MWBR21 09 Verwijzing gi Wi Kresten libi nanga a preikiwroko studie-buku

6-12 SEPTEMBER

GUDU NA INI GADO WORTU | DEUTERONOMIUM 33-34

„Suku kibri na Yehovah”

it-1-O 1266

Yesurun

Na wan nen fu ben gi Israel grani. Na ini a Griki Septuaginta a nen disi wani taki „lobiwan.” A nen „Yesurun” ben musu memre den Israelsma taki den ben de a spesrutu pipel fu Yehovah èn taki den ben musu libi leki fa a wani (De 33:5, 26; Yes 44:2). Na Deuteronomium 32:15, a nen e gebroiki na wan spotu fasi. Na presi taki den Israelsma ben tyari densrefi leki a lobiwan fu Yehovah, den ben kon tranga-ede, den gowe libi a Mekiman fu den èn den wisiwasi a Frulusuman fu den.

Diki moro dipi

it-2-O 372 ¶4

Moses

Moses ben abi 120 yari di a dede. Bijbel e sori taki a ben abi wan bun gosontu: „A ben e si bun ete èn a ben tranga ete.” Na Yehovah srefi beri en èn nowan sma sabi pe a beri (De 34:5-7). A kan taki Yehovah ben du disi fu sorgu taki den Israelsma no go du sani di ben o meki taki den du afkodrei. Disi ben kan pasa efu den ben meki a grebi fu en tron wan santa presi. A sori leki Didibri ben wani gebroiki a dedeskin fu Moses fu du wan srefi sortu sani. Na fu dati Yudas, na afu-brada fu Yesus, ben skrifi di a taki: „Wan leisi a gran engel Mikael ben abi wan kesekese nanga Didibri. A ben e haritaki nanga en fu a dedeskin fu Moses. Toku a no ben prefuru fu krutu Didibri èn fu kosi en. A ben taki nomo: ’Meki Yehovah strafu yu’” (Yudas 9). Fosi Yosua tyari den Israelsma go na ini Kanan den ben row 30 dei langa gi Moses.​—De 34:8.

20-26 SEPTEMBER

GUDU NA INI GADO WORTU | YOSUA 3-5

„Yehovah e blesi den sani di wi e du fu sori taki wi abi bribi”

it-1-O 1335

Yordan-liba

Furu tron a pisi fu a Yordan-liba na a zuidsei fu a Se fu Galilea dipi sowan 1 te go miti 3 meter èn a bradi sowan 27 te go miti 30 meter. Na a bigin fu a yari, a liba disi e moro bradi en a e moro dipi tu, fu di den syoro fu en e sungu (Yos 3:15). Te a watra ben hei, a no ben o de wan koni sani taki den mansma, umasma nanga pikin fu Israel ben o go fu abra a liba disi, spesrutu krosibei fu Yerikow. A watra e lon so tranga drape taki na ini a ten di pasa a tyari sma gowe di ben e swen. Toku na wan wondru fasi Yehovah ben tapu a watra na wan sei fu a liba, so taki den Israelsma ben kan abra a liba na tapu drei gron (Yos 3:14-17). Hondrohondro yari baka dati a srefi sani ben pasa di Elia nanga Elisa ben abra èn bakaten di Elisa wawan ben du dati.​—2Kow 2:7, 8, 13, 14.

4-10 OKTOBER

GUDU NA INI GADO WORTU | YOSUA 8-9

„Sani di wi kan leri fu a tori fu den Gibeonsma”

it-1-O 838

Gibeon

Den Gibeonsma nanga Yosua. Na den Hefietsma ben e libi na ini Gibeon na a ten fu Yosua. Den ben de wan fu den seibi pipel na ini Kanan di ben musu kisi pori (De 7:1, 2; Yos 9:3-7). Sma ben e kari den Gibeonsma, Amorietsma tu. Son leisi den ben e gebroiki a nen disi gi ala den Kanansma (2Sa 21:2; luku Ge 10:15-18; 15:16). Den Gibeonsma no ben de leki den tra Kanansma. Den ben frustan taki awinsi den ben abi wan tranga legre nanga wan bigi foto, dati no ben o man yepi den, fu di na Yehovah ben e feti gi den Israelsma. Dati meki Gibeon makandra nanga den tra foto, Kefira, Berot, nanga Kiriat-Yarim seni sma go na Yosua na Gilgal fu meki freide nanga den, baka di den yere fa den Israelsma pori den foto Yerikow nanga Ai (Yos 9:17). Den man fu Gibeon ben weri owru pritipriti krosi nanga susu, den ben tyari owru winsaka nanga owru brede èn den du leki den ben komoto fu wan farawe kondre. Den ben du tu leki den no ben de sma fu wan fu den foto di Israel ben musu pori. Soleki fa den taki, dan den ben sabi taki na Yehovah ben wini Egepte nanga den Amoriet kownu Sihon nanga Ok. Ma fu di den ben koni meki den no taki fu san ben pasa nanga den foto Yerikow nanga Ai. Fu di den taki dati den e tan „na wan farawe kondre” meki den no ben o man kisi a boskopu dati ete. Den man fu Israel ben ondrosuku a tori èn te fu kaba den meki wan frubontu nanga den fu no kiri den.​—Yos 9:3-15.

Diki moro dipi

it-1-O 937

Anga

A wet di Yehovah ben gi den Israelsma ben e sori taki den ben kan anga son ogrisma na wan postu, baka te den ben kiri en. Disi ben o sori taki „Gado ben fluku” a sma dati èn a ben o de wan warskow gi ala sma. Te den ben anga wan sma, dan den ben musu puru a dedeskin fosi neti tapu èn beri en. Efu den ben libi a dedeskin a heri neti na a postu, dan dati ben o doti a kondre di Yehovah ben gi den Israelsma (De 21:22, 23). Den Israelsma ben e hori densrefi na a wet disi, awinsi a sma di ben dede no ben de wan Israelsma.​—Yos 8:29; 10:26, 27.

11-17 OKTOBER

GUDU NA INI GADO WORTU | YOSUA 10-11

„Yehovah feti gi Israel”

it-1-O 61

Adoni-Seidek

A ben de kownu fu Yerusalem na a ten di Israel ben e teki a Pramisi Kondre abra. Adoni-Seidek ben span anu makandra nanga tra pikin kownukondre na a westsei fu Yordan-liba fu feti teige a legre fu Yosua (Yos 9:1-3). Ma den Hefietsma fu Gibeon ben meki freide nanga Yosua. Fu di Adoni-Seidek no ben wani taki tra nâsi du a srefi sani meki a moksi nanga den legre fu ete fo kownu fu den Amorietsma. Den seti kampu lontu Gibeon fu feti nanga den. A fasi fa Yosua frulusu den Gibeonsma èn a fasi fa a feti nanga den legre disi, meki taki den feifi kownu lowe go na Makeda, èn den go kibri na ini wan bergi-olo. Na Yosua srefi kiri Adoni-Seidek nanga den tra fo kownu leti na fesi den srudati fu den èn a anga den na postu. Bakaten den fringi den dedeskin go baka na ini a olo èn dati tron a grebi fu den.​—Yos 10:1-27.

it-1-O 915

Pisipisi ijs

Yehovah ben gebroiki en. Pisipisi ijs na wan fu den sani fu a natuur di Yehovah gebroiki son leisi fu du san a taki noso fu sori a makti fu en (Ps 148:1, 8; Yes 30:30). A fosi leisi di Bijbel e taki fu a sani disi, na di a di fu seibi rampu ben kon na tapu Egepte. A ben pori bon nanga sani di sma ben prani èn a ben kiri libisma nanga meti. Ma noti no ben pasa nanga den Israelsma na Gosen (Eks 9:18-26; Ps 78:47, 48; 105:32, 33). Bakaten na ini a Pramisi Kondre, di den Israelsma go yepi Gibeon di feifi kownu fu den Amorietsma ben go feti nanga den, dan Yehovah meki bigi pisi ijs fadon na tapu den Amorietsma. Na a okasi disi den pisipisi ijs kiri moro sma leki san den Israelsma srefi kiri.​—Yos 10:3-7, 11.

18-24 OKTOBER

GUDU NA INI GADO WORTU | YOSUA 12-14

„Dini Yehovah nanga yu heri ati”

Diki moro dipi

it-1-O 722

Geibal

„A kondre fu den Geibalsma” ben de wan fu den kontren di Yehovah ben taki dati den Israelsma ben musu teki abra (Yos 13:1-5). Son sma e taki dati disi no kan, fu di a foto Geibal ben de bun fara na a noordsei pisi fu Israel (so wan 100 kilometer na a noordsei fu Dan) èn noiti den Israelsma teki en abra. Son sabiman e taki dati a kan taki wan fowtu meki na a Hebrew vers disi. Den taki, fosi a ben skrifi „a heri kontren sei Libanon,” noso ’teleki a kontren fu den Geibalsma.’ A bun fu hori na prakseri tu taki den pramisi disi fu Yehovah na ini Yosua 13:2-7 ben o kon tru soso te den Israelsma ben e du san a taki. Sobun a kan taki na fu di den Israelsma no ben gi yesi na Yehovah meki noiti den kisi a kondre Geibal.​—Luku Yos 23:12, 13.

25-31 OKTOBER

GUDU NA INI GADO WORTU | YOSUA 15-17

„Kibri a warti gudu fu yu”

it-1-O 991 ¶6

Hebron

Di den Israelsma ben teki a zuidsei pisi fu Kanan abra, den kiri den sma di ben e tan na Hebron nanga a kownu fu den (a kan taki disi ben de a sma di ben de kownu baka Hoham) (Yos 10:36, 37). Yosua nanga den Israelsma ben teki furu kondre abra na ini Kanan, ma a sori leki den no ben poti srudati na ala den presi disi fu luku den. Na wan ten di Israel ben e feti na wan tra pisi fu a kondre, dan a kan taki den Enaksma go libi baka na ini Hebron. Dati meki Kaleb (noso den manpikin fu Yuda nanga Kaleb) ben musu teki a foto abra baka (Yos 11:21-23; 14:12-15; 15:13, 14; Kru 1:10). Aladi na Kaleb fu a lo fu Yuda ben kisi a foto Hebron, toch bakaten a foto disi tron wan loweman-foto di santa èn a tron wan foto fu den priester tu. Ma „den gron di ben de dorosei fu a foto [Hebron]” tan fu Kaleb.​—Yos 14:13, 14; 20:7; 21:9-13.

it-1-O 553

Dwengi sma fu wroko

A sori leki na ini Bijbel ten a ben de wan gewoon sani fu „dwengi sma fu wroko” (Heb., mas). Furu tron den ben e meki sma di den wini tron srafu (De 20:11; Yos 16:10; 17:13; Ese 10:1; Yes 31:8; Sar 1:1). Di den Israelsma ben de leki srafu na ini Egepte, sma ben e dwengi den fu wroko tranga tu. Den ben e basi den èn den ben musu bow den maksin na Pitom nanga Ramses (Eks 1:11-14). Bakaten di den Israelsma go na ini a Pramisi Kondre, den ben musu gi yesi na Yehovah di a taigi den fu puru ala den Kanansma na ini a kondre, fu di den ben musu kiri den. Ma na presi fu dati den meki den tron srafu. A sani disi meki taki den Israelsma go dini falsi gado (Yos 16:10; Kru 1:28; 2:3, 11, 12). Kownu Salomo ben meki den Kanansma tan wroko gi en leki srafu. Dati ben de den Amorietsma, den Hètsma, den Feresietsma, den Hefietsma nanga den Yeibus-sma.​—1Kw 9:20, 21.

it-2-O 30 ¶2

Kanan

Aladi furu Kanansma ben tan na libi èn den no ben gi densrefi abra di den Israelsma ben teki a kondre, toku wi kan taki dati „Yehovah gi den Israelsma a heri kondre di a ben sweri fu gi den afo fu den.” A meki sani „waka bun nanga den,” èn „a du ala den sani di a ben pramisi den Israelsma. Ala den sani disi ben kon tru” (Yos 21:43-45). Den pipel na den lontu ben kon frede èn den no ben de wan trutru kefar gi den. Gado ben taki dati na „safrisafri” a ben o yagi den Kanansma puru fu a kondre so taki ogri meti no ben o kon furu wantronso na ini a kondre (Eks 23:29, 30; De 7:22). Aladi den Kanansma ben abi moro bun fetisani, soleki den fetiwagi di ben abi isri nefi na den wiel èn den Israelsma no ben e du furu muiti fu teki den kondre disi abra, toku disi no ben wani taki dati Yehovah no ben man hori ensrefi na san a ben pramisi (Yos 17:16-18; Kru 4:13). Na presi fu dati, a tori e sori krin taki den Israelsma ben lasi wan tu feti fu di den no ben gi yesi na Yehovah.​—Nu 14:44, 45; Yos 7:1-12.