Den wet fu a Kownukondre​—Gado pipel e kisi deki-ati fu suku a retidu fu Gado

WAN pisi ten kaba yu si taki yu birman e luku yu nanga yu osofamiri. Wan dei te yu e waka pasa èn yu e gi en odi, a e gi yu odi baka, dan a e kari yu kon. A e taki: „Mi kan aksi yu wan sani? Fu san ede unu de tra fasi?” Yu e taki: „Fu san ede yu e aksi mi dati?” A e taki: „Unu na Yehovah Kotoigi tòk? Unu no de leki ala tra sma. Unu no de leki den tra kerki, unu no e hori fesa, unu no e bumui nanga politiek èn unu no e go na feti. Noiti mi si wan fu unu e smoko èn yu frow nanga pikin e tyari densrefi na wan fasi di fiti. San meki taki unu de so tra fasi?”

Yu sabi taki ala den aksi disi abi wán piki nomo: Na fu di wi e meki Gado Kownukondre tiri wi. Leki Kownu, Yesus e meki wi kon krin moro nanga moro. A e yepi wi fu waka na en baka èn fu de tra fasi leki na ogri grontapu disi. Na ini Pisi 3 fu a buku disi wi o si fa a Mesias Kownu krin Gado pipel na difrenti fasi: A meki na anbegi fu den kon moro krin, a yepi den fu libi wan krin libi, èn a sorgu taki sani seti moro bun na ini na organisâsi fu den. Ala den sani disi e meki taki Yehovah e kisi glori.