Yu yepi de fanowdu

¹ „Grantangi gi ala den sani di unu e du gi wi. A wroko di unu e du e tyari wini gi wi trutru.” Den wortu disi e sori heri moi o furu wi e warderi den owruman fu wi, nanga den dinari ini a diniwroko. Fu di na organisâsi fu Gado e kon moro bigi, meki ala ten lepi brada de fanowdu fu dini na ini den pikinmoro 100.000 gemeente na heri grontapu. Efu yu na wan brada di dopu kaba, dan yu yepi de fanowdu.

² ’Suku fu gi yepi’: Fa yu kan suku fu kisi moro grani na ini a diniwroko? (1 Tim. 3:1) Fu taki en leti, na fu di yu e suku fu de wan bun eksempre na ini ala afersi fu yu libi (1 Tim. 4:12; Tit. 2:6-8; 1 Petr. 5:3). Teki prati fayafaya na a preikiwroko, èn yepi trawan fu du a srefi sani tu (2 Tim. 4:5). Du muiti fu yepi tra bribiman nanga yu heri ati (Rom. 12:13). Studeri Gado Wortu fayafaya, èn suku fu kon moro bun na ini ’a fasi fa yu e gi leri’ (Tit. 1:9; 1 Tim. 4:13). De fayafaya te yu e du den wroko di den owruman gi yu (1 Tim. 3:10). Efu yu na edeman fu wan osofamiri, dan ’tiri yu eigi osofamiri na wan tumusi bun fasi’.—1 Tim. 3:4, 5, 12.

³ Fu dini leki owruman noso dinari ini a diniwroko, wani taki dati wan sma musu wani wroko tranga èn taki a no musu prakseri ensrefi nomo (1 Tim. 5:17). Sobun, te yu wani kisi grani, dan yu musu leri yusrefi fu dini trawan nanga sakafasi (Mat. 20:25-28; Yoh. 13:3-5, 12-17). Prakseri dipi fu a fasi fa Timoteyus ben e denki, èn pruberi fu waka baka na eksempre fu en (Fil. 2:20-22). Tyari yusrefi na wan bun fasi neleki Timoteyus so taki yu kan kisi moro grani (Tori. 16:1, 2). Te yu e du muiti fu kon kisi den fasi di de fanowdu fu kan teki moro frantwortu, èn te yu e arki den rai di sma e gi yu fu yepi yu fu gro na yeye fasi, dan ’ala sma [sa] si taki yu e go na fesi’.—1 Tim. 4:15.

⁴ Papa nanga mama, leri yongu pikin fu yepi trawan: Pikin-nengre kan leri fu yepi trawan te den yongu ete. Leri den fu arki bun na den konmakandra, leri den fu preiki, èn fu de wan bun eksempre na ini a fasi fa den e tyari densrefi na a Kownukondre zaal èn na skoro. Leri den fu lobi yepi trawan. Den kan du dati fu eksempre te den e yepi fu krin a Kownukondre zaal, te den e yepi den owruwan, èn so moro fara. Gi den na okasi fu ondrofeni o furu prisiri den kan kisi te den e sani na trawan (Tori. 20:35). Te wi e leri den yonguwan na so wan fasi, dan dati kan meki taki den tron pionier, dinari ini a diniwroko, nanga owruman bakaten.

Pisi 4: Hori bijbelstudie di e go na fesi

Fa fu yepi a studenti fu sreka ensrefi

¹ Furu tron wan studenti di e leisi a les na fesi, di e hari strepi na ondro den piki, èn di e denki fa fu gi piki nanga en eigi wortu, e go na fesi moro esi na yeye fasi. Fu dati ede, te yu seti sani fu studeri Bijbel nanga a sma ibri wiki, dan sreka wan les makandra nanga en fu sori en fa a kan sreka ensrefi. Furu tron a bun fu sreka wan heri kapitel noso les makandra nanga a studenti.

² Fa fu hari strepi èn skrifi sani na ini yu buku: Sori a studenti fa a kan feni den yoisti piki tapu den aksi di skrifi. Sori a studenti yu eigi buku di yu e gebroiki fu studeri nanga en, so taki a kan si fa yu hari strepi soso na ondro den moro prenspari wortu noso pisi fu a paragraaf. Te unu e poti prakseri na a kapitel, dan a studenti sa wani teki na eksempre fu yu, fu di a e hari strepi na ini en eigi buku soso na ondro den prenspari wortu di sa yepi en fu memre a piki (Luk. 6:40). Baka dati, aksi en fu gi piki nanga en eigi wortu. Disi sa yepi yu fu si o bun a e frustan a les, noso a kapitel.

³ Wán prenspari sani di a studenti musu du te a e sreka ensrefi, na fu luku finifini san skrifi na ini den tekst di kari na ini a paragraaf (Tori. 17:11). Yepi a studenti fu si fa ibri tekst di kari e horibaka gi wan penti di e kon na krin na ini a paragraaf. Sori en fa a kan skrifi wan tu sani na a lanki fu en eigi buku di a e gebroiki fu studeri. Sorgu taki a studenti e frustan krin taki den sani di a e leri komoto fu Bijbel. Gi en deki-ati fu gebroiki den tekst di kari so furu leki a man, te a e gi piki na a studie.

⁴ Luku san na den edepenti èn luku syatu san yu ben leri: Bifo a studenti bigin luku a kapitel, noso a les finifini, dan a ben o bun efu a ben o luku syatu san na den edepenti fu a tori di a e studeri. Sori a studenti taki a kan luku den edepenti fu a kapitel fu di a e poti prakseri syatu na a nen fu a kapitel, na den ondro-edeprakseri, èn na den prenki. Sori a studenti taki te a kaba sreka ensrefi, dan a ben o de wan koni sani fu luku syatu baka sortu prenspari penti kon na krin na ini a les. Efu wan faki de nanga aksi, dan a studenti kan gebroiki den aksi dati fu luku baka san a leri. Te a e du disi, dan dati sa yepi en fu memre den sani di a ben leri.

⁵ Te wi e yepi a studenti fu sreka ensrefi bun gi a studie, dan dati sa yepi en fu gi moi piki na den gemeente konmakandra. Disi sa yepi a studenti tu fu kisi a gwenti fu studeri, èn a sa kisi wini fu dati srefi te a kaba studeri.