Sortoe nen joe abi?

NA INI bijbel, a wortoe „nen” e sori sontron go na wan boen nen noso wan takroe nen. Foe eksempre, a koni kownoe Salomo ben skrifi: „Wan nen boen moro leki boen oli, èn a dei foe dede boen moro leki a dei te wan sma e kon gebore.” (Preikiman 7:1; teki gersi Odo 22:1.) Soleki fa Salomo taki, wan sma no gebore nanga wan boen nen. Na presi foe dati, a de na ini a libi foe en taki a e kisi wan nen di wani taki wan sani. A nen foe en e meki sma kon sabi den eigifasi foe en, efoe a lobi gi sani, noso a e denki ensrefi wawan, efoe a abi sari-atifasi noso a no e ke nanga sma, efoe a abi sakafasi noso a abi heimemre, srefi efoe a regtfardiki noso a godelowsoe.

Loekoe David. Di a ben de kownoe, a ben boeweisi taki a ben tranga èn taki a no ben degedege. Na a srefi ten, na wan sakafasi David ben erken den fowtoe foe en èn a ben sori berow foe den bigi sondoe foe en. Nanga reti a profeiti foe Jehovah ben kari David „wan man di e plisi en [Gado] ati” (1 Samuèl 13:14). Di David ben jongoe a ben abi wan boen nen kaba na Gado.

Kontrari foe dati, Kownoe Joram foe Judea ben meki wan takroe nen gi ensrefi. A ben hari den borgoe foe en poeroe foe na anbegi foe Jehovah èn a ben meki den kiri den siksi brada foe en nanga wan toe foe den ondro-kownoe foe Juda srefi. Te foe kaba Jehovah ben naki Joram nanga wan siki di e gi hebi skin-ati, di ben meki a dede baka ten. Bijbel e taki dati Joram „hari foetoe sondro taki sma ben angri foe en”, noso soleki fa Today’s English Version e taki en, „no wan sma ben sari di a dede”. — 2 Kroniki 21:20.

A fasi fa David nanga Joram ben libi e sori o troe na odo foe bijbel de: „A memre di sma e memre wan regtfardiki sma na wan blesi, ma a nen foe den godelowsoe sma dati sa pori gowe” (Odo 10:7). Ibriwan foe wi moesoe prakseri serjoesoe foe na aksi: ’Sortoe nen mi e meki gi misrefi na Gado èn na a sma na mi sei?’