den Kotoigi na a heri grontapu esori?

¹⁷ Fa Yehovah Kotoigi na ini den yari 80 ben man fu tyari na politiki èn kerki druk di ben kon alaten na tapu den? We, tapu a srefi fasi fa David ben kakafutu gi Goliath èn David nanga Yonathan ben kakafutu gi Saul! Den de sondro frede èn nanga na faste bosroiti fu kibri den soifri-retifasi ini a tori fu na strei-aksi di e go fu Gado soevereiniteit, bika den ben sabi taki Gado Kownukondre sa wini (Daniël 2:44). Te den e ondrofeni frufolgu, dan den e de leki wan skotu di smeti kon na wan èn e gi makandra deki-ati nanga yepi fu na Internationaal banti fu lobi di de na mindri den soleki na grontapu noiti ben si ete. Fudi na ini ten fu feti den de neutraal, meki den no e trowe brudu fu den kompe bribiman fu den ini tra nâsi (Micha 4:3, 5). Na sofasi den e sori taki den de na grupu di Yesus ben sori a tapu di a ben taki: „nanga disi ala sma sa sabi taki unu na mi disipel, efu unu abi lobi gi makandra” (Yohannes 13:35). Leki wan bradafasi di de na a heri grontapu, Yehovah Kotoigi ’ben weri gi den srefi lobi, na volmaakti banti fu wanfasi’, wan banti di de moro leki ala skotu fu ras, lo nanga nâsi. —Kolosse 3:14.

„Sori tranga lobi”

18. (a) Sortu parallel a Yonathan lobi gi David abi now, èn ini san dati e kon a krin? (b) San de na a heri grontapu na bakapisi fu na faste bosroiti fu na Davidklasse?

¹⁸ Yu e memre ete taki na sili fu Yonathan ben tai krosibei na a sili fu David, èn „Yonathan ben kon [lobi en] leki en eigi sili”? Fa disi abi wan tumsi moi parallel na ini den „lasti dei disi”! (2 Timóteus 3:1, 14) Ini a ten fu ala bruya di de fu soso ini a piiten disi fu tranga fasi, dan wán grupu de, Yehovah Kotoigi, di e kibri wan lobi wanfasi di de na a heri grontapu. Leki neutraal kristen den ben gi grani na a Mekiman fu den leki na Soeverein Masra fu na heri libismafamiri (Psalm 100:3). O ya, a kan de heri bun taki den disiten Refaïtsma — den politiki kondreman fu Goliath — e tan kosi na yeye Israël (2 Samuël 21:22). Èn a kan de heri bun taki na disiten Saul — den kerki fesiman fu na kristenheid — e tan meki na David nanga na Yonathanklasse muiliki (1 Samuël 20:32, 33). Ma „na feti na fu Yehovah”. Leki Soeverein Masra a sa kisi te fu kaba na wini gi en loyaal dienstknegti. Milyunmilyun sma di de fu na grupu fu Yonathan na ini ala kondre, èn di a mindri den yu abi srefi fositen frufolguman, ben si na faste bosroiti di na Davidklasse ben teki èn den ben go moksi den srefi na den sei na ondro Kristus ’marki fu lobi’.b — 1 Samuël 17:47; Heisingi 2:4.

19, 20. (a) San na wantu heimarki fu na activiteit fu Yehovah Kotoigi, soleki fa disi de a tapu na tabel tapu blz. 4-7? (b) O bigi na gro fu den Kotoigi ben de ini a ten fu na tin yari fu 1979 te 1988? (c) Fu san-ede yu kan taki dati den Kotoigi de trutru wan pipel di de ini wanfasi na a heri grontapu, èn sortu aksi e kon fu dati-ede?

¹⁹ Yu kan go luku na activiteit di e go moro nanga moro fu den milyunmilyun Kotoigi disi tapu na tabel tapu den bladzijde 4-7 fu a tijdschrift disi. Na ini na ten fu na tin yari fu 1979-1988 na nomru fu preikiman fu na bun nyunsu fu Gado di ben opo ben gro fu 2.816.075 te 3.592.654, wan gro fu 64,3 procent. Na a heri grontapu den de wan pipel di trutru de na ini wán gemeenschappelek bribi, wán gemeenschappelek dini fu Gado èn nanga a srefi gi di den gi den srefi na ini na dini fu Gado èn den moreel gronprakseri fu Gado. Tapu na steifi internationaal grupu di moksi kon na wan den wortu fu yesus e kon tru na ini a ten disi: „Efu unu e ondrow mi gebod, dan unu sa tan na ini mi lobi, net soleki mi e ondrow den gebod fu na Tata èn e tan na ini en lobi.” — Yohannes 15:10; teki gersi nanga 1 Korinte 1:10.

²⁰ Aladi den Kotoigi disi fu Yehovah e preiki na ini difrenti tongo, toku den e taki na „soifri tongo” fu na waarheid, aladi den e dini Gado „skowru na skowru”. Na ini disi den e waka na baka na lobi eksempre fu David èn Yonathan (Zefanya 3:9; 1 Samuël 20:17; Odo 18:24). Efu yu no ben moksi nanga a pipel fu Gado, dan yu no ben sa wani de nanga ala prisiri wan pisi fu na disiten Yonathanklasse? Dati yu kan poti leki wan marki na yu fesi èn Yehovah Kotoigi sa sori tranga lobi fudi den sa yepi yu fu doro na marki disi.

[Futuwortu]

Aksi fu luku san wi ben leri

◻ Fa Yonathan ben sori loyaal lobi gi David?

◻ Fu sortu fasi na lobi ben de di na lobi mindri David nanga Yonathan ben e prenki?

◻ Fa den kerki leriman fu na kristenheid ben handri leki kownu Saul di a ben frufolgu David?

◻ San na ini na ten disi yu kan teki gersi nanga a lobi fu Yonathan gi David?

◻ San na wanfasi na a heri grontapu fu Kotoigi e sori?

[Faki na tapu bladzijde 36]

St. Mary’s Cathedral

Sydney

August 20, 1940.

The Rt. Hon. W. M. Hughes, M.H.R.,K.C.,

Attorney General,

CANBERRA.

Dear Mr. Hughes: (VERTALING VAN DE BRIEF)

Uw brief van de 9de dezer aangaande het protest dat mr. Jennings, M. P., bij u heeft ingediend, is door mij in dank ontvangen.

Natuurlijk wordt beseft dat in zo’n delicate kwestie als die waarop het ingediende protest betrekking heeft, door u de grootst mogelijke voorzichtigheid betracht moet worden.

Indien echter de enige door u gekoesterde twijfel voortspruit uit het feit dat deze mensen beweren de leringen van het christendom te verbreiden, zou ik zeer respectvol willen suggereren uw oordeel dienaangaande niet te baseren op datgene wat zij beweren, maar op de feiten. Wat dit betreft, zou u hun eigen publikaties en hun eigen woorden en daden, zoals die door de politie van New South Wales gestaafd worden, aan een beschouwing moeten onderwerpen. Iets strijdigers met het christendom zal men zich moeilijk kunnen indenken.

De hoofdcommissaris van politie in N.S.W. heeft de hoop geuit dat de autoriteiten van het Britse Gemenebest het genootschap in kwestie onwettig zullen verklaren, zodat de politie in staat zal zijn er doeltreffender tegen op te treden.

With every good wish, I remain,

Yours faithfully,

ARCHBISHOP OF SYDNEY.