MWBR21 02 Verwijzing gi Wi Kresten libi nanga a preikiwroko studie-buku

1-7 MAART

GUDU NA INI GADO WORTU | NUMERI 7-8

„Sani di wi kan leri fu a fasi fa a kampu fu Israel ben seti”

it-1-O 780 ¶7

Gemeente

Furu tron na den edeman fu Israel ben e teki presi gi a pipel (Esr 10:14). Dati meki na „den edeman fu den lo” ben e tyari ofrandi go na a tabernakel (Nu 7:1-11). Na ini a ten fu Nehemia dan na den priester, den Leifisma nanga „den granman fu den lo” ben meki ’wan sweri di ben musu poti tapu papira’ (Ne 9:38–10:27). Di den Israelsma ben de na ini a sabana, yu ben abi den prenspari man di ben gwenti teki fesi gi a pipel na den konmakandra.” Bakaten, 250 fu den man disi ben hori baka gi Korak, Datan, Abiram, nanga On fu opo densrefi teige Moses nanga Aron (Nu 16:1-3). Yehovah ben meki Moses teki 70 owruman fu Israel, di ben musu yepi en fu „tyari den problema fu a pipel,” fu di en wawan no ben man du dati (Nu 11:16, 17, 24, 25). Lefitikus 4:15 e taki fu „den owruman fu a pipel.” Soleki fa a sori dan na den owruman, den edeman, den krutuman nanga den fesiman ben e teki presi gi a pipel.​—Nu 1:4, 16; Yos 23:2; 24:1.

it-2-O 759 ¶4

Ruben

Te den Israelsma ben e seti kampu, dan a lo fu Ruben ben de na a zuidsei fu a tabernakel. Baka dati yu ben e kisi den lo fu Simeon nanga Gad. Den dri lo disi ben e waka baka makandra te den ben e hari fu a wan presi go na a trawan. Baka dati yu ben e kisi den dri lo fu Yuda, Isaskar nanga Seibulon (Nu 2:10-16; 10:14-20). Na a srefi fasi disi den lo ben orga fu gi a ofrandi fu den di a tabernakel ben gi abra na Yehovah.​—Nu 7:1, 2, 10-47.

Diki moro dipi

it-1-O 579

Fosi geborewan, fosiwan

Fu di den fosi gebore manpikin fu Israel ben o tron ede fu na oso fu den, meki na den ben e teki presi gi a heri pipel. Te yu luku en bun, dan Yehovah ben e kari a heri pipel Israel en „fosi geborewan” fu di a ben meki wan frubontu nanga Abraham (Eks 4:22). Fu di Yehovah ben kibri a libi fu den fosi gebore manpikin na ini Israel meki a ben taki dati „ibri fosi manpikin fu den libisma nanga den meti na ini Israel musu de santa” (Eks 13:2). Sobun den fosi gebore manpikin ben de fu Gado.

8-14 MAART

GUDU NA INI GADO WORTU | NUMERI 9-10

„A fasi fa Yehovah e tiri en pipel”

it-2-O 25 ¶1

Kampu

A fasi fa den Israelsma ben e froisi fu a wan presi go na a trawan, e sori taki den ben orga bun (na ini Numeri 33, Moses e taki fu sowan 40 presi pe den Israelsma ben seti kampu na ini a sabana). So langa a wolku ben e tan tapu a tabernakel den no ben e gowe, ma te a wolku ben e opo komoto fu a tabernakel, dan den ben e gowe tu. „Te Yehovah ben taigi den fu tan na wan presi, dan na dati den ben e du, èn te Yehovah ben taigi den fu gowe, dan den ben e gowe tu” (Nu 9:15-23). Den priester ben e gebroiki tu solfru trompeti fu meki a pipel sabi san den ben musu du (Nu 10:2, 5, 6). Den ben e bro a trompeti na wan spesrutu fasi te a pipel ben musu gowe. A fosi leisi di a sani disi pasa ben de „a di fu tu tenti dei fu a di fu tu mun na ini a di fu tu yari [1512 Fosi Krestes].” A fosi grupu fu dri lo, Yuda, Isaskar nanga Seibulon ben de na fesi makandra nanga na Ark fu a frubontu. Baka den lo disi, yu ben e kisi den Gersonsma nanga den Merarisma di ben e tyari den pisi fu a tabernakel. Dan yu ben e kisi a lo fu Ruben makandra nanga den lo fu Simeon nanga Gad. Na den baka yu ben abi den Kehatsma di ben e tyari den pisi fu a santa presi. Baka dati, yu ben e kisi den Efrayimsma makandra nanga den lo fu Manase nanga Benyamin. Leki lasti yu ben e kisi a lo fu Dan di ben de makandra nanga a lo fu Aser nanga Naftali. Sobun, na den moro bigi èn tranga grupu ben de na fesisei nanga bakasei fu a pipel disi.​—Nu 10:11-28.

Diki moro dipi

it-2-O 1102 ¶6

Konmakandra

A prenspari fu kon makandra. A Paskafesa di den Israelsma ben musu hori ibri yari, e sori o prenspari a de fu kon makandra èn fu teki leri fu Yehovah. Ibri mansma di ben krin ben musu fu hori a Paska, noso a ben o lasi en libi. Boiti efu a ben de na pasi e go na wan presi (Nu 9:9-14). Di Kownu Heskia ben kari den sma fu Yuda nanga Israel fu hori a Paska fesa na ini Yerusalem, a ben taki: „Un bakapikin fu Israel, un drai kon baka na Yehovah. . . No kon de leki den afo fu unu di trangayesi Yehovah. Arki Yehovah èn kon na a santa presi di a meki kon santa fu ala ten. Dini Yehovah un Gado, so taki en ati no bron nanga unu moro. . . . Yehovah un Gado abi bun-ati nanga sari-ati. Dati meki a no o hori unu na feanti te unu e drai kon baka na en” (2Kr 30:6-9). Efu wan sma no ben hori a Paska fu espresi, dan dati ben e sori taki a gowe libi Yehovah. Aladi Kresten na ini a ten disi no e hori a Paskafesa, tog Paulus ben sori o prenspari a de fu tan kon makandra nanga a pipel fu Gado. A ben taki: „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. Meki wi no misi konmakandra, soleki fa son sma gwenti du, ma gi makandra deki-ati o moro unu e si a dei e kon krosibei.”​—Heb 10:24, 25; luku GEMEENTE.

15-21 MAART

GUDU NA INI GADO WORTU | NUMERI 11-12

„Fu san ede wi no musu krutukrutu?”

it-2-O 763 ¶5

Meki trobi

Krutukrutu. Te sma e krutukrutu, dan dati e meki trawan lasi-ati èn firi brokosaka. Syatu baka di den Israelsma komoto na ini Egypte, den bigin krutu nanga Moses nanga Aron, den man di Yehovah ben poti fu tyari a pipel. Na so den ben sori taki den e krutu Yehovah tu (Eks 16:2, 7). Bakaten a sani disi meki Moses lasi-ati so te taki a ben wani dede (Nu 11:13-15). Te wan sma e krutukrutu dan disi kan meki a lasi en libi srefi. Te den ben e krutu Moses dan gi Yehovah a ben de leki na en den ben e krutu (Nu 14:26-30). Furu fu den lasi den libi fu di den ben du a sani disi.

Diki moro dipi

it-2 254

Mana

Fa a ben de. A mana ben „de leki finifini weti siri,” a ben „gersi” bedelium-tara èn a ben lontu leki parel. A ben e tesi leki „plata oni kuku” noso „sukru kuku di moksi nanga oli.” Baka te den ben mara en nanga anumiri noso masi en na ini wan mata, den ben e bori en noso meki kuku nanga en.​—Eks 16:23, 31; Nu 11:7, 8.

22-28 MAART

GUDU NA INI GADO WORTU | NUMERI 13-14

Diki moro dipi

it-1-O 740

A kondre di Gado ben gi Israel

A kondre di Gado ben gi Israel ben bun trutru. Di Moses ben taigi den man fu go luku a Pramisi Kondre, a ben taigi den tu fu tyari wan tu froktu fu a kondre kon. Di den drai kon baka den tyari figa, granaki-apra nanga wan bosu droifi di ben bigi so te taki tu man ben abi fu tyari en na wan tiki. Aladi den ben e frede èn no ben abi bribi, tog den ben taki: „A tru taki a kondre lai merki nanga oni.”​—Nu 13:23, 27.

5-11 APRIL

GUDU NA INI GADO WORTU | NUMERI 17-19

Diki moro dipi

g02-O 8/6 14 ¶2

Sowtu​—Wan sani di abi waarde

Sowtu ben e prenki wan sani di ben o tan fu wan langa pisi ten. Dati meki te Bijbel ben taki fu wan „sowtu frubontu,” dan a ben e sori go na wan frubontu di ben o tan. Den sma di ben meki so wan frubontu ben e sidon nyan wan nyanyan makandra di abi sowtu. Na so den ben e sori taki den ben o hori densrefi na a frubontu disi (Numeri 18:19). A wet fu Moses ben e sori taki den Israelsma ben musu poti sowtu tapu den ofrandi di den ben e tyari. Disi ben e sori taki a meti no ben o pori.

12-18 APRIL

GUDU NA INI GADO WORTU | NUMERI 20-21

„Tan sori safri-ati na ini muilek situwâsi”

w09-O 1/9 19 ¶5

Wan krutuman di e du san reti

A fosi sani na taki Gado no ben taigi Moses fu taki nanga a pipel èn a no ben taigi en fu krutu den tu. A di fu tu sani na taki Moses nanga Aron no ben gi Gado glori. Gado ben taki: „Un no gi mi grani” (vers 12). Di Moses taki ’wi o puru watra gi unu,’ dan a sori taki na en nanga Aron ben o du dati. A no taki leki na Yehovah ben o du dati. A di fu dri sani, na taki den kisi a srefi strafu di den sma di ben opo densrefi ben kisi. Gado no ben meki den sma di opo densrefi teige en go na ini a kondre Kanan èn now a ben du a srefi sani nanga Moses nanga Aron tu (Numeri 14:22, 23). A di fu fo sani, na taki na Moses nanga Aron ben de fesiman fu a pipel. Sma di abi moro bigi grani o abi fu gi moro frantwortu na Gado.​—Lukas 12:48.

19-25 APRIL

GUDU NA INI GADO WORTU | NUMERI 22-24

„Yehovah meki wan fluku tron wan blesi”

it-2-O 1220

Law

A de wan don sani fu opo wisrefi teige Yehovah. A profeiti Bileam ben du wan don sani di a ben wani fluku Israel soso fu kisi moni fu Balak, a kownu fu den Moabsma. Ma Yehovah ben tapu en fu du dati. Na apostel Petrus ben taki disi fu Bileam: „Buriki no gwenti taki. Toku na wan buriki ben taki nanga a profeiti nanga wan libisma sten fu pruberi fu tapu en fu du a don di a ben wani du.” Di Petrus ben taki fu a donfasi fu Bileam, a ben gebroiki a Griki wortu pa·ra·phro·niʹa. A wortu disi wani taki „wan sma sondro frustan.”​—2Pe 2:15, 16; Nu 22:26-31.

26 APRIL–2 MEI

GUDU NA INI GADO WORTU | NUMERI 25-26

Diki moro dipi

it-1-O 881 ¶1-2

A fasi fa a kondre ben musu prati

Soleki fa a sori, dan den ben e luku tu prenspari sani te den ben e prati a kondre gi den lo na ini Israel. Den ben e iti lot èn den ben e luku o bigi den lo de. Na a lot ben e bepaal sortu pisi fu a kondre wan lo ben o kisi. Efu a ben o de noordsei noso zuidsei, owstusei noso westsei. Noso efu a ben o de a bergikontren noso na sesyoro. Na Yehovah ben gebroiki a lot fu sori sortu pisi ibri lo ben o kisi. Dati ben o meki taki den no ben o dyarusu noso meki trobi nanga makandra (Odo 16:33). Na a fasi disi Yehovah ben sorgu taki ibri lo ben kisi a pisi fu a kondre, soleki fa Yakob ben taki fosi a dede na ini Genesis 49:1-33.

Baka te a lot ben sori sortu pisi kontren wan lo ben o kisi, dan den ben o luku o bigi a lo de fosi den gi en a pisi kontren dati: „Un musu iti lòt fu prati a kondre na mindri den famiri nanga den lo fu unu. Efu wan lo bigi, dan a musu kisi wan bigi kontren, èn efu wan lo pikin, dan a musu kisi wan pikin kontren. Na a lòt o sori sortu kontren ibri lo o kisi” (Nu 33:54). Na a lot ben e bepaal sortu kontren wan lo ben o kisi, ma na a bigi fu a lo ben o sori o bigi a kontren dati ben o de. Disi ben de fu si di a ben kon na krin taki a kontren fu Yuda ben bigi tumusi. Den ben meki en kon moro pikin fu di den ben gi a lo fu Simeon wan pisi fu a kontren dati.​—Yos 19:9.