Tyari pipel fu ala tongo kon na wan

¹ A Wortu fu Gado e kon tru! Sma „fu ala tongo fu den nâsi” e teki a tru anbegi (Sak. 8:23). Fa Yehovah Kotoigi e yepi sma fu ala ’lo, pipel, nanga tongo’ fu kon na ini wan bun posisi na fesi Yehovah, so taki den kan pasa „a bigi banawtu” libilibi?—Opb. 7:9, 14.

² Gado organisâsi e du wan sani: A Tiri Skin seti sani so taki Bijbel publikâsi de fu kisi na ini sowan 380 tongo, so taki sma na heri grontapu kan frustan krinkrin o prenspari a bun nyunsu de. A de wan bigi wroko fu meki èn tyari publikâsi kon na doro na ini so furu tongo. Disi wani taki fu tyari difrenti grupu fu bun vertaler kon makandra èn fu yepi den nanga wrokosani di den abi fanowdu fu man vertaal den publikâsi na ini ala den tongo disi. A wani taki sosrefi dati den musu druk èn seni den publikâsi gowe tu. Ma den sma di abi a moro bigi frantwortu, na den Kownukondre preikiman di e tyari a boskopu fu Bijbel gi ala sma.

³ Teki a tyalensi: Wan bigi ipi sma di e taki wan tra tongo de fu feni now na ini furu presi. Fu man miti den sma disi nanga a bun nyunsu, dan moro nanga moro futuboi fu Gado e meki muiti fu leri sabi taki Sneisitongo, Potogisitongo, Spanyorotongo noso tra tongo di sma e taki ini a birti fu den. Trawan e leri Bakratongo gebaartongo so taki den kan yepi tra sma na ini a kontren fu den. Na ini Sranan wi abi tu gemeente di e du muiti fu yepi sma di e taki wan tra tongo. Sonwan fu den sma, di noiti yere fu Yehovah noso di no sabi noti fu Bijbel, e poti bribi na ini a waarheid fu Gado Wortu.—Rom. 15:21.

⁴ Wi man du moro muiti fu meki a bun nyunsu bekènti na trakondre sma di e libi na ini a kontren pe wi e tan? (Kol. 1:25) Wan lo gemeente e orga a preikiwroko so taki den man miti den trakondre sma di e libi na ini a kontren fu den. Den preikiman fosi e leri sabi nofo fu a tongo fu man pristeri sani na wan makriki fasi. Den kan taki: „Kumorgu. Mi tyari bun nyunsu gi yu. [Baka dati den kan pristeri wan traktaat noso wan brochure san de fu kisi na ini a tongo dati.] Mi e winsi yu wan switi dei moro fara.” Yehovah e blesi den pikin muiti di wi e du na a bigin trutru!

⁵ A Kownukondre boskopu e hari sma fu ala sortu difrenti kulturu nanga tongo. Meki wi teki na okasi fu prati a boskopu nanga den.

Nyun Kring Konmakandra programa

¹ Wi musu frutrow tapu Yehovah efu wi wani hori wi bribi tranga ini wan bruya grontapu. San disi wani taki na ini wi aladei libi? Sortu krakti a abi tapu wi eigi libi èn tapu wi osofamiri libi te wi e frutrow tapu Yehovah? Fa a e yepi wi fu kakafutu gi a krakti fu a grontapu fu Satan? A Kring Konmakandra programa fu a dienstyari 2003 sa gi piki tapu den aksi disi. A thema na „Frutrow tapu Yehovah èn du bun”.—Ps. 37:3.

² Wi no e frutrow tapu Yehovah soso na spesrutu okasi noso te wi de na ini bigi nowtu. A sani disi abi fu du nanga ibri pisi fu wi aladei libi. A fosi taki di abi a nen „Frutrow tapu Yehovah ala ten” e poti krakti tapu a tori disi (Ps. 62:8). A symposium di abi fo pisi, abi leki nen „Sori taki yu e frutrow tapu Yehovah”. Den lezing disi sa sori wi fa fu feni sabi fu Bijbel, èn fa fu fiti den sani di skrifi na ini fu seti wan bun trowlibi, fu lusu problema di e opo kon na ini wi osofamiri, èn fu sorgu gi den sani di wi abi fanowdu na materia sei.

³ A grontapu fu Satan e pruberi fu dwengi wi fu abi wan kruktu denki fu san bun noso fu san no bun. A e bruya sma tu so taki den no sabi san prenspari noso san no de prenspari (Yes. 5:20). Den lezing „Luku bun nanga den soso sani fu a libi” nanga „No du san takru, du san bun” sa yepi wi fu teki a fasti bosroiti fu hori den moi markitiki fu Yehovah hei.—Amos 5:14.

⁴ Te Yehovah e tyari wan kaba kon na a seti fu sani fu a ten disi, dan ala den futuboi fu Gado musu frutrow dorodoro tapu en. A thema disi sa kon na krin ini a publikitaki di nen „Heri esi wi sa kisi frulusu fu a banawtu na ini grontapu”. Baka dati wi sa kisi a deki-ati fu ondrosuku wisrefi ini a taki „Yu warti fu libi na ondro a Kownukondre fu Gado?” A programa sa tapu nanga wan frumane fu „Frutrow ini den pramisi fu Yehovah”.

⁵ Wan heimarki fu ala Kring Konmakandra na a dopu-lezing. Iniwan sma di abi a winsi fu dopu musu taki nanga a fesiman opziener so esi leki a kan, so taki a brada disi man sreka ala sani di musu seti na fesi.

⁶ Yehovah na a wan-enkri tru Sma di e gi frutrow nanga seikerfasi na ini den takru ten disi (Ps. 118:8, 9). Meki wi alamala frutrow moro tapu Yehovah fu di wi de na ibri pisi fu a Kring Konmakandra programa.