Loekoe boen nanga Simoni!
SMA ben abi foeroe lespeki gi Simon foe Samaria, na ini a libimakandra pe a ben libi. Simon ben libi na ini a fosi jarihondro G.T., èn den towfroewroko di a ben doe ben abi so wan krakti na tapoe sma taki den ben sa taki foe Simon: „A man disi na a Krakti foe Gado, di wi kan kari Bigi.” — Tori foe den Apostel 8:9-11.
Ma baka di Simon ben tron wan dopoe kresten, dan a kon si wan moro bigi krakti leki a wan di ensrefi ben sori fosi. A ben de a krakti di den apostel foe Jesus ben kisi èn di ben meki taki den ben kan gi trawan wondroe presenti foe a santa jeje. A sani dati ben naki na ati foe Simon so kefalek, taki a ben wani gi den apostel moni èn a ben aksi den: „Gi mi a makti disi toe, so taki ibriwan sma di mi e poti mi anoe na tapoe, kan kisi santa jeje.” — Tori foe den Apostel 8:13-19.
Na apostel Petrus ben piri-ai gi Simon, taki: „Meki joe solfroe nanga joe lasi gowe, bika joe ben denki foe kisi a fri presenti foe Gado nanga jepi foe moni. Joe no abi no wan prati na a afersi disi, bika joe ati no reti ini Gado ai.” — Tori foe den Apostel 8:20, 21.
Foe a bijbel tori disi sma meki a wortoe „simoni”, di den e froeklari leki „a sondoe foe bai noso seri posisi na ini a kerki”. A New Catholic Encyclopedia e erken taki spesroetoe foe a di foe neigi te leki a di foe 11 jarihondro „simoni ben de foeroe na ala presi foe den klooster, den moro lagi kerki tiriman, den biskopoe, èn den tiri foe den paus srefi”. A di foe neigi wan foe The Encyclopædia Britannica (1878) e taki: „Wan stoeka foe a historia foe a konmakandra pe den froekisi wan paus, e gi a studenti na overtoigi taki noiti no wan verkiezing ben de na ini kerki sondro taki simoni no feni presi, ala di na ini foeroe foe den kefal a simoni di ben doe ini a konmakandra dati ben de foe a moro takroe sortoe, sondro sjen èn sondro kibrifasi srefisrefi.”
Nojaso, troe kresten moesoe loekoe boen nanga simoni. Foe eksempre, wan toe sma ben sa kan gi tra sma wan lo prèise èn wan lo presenti, te den tra sma disi man gi den grani. Na a tra sei, den wan di kan gi trawan grani, e sori boen fasi gi den sma di kan gi den presenti èn di foeroetron de fajafaja foe doe dati. Ala den toe kefal disi abi foe doe nanga simoni, èn den Boekoe foe bijbel e kroetoe so wan libi krinkrin. „Foe dati ede, abi berow foe a takroe sani disi foe joe”, na so Petrus ben gi Simon tranga, „èn begi Jehovah tranga taki den sani di joe ati ben prakseri [„a plan disi foe joe”, New Jerusalem Bible] kan kisi pardon, efoe dati kan, bika mi e si taki joe na wan bita sani di e kiri sma èn wan banti foe onregtfardikifasi.” — Tori foe den Apostel 8:22, 23.
Kolokoe Simon ben si o serjoesoe a fowtoe lostoe foe en ben de. A ben begi den apostel: „Oenoe begi Jehovah tranga gi mi, taki no wan foe den sani di oenoe taki, moesoe kon na mi tapoe” (Tori foe den Apostel 8:24). Opregti kresten e gi jesi na den froemane foe a prenspari lès di de na ini den tori disi, èn den e meki moeiti foe wai pasi gi ibri flaka foe simoni.