Fu san ede a bun fu studeri Bijbel?
Yu sabi Bijbel? A tumusi aparti buku disi prati moro leki iniwan tra buku. Sma fu difrenti kulturu kon si taki a boskopu na ini Bijbel gi den trowstu nanga howpu, èn taki a rai na ini yepi den na ini na aladei libi. Toku, furu sma na ini a ten disi no sabi furu fu Bijbel. Awinsi yu e go na kerki noso yu no e du dati, toku a kan de so taki yu wani sabi moro fu Bijbel. A brochure disi meki fu yepi yu fu kon sabi san na den moro prenspari tori na ini Bijbel.
FOSI yu teki wan Bijbel fu leisi, a ben o bun fu sabi wan tu sani fu a buku disi. Sma sabi Bijbel sosrefi leki den Santa Buku fu Bijbel. Fu taki en leti, Bijbel abi 66 buku, noso pisi di tyari kon na wán. A fosiwan na Genesis, èn a lastiwan na Openbaring.
Suma na a skrifiman fu Bijbel? Dati na wan moi aksi. Fu taki en leti, sowan 40 man skrifi Bijbel na ini wan pisi ten fu 1600 yari. A moi fu sabi taki den man disi no taki dati na den skrifi Bijbel. Wan fu den skrifiman ben skrifi: „Na Gado srefi ben meki sma skrifi ala den sani di de na ini Gado Buku” (2 Timoteyus 3:16). Wan tra skrifiman ben taki: „Di a yeye fu Yehovah kon na mi tapu, mi bigin taki. San en ben wani, na dati mi ben e taki” (2 Samuel 23:2). Sobun, den skrifiman sori taki Yehovah Gado, a Moro Hei Tiriman fu hemel nanga grontapu, na a Skrifiman fu Bijbel. Den skrifiman tyari kon na krin taki Gado wani taki libisma kon sabi en.
Efu yu wani frustan Bijbel, dan yu musu kon sabi wan tra prenspari sani. A moro prenspari sani di Bijbel e taki fu en, na disi: A musu kon na krin taki na Gado wawan abi a reti fu tiri libisma nanga yepi fu a hemel Kownukondre fu en. Na tapu den bladzijde di e kon, yu sa si taki dati na a moro prenspari sani di Bijbel e taki fu en, iya, yu sa si dati fu Genesis te go miti Openbaring.
Nanga den sani disi na prakseri, wi go luku now san na a boskopu di de na ini Bijbel, a buku di furu sma na grontapu sabi.
a Na ondrosei fu den bladzijde yu sa si o ten spesrutu sani pasa. Te yu si B.K., dan dati wani taki Bifo Krestes. Na so furu sma e kari a ten bifo den bigin teri fu a yari 1. Ma Yesus gebore pikinmoro 2 yari bifo sma bigin teri na a fasi disi.