„Teki den wortu fu bribi leki nyanyan”

¹ Wi musu meki tranga muiti te wi wani gi wisrefi dorodoro na ini a dini fu Gado (1 Tim. 4:7-10). Efu wi ben o du dati nanga wi eigi krakti, dan a no ben o teki langa fosi wi kon weri èn wi no ben o man du a wani fu Gado dorodoro te wi ben o pruberi fu tyari wisrefi na so wan fasi (Yes. 40:29-31). Wan fasi fa wi kan kisi krakti fu Yehovah, na te wi e „teki den wortu fu bribi leki nyanyan”.​—1 Tim. 4:6.

² Bogobogo yeye nyanyan: Yehovah e gi wi bogobogo yeye nyanyan nanga yepi fu en Wortu èn nanga „a getrow èn koni srafu” (Mat. 24:45). Wi e du san de fanowdu fu kisi wini fu den sani disi? Wi e leisi Bijbel ibri dei? Wi e poti spesrutu ten na wan sei fu studeri èn fu denki dipi fu den sani di wi leri? (Ps. 1:2, 3) Te wi e hori wisrefi na a gosontu yeye nyanyan disi, dan dati e gi wi krakti èn a e kibri wi gi den sani fu a grontapu fu Satan di kan meki wi kon swaki (1 Yoh. 5:19). Efu wi e furu wi frustan nanga bun sani èn efu wi e du den sani dati na ini wi libi, dan Yehovah sa de nanga wi.​—Fil. 4:8, 9.

³ Yehovah e gi wi krakti sosrefi nanga yepi fu den gemeente konmakandra (Hebr. 10:24, 25). Den sani di wi e leri na yeye fasi èn a bun demakandra di wi abi na den konmakandra disi, e tranga wi fu tanapu kánkan te wi e kisi fu du nanga tesi (1 Petr. 5:9, 10). Wan Kresten yonguwan ben taki: „Heri dei mi de na skoro, èn dati e weri mi. Ma den konmakandra de leki wan kowrupe na ini wan drei sabana, pe mi e kisi krakti baka fu man pasa a tra dei na skoro.” Wi e kisi trutru blesi te wi e meki muiti fu go na den konmakandra!

⁴ Meki a waarheid bekènti: A preiki di Yesus ben e preiki gi trawan, ben de leki nyanyan gi en. A ben kisi krakti fu dati (Yoh. 4:32-34). Na so a de tu, taki te wi e fruteri trawan den tumusi moi pramisi fu Gado, dan wi e kisi krakti baka. Te wi e tan abi furu fu du na ini a diniwroko, dan dati e meki taki wi ati nanga wi frustan e poti prakseri na a Kownukondre èn na den blesi di o kon heri esi. Disi e gi wi trutru krakti baka.​—Mat. 11:28-30.

⁵ A de wan trutru blesi gi wi taki wi kan kisi wini fu a bogobogo yeye nyanyan di Yehovah e gi a pipel fu en na ini a ten disi! Meki wi tan bari fu prisiri so taki a e kisi prèise.​—Yes. 65:13, 14.

Pisi 5: Hori bijbelstudie di e go na fesi

Luku o furu yu man du na a studie

¹ Te Yesus ben e gi leri, a ben hori na prakseri omeni den disipel fu en ben man leri, èn fu dati ede a ben taki nanga den „solanga den ben man frustan en” (Mark. 4:33; Yoh. 16:12). Na a srefi fasi, den wan di e gi leri fu Gado Wortu na ini a ten disi, musu luku o furu den e du na wan bijbelstudie. Efu wan sma di e hori wan studie wani sabi o furu a kan du ibri leisi nanga a studenti, dan a abi fu luku a situwâsi fu a studenti èn omeni a studenti man leri. A musu luku tu san na a situwâsi fu ensrefi, èn a koni di a abi fu gi leri.

² Meki a studenti kon kisi wan tranga bribi: Kande son studenti musu studeri wan sani, tu noso dri leisi, fosi den kon frustan wan pisi tori di tra studenti man frustan makriki na ini wán leisi. A de moro prenspari fu yepi a studenti fu frustan wan pisi tori bun, leki fu studeri wan lo sani nanga en na ini wan syatu pisi ten. Ibri studenti musu kisi krinkrin buweisi fu man bribi taki Gado Wortu tru.​—Odo 4:7; Rom. 12:2.

³ Te yu e hori a bijbelstudie ibri wiki, dan teki ala ten di de fanowdu fu yepi a studenti fu frustan san a e leri èn yepi en fu bribi den sani di a e leri fu Gado Wortu. Luku bun taki yu no e hasti yusrefi fu di yu wani kaba esi-esi, bika dati no o meki a studenti kisi wini dorodoro fu den tru tori di a e leri. Teki nofo ten fu poti prakseri na den prenspari penti èn fu luku den prenspari bijbeltekst di e horibaka gi den sani di a studenti e leri.​—2 Tim. 3:16, 17.

⁴ Hori yusrefi na a thema fu a studie: Aladi wi wani luku bun taki wi no e hasti wisrefi na a studie, toku wi wani luku bun sosrefi dati wi no e taki fu sani di no abi fu du nanga a studie. Efu wan studenti wani fu taki furu fu afersi di abi fu du nanga ensrefi, dan kande a sa de fanowdu fu seti sani so, taki wi e taki fu den tori dati baka a studie.​—Preik. 3:1.

⁵ Na a tra sei, fu di wi de fayafaya gi a waarheid, a kan muilek gi wi fu no taki tumusi fu tra sani di no abi fu du nanga a studie (Ps. 145:6, 7). Wanwan leisi a kan bun fu taki fu wan tra sani di no abi fu du nanga a studie, noso fu wan ondrofenitori. Ma wi no ben sa wani dati wi e taki so furu noso so langa fu den tori disi taki a studenti no sa man kisi a soifri sabi fu den prenspari Bijbel leri.

⁶ Te wi no e taki fu tumusi furu sani ibri leisi te wi e hori wan bijbelstudie, dan na so fasi wi e yepi den bijbelstudenti fu „waka na ini a leti fu Yehovah”.​—Yes. 2:5.