Pisi 8: Hori bijbelstudie di e go na fesi

Tyari den studenti kon na a organisâsi

1. Fu san ede a bun fu taki pikinso fu Yehovah en organisâsi ibri wiki te wi de na wan bijbelstudie?

¹ A marki di wi abi te wi e hori bijbelstudie no de wawan fu leri sma den sani di Bijbel e leri, ma wi wani yepi den studenti tu fu kon tron wan pisi fu a Kresten gemeente (Sak. 8:23). A brochure Jehovah’s Getuigen — Wie zijn zij? Wat geloven zij? (Yehovah Kotoigi​—Suma na den? San den e bribi?) kan yepi wi fu du disi. Gi nyun bijbelstudenti den eigi brochure, èn gi den a deki-ati fu leisi en. Boiti dati, ibri wiki te wi e studeri nanga sma dan wi musu gebroiki wan tu miniti fu fruteri a studenti wan tu sani fu na organisâsi fu Yehovah.

2. Fa yu kan gi bijbelstudenti deki-ati fu go na den gemeente konmakandra?

² Gemeente konmakandra: A moro prenspari fasi fa bijbelstudenti kan kisi warderi gi na organisâsi fu Gado, na fu abi demakandra nanga wi na den gemeente konmakandra (1 Kor. 14:24, 25). Fu dati ede, yu kan bigin meki den kon sabi san na den feifi konmakandra di wi abi ibri wiki. Ibri leisi yu kan taki fu wan konmakandra. Kari a nen fu a publikitaki di sa hori a wiki di e kon. Sori den san wi sa studeri na a Waktitoren-studie èn na a Gemeente Bukustudie. Fruteri den wan tu sani fu a Theokrasia Diniwroko-skoro nanga a Diniwroko Konmakandra. Efu yu abi wan prati na a skoro, dan kande yu kan sreka dati nanga den. Fruteri den wan tu moi penti di kon na krin na den konmakandra. Gebroiki den fowtow na ini den publikâsi fu wi fu yepi den sma fu kon si san e pasa na den konmakandra. Na a fosi studie kaba yu musu gi den wan kari fu kon na den konmakandra.

3. Fu sortu sani fu na organisâsi wi kan taki?

³ Te wi e doro a ten fu a Memrefesa, den bigi konmakandra nanga a kongres, èn te a kring-opziener o fisiti a gemeente, dan wi musu gebroiki wan tu miniti fu fruteri den studenti san den seti disi wani taki, èn wi musu gi den deki-ati fu kon na den konmakandra disi. Safrisafri wi musu gi piki tapu den aksi soleki: Fu san ede wi nen Yehovah Kotoigi? Fu san ede wi e kari den konmakandra presi fu wi, Kownukondre zaal? Sortu wroko den owruman nanga den dinari ini a diniwroko e du? Fa a preikiwroko orga, èn sosrefi den kontren pe a preikiwroko e du? Fa den publikâsi fu wi e meki? Fa na organisâsi e kisi moni? Fa a bijkantoro nanga a Tiri Skin e teki fesi na ini a wroko?

4, 5. Fa den video fu wi kan meki taki sma kisi moro warderi gi na organisâsi?

⁴ Video di e meki sma frustan sani moro krin: Wan tra fasi fa bijbelstudenti kan leri moro fu a moi organisâsi fu Yehovah, de nanga yepi fu den video fu wi. A video Tot de einden der aarde e sori fa a preikiwroko e du na heri grontapu; a video Onze gehele gemeenschap van broeders e sori den sma a bradafasi fu wi na heri grontapu; èn a video Verenigd door Goddelijk onderwijs e sori a wánfasi di Yehovah Kotoigi abi. Di wan umasma, di ben kisi den tijdschrift nanga tra buku fu wi feifi yari langa kaba, si a video Jehovah’s Getuigen — De organisatie achter de naam, dan a video naki en ati taki a krei. A ben kon kisi frutrow na ini den Kotoigi di ben go na en, ma baka di a si a video, dan a ben kon si taki a ben kan frutrow na organisâsi tu. A bigin wan bijbelstudie, èn a wiki na baka, a go na den konmakandra na a Kownukondre zaal.

⁵ Efu wi e gebroiki wan tu miniti ibri wiki nanga den bijbelstudenti fu wi, èn efu wi e gebroiki den wrokosani di wi kisi, dan safrisafri wi kan tyari den bijbelstudenti kon na a organisâsi di Yehovah e gebroiki na ini a ten disi.

Sani di yu kan fruteri fu den tijdschrift

A Waktitoren 15 mrt.

„Sma na heri grontapu e prèise den leri fu Yesus. [Leisi san skrifi na tapu bladzijde 3, paragraaf 1.] Ma yu denki taki den leri fu Yesus, soleki na eksempre dyaso na ini a bijbeltekst disi, e fiti na ini a ten disi? [Leisi Mateyus 5:21, 22a. Baka dati, gi a sma na okasi fu piki.] A tijdschrift disi e taki fu sani di Yesus ben leri èn sortu wini wi kan kisi fu den leri dati.”

Ontwaakt! 22 mrt.

„Furu sma lobi den bergi fu di den moi, ma yu sabi taki den bergi de tumusi prenspari gi a libi na grontapu? [Gi a sma na okasi fu piki.] A tijdschrift disi e taki fu san ede wi abi bergi fanowdu èn san e pasa nanga den bergi na ini a ten disi. A tijdschrift disi e sori tu fa a Mekiman sa kibri den prenspari bergi disi.” Leisi Psalm 95:4.

A Waktitoren 1 apr.

„Oiti yu yere sma taki dati sabidensi nanga Bijbel de kontrari fu makandra? [Gi a sma na okasi fu piki.] A tijdschrift disi e ondrosuku a historia fu a strei na mindri sabidensi nanga kerki. Ma a e tyari buweisi kon na fesi tu di e sori taki trutru sabidensi e kruderi nanga Bijbel.” Sori a sma bladzijde 6, 7. Baka dati leisi Preikiman 1:7.

Ontwaakt! 8 apr.

„Fa yu denki taki papa nanga mama kan yepi den pikin fu den fu wai pasi gi problema na ini den muilek tini yari? [Gi a sma na okasi fu piki, èn baka dati leisi Yesaya 48:17, 18.] A tijdschrift disi e sori fa a rai fu Bijbel kan yepi papa nanga mama fu abi bun takimakandra nanga den pikin fu den, èn fa den kan kweki den pikin fu den na a yoisti fasi, sondro fu tanteri den.”