Leri a Tumusi Bun Fasi fu Lobi

Kosovo, Libanon, nanga Ierland. Disi na nen di kon na nyunsu furutron na ini den yari di no pasa so langa ete. Den e meki sma prakseri fa ipi-ipi sma ben lasi libi, fa bom ben trowe, èn fa sma ben kiri trawan. Ma a no soso na ini a ten disi den trobi di abi fu du nanga a relisi, a ras, na ethnisch background fu sma, noso nanga tra trobi, meki sma e feti ogri feti. Fu taki en leti, a historia lai nanga den sani disi, èn den tyari wan lo pina kon gi libisma.

FURU sma di si taki feti ben de na ini a heri historia, kon prakseri taki feti na sani di wi no kan wai pasi gi èn taki a de wan gewoon sani gi libisma fu no wani si makandra na ai. Ma den sortu denki dati no e kruderi kwetikweti nanga den leri fu Bijbel, a Wortu fu Gado. Bijbel e fruklari krin: „A sma di no abi lobi, no kon sabi Gado, bika Gado na lobi” (1 Yohanes 4:8). A de krin taki a Kriaman wani, taki libisma musu lobi makandra.

Bijbel e tyari kon na krin tu taki Gado ben kria libisma na a prenki fu en (Genesis 1:26, 27). Disi wani taki dati libisma kisi a krakti fu sori den eigifasi fu Gado, èn a moro prenspari wan fu den na lobi. Efu disi de so, dan fu san ede ini a heri historia, libisma no ben man sori kwetikweti taki den lobi makandra? Agen Bijbel e tyari a tori kon na krin gi wi. A de fu di a fosi libisma paar Adam nanga Eva, ben opo densrefi kontrari Gado èn den ben du sondu. A bakapisi ben de taki ala den pikin fu den gebore nanga sondu èn nanga onvolmaaktifasi. Romesma 3:23 e fruklari: „Den alamala sondu èn no e doro a glori fu Gado.” Na eigifasi di Gado gi wi fu kan lobi sma kon pori fu di wi gebore nanga sondu èn nanga onvolmaaktifasi. ¿Disi wani taki dati libisma no man lobi makandra moro? Sortu howpu de taki oiti wi sa abi wan banti fu vrede èn fu lobi nanga tra libisma?

Wi Musu Leri fu Lobi Gado

Yehovah Gado sabi taki ala di libisma no de volmaakti, toku den man sori lobi ete. Dati meki a wani taki ala sma di wani plisi en musu sori lobi so bun leki den man. Yesus Krestes, A Manpikin fu Gado, ben tyari kon na krin taki disi de fanowdu, di den ben aksi en fu taki san na a moro bigi komando fu a Wet di Israèl ben kisi. A ben taki: „’Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan.’ Disi na a moro bigi èn fosi komando.” Baka dati a ben taki: „A di fu tu, di de a srefi leki en, na disi: ’Yu musu lobi a sma na yu sei leki yusrefi.’ Na den tu komando disi a heri Wet nanga den Profeiti, e anga.”—Mateus 22:37-40.

Ma furu sma e denki taki a muilek tumusi fu lobi wan sma di den no kan si, èn wi libisma no kan si Yehovah Gado fu di a de wan Yeye (Yohanes 4:24). Toku den sani di Gado e du abi krakti na wi tapu ala dei, fu di wi alamala abi den furu bun sani fanowdu di a ben kria fu a bun fu wi. Na apostel Paulus ben sori taki disi de so, di a ben taki: „[Gado] ben gi kotoigi fu ensrefi fu di a ben du bun, fu di a e gi unu alen fu hemel nanga bun yariten, èn fu di a e furu un ati bogobogo nanga nyanyan èn nanga bigi prisiri.”—Tori fu den Apostel 14:17.

Ala di wan fasi de fa ala sma e kisi wini fu den sani di a Kriaman e gi wi, toku pikinso sma nomo breiti nanga san a e du noso e kisi a firi fu taigi en tangi. So bun, wi musu ondrosuku ala den bun sani di Gado du gi wi èn prakseri dipi fu den tumusi moi eigifasi di e kon na krin na ini ala sani di a e du. Te wi e du dati, dan a sa gi wi na okasi fu si a koni nanga a krakti fu wi Gran Kriaman, di e gi sma lespeki frede (Yesaya 45:18). Boiti dati, disi musu yepi wi fu si omeni a Gado disi lobi wi, no soso fu di a gi wi libi, ma fu di a ben meki tu taki wi kan nyan bun fu den furu prisiri fu a libi.

Fu eksempre, prakseri fu den someni moi bromki di Gado ben kria na grontapu. ¡A moi srefisrefi taki a ben gi wi a krakti fu kan si èn fu kan prisiri trutru fu den moi sani disi! Gado ben gi wi ala sortu nyanyan sani tu fu tan na libi. ¡A de trutru wan moi sani taki a ben prakseri fu kria wi so taki wi kan tesi èn prisiri te wi e nyan! ¿Den sani disi no de krakti buweisi taki Gado lobi wi trutru èn taki a wani meki a go bun nanga wi?—Psalm 145:16, 17; Yesaya 42:5, 8.

Boiti taki a Kriaman e gebroiki a „buku fu a naturu” fu sori wi suma a de, a e gebroiki Bijbel tu, a Wortu fu en, fu sori wi sortu Gado a de. Disi de bika na ini Bijbel den skrifi furu fu den sani di Yehovah ben du na ini a ten di pasa, di e sori taki a lobi wi èn den someni blesi di a e pramisi fu gi libisma na ini a ten o kon dyonsro (Genesis 22:17, 18; Exodus 3:17; Psalm 72:6-16; Openbaring 21:4, 5). Boiti dati, Bijbel e sori wi a moro bigi fasi fa Gado ben sori taki a lobi a libisma famiri — di a ben gi en wan-enkri gebore Manpikin fu de wi Frulusuman so taki wi kan kon fri fu a katibo fu sondu nanga dede (Romesma 5:8). Iya, o moro wi e leri fu wi Kriaman di lobi wi, o moro wi e kisi a firi fu lobi en nanga wi heri ati.

Leri fu Lobi Tra Libisma

Soleki fa Yesus ben sori, dan boiti taki wi musu lobi Gado nanga wi heri ati, sili nanga frustan, wi musu lobi a sma na wi sei neleki fa wi lobi wisrefi. Te yu luku en bun, dan a lobi fu Gado e poti a fruplekti na wi tapu fu lobi tra libisma. Na apostel Yohanes ben fruklari: „Lobiwan, efu disi na fa Gado ben lobi wi, dan wi abi a fruplekti fu lobi makandra.” Moro fara, a ben sori wi tu o prenspari disi de: „Efu wan sma e taki: ’Mi lobi Gado,’ èn toku a no wani si en brada na ai, dan a de wan leiman. Bika a sma di no lobi en brada, di a si, no kan lobi Gado, di a no si. Èn na en gi wi a komando disi, taki a sma di lobi Gado, musu lobi en brada tu.”—1 Yohanes 4:11, 20, 21.

Now wi e libi na ini wan grontapu pe moro furu sma e sori taki den e prakseri densrefi wawan, fu di den de ’sma di lobi densrefi nomo’, neleki fa Bijbel ben taki disi na fesi (2 Timoteus 3:2). Fu dati ede, efu wi wani leri a tumusi bun fasi fu lobi, dan wi musu du furu muiti fu kenki wi denki èn waka baka wi Kriaman di lobi wi, na presi taki wi waka baka a fasi fa moro furu sma e prakseri densrefi nomo (Romesma 12:2; Efeisesma 5:1). Gado „abi bun-ati [srefi] gi den sma di de sondro tangi èn gi den godelowsusma” èn a e „meki en son opo kon gi den godelowsusma èn gi den bun sma èn a e meki alen fadon gi den regtfardiki sma nanga den onregtfardiki sma”. Fu di wi hemel Tata e gi wi so wan kefalek bun eksempre, dan wi musu du muiti fu abi bun-ati gi ala sma èn fu yepi den. Te wi e du disi, dan wi kan sori taki wi de ’manpikin fu a hemel Tata di lobi wi’.—Lukas 6:35; Mateus 5:45.

Son leisi den sani di wi e du èn di e sori taki wi lobi sma, abi leki bakapisi taki wi kan yepi sma fu tron anbegiman fu a tru Gado. Wan tu yari pasa, wan oso-uma di de wan Kotoigi fu Yehovah ben pruberi fu fruteri a birfrow fu en a boskopu fu Bijbel, ma na uma no ben wani arki kwetikweti. Ma a fasi fa na uma ben piki no ben meki a Kotoigi lasi-ati. Na presi fu dati, a ben tan sori bun-ati èn ben pruberi fu yepi a birfrow. Wan leisi a ben yepi a birfrow fu froisi go na wan tra oso. Wan tra leisi a ben aksi wan sma fu go nanga a birfrow na a opolani presi fu miti den famiriman fu a birfrow. Baka ten, a birfrow ben teki wan bijbelstudie èn te fu kaba a ben tron wan fayafaya Kresten ala di en masra ben frufolgu en hebi. Iya, a fasi disi fu sori lobi ben poti a fondamenti fu kisi têgo blesi.

Efu wi eerlijk nanga wisrefi, dan wi sa erken taki a lobi di Gado lobi wi no de fu di wi abi someni moi eigifasi. Ma na presi fu dati, a lobi wi ala di wi abi someni fowtu nanga sondu. Fu di dati de so, meki wi musu leri tu fu lobi tra libisma, ala di den abi someni fowtu. Efu wi e leri wisrefi fu si san na den moi eigifasi fu trawan èn fu abi warderi gi dati, na presi taki wi e luku den fowtu fu den, dan wi sa feni en moro makriki fu lobi den. San wi e firi gi den kan de moro leki wan lobi di abi en fondamenti tapu gronprakseri èn a abi fu du nanga a waran lobi nanga firi di bun mati abi gi makandra.

Meki a Lobi fu Yu Gro

Lobi nanga matifasi musu gro, èn wan fu den prenspari sani di kan yepi fu du disi na te yu de opregti èn eerlijk. Son sma e pruberi fu kibri den fowtu fu den, so taki den sma di den wani leki mati kan prakseri bun fu den. Ma nofotron so wan fasi fu handri abi takru bakapisi, efu trawan e kon si te fu kaba fa a tori sidon trutru èn den e atibron fu di yu no ben eerlijk. Dati meki wi no musu frede fu meki trawan kon sabi fa wi de trutru — ala di wi abi fowtu di wi e pruberi fu wini. Disi kan yepi wi fu tron mati fu den.

Fu eksempre, wan owru sisa di de wan Kotoigi na ini wan gemeente na ini wan kondre na a Fara Owstusei, no kisi furu skoro. Ma noiti a e pruberi fu kibri a tori disi gi tra sma. Fu eksempre, a e erken eerlijk taki a no man sori tra sma fa den kan kon sabi nanga yepi fu Bijbel profeititori èn nanga yepi fu a historia taki a Ten fu den Heiden ben kon na wan kaba na ini 1914.a Ma a de so wan moi eksempre gi trawan fu di a de fayafaya ini a diniwroko, èn fu di a lobi den brada èn lobi fu gi den sani, taki nanga lobi den e kari en a diriston fu a gemeente.

Sma na ini son kulturu no lobi en srefisrefi fu sori krinkrin taki den lobi tra sma; sma e leri taki te den e handri nanga tra sma, dan den musu sori bun maniri. Ala di a bun ala ten fu abi bun maniri èn fu hori sma na prakseri, toku wi no musu meki den bun maniri fu wi tapu wi fu sori san wi e firi gi tra sma. Yehovah no ben syen fu sori lobi gi owruten Israèl, a pipel di a ben frukisi, di a ben taigi den: „Nanga wan lobi di sa tan te ten di no skotu mi ben lobi yu” (Yeremia 31:3). Na a srefi fasi, na apostel Paulus ben taigi den kompe-bribiman fu en na Tesalonika: „Fu di wi abi safu firi fu lobi gi unu, meki nanga ala prisiri wi ben prati no wawan a bun nyunsu fu Gado nanga unu, ma so srefi wi eigi sili, bika unu ben kon de sma di wi lobi” (1 Tesalonikasma 2:8). Dati meki, te wi e du muiti fu abi opregti lobi gi tra libisma, dan a de fu di Bijbel e leri wi taki wi musu sori den firi disi na wan natuurlijk fasi èn taki wi no musu kiri den firi dati.

A De Fanowdu fu Tan Du Muiti

Doronomo wi musu leri fa fu firi lobi gi tra sma èn fa fu sori dati. Disi e aksi taki wi musu du furu muiti, bika wi musu wroko tranga fu wini wi eigi onvolmaaktifasi èn wi musu kakafutu tu gi a tranga krakti di a grontapu disi di no abi lobi, abi na wi tapu. Ma den furu bun bakapisi di wi e kisi fu disi, e meki taki a warti trutru fu du dati.—Mateus 24:12.

Srefi na ini a grontapu disi di de kefalek onvolmaakti, wi kan kisi moro bun banti nanga tra sma, èn a bakapisi kan de furu prisiri, vrede, nanga koloku gi wisrefi èn gi tra sma. Te wi e du a muiti disi, dan wi kan sori taki wi warti fu kisi a tumusi moi howpu fu têgo libi na ini a nyun grontapu fu Gado. ¡Boiti dati, te wi e leri a tumusi bun fasi fu lobi, dan a Kriaman di lobi wi, kan feni wi bun èn blesi wi now èn fu ala ten!

[Futuwortu]

[Prenki na tapu bladzijde 10]

Wi kan sori a lobi di Kresten abi, te wi e du bun gi sma

[Sma di abi a reti fu a prenki na tapu bladzijde 8]

UN PHOTO 186226/​M. Grafman