Pisi 3: Hori bijbelstudie di e go na fesi

Gebroiki Bijbel bun

1. Fu san ede wi musu poti krakti tapu Bijbel te wi hori bijbelstudie?

¹ A marki di wi wani doro te wi e hori bijbelstudie, na fu ’meki disipel’. Wi wani yepi sma fu frustan èn fu teki den leri fu Gado Wortu èn sosrefi fu fiti den leri disi na ini den libi (Mat. 28:19, 20; 1 Tes. 2:13). Fu dati ede, Bijbel musu de a moro prenspari sani di wi e gebroiki na a studie. Na a bigin, a ben o bun kande fu sori den studenti fa den kan feni den bijbeltekst na ini den eigi Bijbel. Ma fa wi kan gebroiki Bijbel fu yepi den sma disi fu go na fesi na yeye fasi?

2. Fa wi e bosroiti sortu bijbeltekst wi o leisi èn o taki fu den?

² Luku sortu bijbeltekst yu o leisi: Te yu e sreka yusrefi, dan pruberi fu si san ibri bijbeltekst na ini a les abi fu du nanga a pisi tori di unu sa luku. Baka dati, luku sortuwan fu den tekst yu o leisi èn o taki fu en na a studie. Furu tron, a moro bun fu leisi den bijbeltekst di e sori taki den sani di wi e bribi, na sani di skrifi na ini Bijbel. Kande a no de fanowdu fu leisi den tekst di e sori moro finifini sani fu a tori. Hori na prakseri san ibri studenti abi fanowdu èn na ini sortu situwâsi a de.

3. Fu san ede a bun fu poti aksi, èn fa wi kan du dati?

³ Poti aksi: Na presi taki yu e fruklari den bijbeltekst gi a studenti, dan meki a studenti fruklari den tekst gi yu. Yu kan gi en deki-ati fu du dati, fu di yu e poti den yoisti aksi gi en. Efu a de krin fa wan bijbeltekst e fiti na a pisi tori di unu e luku, dan kande yu kan aksi a studenti nomo fa a tekst e horibaka gi san skrifi na ini a paragraaf. Na tra okasi a kan de fanowdu fu poti wán spesrutu aksi, noso moro aksi di abi fu du nanga a tori, fu yepi a studenti fu kisi a yoisti prakseri fu a tori. Efu a de fanowdu ete fu fruklari wan sani, dan yu kan du dati baka te a studenti gi piki tapu na aksi.

4. Omeni sani wi musu fruklari fu den bijbeltekst di wi e leisi?

⁴ No meki a tori kon muilek gi a studenti: Furu tron, wan sma di sabi sutu peiri bun, abi soso wán peiri fanowdu fu sutu wan sani. Na a srefi fasi, wan bun leriman no abi fu gebroiki furu wortu fu tyari wan sani kon na krin. A kan tyari a tori kon na krin na wan makriki fasi, na wan fasi di a sma o frustan, èn na wan soifri fasi. Son tron a kan de fanowdu fu go ondrosuku sani na ini den Kresten publikâsi fu frustan wan bijbeltekst èn fu fruklari dati na a yoisti fasi (2 Tim. 2:15). Ma luku bun fu no fruklari ibri pisi fu ala den bijbeltekst na a studie. Taki soso fu den sani di de fanowdu fu tyari a tori kon na krin.

5, 6. Fa wi kan yepi den studenti fu fiti Gado Wortu na ini den libi, ma san wi no musu du?

⁵ Sori a studenti fa fu gebroiki den sani di a leri: Te a fiti, dan yu kan yepi a studenti fu si fa a kan gebroiki den bijbeltekst na ini en eigi libi. Fu eksempre, te yu e luku Hebrewsma 10:24, 25 nanga wan studenti di no e kon na den Kresten konmakandra ete, dan kande yu kan taki nanga en fu wan fu den konmakandra èn yu kan gi en wan kari fu kon. Ma luku bun taki yu no e dwengi a sma. Meki a Wortu fu Gado gi en a deki-ati fu du san de fanowdu fu plisi Yehovah.—Hebr. 4:12.

⁶ Te wi e du a wroko fu wi fu meki disipel, dan meki wi suku fu gebroiki Bijbel bun, so taki wi kan „meki sma gi yesi nanga yepi fu bribi”.—Rom. 16:26.

Sani di yu kan fruteri fu den tijdschrift

A Waktitoren 15 okt.

„Son sma e denki taki o moro moni den abi, o moro koloku den sa abi na ini den libi. Yu denki taki a sani disi tru? [Gi a sma na okasi fu piki.] Luku san wan man ben skrifi di ben abi bun furu gudu. [Leisi Preikiman 5:10.] A tijdschrift disi e taki fu sani di warti moro gudu.”

Ontwaakt! 22 okt.

„Furu sma e si o prenspari a de fu bigin gi den pikin fu den leri te den yongu ete. Yu denki taki disi de fanowdu na ini a ten disi? [Gi a sma na okasi fu piki. Baka dati, leisi Odo 22:6.] Na Ontwaakt! disi e taki fu spesrutu sani di papa nanga mama kan du fu yepi den pikin fu den fu kon tron opregti bigisma di abi wan libi di e waka bun.”

A Waktitoren 1 nov.

„Furu sma no e bribi moro taki libisma tirimakti kan lusu den problema di wi abi na ini a ten disi. Yu denki taki wan sma de di kan meki den sani disi kon tru di skrifi na ini den vers disi? [Leisi Psalm 72:7, 12, 16. Baka dati, gi a sma na okasi fu piki.] A tijdschrift disi e fruklari suma na a fesiman fu suma den profeiti ben taki, èn san a sa du.”

Ontwaakt! 8 nov.

„Pikin abi yepi fanowdu fu man kakafutu gi den problema di den abi na ini a ten disi, a no so? [Gi a sma na okasi fu piki. Baka dati, leisi Efeisesma 6:4.] A tijdschrift disi e fruklari san a wani taki trutru fu gi trangaleri. A e taki tu fa papa nanga mama kan yepi den pikin fu den, èn fa den kan piri-ai gi den sondro fu meki den pikin lasi-ati.”