A moro prenspari fasi di wan bun leriman musu abi
1. San na a moro prenspari fasi di wan bun leriman musu abi?
1 San e meki taki wan sma na wan bun Bijbel leriman? Na a skoroleri di a kisi? Na a ondrofeni di a abi? Na den sani di a man du bun fu ensrefi? Fu taki en leti, na a srefi sani di e meki sma hori densrefi na a wèt, di e sori suma na den disipel fu Yesus, èn di de a moro prenspari fasi fu Yehovah di e hari sma trutru (Yoh. 13:35; Gal. 5:14; 1 Yoh. 4:8). A fasi dati na lobi. Bun leriman e sori lobi.
2. Fu san ede a de tumusi prenspari gi wi fu lobi sma?
2 Lobi sma: A Bigi Leriman, Yesus, ben sori lobi gi sma èn disi meki taki den sma ben wani arki en (Luk. 5:12, 13; Yoh. 13:1; 15:13). Te wi lobi sma, dan wi o preiki na ibri okasi. Wi no o lasi-ati te sma e frufolgu wi noso te den no wani arki. Wi o sori taki wi e broko wi ede trutru nanga den sma di wi e preiki gi èn wi o fiti wisrefi na den sma te wi e preiki gi den. Wi o de klariklari fu gebroiki wi ten te wi de na den Bijbelstudenti fu wi, èn wi o gebroiki wi ten tu fu sreka wisrefi na fesi gi ibri studie.
3. Te wi lobi den tru tori fu Bijbel, dan fa dati o yepi wi na ini a preikiwroko?
3 Lobi den tru tori fu Bijbel: Yesus ben lobi den tru tori fu Bijbel tu èn a ben si den tori dati leki wan gudu (Mat. 13:52). Te wi lobi den tru tori dati, dan wi o taki fayafaya fu den èn disi kan meki taki sma di o arki wi o de fayafaya tu. A lobi disi o yepi wi fu poti prakseri na a tumusi prenspari boskopu di wi e tyari na presi fu poti prakseri na den sani di wi no man du so bun. Disi kan yepi wi fu no senwe so furu na ini a preikiwroko.
4. Fa wi kan kon abi lobi?
4 Fa wi kan kon abi lobi: Fa wi kan kon abi lobi gi sma? Te wi e prakseri a lobi di Yehovah nanga en Manpikin sori èn te wi e prakseri taki den sma na ini a kontren fu wi abi Gado fanowdu trutru (Mark. 6:34; 1 Yoh. 4:10, 11). Wi o lobi den tru tori fu Bijbel moro te wi e studeri doronomo èn te wi e denki dipi fu den sani di wi leri. Lobi na wan fasi di a yeye e meki sma kisi (Gal. 5:22). Sobun wi kan aksi Yehovah en santa yeye èn wi kan aksi en fu yepi wi fu kon abi moro lobi (Luk. 11:13; 1 Yoh. 5:14). A no abi trobi omeni skoroleri wi kisi, omeni ondrofeni wi abi na ini a tru anbegi, èn omeni sani wi man du bun fu wisrefi, ma toku wi kan de bun leriman fu Bijbel te wi e sori lobi.