A dei fu Yehovah de krosibei

¹ Kresten musu hori bun na prakseri taki a dei fu Yehovah e kon te a o pori a disiten seti fu sani èn te a o tyari den go na ini a nyun grontapu pe regtfardikifasi o de (2 Petr. 3:12, 13). Fu di wi no sabi soifri o ten a dei dati o kon, meki wi musu tan na ai èn yepi trawan fu du a srefi tu (Esek. 33:7-9; Mat. 24:42-44). Te wi e denki dipi fu a profeiti Wortu fu Gado, dan dati sa meki wi kisi wan moro tranga overtoigi taki „a bigi dei fu Yehovah de krosibei”.​—Sef. 1:14.

² A wan grontapumakti e kon baka a trawan: Soleki fa a skrifi na ini Openbaring 17:9-11, dan na apostel Yohanes e taki fu „seibi kownu” di e prenki seibi grontapumakti di e kon baka makandra. Yohanes e taki sosrefi fu „wan di fu aiti kownu” di e prenki den Verenigde Nâsi now. Wi musu fruwakti taki tra grontapumakti o kon? Nôno, bika a profeititori e taki dati a di fu aiti kownu „o kisi pori”, èn baka dati a no e taki fu nowan tra kownu fu grontapu. A profeititori disi e yepi yu fu si na ini sortu pisi ten wi e libi, a no so?

³ Danièl 2:31-45 e yepi wi fu frustan taki a dei fu Yehovah e kon. Na ini a profeititori dati, Nebukadnesar e si wan bun bigi popki na ini wan dren, èn a popki dati e prenki den grontapumakti di kon baka makandra. Ibriwan fu den tirimakti disi kon kaba. Sortu tirimakti e tiri na ini a ten disi? Wi e libi na ini a pisi ten di e prenki den futu fu a popki. A profeititori e tyari kon na krin sortu span sani o pasa baka dati. Libisma tirimakti sa kisi pori krinkrin, èn na ini a presi fu dati ’wan kownukondre sa kon di noiti no sa kisi pori’. Yu e frustan taki disi e sori taki a dei fu Yehovah de krosibei?

⁴ Moro buweisi: Wisrefi e si tra buweisi di e sori taki a dei fu Yehovah de krosibei. Wi e si a kontru fu den sani di na apostel Paulus ben taki na fesi, fu a fasi fa sma ben o tyari densrefi na „ini den lasti dei” (2 Tim. 3:1-5). Wi e teki prati sosrefi na a kotoigiwroko di musu du na heri grontapu bifo a kaba kon (Mat. 24:14). Meki wi tan sori nanga a fasi fa wi e du a preikiwroko fu wi, taki a sani di na engel ben taki de prenspari trutru, namku: „Frede Gado èn gi en glori, bika a yuru doro te a sa tyari krutu kon.”​—Openb. 14:6, 7.

Pisi 9: Hori bijbelstudie di e go na fesi

Sreka a studenti fu gi kotoigi te a e kisi na okasi

¹ Di Andreas nanga Filipus kon frustan taki Yesus na a pramisi Mesias, dan den no ben man hori a span nyunsu disi gi densrefi, ma den ben fruteri trawan (Yoh. 1:40-45). Na so a de tu na ini a ten disi, taki te den bijbelstudenti e bigin poti bribi na ini den sani di den e leri, dan den sa wani taki fu den sani dati (2 Kor. 4:13). Fa wi kan gi den deki-ati fu preiki te den e kisi na okasi, èn fa wi kan sreka den na so wan fasi taki den abi bun bakapisi?

² Yu kan aksi a studenti efu a ben taki kaba nanga trawan fu den sani di a leri fu Bijbel. Kande a kan aksi mati nanga famiriman fu kon sidon arki na a studie. Aksi en efu iniwan sma na en wrokope, na skoro, noso tra sma di a sabi ben sori taki den wani sabi moro fu a bun nyunsu. Na a fasi disi a kan bigin gi kotoigi. Meki a kon frustan taki a de prenspari fu handri nanga koni, fu abi lespeki, èn fu taki na wan switi fasi te a e taki nanga trawan fu Yehovah Gado èn fu den sani di A abi na prakseri.​—Kol. 4:6; 2 Tim. 2:24, 25.

³ Meki den fruteri trawan san den e bribi: A de tumusi prenspari fu leri den bijbelstudenti fa fu gebroiki Gado Wortu fu fruteri trawan san den e bribi. Na son pisi fu a studie, yu kan aksi a studenti: „Fa yu ben o gebroiki Bijbel fu fruklari a tru tori disi gi yu famiri?” Noso yu kan aksi en: „Sortu bijbeltekst yu ben o gebroiki fu tyari a tori disi kon na krin gi wan mati fu yu?” Arki a piki fu en, èn sori en fa a kan gebroiki Bijbel fu horibaka gi den sani di a e leri sma (2 Tim. 2:15). Te yu e du disi, yu sa sreka a studenti fu gi kotoigi te a e kisi na okasi, èn te a doro den markitiki, dan a sa man go makandra nanga a gemeente na ini a preikiwroko.

⁴ A de wan koni sani fu sreka den bijbelstudenti so taki den kan sabi san den kan du te den e kisi gens (Mat. 10:36; Luk. 8:13; 2 Tim. 3:12). Te tra sma e poti wan aksi noso te den e taki wan sani fu Yehovah Kotoigi, dan disi kan gi a studenti na okasi fu gi kotoigi. A brochure Jehovah’s Getuigen — Wie zijn zij? Wat geloven zij? kan yepi den fu de ’klariklari fu opo taki’ gi a bribi fu den (1 Petr. 3:15). A brochure disi abi finifini tori na ini di nyunwan kan gebroiki fu meki mati nanga famiriman di e broko den ede nanga den, frustan taki a bribi fu wi nanga den sani di wi e du komoto fu Bijbel.