Pisi 6: Hori bijbelstudie di e go na fesi

San yu kan du te wan bijbelstudenti poti wan aksi

¹ Te wan bijbelstudie e waka bun kaba, dan a moro bun fu poti prakseri na Bijbel leri wan fru wan, na presi fu dyompo fu a wan tori go na a trawan. Disi e yepi a studenti fu kisi soifri sabi moro nanga moro, so taki a kan go na fesi na yeye fasi (Kol. 1:9, 10). Ma furu tron a de so taki den studenti e poti aksi fu difrenti tori na a studie. San wi musu du te dati e pasa?

² Abi a koni fu si sani krin: Furu tron a de so taki yu kan gi piki wantewante tapu den aksi, te den abi fu du nanga a pisi tori di unu e luku. Efu bakaten a publikâsi di unu e studeri o taki fu na aksi di a studenti poti, dan a ben o moro bun fu sori a studenti dati. Ma efu wan aksi no abi noti fu du nanga a pisi tori di unu e studeri, noso efu yu musu ondrosuku a tori bifo yu kan gi wan bun piki tapu na aksi, dan a moro bun fu poti prakseri na a aksi dati baka a studie, noso na wan tra okasi. Son preikiman e feni taki te den e skrifi na aksi na tapu papira, dan dati e gi a studenti a dyaranti taki a sma di e studeri nanga en e si na aksi fu en leki wan seryusu sani èn na a srefi ten disi e yepi fu no poti prakseri na tra tori di no abi noti fu du nanga a studie.

³ Den publikâsi di wi e gebroiki fu studeri nanga sma, e taki syatu fu furu fu den leri fu Bijbel. San musu pasa te wan studenti e feni en muilek fu agri nanga wan spesrutu Bijbel leri, noso efu a e hori ensrefi nomonomo na wan falsi leri? Kande a ben o bun fu luku na ini tra publikâsi di e taki finifini fu a fasi fa Bijbel e taki fu a tori dati. Efu a studenti no kisi na overtoigi ete, dan libi a tori gi wan tra leisi èn go doro fu studeri nanga a sma (Yoh. 16:12). Te a studenti e kisi moro sabi fu Bijbel èn te a e go na fesi na yeye fasi, dan a kan kon frustan a spesrutu Bijbel leri dati.

⁴ Abi sakafasi: Efu yu no de seiker san na a piki tapu wan aksi, dan luku bun fu no gi wan piki di e sori fa yusrefi e prakseri fu sani (2 Tim. 2:15; 1 Petr. 4:11). Fruteri a sma taki yu sa ondrosuku a tori èn taki yu sa piki en wan tra leisi. Kande yu kan gebroiki na okasi disi fu leri a studenti fa fu ondrosuku sani. Sori en ibri leisi pikinsopikinso fa a kan gebroiki den difrenti yepisani di na organisâsi fu Yehovah gi wi. Na a fasi disi a studenti sa man feni piki tapu den aksi fu en te fu kaba.​—Tori. 17:11.

Yepi den fu kon sabi moro

¹ Te wi e preiki a bun nyunsu, dan furu tron wi e miti sma di no e libi na ini a kontren fu wi pe wi e preiki, noso sma di e taki wan tra tongo, soleki a dofusma-tongo. Kande son sma nanga suma wi ben abi bun Bijbel takimakandra, froisi gowe fu a kontren fu wi pe wi e preiki. Fa wi kan seti sani gi den sma disi so taki den kan kon sabi moro? Wi kan yepi den fu di wi e gebroiki a papira Te bezoeken anderstalig adres (S-43).

² Furu tron sma e poti yesi arki a bun nyunsu moro bun te den e yere dati na ini a mamatongo fu den (Tori. 22:1, 2). Fu dati ede, te wi e miti wan sma di e taki wan tra tongo, dan furu tron wi musu skrifi disi na tapu a papira srefi te a sma no e sori taki a wani kon sabi moro fu a Kownukondre boskopu. Ma te wan bigi grupu sma de di e taki wan tra tongo èn den e kisi kotoigi na ini den eigi tongo, dan kande a no de fanowdu fu skrifi dati na tapu a papira, boiti efu wan sma sori taki a wani sabi moro.

³ Skrifi sani na tapu a papira: Suku na wan koni fasi fu kon sabi a nen fu a sma, pe a e libi, èn san na a telefon-nomru fu en. Skrifi na tapu a papira o furu a sma wani sabi, o ten a sma wani taki den kotoigi kon baka na en, sortu publikâsi a sma teki noso sortu publikâsi a aksi fu kisi, èn skrifi sosrefi sortu tongo a sma e frustan moro bun. Baka te yu skrifi ala den sani disi na tapu a papira, dan gi en wantewante na a gemeente sekretarsi. A brada disi sa gi a papira na a gemeente noso na a grupu di kan yepi a sma moro bun.

⁴ Pe yu kan seni a papira go: Efu a sekretarsi no sabi sortu gemeente noso grupu musu kisi a papira, noso efu a no sabi na adres fu a gemeente noso grupu, dan a kan bel a Dienst-afdeling na a bijkantoro fu kon sabi moro fu a tori disi. A no de fanowdu moro fu taigi a foto-opziener taki yu seni a papira gowe.

⁵ Te wan gemeente noso wan grupu e kisi wan fu den Te bezoeken anderstalig adres papira disi pe ala sani skrifi na tapu, dan den musu seti sani fu go baka na a sma so esi leki a kan. Te wi de fayafaya fu du san wi musu du, dan wi kan de seiker taki Yehovah sa opo na ati fu den wan di „abi a yoisti denki fu man kisi têgo libi”.​—Tori. 13:48.