Yu sa kisi blesi te yu e horidoro

¹ „Unu sa wini unu sili efu unu horidoro” (Luk. 21:19). Den wortu disi na wan pisi fu a profeititori fu Yesus di abi fu du nanga „a kaba fu a grontapu sistema”, èn den e sori wi taki efu wi wani tan getrow, wi musu de srekasreka fu kisi furu tesi. Ma nanga a krakti fu Yehovah, ibriwan fu wi kan „horidoro te na a kaba” èn wi kan „feni frulusu”.—Mat. 24:3, 13; Fil. 4:13.

² Frufolgu, siki, problema na moni sei, nanga den broko-ede fu a libi kan meki taki ibri dei e tron wan tesi gi wi. Ma noiti wi musu frigiti taki Satan no wani dati wi tan getrow na Yehovah. Ibri dei di wi e tan loyaal na wi Tata, na wan dei pe wi e gi En na okasi fu gi wan piki tapu a tyalensi fu a Bigi Spotuman. A e gi wi bigi prisiri fu sabi taki te wi e kisi tesi, Gado no e frigiti den „watra-ai” fu wi! Den de warti gi Yehovah, èn a e prisiri Yehovah ati, te wi e tan getrow na en!—Ps. 56:8; Odo 27:11.

³ Wi e tron moro bun sma te wi e horidoro ondro tesi: Tesi kan tyari kon na krin taki wi bribi no tranga nofo, noso taki wi abi swakifasi; kande wi abi heimemre, noso wi no abi pasensi. Na presi fu pruberi fu wai pasi gi tesi, noso fu tapu den na wan fasi di no e kruderi nanga Bijbel gronprakseri, dan wi musu gi yesi na a rai fu Gado Wortu di e taki dati wi musu ’meki a horidoro di wi e tan horidoro, klari a wroko fu en’. Fu san ede? Fu di wi sa „kon bun na ala fasi” te wi e horidoro na wan getrow fasi ondro tesi (Yak. 1:2-4). Te wi e horidoro, dan dati kan yepi wi fu kon kisi difrenti fasi di warti trutru; fasi soleki a fiti di wi man fiti wisrefi na trawan, a firi di wi e firi gi trawan èn a sari-ati di wi abi nanga trawan.—Rom. 12:15.

⁴ Wi bribi e kon moro tranga te wi e horidoro ondro tesi: Te wi e horidoro ondro tesi, dan wi e kon abi wan tranga bribi di kisi tesi èn di warti srefisrefi na ini Gado ai (1 Petr. 1:6, 7). So wan bribi sa yepi wi fu tan tanapu kánkan te wi sa kisi tesi na ini a ten di e kon. Boiti dati, wi kan firi taki Gado feni wi bun, èn dati e meki a howpu fu wi kon moro tranga, fu di wi e bribi taki san wi e howpu sa kon tru.—Rom. 5:3-5.

⁵ A moro bun pai di wi kan kisi te wi e horidoro, na san e kon na krin na ini Yakobus 1:12, pe skrifi: „Koloku fu a sma di e tan horidoro te tesi e miti en, bika te Yehovah feni en bun, dan a sa kisi a kownu-ati fu libi.” Sobun, meki wi tan tanapu kánkan na ini wi getrow diniwroko gi Yehovah, aladi wi abi a frutrow taki a sa blesi „den wan di e tan lobi en”.

Pisi 2: Hori bijbelstudie di e go na fesi

Fa fu sreka wisrefi fu hori a bijbelstudie

¹ Fu gi bun leri na wan bijbelstudie no wani taki nomo dati wi musu taki fu den sani di skrifi na ini a buku, èn taki wi musu suku den tekst di kari na ini a buku. Wi musu hori a studie na so wan fasi, taki wi e doro na ati fu a studenti. Disi wani taki dati wi musu sreka wisrefi bun, aladi wi e hori a studenti na prakseri.—Odo 15:28.

² Fa wi musu sreka wisrefi: Te yu o bigin, yu kan taki nanga Yehovah fu a studenti èn yu kan taki nanga en fu den sani di a sma abi fanowdu. Aksi Yehovah fu yepi yu fu doro na ati fu a studenti (Kol. 1:9, 10). Efu yu wani frustan bun san a kapitel, noso a les wani tyari kon na krin, dan yu musu teki ten fu poti prakseri na a nen fu a kapitel, noso a les. Yu musu poti prakseri tu na den ondro-edeprakseri, èn na ibri prenki. Aksi yusrefi: ’San na a marki fu a kapitel, noso a les?’ Disi sa yepi yu fu poti prakseri na den prenspari penti, te yu e hori a studie.

³ Luku finifini san ibri paragraaf e tyari kon na krin. Suku den piki tapu den aksi di kari na ini a buku, èn hari strepi soso na ondro den moro prenspari wortu. Ondrosuku san den tekst abi fu du nanga na edeprakseri fu a paragraaf, èn luku sortuwan fu den tekst yu sa leisi na a studie. A kan de wan yepi gi yu fu skrifi syatu na a lanki fu a publikâsi, fu san a tekst e taki. A studenti musu si krin taki den sani di a e leri e komoto fu Gado Wortu.—1 Tes. 2:13.

⁴ Fiti a les na a studenti: Baka dati, luku fa yu kan fiti a les na a studenti. Prakseri sortu aksi a kan poti èn sortu sani a no sa man frustan bun, noso sortu sani a no sa bribi so makriki. Aksi yusrefi: ’San a musu kon frustan moro bun, noso na sortu spesrutu penti a musu wroko ete, so taki a kan gro na yeye fasi? Fa mi kan doro en ati?’ Hori den sani disi na prakseri èn gebroiki den te yu e studeri nanga a sma. Ten na ten, a sa de fanowdu fu sreka yusrefi fu fruteri wan agersitori, fu fruklari wan penti, noso fu poti wan tu aksi di sa yepi a studenti fu frustan wan spesrutu penti, noso tekst (Neh. 8:8). Ma luku bun taki yu no taki moro leki san de fanowdu fu yepi a sma fu frustan san yu wani leri en. Na a kaba fu a studie, yu kan luku baka fu san unu ben taki. Disi sa yepi a studenti fu hori den prenspari penti na ede.

⁵ Fu tru, a e gi wi bigi prisiri te wi e si fa nyun sma e gi Yehovah glori fu di den e handri na wan regtfardiki fasi! (Fil. 1:11) Efu yu wani yepi den fu doro a marki disi, dan yu musu sreka yusrefi bun gi ibri bijbelstudie di yu sa hori.