MWBR21 05 Verwijzing gi Wi Kresten libi nanga a preikiwroko studie-buku

3-9 MEI

GUDU NA INI GADO WORTU | NUMERI 27-29

Diki moro dipi

it-2-O 458 ¶6

Ofrandi

Dringi-ofrandi. Furu leisi sma ben e tyari dringi-ofrandi makandra nanga tra ofrandi, spesrutu baka di den Israelsma go ini a Pramisi Kondre (Nu 15:2, 5, 8-10). A ben kan de win (noso dringi di abi sopi) di ben kanti trowe tapu na altari (Nu 28:7, 14; luku Eks 30:9; Nu 15:10). Na apostel Paulus ben skrifi disi gi den Kresten na ini Filipi: „Srefi te mi e gi misrefi leki wan dringi-ofrandi di kanti trowe na tapu na ofrandi fu yu, toku mi breiti èn mi e prisiri.” Na ini a tekst disi Paulus e agersi a dringi-ofrandi nanga a de di a ben de klariklari fu gi ensrefi fu yepi den Kresten brada fu en (Fp 2:17). Syatu fosi a dede, a skrifi disi gi Timoteyus: „Den kanti mi trowe kaba leki wan dringi-ofrandi èn a ten di mi o kon fri de krosibei kaba.”​—2Ti 4:6.

10-16 MEI

GUDU NA INI GADO WORTU | NUMERI 30-31

„Sorgu taki yu du san yu pramisi”

it-1-O 772

Pramisi

Wan sma ben e du dati sondro fu trawan dwengi en, ma a ben musu du san a pramisi. Sma ben e pramisi wan sani fu di densrefi ben wani du dati. Ma te wan sma ben pramisi wan sani, dan soleki fa a wet e taki, a ben musu fu hori ensrefi na a pramisi dati. Fu dati ede wan sma di ben pramisi wan sani ben musu sorgu taki a du san a pramisi (Nu 30:2; luku sosrefi Ro 1:31, 32). Wan sma kan poti en libi na ini kefar srefi, te a pramisi taki a o du wan sani. Dati meki wi kan frustan fu san ede Bijbel e taki dati wan sma musu denki bun fosi a meki wan pramisi. A wet ben taki: ’Efu unu sweri Yehovah un Gado wan sani . . . a o aksi unu fu gi en san unu sweri. A de wan sondu te unu no du san unu sweri. Ma efu unu no ben meki wan sweri, dan unu no sondu.’​—De 23:21, 22.

it-1-O 772

Pramisi

Na wan seryusu pramisi di wan sma ben meki na Gado fu du wan sani, fu tyari wan ofrandi, noso fu gi wan sani. Wan pramisi ben kan abi fu du tu nanga a fasi fa wan sma ben o libi, a wroko di a ben o du, noso fu no du son sani aladi den sani disi no fowtu. Sma ben e du den sani disi fu di densrefi ben wani, no fu di sma ben dwengi den. Sowan pramisi ben de wan seryusu sani, neleki te wan sma ben meki wan sweri. Son leisi Bijbel e gebroiki den tu wortu disi gi a srefi sani (Nu 30:2; Mt 5:33). Te wan sma ben meki wan “pramisi”, dan disi ben abi fu du nanga a bosroiti di wan sma teki fu du wan sani. Ma te wan sma “sweri” fu du wan sani, dan dati e sori taki a e luku go na wan moro hei sma noso makti fu sori o prenspari a sweri fu en de. Furu tron sma ben e meki wan sweri fu poti krakti tapu wan frubontu di den meki.​—Ge 26:28; 31:44, 53.

Diki moro dipi

it-1-O 1211 ¶2

Yefta

Sma ben kan gi na Yehovah fu du santa diniwroko gi en na ini a santa presi. Papa nanga mama ben kan bosroiti fu du disi nanga den pikin. Wan fu den sma disi ben de Samuel. Fosi a gebore, en mama Hanna ben pramisi taki a ben o gi Yehovah en fu wroko na ini a tabernakel. En masra Elkana ben agri nanga a pramisi disi. Di Hana puru Samuel na bobi a tyari en go wantewante na a santa presi, aladi a ben tyari wan meti leki ofrandi tu (1Sa 1:11, 22-28; 2:11). Simson srefi ben de wan pikin ete di den gi en na Yehovah leki wan Nasireisma.​—Kru 13:2-5, 11-14. Nu 30:3-5, 16 e sori taki wan papa ben abi a reti fu teki son bosroiti gi en umapikin.

17-23 MEI

GUDU NA INI GADO WORTU | NUMERI 32-33

„Un musu yagi ala den sma di e tan na ini a kondre”

w10-O 1/8 23

Yu ben sabi a sani disi?

San ben de den „hei presi” di kari na ini den Hebrew buku fu Bijbel?

Syatu fosi den Israelsma go na ini a Pramisi Kondre, Yehovah ben taigi den fu pori ala den presi pe den Kanansma ben e go anbegi den falsi gado fu den. A ben taigi den: „Un musu broko ala den ston popki nanga den isri popki di den e anbegi leki gado. Un musu broko ala den santa hei presi pe den e anbegi den gado fu den” (Numeri 33:52). Den hei presi disi ben kan de opo presi tapu den bergi, noso hei presi di sma srefi ben meki na ondro wan bon noso ini a foto (1 Kownu 14:23; 2 Kownu 17:29; Esekièl 6:3). Den presi disi ben abi altari, santa postu noso pilari, popki, altari fu bron switismeri, noso tra sani.

it-2-O 32 ¶2

Kanan

Yosua ben du wani koni sani di „a du ala sani di Yehovah ben taigi Moses fu du” nanga den Kanansma di ben musu kisi pori (Yos 11:15). Ma den Israelsma no teki na eksempre fu en, èn den no puru den sma di ben e doti a kondre. Fu di den Kanansma ben e tan na den mindri, meki den ben abi krakti tapu den Israelsma. A sani disi ben meki taki moro Israelsma ben e lasi den libi (boiti den wan di ben dede fu di den ben du wan ogri, hurudu noso afkodrei). Efu den ben hori densrefi na a komando fu puru den sma disi na ini a kondre, dan a sani disi no ben o miti den (Nu 33:55, 56; Kru 2:1-3, 11-23; Ps 106:34-43). Yehovah ben warskow den Israelsma taki te a ben o krutu sma a no ben o teki sei, fu di en na wan Gado fu retidu. Efu den Israelsma ben o moksi nanga den trakondre sma èn trow nanga den, dan te fu kaba den ben o teki den gwenti fu a bribi fu den abra. Èn den ben o du sani di Yehovah no feni bun. A sani disi ben o meki taki Yehovah gi den a srefi dedestrafu leki den sma dati. A kondre ben o ’spiti den puru.’​—Eks 23:32, 33; 34:12-17; Le 18:26-30; De 7:2-5, 25, 26.

Diki moro dipi

it-1-O 881 ¶2

A fasi fa a kondre ben musu prati

Baka te a lot ben sori sortu pisi kontren wan lo ben o kisi, dan den ben o luku o bigi a lo de fosi den gi en a pisi kontren dati: „Un musu iti lòt fu prati a kondre na mindri den famiri nanga den lo fu unu. Efu wan lo bigi, dan a musu kisi wan bigi kontren, èn efu wan lo pikin, dan a musu kisi wan pikin kontren. Na a lòt o sori sortu kontren ibri lo o kisi” (Nu 33:54). Na a lot ben e bepaal sortu kontren wan lo ben o kisi, ma na a bigi fu a lo ben o sori o bigi a kontren dati ben o de. Disi ben de fu si di a ben kon na krin taki a kontren fu Yuda ben bigi tumusi. Den ben meki en kon moro pikin fu di den ben gi a lo fu Simeon wan pisi fu a kontren dati.​—Yos 19:9.

31 MEI–6 YUNI

GUDU NA INI GADO WORTU | DEUTERONOMIUM 1-2

„Na gi Gado unu e koti krutu”

w96-O 15/3 23 ¶1

Yehovah lobi retidu èn a lobi te sma e koti krutu na wan reti fasi

Owruman musu koti krutu te sma na ini a gemeente du wan seryusu sondu (1 Korentesma 5:12, 13). Den musu hori na prakseri taki Yehovah na wan Gado fu retidu. Fu dati ede den musu du ala san den man fu sori sari-ati. Efu a sma no e sori berow, dan den no o man du dati. Ma den owruman no e puru wan sma fu a gemeente fu di den atibron tapu en. Den e howpu taki a puru di a puru fu a gemeente o yepi en fu kisi ensrefi baka (Luku Esekiel 18:23). Den owruman e wroko ondro a tiri fu Krestes, èn disi wani taki dati den de leki „wan kibripresi gi tranga winti” (Yesaya 32:1, 2). Fu dati ede, den no musu teki sei èn den musu hori sma firi na prakseri.​—Deuteronomium 1:16, 17.

7-13 YUNI

GUDU NA INI GADO WORTU | DEUTERONOMIUM 3-4

„Den wet fu Yehovah e sori taki a koni èn taki a e du san reti”

it-2-O 1118 ¶6

Frustan

Te wan sma e studeri Gado Wortu fayafaya èn a e du muiti fu du san a e leri, dan dati kan meki a frustan sani moro krin leki den leriman fu en. A kan frustan sani moro den man di grani kaba (Ps 119:99, 100, 130; luku Lu 2:46, 47). Disi de so fu di koni nanga frustan de fu feni na ini den wet nanga den krutubosroiti fu Gado. Efu den Israelsma ben e hori densrefi na den weti disi, dan den tra pipel na den lontu ben o ’si taki den koni èn taki den abi sabi’ (De 4:5-8; Ps 111:7, 8, 10; luku 1Kw 2:3). Wan sma di koni e si taki Gado Wortu bun dorodoro. A o du ala san a man fu fiti den leri disi èn a o begi Gado fu yepi en fu du dati (Ps 119:169). A e meki muiti fu frustan a boskopu fu Gado bun (Mt 13:19-23), a e skrifi en na tapu en ati (Odo 3:3-6; 7:1-4), èn a sani disi e yepi en fu „koti pasi gi bedrigi fasi” (Ps 119:104). Di a manpikin fu Gado ben de na grontapu, a sori taki a ben frustan a sani disi, fu di a no ben suku wan fasi fu tan na libi. A ben sabi taki a ben kon fu meki den sani di skrifi na ini Bijbel kon tru.​—Mt 26:51-54.

28 YUNI–4 YULI

GUDU NA INI GADO WORTU | DEUTERONOMUIM 9-10

„San Yehovah e aksi fu unu?”

w09-O 1/10 10 ¶3-4

San Yehovah e aksi fu unu?

San musu pusu wi fu gi yesi na Gado nanga wi heri ati? Moses ben taki fu wan fu den sani disi. A taki: „Lespeki Gado” (Vers 12). Disi no wani taki wi e lespeki Gado fu di a o strafu wi, ma wi e du disi fu di wi abi bigi lespeki gi en nanga den sani di a e leri wi. Te wi abi bigi lespeki gi Gado, wi no o wani du wan sani di o meki a sari.

San musu de a moro prenspari reide fu san ede wi e gi yesi na Gado? Moses taki: „Lobi en [Yehovah] èn . . . dini Yehovah un Gado nanga un heri ati èn nanga un heri libi” (Vers 12). Lobi gi Gado a no wan firi nomo. Wan Hebrew sabiman taki: „Den Hebrew wortu di den e gebroiki gi firi, abi fu tu nanga den sani di wan sma e du fu sori a firi dati.” A e taki tu dati fu lobi Gado wani taki dati ’wi e du sani gi en fu di wi lobi’ en. Sobun te wi lobi Gado trutru dan wi o du sani di o meki a prisiri.​—Odo 27:11.

w09-O 1/10 10 ¶6

San Yehovah e aksi fu unu?

Te wi e gi yesi nanga wi heri ati, wi o kisi blesi. Moses ben skrifi: „Un musu hori den komando . . . di mi e taigi unu tide, so taki sani kan waka bun nanga unu” (Vers 13). Ibri komando fu Yehovah, iya ala den sani di a e aksi fu wi, na gi wi eigi bun. Ma a no man tra fasi. Bijbel e taki dati „Gado na lobi” (1Yh 4:8). Dati meki ala den wet fu en o yepi wi fu de koloku fu tego (Yesaya 48:17). Te wi e du ala san Yehovah e aksi fu wi, dan wi e wai pasi gi furu broko-ede. Èn na ini a ten di e kon wi o kisi tego blesi te en Kownukondre o tiri.