Wan switikon tapu a Theokrasia Diniwroko-skoro

NA HERI grontapu na ini sowan 200 kondre, milyunmilyun studenti e nyan bun ibri wiki fu a leri di den e kisi tapu a Theokrasia Diniwroko-skoro. Wan tu fu den na nyun studenti. Trawan baka de omeni yari kaba tapu a skoro disi. A skoro disi e hori na dusundusun presi. Awansi pe yu e tan na grontapu, a srefi leri de fu kisi gi yu. Awansi o owru sma de, awansi fu sortu folku den de, èn awansi sortu skoroleri den kisi, den alamala e kisi a leri disi di e kon fu Gado, èn den no abi fu pai gi dati.

Di a skoro ben bigin na ini den gemeente fu Yehovah Kotoigi na ini 1943, dan a marki di a skoro ben wani doro, ben de fu si na ini den wortu disi: „A de fu sreka ala ’getrow man’, den wan di yere Gado Wortu èn di sori taki den e bribi dati, fu den ’sa man leri trawan’ . . . so taki makandra den kan kon moro bun na ini a fruteri di den e fruteri ala sma fu a howpu di de na ini den” (Course in Theocratic Ministry, bladzijde 4). A skoro disi wani doro a srefi marki na ini a ten disi.

Gado meki wi na so wan fasi, taki wi man taki. Te yu luku en bun, dan san na a moro bun sani di iniwan fu wi kan du nanga a moi sani disi di Gado gi wi? Bijbel e piki: „Iya, ibri sani di e bro, meki a prèise Yah” (Ps. 150:6). Te wi e du dati, dan wi e prisiri na ati fu wi hemel Tata. Wi e sori en krinkrin taki wi de nanga tangi na ati fu a bun di a e sori wi èn sosrefi a lobi di a e sori wi. Dati meki a no de fu fruwondru, taki Kresten e kisi a deki-ati fu „tyari wan srakti-ofrandi fu prèise gi Gado ala ten, dati wani taki, a froktu fu den mofobuba di e meki en nen bekènti na publiki”! (Hebr. 13:15) Yu kisi wan moi sani fu Yehovah Gado so taki yu kan prèise En. Wi abi na prakseri fu yepi yu gebroiki a moi sani disi moro bun, dati meki wi e gi yu wan switikon leki wan studenti tapu a Theokrasia Diniwroko-skoro.

Tapu a skoro wi sa poti furu prakseri na a man di yu musu man leisi na fesi ala sma, èn na a koni fu man taki èn fu gi leri. Toku yu sa kisi moro winimarki tapu a Theokrasia Diniwroko-skoro. Te yu e teki prati na a skoro, dan dati sa yepi yu fu du wan tu sani moro bun. Yu sa leri fu leisi moro bun, fu arki èn memre sani, fu studeri, fu ondrosuku sani, èn fu orga sani moro bun. Moro fara yu sa leri fa fu taki moro bun nanga tra sma, fa fu piki sma te den e poti aksi gi yu, èn fa fu skrifi na tapu papira san yu abi na prakseri. Ala den sani di wi sa du tapu a skoro sa komoto fu Bijbel nanga den buku di abi fu du nanga Bijbel. Te yu e furu yu prakseri nanga den moi tru tori di de fu feni na ini Gado Wortu, dan yu sa leri denki leki fa Gado e denki. Trutru, dati sa gi yu winimarki na ini ala sani di yu e du na ini yu libi! William Lyon Phelps di ben de wan leriman tapu wan universiteit na ini a di fu tutenti yarihondro, ben skrifi taki a Wortu fu Gado warti trutru. A ben skrifi: „Ibri sma di sabi Bijbel finifini, na trutru wan sma di kisi bun leri. . . . Mi e bribi taki wan sma di sabi Bijbel ma di no go na heiskoro, warti moro leki wan sma di go na heiskoro ma di no sabi Bijbel.”

Fa yu kan kisi furu winimarki

Fu man kisi furu winimarki fu a leri tapu a Theokrasia Diniwroko-skoro, dan a no de fu taki, dati yu leki studenti musu meki muiti gi dati. Na apostel Paulus ben tranga en Kresten mati Timoteyus: „Denki dipi fu den sani disi, teki den krinkrin na ini yu, so taki ala sma kan si taki yu e go na fesi” (1 Tim. 4:15). San na den sani di yusrefi kan du?

Efu a kan, dan meki muiti fu de tapu a Theokrasia Diniwroko-skoro ibri wiki. A leribuku disi abi leki nen Kisi wini fu a Theokrasia Diniwroko-skoro. Gebroiki en na wan koni fasi. Na fesisei fu a buku wan presi de pe yu musu skrifi yu nen. Ala ten kon nanga a buku disi tapu a skoro. Yu kan gebroiki a leribuku disi tu fu skrifi wan tu sani na ini di yu no wani frigiti. Te yu leisi prenspari sani di yu denki taki den sa man yepi yu, dan poti wan strepi na ondro den. Gebroiki den bradi kanti tapu den bladzijde fu a buku pe noti no skrifi, fu skrifi sani di yu wani gebroiki èn di yu ben leri fu den takimakandra tapu a skoro.

Den sani di wi sa du tapu a skoro de fu feni tapu wan schema di no de na ini a buku disi. Tapu a schema dati yu sa man leisi sosrefi fa wi sa hori a skoro disi. A ben sa bun fu hori a schema dati na ini a buku disi, so taki yu abi en na yu ibri tron te yu abi en fanowdu.

Te yu e sreka yusrefi gi a skoro ibri wiki, dan hori na prakseri taki Bijbel na a moro prenspari leribuku. Dati meki, na a fosi presi, yu musu suku fu leisi ibri pisi fu Bijbel di de tapu a schema fu a wiki dati. Efu yu man leisi ala den tra sani tu di de tapu a schema fu a wiki dati, dan dati sa gi yu furu winimarki tu.

Den arkiman sa man abi wan prati tu na tapu a skoro. Gebroiki den okasi disi bun. Efu yu abi wan prati na den takimakandra disi, dan dati sa yepi yu fu memre san yu yere èn fu gebroiki a sani dati na ini yu eigi libi.

A no de fu taki, dati ala studenti sa kisi na okasi fu taki fu wan tori, noso fu hori demonstrâsi na ini a gemeente. Gebroiki ibriwan fu den okasi disi bun. Te yu musu wroko na wan spesrutu sani fu man taki moro bun, dan du muiti trutru fu du a sani dati moro bun. Yu sa kisi rai di sa yepi yu fu tan go na fesi. Teki den rai disi. Skrifi na ini yu buku den spesrutu rai di yu kisi fu meki taki yu kan du en moro bun. Fu di a muilek fu si yusrefi leki fa trawan e si yu, dati meki den rai di yu sa kisi fu Bijbel na wan lobi-ati fasi, sa yepi yu fu go na fesi krinkrin. A sani dati tru, èn a no abi trobi omeni yari yu de kaba tapu a skoro.—Odo 1:5.

Yu ben sa wani go na fesi moro esi? Efu yusrefi e meki muiti, dan yu kan go na fesi moro esi. Luku den tori bun di ibri studenti sa taki fu den tapu a skoro, èn du dati na fesi. Efu wan fu den takiman no man teki prati moro, dan yu kan taigi a fesiman fu a skoro taki yu wani hori a pisi dati, èn dati sa yepi yu fu kisi moro ondrofeni. Te trawan e hori wan lezing, dan arki bun fa den e du dati. Wi e leri fu makandra.

Moro fara, efu yu abi na okasi, dan yu kan go na fesi moro esi srefi te yu e studeri den tra penti na ini a leribuku disi na fesi. Baka te yu leri den tra 15 les di e kon baka a wan disi, dan go doro nanga a „Programa fu yepi yu tron wan moro bun takiman nanga wan moro bun leriman”, di e bigin tapu bladzijde 78. Na a fosi presi, studeri ibri les; baka dati, du den sani di skrifi na ini a buku èn di abi fu du nanga a les. Gebroiki den sani di yu leri na tapu a skoro, na ini a diniwroko fu yu. Disi kan yepi yu furu fu tron wan moro bun takiman nanga wan moro bun leriman fu Gado Wortu.

A leri di yu sa kisi tapu a Theokrasia Diniwroko-skoro, sa yepi yu fu sreka yusrefi gi den moro prenspari sani na ini a libi. Wi de na libi fu di Gado wani dati. Sobun, te wi e frustan fu san ede wi e libi, dan wi sa prèise en. Yehovah Gado warti fu kisi den moro bun prèise (Openb. 4:11). A leri di wi e kisi tapu a skoro, sa yepi wi fu du dati. Dati sa meki taki wi sa man denki krinkrin, wi sa man du sani na wan koni fasi, èn wi sa man taki bun nanga trawan fu den moi tru tori di komoto fu Gado Wortu.

WAN FONDAMENTI TAPU SAN WI KAN BOW

Wan sma di man taki bun nanga trawan, na wan trutru koni sma. A no ala sma sabi taki bun nanga trawan. Furu leribuku skrifi fu yepi sma fu taki moro bun nanga trawan. Ma a Mekiman na a Wan di meki libisma na so wan fasi, taki den kan taki nanga trawan. Sobun, a Mekiman sabi moro leki iniwan libisma leriman fa wan sma musu taki èn fa wan sma musu gi leri. A ben wroko makandra nanga en wan-enkri gebore Manpikin di ben wroko leki wan Meester Wrokoman sei en. Makandra den ben meki a libisma edetonton nanga ala den tra pisi fu a skin so taki libisma ben man taki. Sosrefi den ben meki ala tra kefalek moi sani na hemel nanga grontapu.

Gado meki engel èn baka dati a meki libisma. A Manpikin dati, di ben de leki a Wortu fu Gado, ben de a moro prenspari Wan di Gado ben gebroiki fu seni boskopu kon gi engel nanga libisma (Odo 8:30; Yoh. 1:1-3). Gado ben seni a Manpikin dati kon na grontapu leki Masra Yesus Krestes. A Wortu fu Gado e taki fu en: „Ala den sma ben fruwondru fa a ben gi leri.” Den wan di ben yere Masra Yesus Krestes, ben kotoigi fu en taki: „Noiti ete wan tra sma taki na so wan fasi” (Mat. 7:28; Yoh. 7:46). Na ini den Evangelietori den e kari Yesus moro leki 40 tron a Leriman, èn den sabi heri bun fu san ede den kari en so. Wi kan leri furu fu Yesus efu wi e luku fa a ben taki èn fa a ben gi leri.

Bijbel e fruteri wi tu fa Yehovah Gado ben gebroiki difrenti sortu mansma nanga umasma so taki a wani fu en ben kan du. Wan tu fu den ben tyari syatu boskopu, ma den boskopu disi ben krakti trutru. Furu fu den mansma nanga umasma dati no ben taki na fesi furu sma, ma na wan getrow fasi den ben kotoigi fu a tru Gado èn fu san Gado abi na prakseri. Soleki fa a sori, dan furu fu den no ben man taki so kefalek bun, ma Gado ben blesi a muiti di den ben du. Wi kan leri fu den sani di Bijbel e taigi wi fu den, fa den ben du a diniwroko fu den.—Ps. 68:11.

Seiker, Bijbel no de wan leribuku fu leri yu fa yu musu taki na fesi furu sma. Ma den sma di e leisi Bijbel bun, e si taki Bijbel abi furu warti tori di kan yepi den tron bun takiman èn bun leriman. Kisi wini fu a Theokrasia Diniwroko-skoro e meki muiti fu bow tapu a fondamenti dati di komoto fu Bijbel.