Yuda ben tan wan brokopresi?

BIJBEL ben taki na fesi dati den Babilonsma ben o pori a kownukondre fu Yuda, èn taki a kondre disi ben o tan wan brokopresi teleki den Dyu katiboman drai kon baka (Yeremia 25:8-11). A moro bigi buweisi di wi abi fu bribi taki a profeititori disi kon tru, na a fositen tori di Gado meki sma skrifi sowan 75 yari baka di a fosi grupu katiboman drai go baka na a mamakondre fu den. A tori dati e taki dati a kownu fu Babilon „tyari den wan di a no ben kiri nanga feti-owru, go na ini katibo na Babilon, èn den tron futuboi fu en, èn fu den manpikin fu en, teleki a kownu-oso fu Persia teki a makti abra”. Èn disi na san a tori e taki fu a kondre: „Ala den dei di a tan wan brokopresi a ben e hori a sabat” (2 Kroniki 36:20, 21). Owruten sani de di e buweisi taki disi tru?

Na ini a tijdschrift Biblical Archaeology Review, Ephraim Stern, di e wroko na a Hebrew Universiteit leki wan professor fu owruten sani fu Palestina, e sori: „Den Asiriasma nanga den Babilonsma ben pori bigi pisi fu owruten Israel, ma den owruten sani di sma feni fu a ten baka di den pipel disi teki Israel abra, e tyari tu difrenti sani kon na krin.” A professor e fruklari: „Aladi krinkrin buweisi de taki den Asiriasma ben de na ini Palestina, toku buweisi no de taki sma ben e libi drape baka di Babilon pori Yuda. . . . Den buweisi di e sori taki sma ben e libi drape, na fu a ten fu den Persiasma . . . Nowan enkri buweisi de di e sori taki sma ben e libi na ini Yuda. Na ini a heri pisi ten dati sma no go libi baka na ini nowan enkri foto di den Babilonsma ben pori.”

Professor Lawrence E. Stager fu na Harvard Universiteit e agri nanga den wortu dati. A e taki: A gwenti di den kownu fu Babilon ben abi „fu pori den kondre fu den feanti fu den dorodoro, meki taki a kontren na a westsei fu a Yordanliba, namku a heri kontren fu Filistia, èn bakaten a di fu Yuda, kon tron wan brokopresi”. Stager e taki moro fara: „Den buweisi di sma feni na ini Yerusalem nanga Yuda, e sori taki sma go libi drape baka, na a ten fu Sirus a Bigiwan, di teki Yuda abra baka den Babilonsma . . . Na ini a ten dati, furu Dyu katiboman drai go baka na a mamakondre fu den.”

Iya, a de so trutru taki Yuda ben tron wan brokopresi, soleki fa Yehovah ben taki. Den sani di Yehovah Gado e taki na fesi e kon tru ala ten (Yesaya 55:10, 11). Wi kan poti ala wi frutrow tapu Yehovah èn tapu den pramisi fu en di skrifi na ini en Wortu, Bijbel.—2 Timoteyus 3:16.

Yu wani meki den kon na yu?

Srefi na ini a grontapu disi di lai nanga problema yu kan feni koloku, te yu e teki a soifri sabi fu Bijbel di e taki fu Gado, en Kownukondre, nanga den kefalek moi prakseri di a abi gi libisma. Efu yu wani sabi moro noso yu wani meki wan sma kon na yu oso fu hori wan oso-bijbelstudie nanga yu sondro fu pai, dan grantangi skrifi go na Yehovah Kotoigi, P.O. Box 2914, Paramaribo, Suriname, noso skrifi go na wan fu den adres di de na tapu bladzijde 2.