Den e kiri Yohanes na wan friyari-oso

Den apostel fu Yesus e du a wroko fu den na ini Galilea, ma a sma di meki den kon sabi Yesus no man du dati. Pikinmoro tu yari pasa kaba, èn Yohanes a Dopuman de na strafu-oso ete.

Yohanes ben taki krin taki Kownu Herodes Antipas no ben mag teki Herodias leki wefi, fu di Herodias ben trow nanga Herodes afubrada Filipus. Herodes ben brokotrow nanga en eigi wefi fu man trow nanga Herodias. Herodes ben feni taki a e hori ensrefi na a Wet di Gado gi Moses. Ma soleki fa a Wet dati ben sori, dan Herodes ben du sutadu èn a no ben mag trow nanga Herodias. Fu di Yohanes piri-ai gi Herodes, meki Herodes meki sma poti Yohanes na strafu-oso. Kande Herodias gi en deki-ati fu du disi.

Herodes no sabi san fu du nanga Yohanes fu di a pipel e „si Yohanes leki wan profeiti” (Mateyus 14:5). Ma Herodias sabi bunbun san a wani du. A e „hori Yohanes na ati” èn a e tan suku wan fasi fu kiri en (Markus 6:19). Te fu kaba a e kisi na okasi fu du dati.

Syatu fosi a Paskafesa fu a yari 32, Herodes e hori wan bigi fesa fu di a friyari. Ala den heihei man nanga den legre-ofsiri fu Herodes, sosrefi den prenspari sma fu Galilea e kon na a fesa. Na a fesa den e kari a yongu uma Salome fu kon dansi gi den sma di kon drape. Salome na a umapikin fu Herodias di a ben meki nanga en fosi masra Filipus. Den man lobi fa Salome e dansi.

Fu di Herodes lobi fa Salome dansi, meki a e taigi en: „Aksi mi ala san yu wani, dan mi o gi yu dati.” A e sweri srefi: „Ala san yu e aksi mi, mi o gi yu, awansi na afu fu mi kownukondre.” Ma fosi Salome piki en a e go na en mama, dan a e aksi en: „San mi musu aksi?”​—Markus 6:22-24.

Disi na wan moi okasi gi Herodias fu kisi san a wani! Sondro fu draidrai a e taigi Salome: „Na ede fu Yohanes a dopuman.” Wantewante Salome e go baka na Herodes èn a e taki: „Mi wani taki wantewante yu musu gi mi na ede fu Yohanes a Dopuman na tapu wan plata preti.”​—Markus 6:24, 25.

Herodes e sari trutru fu a sani di Salome aksi, ma den sma di kon na a fesa yere di a sweri fu gi Salome san a wani. A no wani kiri wan man di no du noti, ma a no wani kisi syen tu. Fu dati ede a e seni wan waktiman go na a strafu-oso fu du na ogri-ati sani disi. Syatu baka dati a waktiman e drai kon baka nanga na ede fu Yohanes na tapu wan plata preti. A e gi en na Salome di e tyari en go na en mama.

Te den disipel fu Yohanes e yere san pasa, den e kon teki a skin fu en èn den e beri en. Dan den e fruteri Yesus san pasa.

Bakaten te Herodes e yere taki Yesus e dresi sma èn taki a e puru ogri yeye na sma tapu, a e frede. A e aksi ensrefi efu a man Yesus di e du wondru na Yohanes a Dopuman di „kisi wan opobaka” (Lukas 9:7). Dati meki Herodes wani si Yesus trutru. Ma a no wani si en fu di a wani yere san Yesus e preiki. A wani si en fu di a wani sabi efu Yesus na Yohanes trutru.