MWBR20 01 Verwijzing gi Wi Kresten libi nanga a preikiwroko studie-buku

6-12 yanuari

GUDU NA INI GADO WORTU | GENESIS 1-2

„Yehovah e meki taki libi kon de na grontapu”

it-2-O 824

Den sani di Gado meki

Di Gado taki na a fosi dei: „Meki leti kon de”, dan wan dóf leti ben skèin pasa den wolku, ma son, mun, nanga stari no ben de fu si ete na grontapu. Soleki fa a sori, dan disi no ben pasa wantronso. A vertaler J.W. Watts taki: „Èn safrisafri leti ben kon de fu si” (Ge 1:3, A Distinctive Translation of Genesis). Gado prati a leti nanga a dungru. A kari a leti Dei èn a dungru a kari Neti. Disi e sori taki grontapu srefi e drai lontu, ma na a srefi ten a e drai lontu a son. Na so na owstusei nanga a westsei fu grontapu e kon dungru fu wan pisi ten.​—Ge 1:3, 4.

Na a di fu tu dei Gado meki a loktu èn a loktu disi prati „den watra fu makandra”. Watra ben de na grontapu, ma furu watra ben opo go na loktusei fu grontapu. A loktu ben kon de na mindri den watra disi. Gado kari a loktu Hemel fu di a ben de tapusei fu grontapu. Bijbel no e taki dati den stari nanga planeiti ben de na ini a loktu na mindri grontapu nanga den watra na tapusei fu a loktu.​—Ge 1:6-8.

Na a di fu dri dei, Gado gebroiki a bigi krakti fu en fu tyari ala a watra fu grontapu kon na wán. Na so drei gron ben kon de fu si èn Gado kari en Grontapu. Na a dei disi sosrefi, Gado meki taki sani soleki grasi nanga bon di e gi froktu bigin gro na grontapu. Den no kon fu densrefi noso nanga yepi fu evolutie. Ala den sani disi ben e meki den eigi sortu noso „den eigi siri”.​—Ge 1:9-13.

it-2-O 824 ¶6-825 ¶2

Den sani di Gado meki

A moi fu sabi taki Bijbel e gebroiki a Hebrew wortu asah di vertaal nanga „meki”, fu sori taki Yehovah ben meki a son, a mun, nanga den stari kaba. Fu di Gado ben meki „hemel” kaba, meki son, mun, nanga den stari ben de kaba langaten fosi a di fu fo dei. Te Bijbel e taki dati „Gado poti den na loktu fu skèin leti kon na grontapu”, dan disi e sori taki now den ben de fu si komoto fu grontapu. Boiti dati, den leti disi ben musu „sori san na den difrenti ten fu a yari, san na dei èn san na yari”. Sobun, den sani disi ben o yepi sma na ini a libi.​—Ge 1:14.

Na a di fu feifi dei, Gado meki den fosi libisani na grontapu di no ben de leki libisma. Gado no ben meki wan-enkri libisani nomo di ben musu kenki kon tron tra sani, ma a gebroiki a krakti fu en fu meki ipi-ipi difrenti libisani. Bijbel e taki: „Baka dati Gado meki den bigi meti di e libi na ini se. A meki ala sortu meti tu di ben kon lai na ini a watra. Boiti dati, a meki ala sortu meti di e frei.” Di Gado luku den sani di a meki, dan a ben feni den bun èn a blesi den. Fu taki en leti a taigi den taki den „musu kon lai”. A sani disi ben kan, fu di Gado ben meki den difrenti sortu libisani disi na so wan fasi taki den man meki trawan fu den eigi sortu.​—Ge 1:20-23.

Na a di fu siksi dei, „Gado bigin meki ala sortu busimeti, ala sortu osometi, nanga ala sortu meti di e kroipi na gron”. A ben feni ala den sani dati bun, neleki den tra sani di a ben meki kaba.​—Ge 1:24, 25.

Na a kaba fu a di fu siksi dei, Gado meki wan tra sortu libisani di ben hei moro den meti, ma di ben lagi moro den engel. Disi ben de wan libisma di Gado ben meki leki fa en srefi de. A wan-enkri sani di Genesis 1:27 e taki fu libisma, na taki Gado meki „wan man nanga wan uma”. Ma Genesis 2:7-9 di e taki fu a srefi tori, e sori taki Yehovah Gado teki doti fu a gron èn a meki a man. Ne a bro libi go na ini en noso-olo èn a man tron wan libisma. Gado ben meki wan paradijs gi en fu tan èn a ben sorgu taki nyanyan ben de tu gi en. Baka di Gado meki Adam, dan a teki wan fu den lebriki fu Adam fu meki na uma (Ge 2:18-25). Di a meki na uma, dan fosi libisma ben abi den eigi sortu.​—Ge 5:1, 2.

Diki moro dipi

it-1-O 1270

Yesus Krestes

A no de wan Mekiman. Aladi a Manpikin yepi fu meki sani, toku a no ben de wan Mekiman leki en Papa. Gado gebroiki en santa yeye, noso a krakti fu en, fu meki sani (Ge 1:2; Ps 33:6). Fu di Yehovah na a sma fu pe ala libi e komoto, meki ala libisani, den wan di wi man si èn den wan di wi no man si, kisi libi fu en (Ps 36:9). Sobun, a Manpikin no de wan Mekiman, ma a Mekiman Yehovah, gebroiki en fu meki ala sani. Yesus srefi taki dati Gado meki ala sani, èn Bijbel e taki dati tu.​—Mt 19:4-6.

13-19 yanuari

GUDU NA INI GADO WORTU | GENESIS 3-5

„Den takru bakapisi fu a fosi lei”

it-1-O 235

A pen di wan uma e firi te a e meki wan pikin

Baka di a fosi uma Eva sondu, dan Gado taigi en san ben o pasa te a ben o meki pikin. Efu a ben tan gi yesi na Gado, dan Gado ben o tan blesi en èn te a ben o kisi pikin dan dati ben o de soso prisiri. Bika Bijbel e taki: „A blesi fu Yehovah, na dati e meki sma kon gudu èn a no e meki den firi sari” (Odo 10:22). Ma fu di libisma kisi sondu, meki ala umasma ben o meki pikin nanga pen. Dati meki Gado taki (nofo tron te Bijbel e taki dati Gado du wan sani, dan a wani taki dati a e gi pasi taki wan sani pasa): „Mi o meki a pen di yu abi te yu de nanga bere kon furu moro nanga moro. Nanga skin-ati yu o meki pikin.”​—Ge 3:16.

Diki moro dipi

it-2-O 148 ¶2

Lamek

A puwema di Lamek ben skrifi gi den wefi fu en (Ge 4:23, 24) e sori taki den sma fu a ten dati ben abi ogri-ati. A puwema fu Lamek ben e taki: „Arki mi, un wefi fu Lamek; yere san mi abi fu taki: Mi kiri wan man, fu di a gi mi mankeri, iya, mi kiri wan yonkuman, fu di a naki mi. Efu a sma di kiri Kain, musu butu gi dati seibi tron, dan a sma di kiri Lamek, musu butu gi dati seibitenti na seibi tron.” Soleki fa a sori, Lamek ben e taki dati a no fu espresi a ben kiri wan sma neleki Kain ben du dati, ma na kibri a ben wani kibri ensrefi di wan man naki en gi en mankeri. Sobun, a ben skrifi a puwema disi fu begi sma fu no du en ogri fu di a ben kiri a man di ben du ogri nanga en.

it-2-O 161 ¶4

A spotu di wan sma e spotu Gado

Te Bijbel e taki dati sma „bigin gebroiki a nen fu Yehovah” na ini a ten fu Enos, na a ten fosi a Frudu, dan a musu de taki den no ben e du dati na wan reti fasi noso na wan fasi di fiti. Wi kan taki dati fu di langa ten na fesi, Abel ben e gebroiki Gado nen kaba (Ge 4:26; Heb 11:4). Efu a de so taki sma ben e gebroiki Yehovah nen gi libisma noso gi falsi gado, soleki fa son sabiman e taki, dan na spotu den ben e spotu Gado.

27 yanuari–2 februari

GUDU NA INI GADO WORTU | GENESIS 9-11

„Ala sma na grontapu ben e taki wán tongo”

it-1-O 221

Babilon a Bigiwan

Babilon fu owruten. Di sma pruberi fu bow a Toren fu Babel, dan nanga dati den bigin seti a foto Babilon na ini na opo presi fu Sineyar (Ge 11:2-9). Den no ben bow a toren nanga a foto fu gi Gado nen grani, ma den ben bow en fu „meki wan nen” gi densrefi. Na den brokopresi fu owruten Babilon èn na tra presi na ini Mesopotamia, sma feni toren di ben gersi piramide. Awinsi fa den toren dati ben bow, den sani disi e sori krin taki a toren di sma ben meki na Babel ben abi fu du nanga anbegi. Fu di Yehovah Gado tyari wan kaba kon na a bow fu a toren, meki wi kan frustan taki a ben abi fu du nanga falsi anbegi. A Hebrew nen fu a foto, Babel, wani taki „Bruya”, ma a Sumeria nen (Ka-dingir-ra) nanga a nen na ini Akadiatongo (Bab-ilu), wani taki „Portu fu Gado”. Disi e sori taki den sma di ben tan abra na ini a foto kenki a nen so taki a no gersi leki Gado ben krutu a foto. Ma a nyun nen e sori ete taki a foto ben abi fu du nanga anbegi.

it-2-O 976 ¶2

Tongo

A buku Genesis e sori taki sma di ben e libi baka a Frudu ben du wan sani di no ben e kruderi nanga san Gado ben taigi Noa nanga den manpikin fu en fu du (Ge 9:1). Na presi taki den panya go na ala sei „teleki den kon lai na grontapu”, den bosroiti fu tan na wán presi èn fu seti wan libimakandra na a presi di wi kon sabi leki na opo presi fu Sineyar na ini Mesopotamia. Soleki fa a sori, a presi disi pe wan toren ben de ben musu tron wan presi pe sma ben e kon fu anbegi den gado fu den.​—Ge 11:2-4.

it-2-O 976 ¶3

Tongo

Di na Almakti Gado bruya a tongo fu a pipel, dan dati tyari bruya kon na den mindri, èn den no ben man go doro nanga a toren di den ben e prefuru fu bow. Fu di den no ben man wroko makandra moro, meki den panya go na difrenti presi fu grontapu. Now di a tongo fu den ben bruya, a ben o kon moro muilek gi den fu go du sani di Gado no feni bun, fu di den no ben o man span anu makandra fu du bigi sani. Den no ben o leri sani tu fu den difrenti grupu sma di ben e taki wan tra tongo. A koni fu den no ben komto fu Gado, ma den kisi en fu di den srefi ondrosuku èn ondrofeni sani. (Luku Preik 7:29; De 32:5.) Aladi a bruya di Gado ben bruya a tongo fu libisma ben tyari bigi prati kon, toku a sani dati ben bun fu di a tapu den fu go du sani di ben o tyari problema nanga sari kon. (Ge 11:5-9; luku Yes 8:9, 10.) Na ini den yari di pasa sma kon abi furu koni èn te yu e luku fa den e geboiki a koni fu den fu du ogri, dan wi kan frustan fu san ede Gado tapu den sma na ini Babel fu du san den ben wan du.

it-2-O 406

Pipel

Now di ibri grupu sma ben abi den eigi tongo, meki den kon abi den eigi kulturu, den eigi moimoi sani, den eigi gwenti, fasi, nanga bribi (Le 18:3). Now di den difrenti pipel ben drai baka gi Gado, den meki furu popki fu den falsi gado fu den.​—De 12:30; 2Kow 17:29, 33.

Diki moro dipi

it-1-O 409 ¶6

Ham

A kan taki Kanan srefi ben abi fu du nanga a sani disi di pasa èn taki en papa Ham no piri-ai gi en. A kan tu taki di Yehovah meki Noa taki wan profeititori, Noa ben man si kaba taki den bakapikin fu Kanan ben o kon abi den srefi takru fasi di Ham ben abi kaba. A fluku disi bigin kon tru di den Dyu fu Israel puru den Kanansma na pasi. Den wan di den Israelsma no ben puru na pasi, (fu eksempre den Gibeonsma [Yos 9]) tron srafu fu Israel. Hondrohondro yari baka dati, a fluku kon tru moro fara di den bakapikin fu Kanan, a manpikin fu Ham, kon na ondro a makti fu den gran kownukondre Media nanga Persia, Grikikondre, nanga Rome. Den sma fu den kownukondre dati ben de bakapikin fu Yafet.

it-2-O 441

Nimrod

Biginbigin, den foto Babel, Erek, Akad, nanga Kalne ben de pisi fu a kownukondre fu Nimrod. Ala den foto disi ben de na ini a kondre Sineyar (Ge 10:10). Dati meki a kan taki Nimrod ben teki fesi di den bigin bow Babel nanga a toren fu en. A sani disi e kruderi tu nanga san den Dyu e bribi. Josephus ben skrifi: „Safrisafri [Nimrod] bigin kwinsi a pipel, fu di a ben de nomonomo taki sma ben musu frutrow soso tapu a makti fu en. A ben feni taki na so wawan a ben kan tapu sma fu no frede Gado moro. A taki dati a ben o puru atibron tapu Gado efu A ben o sungu grontapu baka. A ben o bow wan toren di ben o hei moro leki pe a watra ben o man doro èn a ben o strafu Gado fu di a ben kiri den afo fu den. A pipel ben de fayafaya fu horibaka gi [Nimrod] fu di den no ben wani lagi densrefi fu tron srafu fu Gado. Dati meki den bigin bow a toren . . . èn den bow en moro esi leki san sma ben e fruwakti.”​—Jewish Antiquities, I, 114, 115 (iv, 2, 3).