MWBR21 11 Verwijzing gi Wi Kresten libi nanga a preikiwroko studie-buku

1-7 NOVEMBER

GUDU NA INI GADO WORTU | YOSUA 18-19

„A fasi fa Yehovah ben prati a kondre e sori taki a koni”

it-1-O 881 ¶1

A fasi fa a kondre ben musu prati

Soleki fa a sori, dan den ben e luku tu prenspari sani te den ben e prati a kondre gi den lo na ini Israel. Den ben e iti lòt èn den ben e luku o bigi den lo de. Na a lòt ben e sori sortu pisi fu a kondre wan lo ben o kisi. Efu a ben o de noordsei noso zuidsei, owstusei noso west-sei. Noso efu a ben o de a bergikontren noso na sesyoro. Na Yehovah ben gebroiki a lòt fu sori sortu pisi ibri lo ben o kisi. Dati ben o meki taki den no ben o dyarusu noso meki trobi nanga makandra (Odo 16:33). Na a fasi disi Yehovah ben sorgu taki ibri lo ben kisi wan pisi fu a kondre, soleki fa Yakob ben taki fosi a dede na ini Genesis 49:1-33.

it-1-O 639 ¶3

Gudu

Gron di sma kisi leki gudu. Yehovah ben taigi Moses o bigi a kondre ben de èn na ensrefi ben gi den Israelsma a pisi gron di den ben kisi (Nu 34:1-12; Yos 1:4). Den manpikin fu Gad, Ruben nanga na afu lo fu Manase ben kisi den pisi gron fu den fu Moses (Nu 32:33; Yos 14:3). Bakaten Yosua nanga Eleasar ben iti lòt fu kon sabi sortu pisi den tra lo ben o kisi (Yos 14:1, 2). Soleki fa Yakob ben taki na ini a profeititori fu Genesis 49:5, 7, dan Simeon nanga Leifi no kisi aparti pisi gron leki gudu. Simeon kisi wan pisi kontren fu den sma fu a lo fu Yuda makandra nanga den foto di ben de na ini (Yos 19:1-9). Ma a lo Leifi kisi 48 foto di ben de na ini a heri kondre Israel. Fu di den Leifisma ben o du spesrutu wroko na a santa presi, meki Yehovah ben taki dati en na a gudu fu den. Den ben e kisi a di fu tin pisi fu den sani di den Israelsma ben e tyari gi Yehovah (Nu 18:20, 21; 35:6, 7). Ibri famiri ben e kisi wan pisi gron na ini a kontren fu a lo fu en. Te den famiri ben e kon moro bigi èn den manpikin ben e kisi den pisi, dan a kondre ben e prati na ini moro pikin pisi.

it-1-O 881 ¶2

A fasi fa a kondre ben musu prati

Baka te a lòt ben sori sortu pisi kontren wan lo ben o kisi, dan den ben e luku o bigi a lo de fosi den gi en a pisi kontren dati. „Un musu iti lòt fu prati a kondre na mindri den famiri nanga den lo fu unu. Efu wan lo bigi, dan a musu kisi wan bigi kontren, èn efu wan lo pikin, dan a musu kisi wan pikin kontren. Na a lòt o sori sortu kontren ibri lo o kisi” (Nu 33:54). Na a lòt ben e sori sortu kontren wan lo ben o kisi, ma na a bigi fu a lo ben o sori o bigi a kontren dati ben o de. Disi ben de fu si di a ben kon na krin taki a kontren fu Yuda ben bigi tumusi. Den ben meki en kon moro pikin fu di den ben gi a lo fu Simeon wan pisi fu a kontren dati.​—Yos 19:9.

Diki moro dipi

it-1-O 881 ¶5

A fasi fa a kondre ben musu prati

Soleki fa a sori, dan den ben iti lòt fosi fu kon sabi sortu pisi Yuda (Yos 15:1-63), Yosef (Efrayim) (Yos 16:1-10), nanga na afu lo fu Manase ben o kisi na West-sei fu Yordan-liba (Yos 17:1-13). Baka dati den luku o bigi den kontren disi ben o de èn sortu foto ben de na ini. A sori leki den ben tapu fu teki a kondre abra fu wan pisi ten, fu di a tori e sori taki den Israelsma ben froisi a kampu fu den fu Gilgal go na Silo (Yos 14:6; 18:1). A tori no e sori o langa den ben tapu fu du disi, ma te fu kaba Yosua ben piri-ai gi den seibi lo, fu di den ben draidrai fu teki den tra pisi fu a kondre abra (Yos 18:2, 3). Sma e taki difrenti sani fu san ede den seibi lo ben draidrai. Son sabiman e taki dati den Israelsma ben feni furu gudu di den ben teki den kontren disi abra èn den no ben si leki den Kanansma ben o kon feti nanga den. Disi ben meki taki den no ben si en leki wan prenspari sani fu teki a tra pisi fu a kondre abra wantewante. A kan tu taki na fu di den ben abi wan tu tranga feanti ete, meki den ben e draidrai (Yos 13:1-7). Ma a kan tu taki den no ben sabi a pisi disi fu a Pramisi Kondre so bun ete.

8-14 NOVEMBER

GUDU NA INI GADO WORTU | YOSUA 20-22

Diki moro dipi

it-2-O 30 ¶2

Kanan

Aladi furu Kanansma ben tan na libi èn no ben gi densrefi abra di den Israelsma ben e teki a kondre, toku wi kan taki dati „Yehovah gi den Israelsma a heri kondre di a ben sweri fu gi den afo fu den.” A meki „sani waka bun nanga den” èn „a du ala den sani di a ben pramisi den Israelsma. Ala den sani disi ben kon tru.” (Yos 21:43-45) Den pipel na den lontu ben kon frede èn den no ben de wan trutru kefar gi den. Gado ben taki dati na „safrisafri” a ben o yagi den Kanansma puru fu a kondre, so taki ogri meti no ben o kon furu wantronso na ini a kondre (Eks 23:29, 30; De 7:22). Aladi den Kanansma ben abi moro bun fetisani, soleki den fetiwagi di ben abi isri nefi na den wiel èn den Israelsma no ben e du nofo muiti fu teki den kondre disi abra, toku disi no ben wani taki dati Yehovah no ben man hori ensrefi na san a ben pramisi (Yos 17:16-18; Kru 4:13). Na presi fu dati a tori e sori krin taki den Israelsma lasi wan tu feti fu di den no ben e gi yesi na Yehovah.​—Nu 14:44, 45; Yos 7:1-12.

15-21 NOVEMBER

GUDU NA INI GADO WORTU | YOSUA 23-24

„Den lasti rai di Yosua gi a pipel”

it-2-O 1089

Frubontu

Sani ben de tra fasi di a nâsi Israel ben go na ini a Pramisi Kondre. Yehovah Gado du san a ben pramisi den afo fu den, fu di a gi den a heri kondre. Fu dati ede den no ben e libi na ini a kondre leki trakondre sma, èn Yehovah ben taigi den fu no meki kruderi nanga den trakondre sma (Eks 23:31-33; 34:11-16). Den ben musu saka densrefi soso na ondro den wet fu Yehovah. Den no ben musu gi yesi na den wet fu den tra nâsi di den ben puru na ini a kondre (Le 18:3, 4; 20:22-24). Yehovah ben warskow den spesrutu fu no trow nanga den sma disi. Efu den ben o du dati, den ben o moksi nanga heiden uma nanga den famiri fu den. A sani disi ben o meki taki den go dini den gado fu den èn den ben o teki den gwenti fu den abra. Na so den ben o drai gowe libi Yehovah.​—De 7:2-4; Eks 34:16; Yos 23:12, 13.

13-19 DECEMBER

GUDU NA INI GADO WORTU | KRUTUMAN 8-9

Diki moro dipi

it-1-O 586 ¶1

Fesikoki, I

Aladi Gideon ben abi na prakseri fu gi Yehovah grani fu a feti di a ben meki den Israelsma wini, toku a fesikoki ben „tron wan tesi gi Gideon nanga en osofamiri” fu di ala den Israelsma gowe libi a tru Gado fu go anbegi a fesikoki (Kru 8:27). Bijbel no e taki dati Gideon srefi ben e anbegi a fesikoki. Na presi fu dati Paulus e kari en nen na ini a grupu fu getrow sma di de leki wan „bigi wolku” di ben e dini Yehovah na ini owruten.​—Heb 11:32; 12:1.

20-26 DECEMBER

GUDU NA INI GADO WORTU | KRUTUMAN 10-12

„Yefta ben poti ala en prakseri na Yehovah”

it-1-O 1210 ¶2

Yefta

Yefta ben de fayafaya. Di a tron fesiman a bigin du sani wantewante. A seni wan boskopu gi a kownu fu Amon, fu taigi en taki na en ben hari kon na ini a kondre fu Israel. A kownu piki en taki a du dati fu di na Israel ben teki a kondre fu den abra (Kru 11:12, 13). Den sani di Yefta taki baka dati e sori taki a no ben de wan srudati di de nomonomo fu feti. Ma a ben sabi bun fa sani ben waka na ini a ten di pasa, spestrutu a fasi fa Yehovah ben du sani gi en pipel. A sori a kownu fu Amon taki a no abi leti, fu di (1) Israel no ben go fruferi den Amonsma, den Moabsma nanga den Edomsma (Kru 11:14-18; De 2:9, 19, 37; 2Kr 20:10, 11); (2) taki na a ten di den ben teki a pisi kondre dati abra a no ben de fu Amon, ma a ben de fu den Amorietsma èn Gado ben meki Israel wini a nâsi disi nanga Sihon, a kownu fu den; (3) na ini den 300 yari di ben pasa, noiti Amon ben meki trobi nanga den fu a kontren disi. Sortu reide den ben abi now fu taki dati a kondre na fu den?​—Kru 11:19-27.

it-1-O 1210 ¶3

Yefta

Yefta ben tyari a tori disi finifini kon na krin, di a sori taki a sani disi ben abi fu du nanga na anbegi. A ben taki dati na Yehovah Gado ben gi den Israelsma a kondre, èn fu dati ede den no ben o gi den Amonsma nowan pisi fu a kondre fu dini den falsi gado fu den. A ben taki dati Kamos na a gado fu den Amonsma. Son sma e taki dati na wan fowtu a meki. Ma aladi den Amonsma ben e anbegi Milkom, èn den Moabsma ben e anbegi Kamos, toku a sani di a taki no fowtu, fu di den nâsi disi di ben de famiri fu makandra, ben e anbegi furu gado. Fu di Salomo ben abi trakondre uma, meki a ben tyari na anbegi fu Kamos kon na ini Israel srefi (Kru 11:24; 1Kw 11:1, 7, 8, 33; 2Kw 23:13). Boiti dati, son sabiman e taki dati a nen „Kamos” wani taki „Winiman”. (Luku Gesenius’s Hebrew and Chaldee Lexicon di S. Tregelles vertaal, 1901, blz. 401.). A kan taki Yefta ben taki fu a gado disi fu di den Amonsma ben e taki dati na en ben meki den ’wini’ den tra nâsi èn ben teki den kondre fu den abra.

Diki moro dipi

it-1-O 1209

Yefta

Yefta papa nanga en mama ben trow. A mama fu Yefta ben de „wan huru-uman,” ma dati no wani taki dati en mama no ben de a wefi fu en papa. En mama ben de wan huru-uma fosi a trow leki a di fu tu wefi fu Gilead, neleki fa Rakab di ben de wan huru-uma fosi, ben tron a wefi fu Salmon (Kru 11:1; Yos 2:1; Mt 1:5). Wi kan taki dati Yefta papa nanga en mama ben trow fu di den afu brada fu en ben yagi en, den no ben wani a kisi afu fu a gudu fu en papa (Kru 11:2). Bakaten den poti Yefta leki fesiman fu den man fu Gilead (sosrefi den afu brada fu en di ben de prenspari sma ini a grupu disi.) (Kru 11:11). Ma Yefta ben e tyari ofrandi gi Gado tu na ini a tabernakel (Kru 11:30, 31). A no ben o man du ala den sani disi efu en papa nanga mama no ben trow. A wet ben e taki krin: „Efu wan man meki wan manpikin nanga wan uma di no de en wefi, dan a manpikin dati no musu de na mindri a pipel fu Yehovah. Nowan fu den bakapikin fu en musu de na mindri a pipel fu Yehovah.”​—De 23:2.