Horidoro na ini a preikiwroko
1 Wi e libi na ini muilek ten. Sma fu a srefi kondre e feti nanga makandra, sma fu difrenti kulturu e feti nanga makandra, sma e kisi fu du nanga rampu. Den tori disi nanga tra takru sani di e pasa, kon tron aladei sani. Now moro leki oiti bifo, a libisma famiri abi bun nyunsu fanowdu. Ma furu sma no e broko den ede kwetikweti nanga yeye afersi. Na ini son kontren, a kan de wan muilek sani fu feni sma na oso èn a kan de wan moro muilek sani fu feni sma di wani arki wi, noso di wani studeri Bijbel. Ma toku, a de prenspari taki wi e horidoro na ini a preiki di wi e preiki a bun nyunsu fu Gado Kownukondre di seti kaba.—Mat. 24:14.
2 Lobi gi sma: A preikiwroko di wi e du e sori taki Yehovah lobi sma. „A no wani taki wan sma e kisi pori, ma a wani taki ala sma musu abi berow” (2 Petr. 3:9; Esek. 33:11). Fu dati ede, a poti wan komando soleki fa Yesus ben taki: „A bun nyunsu musu preiki fosi na ala kondre” (Mark. 13:10). Gado e begi sma fu kon na en èn fu lowe komoto gi a strafu di a grontapu fu Satan sa kisi (Yoèl 2:28, 29, 32; Sef. 2:2, 3). Wi no breiti taki Yehovah e gi wi na okasi dati?—1 Tim. 1:12, 13.
3 A raportu e sori taki na ini a dienstyari fu 2004, wan sani fu 6.085.387 bijbelstudie ben hori ibri mun, èn wan sani fu 5000 nyun disipel ben teki dopu ibri wiki! Sonwan fu den nyun sma disi ben teki dopu fu di Yehovah blesi a muiti di preikiman ben tan du fu taki nanga ibri sma na ini a kontren fu den. Disi meki taki furu gemeente e prisiri, èn a de wan bigi grani fu wroko makandra nanga Gado na a wroko disi di kan kibri a libi fu sma!—1 Kor. 3:5, 6, 9.
4 Prèise a nen fu Gado: Wi e horidoro fu du a preikiwroko so taki wi kan prèise Yehovah na fesi ala sma èn so taki wi kan santa en nen na fesi a heri libisma famiri (Hebr. 13:15). Satan kori „sma na heri grontapu” fu meki den bribi taki Gado no abi a makti fu lusu den problema fu a libisma famiri, taki Gado no e broko en ede nanga a pina di libisma e pina, noso taki Gado no de srefi (Openb. 12:9). Nanga a preikiwroko fu wi, wi e horibaka gi a waarheid di abi fu du nanga a gran hemel Tata fu wi. Meki wi tan prèise a nen fu en, now èn fu têgo.—Ps. 145:1, 2.