Fa fu bigin studeri nanga sma na ini a Bijbel leri-buku

Furu fu wi ben o prisiri fu hori wan bijbelstudie, ma a problema de taki wi no sabi fa fu bigin nanga wan bijbelstudie. A nyun buku San Bijbel e leri wi trutru? kan yepi wi. Den sani di skrifi na a bigin na tapu bladzijde 3-7, skrifi na so wan fasi taki wi kan bigin wan Bijbel takimakandra nanga wan ososma nanga yepi fu a buku disi. Srefi den wan di no abi so furu ondrofeni na ini a preikiwroko sa feni en makriki fu bigin studeri nanga sma na so wan fasi.

◼ Kande yu kan gebroiki bladzijde 3 fu bigin wan takimakandra:

Baka te yu taki fu wan tori na ini nyunsu, noso wan problema di e gi den sma na ini a kontren drape broko-ede, dan meki na ososma poti prakseri na den aksi di skrifi nanga fatu letter na tapu bladzijde 3, èn aksi en fu gi piki tapu den aksi. Baka dati, go na bladzijde 4 nanga 5.

◼ Noso yu kan poti prakseri na bladzijde 4 nanga 5 fu bigin wan takimakandra:

Yu kan taki: „A ben o de wan tumusi moi sani efu den kenki na tapu a prenki disi ben o pasa trutru, a no so?” Noso yu kan aksi a sma: „Sortuwan fu den pramisi disi yu ben o wani fu si kon tru?” Arki bun te a sma e piki yu.

Efu na ososma e sori taki a wani kon sabi moro fu wan spesrutu bijbeltekst, dan sori en san Bijbel e leri fu a tori dati fu di yu e luku den paragraaf na ini a buku di e taki fu a tekst dati. (Luku a faki na tapu a bladzijde disi fu na inibere pisi.) Luku a pisi tori dati neleki fa yu ben o hori wan bijbelstudie. Yu kan du disi na a fosi leisi te yu miti a sma, èn yu kan du en na ini feifi noso tin miniti leti na a mofodoro fu a sma.

◼ Wan tra fasi fu bigin wan takimakandra nanga yepi fu bladzijde 6, na fu aksi a sma fa a e denki fu wan tori:

Meki na ososma poti prakseri na den aksi di skrifi na ondrosei fu a bladzijde, èn aksi en: „Oiti yu aksi yusrefi wan fu den sani disi?” Efu a sori taki a wani sabi moro fu wan fu den aksi, dan luku den paragraaf na ini a buku di e gi piki tapu na aksi dati. (Luku a faki na tapu a bladzijde disi fu na inibere pisi.) Te yu e luku a tori disi makandra nanga na ososma, dan yu e hori wan bijbelstudie kaba.

◼ Yu kan gebroiki bladzijde 7 fu sori a sma fa wan bijbelstudie e hori:

Leisi a fosi pisi na tapu a bladzijde, èn go baka dati na kapitel 3, èn luku paragraaf 1-3 fu sori a sma fa a studie e hori. Seti sani fu go baka na a sma fu taki fu den piki tapu den aksi fu paragraaf 3.

◼ Fa fu seti sani fu go baka:

Te yu e kon na a kaba fu a fosi studie, dan seti sani fu go doro nanga a takimakandra. Kande yu kan taki: „Na ini wan tu miniti nomo wi kon sabi san Bijbel e leri fu wan prenspari tori. Tra leisi wi kan taki fu [poti wan aksi di unu sa go luku]. Mi kan kon baka na yu tra wiki na a srefi ten disi?”

Fu di wi e kon moro krosibei fu a dei fu Yehovah, meki a e tan gi wi yepisani fu de srekasreka gi a wroko di wi musu du (Mat. 28:19, 20; 2 Tim. 3:17). Meki wi gebroiki a tumusi moi èn nyun wrokosani disi fu bigin bijbelstudie.

Fa fu pristeri a Bijbel leri-buku

Na ini na inibere pisi disi wan tu eksempre de di e sori fa fu pristeri a Bijbel leri-buku. Efu yu wani abi moro bun bakapisi te yu e gebroiki den eksempre disi, dan yu musu taki nanga yu eigi wortu, yu musu fiti den sani na sma fu a kontren drape, èn yu musu kon sabi den spesrutu tori na ini a buku di wi kan gebroiki fu bigin Bijbel takimakandra. Yu kan pristeri a buku sosrefi na tra fasi di o hari sma prakseri na ini a kontren fu yu.—Luku Wi Kownukondre diniwroko fu yanuari 2005, blz. 8.

Armagedon

◼ „Te sma e yere a wortu ’Armagedon’, dan furu fu den e denki wan bigi pori. Yu ben o fruwondru efu yu ben kon sabi taki Armagedon na trutru wan prisiri sani di wi kan fruwakti? [Gi a sma na okasi fu piki. Baka dati, leisi Openbaring 16:14, 16.] Luku san skrifi dyaso fu a fasi fa a libi o de baka Armagedon.” Go na bladzijde 82-84, èn leisi paragraaf 21.

Bijbel

◼ „Furu tron sma e taki dati Bijbel na Gado Wortu. Oiti yu aksi yusrefi fa a du kon taki a fiti fu kari wan buku di libisma skrifi, a Wortu fu Gado? [Gi a sma na okasi fu piki. Baka dati, leisi 2 Petrus 1:21 nanga paragraaf 5 na tapu bladzijde 19, 20.] A buku disi e gi piki tapu den aksi disi nanga yepi fu Bijbel.” Sori a sma den aksi na tapu bladzijde 6.

◼ „Moro leki iniwan ten bifo, sma na ini a ten disi kan kisi bodoi, noso den kan kon sabi tori moro makriki. Ma pe yu denki taki wi kan feni bun rai di kan yepi wi fu abi wan bun èn koloku libi? [Gi a sma na okasi fu piki. Baka dati, leisi 2 Timoteyus 3:16, 17 nanga paragraaf 12 na tapu bladzijde 23.] A buku disi e sori fa wi kan libi na wan fasi di Gado feni bun, èn di o tyari wini kon gi wi tu.” Sori a sma a prenki nanga den sani di skrifi na a prenki na tapu bladzijde 122, 123.

Begi

◼ „Oiti yu aksi yusrefi fa Gado e piki den begi fu wi? [Gi a sma na okasi fu piki. Baka dati, leisi 1 Yohanes 5:14, 15 nanga paragraaf 16-18 na tapu bladzijde 170-172.] A kapitel disi e sori wi tu fu san ede wi musu begi Gado èn san wi musu du efu wi wani taki A arki den begi fu wi.”

Dede/na opobaka

◼ „Furu sma e aksi densrefi san e pasa trutru te wan sma dede. Yu denki taki wi man kon sabi dati? [Gi a sma na okasi fu piki. Baka dati, leisi Preikiman 9:5 nanga paragraaf 5, 6, na tapu bladzijde 58, 59.] A buku disi e taki tu san a pramisi fu wan opobaka, soleki fa Bijbel e taki, wani taki gi den wan di dede.” Sori a sma a prenki na tapu bladzijde 75.

◼ „Te wan lobiwan fu wi dede, dan wi e angri fu si a sma dati baka, a no so? [Gi a sma na okasi fu piki.] Furu sma kisi trowstu fu a pramisi fu Bijbel di e taki dati wan opobaka sa de. [Leisi Yohanes 5:28, 29 nanga paragraaf 16, 17, na tapu bladzijde 71, 72.] Na ini a kapitel disi yu kan feni den piki tapu den aksi disi tu.” Sori a sma den aksi na a bigin fu bladzijde 66.

Kerki

◼ „Furu sma e bigin feni taki den kerki fu grontapu e meki taki libisma abi problema, na presi taki den e lusu den problema fu libisma. Yu denki taki kerki e yepi sma fu du san bun? [Gi a sma na okasi fu piki. Baka dati, leisi Mateyus 7:13, 14 nanga paragraaf 5 na tapu bladzijde 145, 146.] A kapitel disi e taki fu siksi sani di o yepi wi fu kon sabi sortu anbegi Gado feni bun.” Sori a sma den sani di skrifi na tapu bladzijde 147.

Orloku/vrede

◼ „Sma na ala presi e angri fu abi vrede. Yu denki taki a howpu fu abi vrede na grontapu, na wan dren nomo? [Gi a sma na okasi fu piki. Baka dati, leisi Psalm 46:8, 9.] A buku disi e sori fa Gado sa meki den sani di a abi na prakseri kon tru, èn fa a sa tyari vrede kon na heri grontapu.” Sori a sma a prenki na tapu bladzijde 35, èn luku makandra nanga en paragraaf 17-21 na tapu bladzijde 34.

Osofamiri

◼ „Wi alamala wani fu kon sabi fa wi kan abi wan koloku osofamiri-libi, a no so? [Gi a sma na okasi fu piki.] Bijbel e taki fu wan sani di ala sma na ini na osofamiri kan du fu meki taki den abi wan koloku osofamiri-libi. A sani dati na a sori di sma musu sori lobi, neleki fa Gado e sori lobi.” Leisi Efeisesma 5:1, 2 nanga paragraaf 4 na tapu bladzijde 135.

Rampu/pina

◼ „Te wan rampu pasa, dan furu sma e tweifri efu Gado e broko en ede trutru nanga libisma èn efu a e si fa den e pina. Oiti yu aksi yusrefi disi? [Gi a sma na okasi fu piki. Baka dati, leisi 1 Petrus 5:7 nanga paragraaf 11 na tapu bladzijde 11.] A buku disi sori fa Gado sa tyari wan kaba kon na a pina di libisma e pina.” Luku den aksi na a bigin fu bladzijde 106.

Sma e suku wan bun oso fu libi na ini

◼ „Na furu presi, a kon moro muilek fu feni wan bun tanpe di sma man pai gi dati. Yu denki taki wan dei ala sma sa abi wan bun tanpe? [Gi a sma na okasi fu piki. Baka dati, leisi Yesaya 65:21, 22 nanga paragraaf 20 na tapu bladzijde 34.] A buku disi e sori fa a pramisi disi fu Gado sa kon tru.

Têgo libi

◼ „Furu sma wani fu de gosontu èn den wani libi langa. Ma efu wi kan libi fu têgo trutru, dan yu ben sa wani dati? [Gi a sma na okasi fu piki. Baka dati, leisi Openbaring 21:3, 4 nanga paragraaf 17, bladzijde 54.] A buku disi e taki fa wi kan kisi têgo libi èn a e taki tu fa a libi o de te a pramisi dati kon tru.”

Yehovah Gado

◼ „Furu sma di e bribi na ini Gado ben sa wani abi wan moro bun banti nanga en. Yu ben sabi taki Bijbel e gi wi a kari fu kon krosibei na en? [Gi a sma na okasi fu piki. Baka dati, leisi Yakobus 4:8a nanga paragraaf 20 na tapu bladzijde 16.] A buku disi meki na so wan fasi fu yepi sma fu leri moro fu Gado nanga yepi fu den eigi Bijbel.” Sori a sma den aksi na a bigin fu bladzijde 8.

◼ „Furu sma e begi taki Gado en nen musu kon santa. Oiti yu aksi yusrefi san na a nen fu en? [Gi a sma na okasi fu piki. Baka dati, leisi Psalm 83:18 nanga paragraaf 2, 3 na tapu bladzijde 195.] A buku disi e sori san Bijbel e leri wi trutru fu Yehovah Gado èn fu den sani di a abi na prakseri fu du gi a libisma famiri.”

Yesus Krestes

◼ „Sma na heri grontapu yere kaba fu Yesus Krestes. Son sma e taki dati a ben de wan aparti man nomo. Trawan baka, e anbegi en leki na Almakti Gado. Yu denki taki san wi e bribi fu Yesus Krestes de prenspari?” Gi a sma na okasi fu piki. Baka dati, leisi Yohanes 17:3 nanga paragraaf 3 na tapu bladzijde 37, 38. Meki a sma poti prakseri na den fosi aksi di de leti na ondro a nen fu a kapitel.

[Faki na tapu bladzijde 5]

Difrenti fasi fu taki fa sma kan gi bijdrage fu horibaka gi a wroko di e du na heri grontapu

„Efu yu wani fu gi wan pikin bijdrage tide gi a wroko di wi e du na heri grontapu, dan mi sa warderi dati srefisrefi.”

„Aladi wi e gi sma den buku fu wi sondro taki den abi fu pai gi dati, toku wi e teki den pikin bijdrage gi a wroko di wi e du na heri grontapu.”

„Kande yu e aksi yusrefi fa wi man tan du a wroko fu wi. We, wi man du disi, fu di sma e gi friwani bijdrage fu horibaka gi a wroko di wi e du na heri grontapu. Efu yu wani gi wan pikin bijdrage tide, dan mi sa warderi dati srefisrefi.”

Gebroiki wan aksi, wan bijbeltekst, nanga wan kapitel

Wan makriki fasi fu pristeri a buku San Bijbel e leri wi trutru? na fu (1) poti wan aksi pe na ososma musu taki fa a e denki fu wan tori, (2) leisi wan bijbeltekst di fiti na a takimakandra, èn (3) luku wan kapitel na ini a buku di e taki fu a tori dati èn leisi den fosi aksi di skrifi na ondro a nen fu a kapitel. Efu na ososma e sori taki a wani sabi moro, dan kande yu kan sori en fa wan bijbelstudie e hori, nanga yepi fu den fosi paragraaf fu a kapitel dati. Nanga yepi fu a fasi disi, yu sa man bigin wan bijbelstudie a fosi leisi te yu miti a sma, noso te yu go baka na en.

◼ „Yu denki taki wi di de libisma nomo o man kon sabi wi almakti Mekiman, soleki fa a skrifi dyaso na ini Bijbel?” Leisi Tori fu den Apostel 17:26, 27 èn gi a sma na okasi fu piki. Baka dati luku kapitel 1.

◼ „Nanga den problema di wi abi na ini a ten disi, yu denki taki wi kan feni a trowstu nanga a howpu disi, di skrifi dyaso?” Leisi Romesma 15:4, èn gi a sma na okasi fu piki. Baka dati luku kapitel 2.

◼ „Efu yu ben abi a makti fu tyari wan kenki kon na den sani di skrifi dyaso, yu ben o du dati?” Leisi Openbaring 21:4 èn gi a sma na okasi fu piki. Baka dati luku kapitel 3.

◼ „Yu denki taki den pikin fu wi sa man nyan bun fu den sani di skrifi na ini na owruten singi disi?” Leisi Psalm 37:10, 11 èn gi a sma na okasi fu piki. Baka dati luku kapitel 3.

◼ „Yu denki taki wan ten sa kon te den wortu disi sa kon tru?” Leisi Yesaya 33:24 èn gi a sma na okasi fu piki. Baka dati luku kapitel 3.

◼ „Oiti yu aksi yusrefi efu den dedewan sabi san den wan di de na libi e du?” Gi a sma na okasi fu piki. Baka dati leisi Preikiman 9:5 èn luku kapitel 6.

◼ „Yu denki taki wan dei sa kon te wi sa man si den lobiwan fu wi di dede, soleki fa Yesus taki dyaso na ini den vers disi?” Leisi Yohanes 5:28, 29 èn gi a sma na okasi fu piki. Baka dati luku kapitel 7.

◼ „Na ini a begi di furu sma sabi, wi e leri taki a wani fu Gado o pasa na grontapu soleki fa a e pasa na hemel. Fa yu denki taki disi o pasa?” Leisi Mateyus 6:9, 10 èn gi a sma na okasi fu piki. Baka dati luku kapitel 8.

◼ „Yu denki taki wi e libi na ini a pisi ten di a profeititori disi e taki fu en?” Leisi 2 Timoteyus 3:1-4 èn gi a sma na okasi fu piki. Baka dati luku kapitel 9.

◼ „Furu sma e aksi densrefi fu san ede libisma e kisi moro nanga moro problema. Oiti yu denki taki a sani di skrifi dyaso e meki taki wi e kisi moro problema?” Leisi Openbaring 12:9 èn gi a sma na okasi fu piki. Baka dati luku kapitel 10.

◼ „Oiti yu ben sa wani sabi a piki tapu so wan sortu aksi?” Leisi Yob 21:7 èn gi a sma na okasi fu piki. Baka dati luku kapitel 11.

◼ „Yu denki taki sma o abi wan koloku osofamiri-libi te den e hori densrefi na a rai disi di komoto fu Bijbel?” Leisi Efeisesma 5:33, èn gi a sma na okasi fu piki. Baka dati luku kapitel 14.

Yu kan bigin teri a sma leki wan bijbelstudie te yu studeri tu leisi nanga en baka di yu sori en fa a studie e hori, èn efu a sori leki a sma o tan studeri.