Bigin studeri nanga sma na den mofodoro èn na telefon

1, 2. Fa wi kan fiti wisrefi fu hori bijbelstudie nanga sma di abi furu fu du?

¹ Sma na ini a ten disi abi furu fu du. Ma toku, furu fu den wani sabi moro fu Gado. Fa wi kan yepi den sma disi fu kon kisi san den abi fanowdu fu kon sabi moro fu Gado? (Mat. 5:3) Furu preikiman man bigin studeri Bijbel nanga sma na den mofodoro noso na telefon. Yu man du moro na ini a diniwroko fu di yu e pruberi fu gi kotoigi na a fasi disi tu?

² Efu wi wani bigin wan bijbelstudie, dan wi musu de srekasreka so taki te wi e kisi na okasi, wi kan sori sma fa wan bijbelstudie e hori Fa wi kan du disi? Pe wi kan du disi?

3. Fu san ede yu kan sori wan sma fa wan bijbelstudie e hori te yu miti en fu a fosi leisi? Fa yu kan du disi?

³ Na den mofodoro: Te yu e miti wan sma di wani taki fu Bijbel, dan wan makriki sani di yu kan du, na fu luku wan paragraaf di yu ben sreka kaba na fesi, èn fu bigin studeri nanga a sma wantewante. Yu kan luku fu eksempre a fosi paragraaf fu les 1 fu a San Gado e aksi-brochure. Leisi a paragraaf, luku na aksi, èn taki fu wan, noso tu bijbeltekst di kari. Furu tron, yu kan du disi leti na a mofodoro fu a sma, na ini feifi noso tin miniti. Efu a sma lobi a takimakandra, dan seti sani fu luku a tra paragraaf, noso den tu tra paragraaf wan tra leisi.​—Yu kan feni tra eksempre di e sori fa fu bigin wantewante nanga wan bijbelstudie, na ini Wi kownukondre diniwroko fu yanuari 2002, blz. 6.

4. Fa wi kan bigin hori wan bijbelstudie na a mofodoro te wi e go baka na wan sma?

⁴ Yu kan du a srefi sani disi fu bigin wan bijbelstudie te yu e tyari gobaka. Fu eksempre, yu kan sori a sma a San Gado e aksi-brochure èn yu kan luku les 2, paragraaf 1 nanga 2 di e taki fu Gado nen. A tra leisi te yu e go na a sma, yu kan taki fu paragraaf 3 nanga 4, di e sori san Bijbel e tyari kon na krin fu den fasi fu Yehovah. Na a tra takimakandra di yu sa hori nanga a sma, yu kan luku paragraaf 5 nanga 6 nanga a prenki na tapu bladzijde 5, fu tyari kon na krin fa a studeri di wi e studeri Bijbel e yepi wi fu kon leri sabi Yehovah. Yu kan du ala den sani disi, aladi yu e tanapu na a sma en mofodoro.

5, 6. (a) Fu san ede son sma wani studeri Bijbel na telefon? (b) San wi kan taki te wi e aksi sma efu den wani studeri na telefon?

⁵ Na telefon: Kande son sma wani fu studeri Bijbel na telefon, na presi fu studeri langalanga nanga wan sma. Luku na eksempre di e kon now: Di wan sisa ben e preiki oso fu oso, a miti wan yongu uma di abi pikin èn di abi furu fu du na a wroko fu en. Di a sisa no ben man miti na uma disi na oso moro, dan a bosroiti fu bel na uma. A yongu uma ben fruteri en taki trutru a no ben abi ten fu taki fu Bijbel. A sisa ben taigi en: „Na ini 10 noso 15 miniti, yu kan leri wan nyun sani, srefi efu a de na telefon.” „We, efu wi o studeri na telefon, dan mi wani!”, na so na uma ben piki. Syatu baka dati, wan bijbelstudie ben hori doronomo nanga na uma disi na telefon.

⁶ Son sma pe yu e go baka sa wani studeri na telefon? Yu kan pruberi fu gebroiki na eksempre fu a sisa fu suma wi ben taki didyonsro, noso yu kan taki nomo: „Efu yu wani, dan wi kan taki fu Bijbel na telefon. Dati ben o de moro bun gi yu?” Te wi e fiti wisrefi fu hori bijbelstudie na so wan fasi taki a e fiti na a situwâsi fu trawan, dan wi kan yepi den fu „feni a sabi fu Gado srefi”.​—Odo 2:5; 1 Kor. 9:23.

Sani di yu kan fruteri fu den tijdschrift

A Waktitoren 15 yuli

„Na ini den dusundusun yari fu a libisma historia, a libisma famiri kon kisi furu difrenti bribi. Yu denki taki wan sma kan kon sabi sortuwan na a tru bribi èn sortuwan na falsi bribi? [Gi a sma na okasi fu piki.] A tijdschrift disi e sori pe yu kan feni tru leri di Gado feni bun.” Leisi 2 Timoteyus 3:16.

Ontwaakt! 22 yuli

„A de wan sari sani trutru fu si taki so furu pina de fu di rampu e pasa na ini a naturu. [Kari wan eksempre di sma fu a presi drape sabi.] Yu denki taki moro fu den sortu rampu disi de na pasi e kon? [Gi a sma na okasi fu piki.] A tijdschrift disi e taki moro fu na aksi disi. A e gi trowstu sosrefi na den wan di lasi wan lobiwan na ini den sortu rampu disi.” Leisi Yohanes 5:28, 29.

A Waktitoren 1 aug.

„Furu sma na ini a ten disi e kisi a firi taki den no warti noti. Yu denki taki wan sani de di wi kan du fu yepi den? [Gi a sma na okasi fu piki.] A tijdschrift disi e taki fa Bijbel kan yepi den sortu sma disi fu prisiri trutru.” Poti prakseri na den bijbeltekst di skrifi nanga fatu letter na ini na artikel di nen „Bijbel kan yepi yu fu de nanga prisiri”.

Ontwaakt! 8 aug.

„Furu sma e frede doronomo taki wan sani kan pasa nanga den. San yu denki: Sortu sani e meki sma e frede so furu? [Gi a sma na okasi fu piki.] A tijdschrift disi e gi bun rai fa wi kan kibri wisrefi gi ogri di e pasa furu. A e taki sosrefi fu a pramisi fu Bijbel di e taki fu wan grontapu pe sma no sa frede.” Leisi Yesaya 11:9.