Dede a no a kaba fu ala sani!

Betania ben de wan pikin dorpu di ben de sowan 3 kilometer moro fara fu Yerusalem (Yohanes 11:18). Wan sari sani ben pasa drape wan tu wiki fosi Yesus dede. Lasarus, wan bun mati fu Yesus, kon siki wantronso èn a dede.

Di Yesus yere a nyunsu, dan a taigi den disipel fu en taki Lasarus ben e sribi èn taki a ben o wiki en (Yohanes 11:11). Ma den disipel fu Yesus no ben e frustan san a ben wani taigi den, sobun Yesus taigi den krin: „Lasarus dede.”​—Yohanes 11:14.

Yesus doro na Betania fo dei baka a beri, èn a ben wani trowstu Marta, a sisa fu Lasarus. Marta taigi en: „Efu yu ben de dya, mi brada no ben o dede” (Yohanes 11:17, 21). Yesus piki en: „Mi na a opobaka nanga a libi. A sma di e bribi na ini mi, sa kon na libi baka, awansi a dede.”​—Yohanes 11:25.

Fu sori taki a no ben taki a sani dati fu soso, dan Yesus waka go na a grebi èn a bari: „Lasarus, kon na doro!” (Yohanes 11:43) Den sma di ben de drape no ben man bribi di den si taki a dede man kon na doro.

Wan pisi ten na fesi, Yesus ben wiki awansi tu dede sma. Wan leisi a ben wiki wan yongu meisje di ben dede, na umapikin fu Yairus. Leti bifo Yesus ben wiki a meisje dati, a taigi den sma drape tu taki a meisje disi ben e sribi.​—Lukas 8:52.

Luku taki di Lasarus nanga na umapikin fu Yairus ben dede, dan Yesus agersi dede nanga sribi. A sani dati fiti. Fu san ede? Te wan sma e sribi, dan a no sabi san e pasa na en lontu. A sani disi e sori heri bun taki den wan di dede e rostu èn taki den no e firi pen nanga sari moro. (Preikiman 9:5; luku a faki, „Dede de leki wan dipi sribi”.) Den disipel fu Yesus ben e frustan heri bun san ben de a situwâsi fu den dedewan. „Gi den bakaman fu Yesus, dede ben de wan sribi, èn a grebi ben de wan presi . . . pe bribiman ben e rostu”a, na so a buku Encyclopedia of Religion and Ethics e taki.

A de wan trowstu gi wi fu sabi taki den dedewan e sribi na ini a grebi èn taki den no e nyan pina. Dati meki dede no e dangra wi moro èn a no e frede wi moro tu.

„EFU WAN LIBISMA DEDE, A KAN KON NA LIBI BAKA?”

Ma aladi wi e firi bun te wi e sribi te neti, toku nowan sma wani sribi fu têgo. Sortu howpu wi abi taki den dedewan di e sribi na ini a grebi o libi baka, neleki fa dati ben pasa nanga Lasarus nanga na umapikin fu Yairus?

A famiri-edeman Yob ben aksi a srefi sani disi di a ben denki taki a ben o dede. A ben aksi: „Efu wan libisma dede, a kan kon na libi baka?”​—Yob 14:14.

Yob ben taki nanga na Almakti Gado èn na so a piki en eigi aksi: „Yu o kari mi èn mi o piki yu. Yu o angri fu si mi, a sani di yu meki nanga yu eigi anu” (Yob 14:15). Yob ben de seiker taki Yehovah ben e angri fu a dei kon taki a ben kan wiki a reti-ati futuboi fu en. Yob ben e winsi wan sani di no kan? Kwetikweti.

Di Yesus ben wiki dede sma, dan dati ben sori krin taki Gado ben gi en a krakti fu wini dede. Fu taki en leti, Bijbel e taki dati nownowde Yesus abi „den sroto fu dede” (Openbaring 1:18). Sobun, Yesus o opo den portu fu grebi, neleki fa a ben taigi sma fu lolo a ston puru di ben de na fesi a grebi fu Lasarus.

Bijbel e taki furu leisi taki Gado o wiki den dedewan. Wan engel ben taigi a profeiti Danièl: „Yu o go rostu, ma yu o opo baka fu kisi yu pai na a kaba fu den dei” (Danièl 12:13). Luku san Yesus ben taigi den Saduseiman, noso den Dyu fesiman di no ben e bribi taki dedewan o kisi libi baka: „A no de soleki fa unu e taki, bika unu no sabi Gado Buku èn a krakti fu Gado” (Mateyus 22:23, 29). Na apostel Paulus ben taki: „Mi abi a howpu taki Gado sa gi wan opobaka na den sma di du san reti èn na den sma di no du san reti.”​—Tori fu den apostel 24:15.

O TEN DEN DEDEWAN O KISI WAN OPOBAKA?

O ten den sma di du san reti nanga den sma di no du san reti o kisi wan opobaka? Na engel ben taigi a reti-ati Danièl taki a ben o opo baka „na a kaba fu den dei”. Na so Marta ben e bribi tu taki en brada Lasarus ben o „kon na libi baka te na opobaka o de na a lasti dei”.​—Yohanes 11:24.

Bijbel e sori taki a „lasti dei” disi abi fu du nanga a tiri fu Krestes leki Kownu fu a Kownukondre. Paulus ben skrifi: „Bika a musu tiri leki Kownu teleki Gado poti ala den feanti fu en na ondro en futu. Dede na a lasti feanti di a o puru na pasi” (1 Korentesma 15:25, 26). A sani disi e gi wi bun reide fu begi taki Gado Kownukondre kon èn taki a wani fu Gado pasa na grontapu.b

Yob ben sabi heri bun taki Gado wani wiki den dedewan. Te a dei dati doro, dan trutru dede no o de moro. Noiti moro wan sma o aksi ensrefi: ’Dede na a kaba fu ala sani?’