„No kon na ondro a srefi tyatyari nanga sma di no de na bribi”
SOLEKI fa yu kan si dyaso tapu a prenki disi, dan a kameili nanga a kaw abi furu problema fu plugu makandra. A tyatyari na ondro san den de, e pina den tu meti disi, fu di a meki gi meti di bigi èn tranga a srefi. Fu di Gado ben e broko en ede nanga den meti disi di musu tyari hebi lai, meki a ben taigi den Israelsma taki: „Unu no musu plugu wan kaw nanga wan buriki makandra” (Deuteronomium 22:10). A srefi sani wi kan taki fu wan kaw nanga wan kameili.
A no de a gwenti taki wan gronman e pina a meti fu en na so wan fasi. Ma efu a no ben abi tu kaw, dan a ben kan poti den tu meti di a abi, na ondro wán tyatyari. Neleki fa yu e si tapu a prenki dyaso, dan dati na san a gronman fu a di fu 19 yarihondro, ben bosroiti fu du. Fu di den meti no bigi a srefi èn no hebi a srefi, meki a moro swaki meti no man waka so esi leki a tra meti èn a moro tranga meti ben sa musu tyari a moro bigi pisi fu a lai.
Na apostel Paulus ben gebroiki na agersitori fu so wan tyatyari fu leri wi wan prenspari sani. „No kon na ondro a srefi tyatyari nanga sma di no de na bribi”, na so a ben skrifi. „Bika san regtfardikifasi abi fu du nanga kruktudu? Noso, fa leti kan moksi nanga dungru?” (2 Korentesma 6:14) Fa wan Kresten kan kon ondro a srefi tyatyari nanga sma di no de na bribi?
Wan fasi fu du disi na te wan Kresten e teki a bosroiti fu trow nanga wan sma di no abi a srefi bribi leki en. So wan trowlibi kan tyari problema kon fu di den tu patna no e denki na a srefi fasi fu prenspari tori.
Di Yehovah ben seti a trowlibi, dan a ben meki a wefi leki wan „fitipisi” fu en masra (Genesis 2:18). Nanga yepi fu a profeiti Maleaki, Gado ben taki sosrefi fu a wefi leki wan „patna” (Maleaki 2:14). Wi Mekiman wani taki trowpatna musu wroko makandra na ini wánfasi na yeye fasi. Na so wan fasi den sa yepi makandra te problema de na ini a trowlibi èn den ala tu sa nyan bun sosrefi fu den winimarki.
Te wan Kresten e trow „soso na ini Masra”, dan a e sori lespeki gi a rai di wi e kisi fu wi Hemel Tata (1 Korentesma 7:39). Na so wan fasi wi e poti wan fondamenti fu wan trowlibi di de na ini wánfasi. Dati sa tyari prèise nanga grani gi wi Gado fu di ala tu trowpatna e dini Gado na wan spesrutu fasi leki „trutru kompe di de na ondro a srefi tyatyari”.—Filipisma 4:3.
[Sma di abi a reti fu a prenki na tapu bladzijde 32]
Kameili nanga mankaw: Fu a buku La Tierra Santa, Volume 1, 1830