Fu di wi wani du ala san wi man fu preiki a „bun nyunsu” gi „sma fu ala kondre, lo, tongo, nanga pipel”, meki wi e tyari buku nanga tijdschrift kon na doro na ini moro leki 750 tongo (Openbaring 14:6). Fa wi man du a muilek wroko disi? Wi e du dati nanga yepi fu skrifiman di de na ini difrenti kondre èn wan grupu di e wroko tranga fu vertaal den sani di skrifi. Ala den sma disi na Yehovah Kotoigi.

Ala sani skrifi fosi na ini Ingrisitongo. A Tiri Skin e luku a wroko fu a Skrifiman Afdeling di de na a edekantoro fu wi. Na afdeling disi e taigi den skrifiman sortu tori den musu skrifi. Den skrifiman disi e dini na a edekantoro èn na wan tu tra bijkantoro. Fu di difrenti skrifiman de, meki den e skrifi fu tori di abi krakti tapu sma fu difrenti kulturu. Na so fasi sma fu ala sortu kondre lobi den buku nanga tijdschrift fu wi.

Den e seni den sani di den skrifi gi den sma di e vertaal. Te den kaba skrifi wan artikel, dan den o luku efu ala sani bun èn efu a bun fu tyari kon na doro. Baka dati den e seni en nanga yepi fu computer go na den sma di e vertaal na heri grontapu. Den sma disi di e wroko na ini grupu, e vertaal na artikel, den e luku efu a vertaal bun, èn baka dati den e leisi en fu luku efu fowtu de na ini. Den e du muiti fu vertaal „soifri san tru”. Den e du dati na so wan fasi taki a srefi prakseri di skrifi na ini Ingrisitongo de tu na ini a tongo dati.​—Preikiman 12:10.

A wroko e go moro gaw fu di den e gebroiki computer. Wan computer no man du san wan skrifiman èn wan sma di e vertaal man du. Ma sma man du a vertaalwroko moro gaw te den e gebroiki computer di abi wortubuku nanga tra sani na tapu. Yehovah Kotoigi meki wan computer sistema di nen MEPS (Multilanguage Electronic Publishing System). Den e gebroiki a computer sistema disi fu vertaal na ini hondrohondro tongo èn fu seti ala wortu nanga prenki na so wan fasi taki den kan druk en.

Fu san ede wi e du so furu muiti fu vertaal na ini tongo di wan tu dusun sma nomo e taki? Fu di Yehovah wani taki „ala sortu sma musu kisi frulusu èn taki den musu kon sabi a tru leri finifini”.​—1 Timoteyus 2:3, 4.

• Suma e skrifi den buku nanga tijdschrift fu wi èn fa den e du dati?

• Fu san ede wi e vertaal den buku nanga tijdschrift fu wi na ini so furu tongo?

Na organisâsi fu wi e meki èn prati hondrohondro milyun Bijbel, buku, nanga tijdschrift ibri yari sondro taki sma abi fu pai gi dati. Wi e bow nyun Kownukondre zaal nanga bijkantoro èn wi e ondrow den. Wi e sorgu gi dusundusun sma na Betel nanga zendeling, èn wi e gi yepi te wan rampu pasa. Fu dati ede yu kan aksi yusrefi: ’Pe a moni e komoto fu du ala den sani disi?’

Wi no e piki moni èn wi no e taigi sma omeni moni den musu gi ibri mun. Aladi wi abi fu pai furu kostu gi a preikiwroko, toku wi no e aksi sma moni. Moro leki wán hondro yari pasa, a di fu tu Waktitoren ben taki dati wi e bribi taki Yehovah e horibaka gi wi. Dati meki „noiti wi sa begi noso aksi libisma fu horibaka gi a wroko disi” èn noiti wi du dati!​—Mateyus 10:8.

Fu di sma wani, meki den e gi moni fu horibaka gi a wroko fu wi. Furu sma lobi a wroko di wi e du fu gi leri fu Bijbel èn fu dati ede den e gi moni fu horibaka gi dati. Den Kotoigi srefi breiti fu gi den ten, den krakti, den moni, nanga tra sani di den abi fu du a wani fu Gado na heri grontapu (1 Kroniki 29:9). Na a Kownukondre zaal èn na den bigi konmakandra fu wi yu abi kisi, pe sma di wani gi moni kan poti dati na ini. Noso den kan go tapu na jw.org website fu wi fu gi moni. Nofo tron a moni di sma e gi, e kon fu sma di no gudu, neleki a pôti uma di en masra ben dede kaba. Yesus ben taki bun fu na uma disi di ben poti tu sensi na ini a monikisi fu a tempel (Lukas 21:1-4). Sobun, iniwan sma kan teki en leki wan gwenti fu „poti san a man na wan sei” „soleki fa a bosroiti na ini en ati”.​—1 Korentesma 16:2; 2 Korentesma 9:7.

Wi de seiker taki Yehovah o tan naki na ati fu sma di wani ’gi Yehovah grani nanga den gudu di den abi’. Na so fasi den e horibaka gi a Kownukondre wroko so taki a wani fu en pasa.​—Odo 3:9.

• Na sortu fasi na organisâsi fu wi de tra fasi leki den kerki?

• Fa wi e gebroiki a moni di sma e gi?

Soleki fa a nen Kownukondre zaal e sori, dan a moro prenspari Bijbel leri di e gi drape abi fu du nanga Gado Kownukondre. Disi ben de a moro prenspari sani di Yesus ben taki fu en na ini en diniwroko.​—Lukas 8:1.

Na den presi pe wi e anbegi a tru Gado. Den Kownukondre zaal na den presi pe wi e seti sani fu preiki a bun nyunsu fu a Kownukondre (Mateyus 24:14). Den zaal no bigi a srefi èn den no bow a srefi, nowan fu den abi furu pranpran èn na ini furu fu den moro leki wán gemeente e kon makandra. Na ini den yari no so langa pasa, wi bow dusundusun nyun Kownukondre zaal (dati na sowan feifi zaal ibri dei). Wi du dati fu di moro nanga moro preikiman nanga gemeente de. Fa wi man du a wroko disi?​—Mateyus 19:26.

Sma e gi moni fu bow Kownukondre zaal. Den e seni a moni disi go na a bijkantoro so taki gemeente di musu bow wan nyun zaal noso di musu seti a zaal fu den kon nyun baka, kan kisi moni fu du dati.

Ala sortu sma e gi densrefi fu bow Kownukondre zaal sondro fu kisi pai. Na ini furu kondre den e seti Kownukondre zaal bow-grupu. Grupu fu bow-dinari nanga friwani wrokoman e go na difrenti gemeente na ini wan kondre, èn srefi na farawe presi fu yepi den gemeente drape fu bow den eigi Kownukondre zaal. Na ini tra kondre Kotoigi di sabi bow e teki fesi na ini a wroko fu bow Kownukondre zaal noso fu seti Kownukondre zaal kon nyun baka. Furu wrokoman fu a kontren drape di sabi bow e yepi nanga a wroko. Ma moro furu na den memre fu a gemeente e gi densrefi fu yepi bow. Na Yehovah en yeye nanga a muiti di a pipel fu en e meki nanga den heri ati e meki taki wi man du ala den sani disi.​—Psalm 127:1; Kolosesma 3:23.

• Fu san ede wi e kari den presi pe wi e anbegi Gado, Kownukondre zaal?

• Fa a du kon taki wi man bow Kownukondre zaal na heri grontapu?