„Tyari bun nyunsu kon di abi fu du nanga wan moro bun sani”

„O switi na tapu den bergi den futu fu a sma de . . . di e tyari bun nyunsu kon di abi fu du nanga wan moro bun sani.”​—YESAYA 52:7.

1, 2. (a) Sortu takru sani e pasa na grontapu ibri dei? (b) San furu sma e taki te den e yere soso takru nyunsu?

NA INI a ten disi, sma na heri grontapu abi a firi taki den e yere soso takru nyunsu. Te den e leti radio, den e yere nyunsu di e frede den fu di den e yere fu siki di e kiri sma na heri grontapu. Te den e leti telefisi fu luku nyunsu, dan den e si fa pikin e dede fu angri èn e begi sma fu yepi den. Sma no man frigiti a sani disi so makriki. Te den e teki koranti, dan den e leisi taki bom sutu oso panya èn kiri ipi-ipi sma di no ben abi noti fu du nanga a tori.

² Iya, furu takru sani e pasa ibri dei. A situwâsi na a grontapu disi e kenki trutru, iya, dei fu dei a e kon moro ogri (1 Korentesma 7:31). Wan koranti fu wan kondre na ini West Europa ben taki dati son leisi a gersi leki heri grontapu „de fu kisi pori krinkrin”. Fu dati ede wi no musu fruwondru taki moro nanga moro sma e firi brokosaka! Di den aksi wan sma san a e denki fu a nyunsu di de fu si na telefisi na ini Amerkankondre, dan a taki wan sani di milyunmilyun tra sma e prakseri tu. A taki: ’Te mi luku a nyunsu, dan mi e firi brokosaka trutru. Na soso takru nyunsu den e sori. A hebi gi mi.’

Nyunsu di ala sma musu yere

3. (a) Sortu bun nyunsu Bijbel e fruteri wi? (b) Fu san ede yu feni taki a bun nyunsu fu a Kownukondre na wan prenspari sani?

³ Bun nyunsu de fu feni na ini wan grontapu di e meki someni sma lasi-ati? Iya, fu tru! A e trowstu wi fu sabi taki Bijbel e fruteri wi bun nyunsu. A nyunsu disi e sori taki Gado Kownukondre o tyari wan kaba kon na siki, angri, ogridu, orloku, nanga ala sortu sani di e kwinsi sma (Psalm 46:9; 72:12). Yu no feni taki disi na a nyunsu di ala sma musu yere? We, Yehovah Kotoigi denki taki ala sma musu yere a nyunsu disi. Fu dati ede, na ala presi den sabi den Kotoigi leki sma di e tan du muiti fu fruteri sma fu ala kondre a bun nyunsu fu Gado Kownukondre.​—Mateyus 24:14.

4. Fu sortu sani di abi fu du nanga a diniwroko fu wi, wi o taki na ini na artikel disi, èn na ini na artikel di o kon?

⁴ Ma san wi kan du fu tan si en leki wan prisiri èn wan prenspari sani fu preiki a bun nyunsu srefi na presi pe sma no wani arki? (Lukas 8:15) Wi o luku syatu san na dri prenspari sani di abi fu du nanga a preikiwroko fu wi, èn wi de seiker taki disi sa de wan bigi yepi gi wi. Wi o luku (1) nanga sortu marki, noso fu san ede wi e preiki; (2) fu sortu boskopu, noso san wi e preiki; (3) na sortu fasi, noso fa wi e preiki. Te wi e tan abi a yoisti denki, te wi e tan tyari wan krin boskopu gi sma, èn te wi e tan suku fasi fu preiki moro bun, dan furu sma o kisi na okasi fu yere a moro bun nyunsu di de, namku a bun nyunsu fu Gado Kownukondre.a

Fu san ede wi e preiki a bun nyunsu

5. (a) San na a moro prenspari sani di meki taki wi e go preiki? (b) Fu san ede wi kan taki dati te wi e gi yesi na a komando fu Bijbel taki wi musu preiki, dan dati na wan fasi fu sori Gado taki wi lobi en?

⁵ Kon meki wi go luku a fosi sani, namku nanga sortu marki wi e preiki. Fu san ede wi e preiki a bun nyunsu? Na fu a srefi sani di ben meki taki Yesus ben e preiki. A ben taki: „Mi lobi a Tata” (Yohanes 14:31; Psalm 40:8). A moro prenspari sani di meki taki wi e preiki, na taki wi lobi Gado (Mateyus 22:37, 38). Bijbel e sori san a lobi gi Gado abi fu du nanga a diniwroko, bika a e taki: „Disi na san a lobi fu Gado wani taki, dati wi e hori wisrefi na den komando fu en” (1 Yohanes 5:3; Yohanes 14:21). A de so dan, taki wi musu hori wisrefi na a komando fu Gado fu ’go na sma èn meki den tron disipel’? (Mateyus 28:19) Iya. A tru taki na Yesus ben taki den wortu disi, ma trutru den wortu disi komopo fu Yehovah. Fa so? Yesus ben fruklari: „Mi no e du san misrefi wani; ma mi e taki den sani disi soleki fa a Tata leri mi” (Yohanes 8:28; Mateyus 17:5). Sobun, te wi e gi yesi na a komando fu go preiki, dan wi e sori Yehovah taki wi lobi en.

6. Fa a lobi di wi lobi Gado, e meki taki wi wani preiki?

⁶ Sosrefi, na fu di wi lobi Gado, meki wi e preiki bika wi wani sori sma sortu lei Satan e fruteri fu Gado (2 Korentesma 4:4). Satan feni taki Gado no abi a reti fu tiri (Genesis 3:1-5). Wi leki Yehovah Kotoigi e angri fu tyari kon na krin sortu ogri-ati lei Satan e fruteri èn wi wani taki nanga ala libisma, fu sani di e santa Gado nen (Yesaya 43:10-12). Boiti dati, wi e preiki fu di wi kon sabi den fasi fu Yehovah èn fu di wi kon si fa a e du sani. Wi abi wan tranga banti nanga en èn wi e angri fu fruteri trawan fu a Gado fu wi. Fu taki en leti, a bunfasi fu Yehovah nanga a regtfardiki fasi fa a e handri, e gi wi someni prisiri taki wi no man tapu fu taki fu en (Psalm 145:7-12). Wi musu fu prèise en èn wi musu fruteri sma di wani arki sortu „kefalek moi fasi” Gado abi.​—1 Petrus 2:9; Yesaya 43:21.

7. Sortu tra prenspari sani, boiti taki wi lobi Gado, e meki taki wi wani du a preikiwroko?

⁷ Wan tra prenspari sani de fu san ede wi musu tan du a preikiwroko: Wi wani trowstu sma di e firi brokosaka fu di den e yere soso takru nyunsu, èn sma di e pina fu wan tra sani ede. Te wi e du a wroko disi, dan wi e pruberi fu de leki Yesus. Fu eksempre, luku san skrifi na ini Markus kapitel 6.

8. Fa a tori na ini Markus kapitel 6 e sori wi taki Yesus ben e firi gi den sma?

⁸ Den apostel kaba du a preikiwroko èn now den e fruteri Yesus ala sani di den du èn di den leri sma. Yesus e si taki den apostel weri, dati meki a e taigi den fu kon nanga en, so taki den kan „rostu pikinso”. Sobun, den e teki wan boto èn den e go na wan tiri presi. Sma e kon na den baka, fu di den e lon na a sesyoro, èn baka wan syatu pisi ten den e kon drape tu. San Yesus e du? A tori e taki: „A si wan heri ipi sma; ma a ben sari den, bika den ben de leki skapu di no abi wan skapuman. Dan a bigin leri den furu sani” (Markus 6:31-34). Fu di Yesus e sari den sma, meki a e tan preiki a bun nyunsu, aladi a weri. A de krin taki Yesus e firi gi den sma disi. A e sari den.

9. San a tori na ini Markus kapitel 6 e leri wi fu sori wi taki wi musu du a preikiwroko nanga a yoisti marki?

⁹ San wi e leri fu a tori disi? Wi leki Kresten e si en leki wan plekti fu preiki a bun nyunsu èn fu meki sma tron disipel. Wi sabi taki wi abi a frantwortu fu meki a bun nyunsu bekènti, fu di Gado wani taki „ala sortu sma musu kisi frulusu” (1 Timoteyus 2:4). Toku wi no e preiki nomo fu di wi de fruplekti fu du disi, ma wi e preiki sosrefi fu di wi abi sari-ati. Efu wi e sari sma trutru, neleki fa Yesus ben e sari den, dan wi sa wani du ala san wi man, fu tan preiki a bun nyunsu gi den (Mateyus 22:39). Te wi e du a diniwroko fu wi nanga den yoisti marki disi, dan wi no sa wani tapu fu preiki a bun nyunsu.

A boskopu fu wi na a bun nyunsu fu Gado Kownukondre

10, 11. (a) San Yesaya e taki fu a boskopu di wi e preiki? (b) Fa Yesus ben fruteri sma bun nyunsu di abi fu du nanga wan moro bun sani, èn fa den futuboi fu Gado na ini a ten disi waka baka na eksempre fu Yesus?

¹⁰ San wi kan taki fu a di fu tu sani di abi fu du nanga a diniwroko fu wi, namku a boskopu fu wi? San wi e preiki? A profeiti Yesaya ben taki na wan moi fasi fu a boskopu di wi e meki bekènti: „O switi na tapu den bergi den futu fu a sma de di e tyari bun nyunsu kon, a sma di e meki vrede bekènti, a sma di e tyari bun nyunsu kon di abi fu du nanga wan moro bun sani, a sma di e meki frulusu bekènti, a sma di e taigi Sion: ’Yu Gado tron kownu!’”​—Yesaya 52:7.

¹¹ Den moro prenspari wortu na ini a tekst disi na „yu Gado tron kownu”, èn den e memre wi sortu boskopu wi musu meki bekènti, namku a bun nyunsu fu Gado Kownukondre (Markus 13:10). Luku sosrefi fa a vers disi e sori taki a boskopu fu wi abi fu du soso nanga bun sani. Yesaya e gebroiki wortu leki „frulusu”, „bun nyunsu”, „vrede”, nanga „wan moro bun sani”. Hondrohondro yari baka di Yesaya taki a sani disi, Yesus Krestes di ben e libi na ini a fosi yarihondro G.T., meki a profeititori disi kon tru na wan tumusi moi fasi. Disi a ben du di a sori sma fa fu de fayafaya fu meki a bun nyunsu fu wan moro bun sani bekènti, namku taki Gado Kownukondre ben de na pasi e kon (Lukas 4:43). Na ini a ten disi, spesrutu sensi 1919, Yehovah Kotoigi waka baka na eksempre fu Yesus fu di den meki a bun nyunsu bekènti fayafaya, èn den e fruteri sma taki Gado Kownukondre seti kaba èn sortu blesi a o tyari kon.

12. Sortu krakti a bun nyunsu fu a Kownukondre abi tapu den sma di e bribi en?

¹² Sortu krakti a bun nyunsu fu a Kownukondre abi tapu den sma di e arki? Neleki fa a ben de na ini a ten fu Yesus, na so a bun nyunsu e trowstu sma na ini ten disi tu èn a e gi den howpu (Romesma 12:12; 15:4). A nyunsu disi e gi howpu na opregtisma fu di den e leri fu san ede den kan bribi trutru taki moro betre ten o kon (Mateyus 6:9, 10; 2 Petrus 3:13). Trutru, a howpu disi e yepi sma di e frede Gado, so taki den kan tan si sani na a yoisti fasi. A psalm skrifiman e taki dati „srefi takru nyunsu no sa frede” den.​—Psalm 112:1, 7.

Wan boskopu di o „tai wensre gi na ati fu den wan di brokosaka”

13. San a profeiti Yesaya e taki fu den blesi di sma kan kisi nownow kaba te den e bribi a bun nyunsu?

¹³ Ete wan sani, na taki a bun nyunsu di wi e preiki, e yepi sma wantewante èn e tyari wini kon gi den wan di e arki en. Fa so? A profeiti Yesaya ben sori na fesi san na wan tu fu den blesi. A ben taki: „A yeye fu a Moro Hei Masra Yehovah de na mi tapu, fu di Yehovah salfu mi fu fruteri den safri-ati sma bun nyunsu. A seni mi fu tai wan wensre gi na ati fu den wan di brokosaka, fu taigi den katibosma taki den fri, en fu opo srefi den ai fu den strafuman; fu meki a yari fu bun wani bekènti fu a sei fu Yehovah èn a dei fu atibron fu a sei fu wi Gado; fu trowstu ala den wan di e sari.”​—Yesaya 61:1, 2; Lukas 4:16-21.

14. (a) San den wortu „tai wan wensre gi na ati fu den wan di brokosaka”, e fruteri wi fu a Kownukondre boskopu? (b) Fa wi e sori taki wi e broko wi ede nanga den wan di brokosaka, neleki fa Yehovah e broko en ede nanga den?

¹⁴ A profeititori disi e sori taki te Yesus ben o preiki a bun nyunsu, dan a ben o „tai wensre gi na ati fu den wan di brokosaka”. Disi na trutru wan moi fasi fa Yesaya ben e taki fu a tori! Wan buku di e fruklari wortu fu Bijbel, e taki dati a Hebrew wortu di vertaal nanga „tai wan wensre gi”, ’e gebroiki nofo tron te sma e „tai” wan pisi krosi gi wan soro; sobun, den e gebroiki a wortu disi tu te sma e poti dresi gi a soro fu wan trawan so taki a kan kon betre’. Te wan sma kisi mankeri, dan wan sma di e sorgu bun gi sikisma kan tai wan pisi krosi gi a pisi fu a skin di kisi mankeri, so taki a sma kan firi moro bun. Sosrefi, te preikiman di e firi gi trawan, e preiki a Kownukondre boskopu, dan den e meki taki ala sma di wani arki a boskopu èn di e nyan pina, kon firi moro bun. Te den e taki sani di e meki taki den sma di de na nowtu e firi moro bun, dan den e sori taki den e broko den ede nanga trawan neleki fa Yehovah e du dati (Esekièl 34:15, 16). A psalm skrifiman e taki fu Gado: „A e dresi den wan di brokosaka, èn a e tai den soro fu den.”​—Psalm 147:3.

Fa a Kownukondre boskopu abi krakti tapu sma

15, 16. Sortu ondrofenitori e sori fa a Kownukondre boskopu e tranga sma di de na nowtu èn e meki den firi moro bun?

¹⁵ Furu ondrofenitori de di e sori fa a Kownukondre boskopu e gi krakti trutru na den wan di e firi brokosaka èn e meki taki den kan firi moro bun. Luku a tori fu Oreanna, wan owru uma fu Zuid-Amerika di no ben wani libi moro. Wan Kotoigi fu Yehovah bigin go na Oreanna fu leisi Bijbel gi en èn sosrefi a buku Mi boekoe nanga Bijbel tori.b Na ini a bigin, na uma di ben lasi-ati, ben e arki fa a sisa ben e leisi gi en, aladi a ben e didon na bedi, en ai ben tapu, èn wanwan leisi a ben e geme. Ma baka wan syatu pisi ten, na uma bigin du muiti fu opo sidon na ini a bedi te a sisa ben e leisi gi en. Wan pisi ten baka dati, a ben e sidon na tapu wan sturu na ini a foroisi, pe a ben e wakti a sma di ben e leri en sani fu Bijbel. Baka dati, na uma bigin go na den Kresten konmakandra na a Kownukondre zaal. Den sani di a ben e leri na den konmakandra disi ben e gi en so furu deki-ati, taki a bigin prati Bijbel buku nanga tijdschrift gi iniwan sma di ben e pasa na en mofodoro. Baka dati, Oreanna teki dopu di a ben abi 93 yari, èn a tron wan Kotoigi fu Yehovah. A Kownukondre boskopu ben gi en krakti baka fu wani tan na libi.​—Odo 15:30; 16:24.

¹⁶ A Kownukondre boskopu e trowstu srefi den sma di sabi taki den no sa libi langa moro fu di den siki. Luku na eksempre fu Maria di ben libi na West-Europa. A ben abi wan siki di ben o kiri en te fu kaba, èn a no ben abi howpu moro. Na a ten di Yehovah Kotoigi miti en, a ben lasi-ati trutru. Ma di a kon sabi san Gado abi na prakseri, a bigin prisiri nanga a libi baka. A teki dopu èn a tron wan fayafaya preikiman. Na ini den lasti tu yari fu en libi, sma ben kan si krin taki a ben abi howpu èn taki a ben e prisiri. Maria dede nanga a tranga howpu fu kisi wan opobaka.​—Romesma 8:38, 39.

17. (a) Sortu krakti a Kownukondre boskopu abi tapu a libi fu sma di e arki a boskopu disi? (b) Na sortu fasi yusrefi ondrofeni taki Yehovah „e yepi ala sma di beni go na gron, fu opo tanapu”?

¹⁷ Den sortu tori disi e buweisi taki a Kownukondre boskopu kan abi krakti na tapu a libi fu sma di e angri fu yere den tru tori fu Bijbel. Sma di e sari fu di wan lobiwan fu den dede, e kisi krakti baka te den kon sabi taki wan opobaka howpu de (1 Tesalonikasma 4:13). Sma di pôti èn di musu wroko bun tranga fu sorgu gi na osofamiri fu den, e kisi lespeki gi densrefi baka èn den e kisi deki-ati baka te den e kon sabi taki noiti Yehovah sa gowe libi den efu den e tan getrow na en (Psalm 37:28). Furu sma di lasi-ati trutru e kisi yepi fu Yehovah, èn safrisafri den e kisi krakti baka fu man feti nanga den firi fu den, èn son leisi den man kon betre srefi (Psalm 40:1, 2). Iya, Yehovah en Wortu e gi krakti, èn na so fasi a „e yepi ala sma di beni go na gron, fu opo tanapu” (Psalm 145:14). Ibri leisi baka, te wi e si fa a bun nyunsu fu a Kownukondre e trowstu den sma di brokosaka, na ini a birti fu wi noso na ini a Kresten gemeente, dan dati e memre wi taki wi abi a moro bun nyunsu di de fu feni na ini a ten disi!​—Psalm 51:17.

’A sani di mi e begi Gado gi den’

18. Fa Paulus ben e firi te den Dyu no ben wani arki a bun nyunsu, èn fu san ede a ben e firi so?

¹⁸ Aladi a boskopu fu wi na a moro bun nyunsu di de, toku furu sma no wani arki en. Sortu krakti disi kan abi na wi tapu? A srefi krakti di a ben abi tapu na apostel Paulus. A preiki gi den Dyu furu tron, ma furu fu den no ben wani arki a boskopu di ben kan gi den frulusu. Te den no ben wani arki, dan Paulus no ben e firi switi. A ben taki: „Na ini mi ati mi e firi wan bigi sari nanga wan bigi pen di no wani gowe” (Romesma 9:2). Paulus ben e sari den Dyu gi suma a ben e preiki. A ben firi sari taki den no ben wani arki a bun nyunsu.

19. (a) Fu san ede wi no musu fruwondru te wi e lasi-ati son leisi? (b) San ben yepi Paulus fu tan du a preikiwroko fu en?

¹⁹ Wi sosrefi e preiki a bun nyunsu fu di wi e sari den sma. Fu dati ede yu kan frustan taki wi kan lasi-ati te furu sma no wani arki a Kownukondre boskopu. A firi disi e sori taki wi wani trutru taki, na yeye fasi, a musu go bun nanga den sma gi suma wi e preiki. Ma a bun fu hori na eksempre fu na apostel Paulus na prakseri. San ben yepi en fu tan du a preikiwroko fu en? Den Dyu no ben wani bribi a bun nyunsu, èn dati meki Paulus ben e firi sari èn a ben hati en trutru. Ma toku a no ben drai en baka gi ala den Dyu, èn a no ben denki taki yepi no ben de moro gi den. A ben howpu taki wan tu sma ben o de ete di ben e bribi na ini Krestes. Fu dati ede Paulus ben skrifi fa a ben e firi gi ibriwan fu den Dyu: „A sani di mi wani srefisrefi gi den èn di mi e begi Gado, na taki den kan kisi frulusu trutru.”​—Romesma 10:1.

20, 21. (a) Fa wi kan waka baka na eksempre fu Paulus, te wi e du a preikiwroko fu wi? (b) Fu sortu sani di abi fu du nanga a diniwroko fu wi, wi o taki na ini na artikel di e kon now?

²⁰ Luku den tu sani di Paulus ben tyari kon na krin. A ben wani taki awinsi wan tu sma nomo ben kan kisi frulusu, èn a ben begi Gado fu meki dati pasa tu. Na ini a ten disi, wi e waka baka na eksempre fu Paulus. Nanga wi heri ati wi e tan suku sma di sa wani kenki den libi te den e yere a bun nyunsu. Wi e tan begi Yehovah fu wi kan feni den sortu sma disi, so taki wi kan yepi den fu libi na wan fasi di kan meki den kisi frulusu.​—Odo 11:30; Esekièl 33:11; Yohanes 6:44.

²¹ Ma efu wi wani gi a Kownukondre boskopu na someni sma leki wi man, dan wi no musu luku nomo fu san ede wi e preiki èn san wi e preiki, ma wi musu luku tu fa wi e preiki. Na artikel di e kon now sa taki fu a tori disi.

[Futuwortu]

San yu ben leri?

• Fu san ede wi e du a preikiwroko?

• San na a moro prenspari boskopu di wi e preiki?

• Sortu blesi sma e kisi te den e gi yesi na a Kownukondre boskopu?

• San sa yepi wi fu tan du a diniwroko fu wi?

[Prenki na tapu bladzijde 18]

A Kownukondre boskopu e tranga den sma di lasi-ati

[Prenki na tapu bladzijde 20]

Begi e yepi wi fu horidoro na ini a preikiwroko fu wi