A preikiwroko e yepi wi fu horidoro

¹ A Wortu fu Gado e gi wi a deki-ati fu „horidoro te wi e lon a streilon di de na wi fesi” (Hebr. 12:1). Neleki fa wan sma di e lon na ini wan streilon musu horidoro fu wini, na so wi musu horidoro fu kisi a prijs fu têgo libi (Hebr. 10:36). Fa a Kresten diniwroko kan yepi wi fu horidoro èn fu de getrow te na a kaba?​—Mat. 24:13.

² Wi e kon tranga na yeye fasi: Te wi e preiki fu a tumusi moi pramisi fu Bijbel di e taki fu wan regtfardiki nyun grontapu, dan dati e yepi wi fu tan si a howpu di wi abi leki wan trutru sani (1 Tes. 5:8). Efu wi e teki prati doronomo na a preikiwroko, dan wi e kisi na okasi fu meki sma kon sabi den tru tori di wi leri fu Bijbel. Wi e kisi na okasi tu fu opo taki gi a bribi fu wi, èn dati sa yepi wi fu kon tranga na yeye fasi.

³ Efu wi wani abi bun bakapisi te wi e leri trawan, dan wisrefi musu frustan den tru tori fu Bijbel krin. Wi musu go ondrosuku sani moro fini èn wi musu denki dipi fu den sani dati. Na opregti muiti di wi e du sa meki wi kisi moro sabi, a sa tranga a bribi fu wi, èn a sa meki wi kisi krakti baka na yeye fasi (Odo 2:3-5). Sobun, te wi e du muiti fu yepi trawan, dan wi e tranga wisrefi tu.​—1 Tim. 4:15, 16.

⁴ Wi musu teki prati fayafaya na a diniwroko fu di dati na wan tumusi prenspari pisi fu ’den sani di Gado gi wi fu feti’. Wi abi disi fanowdu fu tanapu kánkan teige Didibri nanga den ogri yeye (Ef. 6:10-13, 15). Te wi abi furu fu du na ini a santa diniwroko, dan dati e yepi wi fu tan poti prakseri na sani di kan tranga wi èn a e yepi wi tu fu wai pasi gi den sani fu a grontapu fu Satan di wani pori wi (Kol. 3:2). Te wi e leri trawan fu den pasi fu Yehovah, dan dati e memre wi ibri tron baka taki a de fanowdu fu tan tyari wisrefi na wan santa fasi.​—1 Petr. 2:12.

⁵ Wi e kisi krakti fu Gado: Leki lasti sani, te wi e teki prati na a preikiwroko, dan dati e leri wi fu frutrow tapu Yehovah (2 Kor. 4:1, 7). Dati na wan trutru blesi! Te wi e kon abi so wan frutrow, dan dati e meki taki wi de srekasreka fu du a diniwroko fu wi na wan bun fasi èn a e meki wi kakafutu gi iniwan situwâsi di kan kon na ini wi libi (Fil. 4:11-13). Iya, a moro prenspari sani di wi musu du fu man horidoro, na taki wi musu leri fu frutrow dorodoro tapu Yehovah (Ps. 55:22). Na difrenti fasi a preikiwroko e yepi wi fu horidoro.

Pisi 10: Hori bijbelstudie di e go na fesi

Leri den studenti fu du na oso-fu-oso preikiwroko

¹ Te den owruman kon si taki wan bijbelstudenti doro den markitiki fu tron wan preikiman di no dopu ete, dan a studenti dati kan bigin go makandra nanga a gemeente na ini a publiki preikiwroko. (Luku Wi orga fu du a wani fu Yehovah, blz. 79-81.) Fa wi kan yepi a studenti fu bigin preiki oso fu oso?

² Sreka makandra nanga a studenti: A de tumusi prenspari taki a studenti e sreka ensrefi bun na fesi. Sori a studenti fa a kan feni eksempre na ini Wi Kownukondre diniwroko nanga a pikin buku Fa foe bigin èn go doro nanga bijbel takimakandra di e sori fa fu pristeri publikâsi. Yepi a studenti fu gebroiki wán fu den eksempre di makriki fu bigin wan takimakandra èn di e hari sma prakseri na ini a kontren drape. Na a bigin kaba, yu musu gi en deki-ati fu gebroiki Bijbel na ini en diniwroko.​—2 Tim. 4:2.

³ A de wan heri bun sani gi wan nyun preikiman fu oefen fa a ben o hori wan takimakandra. Te a studenti e oefen fu hori wan takimakandra, dan yu kan sori en fa a kan gi piki na wan koni fasi tapu den sani di sma gwenti fu taki na ini a kontren drape (Kol. 4:6). Gi en a dyaranti taki wan Kresten dinari no abi fu sabi a piki fu ibri aksi di wan ososma kan poti. A moro bun sani di a kan du te wan sma poti so wan aksi gi en, na fu taigi a sma taki a o go ondrosuku a tori moro bun èn taki a o kon baka na a sma fu taki moro fara fu a tori.​—Odo 15:28.

⁴ Preiki makandra: A fosi leisi te wan studenti e go na ini na oso-fu-oso preikiwroko, yu kan meki a luku fosi fa yu e hori a takimakandra di unu ben sreka na fesi. Baka dati yu kan meki a teki prati tu na a takimakandra. Son leisi a kan de bun fu meki wan nyun preikiman hori wan pisi nomo fu a takimakandra, kande fu di yu e meki a leisi wan bijbeltekst èn e meki en fruklari a tekst tu. Hori a fasi fa a studenti de na prakseri èn sosrefi den sani di a man du (Fil. 4:5). No draidrai fu prèise en aladi yu e leri en safrisafri fa a musu du a preikiwroko na difrenti fasi.

⁵ A de prenspari fu yepi wan nyun preikiman fu kon kisi a gwenti fu teki prati na a preikiwroko, èn efu a kan, dan a ben o bun efu a kan du dati ala wiki (Fil. 3:16). Seti sani bun fu wroko makandra nanga en na ini a preikiwroko, èn gi en deki-ati fu wroko sosrefi nanga tra fayafaya preikiman. Te a de makandra nanga den èn te a e si na eksempre fu den, dan dati sa yepi en fu kon moro bun na ini a preikiwroko èn fu kisi prisiri fu preiki oso fu oso.