Furu sma no e go na kerki moro fu di den no e kisi piki tapu den moro prenspari aksi na ini a libi èn den no kisi trowstu. Dan fu san ede yu musu go na den Kresten konmakandra fu Yehovah Kotoigi? Fa a o de te yu de drape?

A o gi yu prisiri te yu miti sma di e sori lobi èn di e broko den ede nanga trawan. Den fosi Kresten ben orga na ini gemeente. Den ben hori konmakandra fu anbegi Gado, fu studeri Bijbel, èn fu gi makandra deki-ati (Hebrewsma 10:24, 25). Den Kresten disi ben lobi makandra trutru. Fu dati ede den ben firi taki den ben de na mindri trutru mati te den ben kon makandra nanga den Kresten brada nanga sisa (2 Tesalonikasma 1:3; 3 Yohanes 14). Wi e du a srefi tu neleki den fosi Kresten èn dati e gi wi prisiri.

Den wini di wi e kisi te wi e leri fu du san Bijbel taki. Neleki fa a ben de na ini Bijbel ten, na so mansma, umasma, nanga pikin-nengre, iya, ala sma e kon makandra. Sma di sabi gi leri e gebroiki Bijbel fu yepi wi frustan fa fu du san Bijbel taki (Deuteronomium 31:12; Nehemia 8:8). Ala sma na den konmakandra mag gi piki te wan takimakandra e hori nanga den arkiman èn ala sma mag singi. Na so wan fasi wi e sori sortu howpu wi leki Kresten abi.​—Hebrewsma 10:23.

Yu o kisi blesi fu di yu o kisi wan moro tranga bribi na ini Gado. Na apostel Paulus ben taigi wan fu den gemeente na ini a ten fu en: „Mi e angri fu si unu . . . so taki wi kan gi makandra deki-ati, fu di ibriwan e kisi deki-ati fu a bribi fu a trawan, iya, a bribi fu unu nanga a di fu mi” (Romesma 1:11, 12). Te wi e go doronomo na den konmakandra, dan wi e miti nanga den Kresten brada nanga sisa fu wi. Dati e tranga a bribi fu wi èn a e gi wi deki-ati fu tan tyari wisrefi leki Kresten.

Fu dati ede yu e kisi a kari fu kon na den konmakandra fu wi, so taki yusrefi kan si den sani disi. Wi o breiti srefisrefi te yu kon. Noiti wi e piki moni na den konmakandra fu wi.

• Neleki suma wi e hori den gemeente konmakandra fu wi?

• Sortu wini wi e kisi te wi e go na den Kresten konmakandra fu wi?

Srefi efu wi musu waka pasa na ini bigi busi noso na ini hebi alen, toku wi e go doronomo na den Kresten konmakandra fu wi. Wi e du dati srefi te wi abi problema na ini wi libi èn te wi weri baka a wroko fu wi. Ma fu san ede den Kotoigi fu Yehovah e du so furu muiti fu kon makandra nanga den Kresten brada nanga sisa fu den?

A bun gi wi. Paulus ben taki dati wi musu „poti prakseri na makandra” te wi de na den gemeente konmakandra (Hebrewsma 10:24). Disi wani taki dati wi musu kon leri sabi makandra. Sobun, na apostel e gi wi a deki-ati fu broko wi ede nanga trawan. Te wi e kon leri sabi tra memre fu a gemeente, dan wi e kon sabi san den ben du di den kisi den srefi sortu problema leki wi. Boiti dati, den kan yepi wi fu horidoro tu.

Wi e kisi bun mati. Na den konmakandra fu wi, wi no e miti nomo nanga sma di wi sabi, ma wi e miti nanga bun mati. Son leisi wi e du sani makandra fu meki prisiri na wan fasi di fiti. Sortu wini wi e kisi te wi de makandra? Wi abi moro warderi gi makandra èn dati e meki taki wi abi moro lobi gi makandra. Te den brada nanga sisa fu wi abi problema, dan wi sa de klariklari fu yepi den fu di wi na bun mati fu den (Odo 17:17). Te wi abi demakandra nanga ala memre fu wi gemeente, dan wi e sori taki wi e „sorgu bun gi makandra”.​—1 Korentesma 12:25, 26.

Wi e gi yu a deki-ati fu tron mati fu sma di e du san Gado wani. Yehovah Kotoigi na den sortu sma dati. Grantangi, no meki noti tapu yu fu kon makandra nanga wi.

• Fu san ede wi e kisi wini te wi abi demakandra na den konmakandra?

• O ten yu wani go na den gemeente konmakandra fu wi fu kon leri sabi wi?

Na den Kresten konmakandra fu a fosi yarihondro den ben e singi, den ben e begi èn den ben e leisi èn taki fu Gado Buku (1 Korentesma 14:26). Na so wi e hori den konmakandra fu wi tu.

Wi e kisi leri fu Bijbel di wi kan fiti na ini wi libi. Tapu satra noso sonde, ibri gemeente e kon makandra fu arki wan Bijbel lezing fu 30 miniti. A lezing e sori fa Bijbel kan yepi wi na ini wi libi èn san Bijbel e taki fu a ten fu wi. Te a lezing e hori, wi e kisi deki-ati fu leisi tu na ini wi eigi Bijbel. Baka a lezing, wi e hori a Waktitoren-studie wán yuru langa. Na a studie disi den memre fu a gemeente e gi piki te wi e taki fu wan artikel na ini a Studie-Waktitoren. A takimakandra disi e yepi wi fu fiti den Bijbel rai na ini wi libi. Na ini den moro leki 110.000 gemeente fu wi na heri grontapu, wi e taki fu a srefi artikel.

Wi e kisi yepi fu gi leri na wan moro bun fasi. Na mindriwiki wi e kon makandra tu fu hori wan programa di prati na dri pisi. A konmakandra disi nen Wi Kresten libi nanga a preikiwroko. Den tori di wi e luku na a konmakandra disi, de fu feni na ini a Kresten libi nanga preikiwroko Studie-buku. A fosi pisi fu a konmakandra nen Gudu na ini Gado Wortu èn a e yepi wi fu leri wan sani fu wan pisi fu Bijbel di a gemeente ben musu leisi na fesi. Baka dati yu abi a pisi di nen Du muiti fu tron wan moro bun preikiman. Na ini a pisi disi yu abi demo di e sori fa wi kan taki fu Bijbel nanga tra sma. Wan brada e gi rai di kan yepi wi fu leisi èn fu taki moro bun (1 Timoteyus 4:13). A lasti pisi fu a konmakandra disi nen Wi Kresten libi. A pisi disi e sori fa wi kan gebroiki Bijbel na ini wi aladei libi. Na wan aksi nanga piki takimakandra di e yepi wi fu frustan Bijbel moro krin.

Te yu de na den konmakandra fu wi, dan yu o feni en moi fu si omeni sani yu e leri fu Bijbel.​—Yesaya 54:13.

• San yu o yere na den konmakandra fu Yehovah Kotoigi?

• Na sortuwan fu den alawiki konmakandra fu wi yu wani go?