Verwijzing gi Wi Kresten libi nanga a preikiwroko studie-buku

10-16 YANUARI

GUDU NA INI GADO WORTU | KRUTUMAN 17-19

„Wi o kisi problema te wi no e hori wisrefi na den wet fu Gado”

it-2-O 312-313

Mika

1. Wan man fu Efrayim. Mika no ben hori ensrefi na a di fu aiti komando di Yehovah ben gi Moses (Eks 20:15). A ben fufuru 1100 pisi solfru fu en mama. Bakaten, a taki dati na en teki den èn a tyari a solfru go baka. Dan en mama taigi en: „Mi musu meki a solfru kon tron wan santa sani gi Yehovah, so taki a fluku kan komoto na tapu mi manpikin. Mi o teki a solfru fu meki tu popki. Dan now mi o gi yu a solfru baka.” A tyari 200 pisi fu a solfru go na wan solfrusmeti. Ne a solfrusmeti teki afu fu a solfru „dan a koti wan popki puru na ini a solfru. A smèlter a tra afu fu meki a tra popki.” Baka dati den poti den ini a oso fu Mika. Mika ben abi wan „gado-oso.” A meki wan fesikoki nanga wan terafim-popki, ne a poti wan manpikin fu en fu wroko leki priester gi en. A kan taki a ben du disi fu di a ben wani gi Yehovah grani. Ma a sani disi ben de afkodrei, wan sani di Yehovah ben taki dati den no ben musu du kwetikweti (Eks 20:4-6). Boiti dati, den sani di a du e sori taki a no ben hori ensrefi na a seti fu a tabernakel fu Yehovah nanga den priester di a ben poti (Kru 17:1-6; De 12:1-14). Bakaten, Mika yuru Yonatan, di ben de wan bakapikin fu Gersom (a manpikin fu Moses) fu wroko gi en leki priester (Kru 18:4, 30). Mika ben prakseri taki a du wan bun sani, aladi dati no ben de so. A ben taki: „Now mi sabi taki Yehovah o blesi mi” (Kru 17:7-13). Ma Yonatan no ben de wan bakapikin fu Aron èn a no ben abi a reti fu wroko leki priester. A sani disi ben meki taki den sondu fu Mika kon moro bigi.​—Nu 3:10.

it-2-O 313 ¶2

Mika

Syatu baka dati, Mika nanga wan grupu man hari go baka den man fu Dan. Di Mika miti den, den aksi en san pasa. Ne Mika taki: „Un teki den gado di mi meki èn un teki a priester fu mi tyari gowe. Mi no abi noti moro.” Den man fu Dan taigi en taki den o feti nanga en efu a kon na den baka èn tan krutukrutu. Di Mika si taki den man fu Dan ben tranga moro en, dan en nanga den man fu en drai go baka na oso (Kru 18:22-26). Baka dati den man fu Dan go feti nanga Lais, den bron en èn den bow a foto Dan na a srefi presi drape. Yonatan nanga den boi fu en ben e wroko now leki priester gi den sma fu Dan. „A heri pisi ten di na oso fu a tru Gado ben de na Silo, den sma fu a lo fu Dan ben libi a popki di Mika meki, na ini a oso drape.”​—Kru 18:27-31.

21-27 FEBRUARI

GUDU NA INI GADO WORTU | 1 SAMUEL 6-8

„Suma na yu kownu?”

it-2-O 91 ¶2

A Kownukondre fu Gado

Den aksi fu kisi wan kownu. Sowan 400 yari baka di den Israelsma komoto na ini Egepte èn moro leki 800 yari baka di Gado ben meki wan frubontu nanga Abraham nanga Yakob, den aksi fu kisi wan kownu di ben o tiri den neleki fa den tra pipel na den lontu ben abi dati. A sani di den aksi ben e sori taki den no ben wani Yehovah leki kownu moro (1Sa 8:4-8). A tru taki a pipel ben e fruwakti fu kisi wan kownu, fu di Gado ben pramisi Abraham nanga Yakob a sani disi. Boiti dati, den ben e fruwakti en tu fu di Yakob ben taki fu disi di a ben taki fu Yuda na ini wan profeititori fosi a dede (Ge 49:8-10). Den ben e fruwakti a kownu disi tu, fu di Yehovah ben pramisi den disi di den komoto ini Egepte (Eks 19:3-6), fu di a wet frubontu ben e taki fu disi (De 17:14, 15), èn fu di Gado srefi ben meki a profeiti Bileam taki fu en (Nu 24:2-7, 17). Boiti dati Hana, a mama fu Samuel, di ben abi wan tranga bribi ben taki fu a howpu dati tu na ini a begi fu en (1Sa 2:7-10). Ma Yehovah srefi no ben tyari finifini kon na krin ete fa a “santa kibritori” disi di abi fu du nanga a Kownukondre ben o kon tru. A no ben taki o ten a Kownukondre disi ben o seti noso fa a ben o de​—efu a ben o de na grontapu noso na hemel. Fu dati ede den Israelsma no ben abi a reti na a ten dati fu aksi nomonomo fu kisi wan kownu.

28 FEBRUARI–6 MAART

GUDU NA INI GADO WORTU | 1 SAMUEL 9-11

„Na ini a bigin Saul ben abi sakafasi”

w95-O 15/12 10 ¶1

Den Amonsma​—Wan pipel di no ben sori warderi gi a bun-ati fu Yehovah

A ben pasa baka taki den Amonsma no ben sori warderi gi a bun-ati di Yehovah sori den. Den ben sori taki den na feanti fu Gado pipel. Yehovah no ben lobi a sani disi srefisrefi. „Di Saul yere san den sma taki, dan a yeye fu Gado kon na en tapu, èn a kisi bigi ati-bron.” A yeye fu Gado meki taki Saul seti wan legre fu 330.000 fetiman, ne den go feti nanga den Amonsma. ’Ibriwan fu den di ben tan abra lon gowe en wawan.’​—1 Samuel 11:6, 11.