Fa Gado o tyari wan kaba kon na den ogri di e pasa?

Bijbel e sori krin san Yehovah nanga en Manpikin, Yesus Krestes, o du nanga a pina di Satan e tyari kon. Bijbel e taki: „Dati meki a Manpikin fu Gado [Yesus] ben kon. A ben kon fu tyari wan kaba kon na den wroko fu Didibri” (1 Yohanes 3:8). A grontapu disi pe furu sma gridi, pe bita-ati lai, èn pe furu ogri e pasa, o kon na wan kaba. Boiti dati, Yesus e pramisi taki „a o trowe a tiriman fu a grontapu disi [Satan Didibri] go na dorosei” (Yohanes 12:31). Na a ten dati, Satan no o abi krakti moro tapu libisma, èn wan nyun grontapu o seti pe retidu nanga freide o de.​—2 Petrus 3:13.

Fa a de nanga den sma di e weigri fu kenki den fasi fu den èn di de nomonomo fu du ogri? Luku a pramisi disi di e taki krin san o pasa nanga den: „Den reti-ati sma o libi na grontapu. Na soso den wan di e du bun, o tan abra. Ma Gado o figi den ogri sma puru na grontapu. Den bedrigiman a o rutu puru” (Odo 2:21, 22). Ogrisma no o abi krakti moro tapu trawan. Te freide o de, dan reti-ati libisma safrisafri o kon fri fu a sondu di den ben kisi.​—Romesma 6:17, 18; 8:21.

Fa Gado o tyari wan kaba kon na ogridu na ini a nyun grontapu dati? A no o tapu libisma fu teki den eigi bosroiti, so taki den kon de leki robot. Na presi fu dati, Gado o leri reti-ati libisma den fasi fu en, èn a o yepi den fu no abi takru prakseri èn fu no du ogri moro.

Fa a de nanga den rampu di e pasa sondro taki sma e fruwakti dati? San Gado o du? A pramisi taki heri esi a Kownukondre fu en o tiri grontapu. A sma di Gado poti leki Kownu fu a Kownukondre dati, na Yesus Krestes di abi a makti fu meki sikisma kon betre baka (Mateyus 14:14). Yesus abi a makti tu fu basi den krakti fu a naturu (Markus 4:35-41). Na so wan kaba o kon na a pina di sma e pina fu di ’ogri ten nanga sani di sma no e fruwakti’ e pasa (Preikiman 9:11). Te Krestes o tiri, dan nowan rampu o miti libisma.​—Odo 1:33.

Fa a de nanga den milyunmilyun sma di dede fu soso? Syatu bifo Yesus ben gi en mati Lasarus libi baka, dan a taki: „Mi na a opobaka nanga a libi” (Yohanes 11:25). Iya, Yesus abi a makti fu gi den dedewan libi baka!

Yu feni en wan moi sani taki yu o man libi na ini wan grontapu pe takru sani no o pasa nanga bun sma? Efu dati de so, dan a ben o bun te yu e studeri Bijbel so taki yu kan kon sabi moro fu a tru Gado èn fu a wani fu en. Yehovah Kotoigi na ini a kontren fu yu o breiti fu yepi yu. Wi e gi yu deki-ati fu miti nanga den, noso fu skrifi den sma di tyari a tijdschrift disi kon na doro.