A de wan bigi grani fu du a Kownukondre preikiwroko

¹ Aladei, milyardmilyard sma di e libi na grontapu e kisi wini fu den sani di Yehovah e gi den na wan lobi-ati fasi, so taki den kan tan na libi (Mat. 5:45). Ma wan tu sma nomo abi na aparti grani fu sori warderi gi a Mekiman fu den, fu di den e preiki a bun nyunsu fu Gado Kownukondre (Mat. 24:14). O furu warderi yu abi gi a bigi grani disi?

² A Kownukondre preikiwroko e gi Gado grani èn a e gi den sma di e broko den ede nanga den bruya sani di e pasa na ala sei, howpu èn wan korostu firi (Hebr. 13:15). Den wan di e gi yesi na a boskopu disi, abi a howpu fu kisi têgo libi (Yoh. 17:3). Sortu grontapuwroko e gi wan sma so furu wini? Na apostel Paulus ben sori taki a abi warderi gi a diniwroko èn dati ben de fu si na ini a fasi fa a ben du a diniwroko fu en. A ben si a diniwroko fu en leki wan gudu.​—Tori. 20:20, 21, 24; 2 Kor. 4:1, 7.

³ Sori warderi gi a bigi grani di wi abi: Wan fasi fa wi e sori warderi gi a grani di wi abi fu preiki, na fu poti prakseri na a fasi fa wi e du a diniwroko fu wi. A de so taki wi e teki ten fu sreka wisrefi fu hori wan takimakandra di o naki na ati fu den sma di e arki wi? Wi kan du sani di sa meki taki wi e gebroiki Bijbel moro bun èn taki wi e taki-go-taki-kon moro bun nanga sma? Wi e wroko finifini na ini a pisi kontren di wi kisi fu wroko? Wi sabi fa fu bigin hori bijbelstudie? Neleki den getrow Kresten fu owruten èn fu disiten, na so wi e kisi a deki-ati fu si a wroko disi na a yoisti fasi, èn wi e warderi a grani disi di wi abi.​—Mat. 25:14-23.

⁴ Te wi e teki prati fayafaya na a diniwroko, aladi wi kon owru kaba, aladi a gosontu fu wi no de so bun, noso aladi wi de na ini wan tra muilek situwâsi, toku a e gi trowstu fu sabi taki Gado e warderi trutru san wi e du. A Wortu fu Gado e gi wi a dyaranti taki Yehovah e warderi a muiti di den sma disi e meki fu dini en, srefi te tra sma no e si den muiti disi leki wan kefalek sani.​—Luk. 21:1-4.

⁵ A e gi furu prisiri fu du a Kownukondre preikiwroko. Wan sisa di abi 92 yari ben taki: „Mi e si en leki wan bigi grani, taki mi ben kan gi misrefi fu du diniwroko gi Gado, 80 yari langa, èn mi no e sari taki mi du disi! Efu mi ben de yongu baka, mi ben o libi na a srefi fasi disi, bika a no de fu taki dati ’a lobi bun-ati fu Gado bun moro a libi srefi’” (Ps. 63:3). Meki a de so, taki wi tu e warderi a bigi grani disi di wi kisi fu Gado, namku fu du a Kownukondre preikiwroko.

Pisi 12: Hori bijbelstudie di e go na fesi

Yepi nyun preikiman fu bigin hori bijbelstudie

¹ Te den bijbelstudenti fu wi e bigin teki prati na a preikiwroko, dan kande den e senwe te den e prakseri taki den musu bigin hori den eigi bijbelstudie. Fa wi kan yepi den fu kisi a frutrow taki den o man du a tumusi prenspari pisi disi fu wi diniwroko?​—Mat. 24:14; 28:19, 20.

² Te wan bijbelstudenti doro den markitiki kaba fu tron wan preikiman di no dopu ete, dan a de so furu tron taki a de na a Theokrasia Diniwroko-skoro kaba. A leri di a e leri fu sreka ensrefi èn fu hori lezing na a skoro sa yepi en fu kon sabi fa a musu gi sma leri, so taki a kan tron „wan wrokoman di no abi fu syen fu noti èn di e gebroiki a wortu fu waarheid na wan reti fasi”.​—2 Tim. 2:15.

³ Leri den nanga yepi fu na eksempre fu yu: Yesus ben gi den disipel fu en leri fu di a ben sori den krin san den ben musu du èn fu di a ben gi den wan bun eksempre. A ben taki: „Ala sma di kisi leri na wan volmaakti fasi, o de leki en leriman” (Luk. 6:40). A de tumusi prenspari taki yu e du neleki Yesus, fu di yu de wan bun eksempre na ini yu diniwroko. Te a studenti fu yu e luku na eksempre di yu e gi na ini a diniwroko, dan a sa frustan taki a marki fu tyari gobaka, na fu bigin bijbelstudie.

⁴ Sori a studenti taki te wi e aksi na ososma efu a wani studeri Bijbel, dan furu tron a no de fanowdu fu fruklari finifini fa a studie e hori. Furu tron, a moro bun fu sori na ososma fa a studie e hori, kande fu di yu e luku wán noso tu paragraaf fu a publikâsi di unu o studeri. Yu kan gebroiki den eksempre di e sori fa fu du disi, na tapu bladzijde 8 fu a Kownukondre diniwroko disi èn na tapu bladzijde 6 fu Wi Kownukondre diniwroko fu yanuari 2002.

⁵ Te a fiti, dan yu kan aksi a studenti fu go na wan tra bijbelstudie makandra nanga yu, noso nanga wan tra preikiman di abi ondrofeni. Kande a kan taki wan sani fu wan paragraaf noso fu wan prenspari bijbeltekst. Sobun, a studenti kan leri bun furu te a e luku fa trawan e hori bijbelstudie di e go na fesi (Odo 27:17; 2 Tim. 2:2). Prèise en fu a muiti di a e meki, èn sori en fa a kan go na fesi.

⁶ Te wi e leri nyun preikiman fu de leriman fu Gado Wortu, dan dati sa meki taki den de srekasreka gi a „bun wroko” fu bigin hori bijbelstudie densrefi (2 Tim. 3:17). A e gi wi furu prisiri fu wroko makandra nanga den, aladi wi e gi tra sma a tumusi moi kari: „Meki ibri sma di wani, kon dringi fu a watra di e gi libi èn di de fu kisi fu soso”!​—Openb. 22:17.