Verwijzing gi Wi Kresten libi nanga a preikiwroko studie-buku

14-20 MAART

GUDU NA INI GADO WORTU | 1 SAMUEL 14-15

„A moro bun fu gi yesi leki fu tyari ofrandi”

it-1-O 766 ¶3

Gi yesi

A prenspari srefisrefi fu gi yesi. Gado no lobi sma di no e gi yesi. Samuel ben taigi Kownu Saul: „Yu denki taki bron-ofrandi nanga tra ofrandi e plisi Yehovah moro leki te sma e gi yesi [noso sha·maʽʹ] na Yehovah? Luku, a moro bun fu gi yesi leki fu tyari ofrandi èn a moro bun fu arki leki fu bron a fatu fu manskapu” (1Sa 15:22). Te wan sma no e gi yesi, dan a no e du san a wortu fu Yehovah taki. Disi e sori taki a no e frutrow èn a no e bribi den wortu dati, nanga a Sma fu pe den wortu dati komoto. Dati meki wan sma di no e gi yesi de a srefi leki wan sma di e du lukuman-wroko noso di e du afkodrei. (1Sa 15:23; luku sosrefi Ro 6:16.) Te wan sma e taki nomo dati a o du wan sani ma a no e du en, dan a sani di a taki no abi waarde. Efu a no e du wan sani, dan disi e sori taki a no e bribi noso lespeki a sma di gi en rai (Mt 21:28-32). Efu wan sma de tevrede nomo nanga den sani di a yere fu Gado Wortu, a frustan den, ma a no e du den, dan a e kori ensrefi nanga prakseri di no tru èn a no o kisi blesi (Yak 1:22-25). A manpikin fu Gado ben sori krin tu taki srefi den sma di e taki dati den e du san a Wortu fu Gado e taki, ma den e du disi na wan fowtu fasi noso nanga takru prakseri, no o kisi a Kownukondre fu Gado. A no o feni den bun kwetikweti.​—Mt 7:15-23.

Diki moro dipi

it-2-O 276

Sari-ati

Efu wan sma ben o meki trawan dwengi en fu sori sari-ati na wan ten di Yehovah no wani, dan dati kan tyari takru bakapisi kon. Na disi ben pasa nanga Kownu Saul. A ten ben doro taki Israelsma ben musu pori den Amalèksma soleki fa Yehovah ben taigi den. Na den sma disi ben de a fosi pipel di ben wani hari go feti nanga den Israelsma baka di den komoto na Egepte. Saul ben kisi a komando fu no sori sari-ati gi den Amalèksma. Ma a meki den srudati fu en dwengi en fu no du ala san Yehovah taki. Dati meki Yehovah no ben wani en leki kownu moro (1Sa 15:2-24). Wan sma di abi warderi gi a fasi fa Yehovah e du sani èn e tai hori na Yehovah moro leki iniwan tra sma, no o meki den srefi fowtu leki Saul so taki Gado no feni en bun moro.

21-27 MAART

GUDU NA INI GADO WORTU | 1 SAMUEL 16-17

Diki moro dipi

it-2-O 814

Saul

A yeye fu Yehovah gowe libi Saul baka di den sani disi pasa èn baka di Yehovah salfu David leki a sma di ben o tron kownu. Ne ’wan takru yeye di ben komoto fu Yehovah bigin kwinsi en.’ Fu di a yeye fu Yehovah gowe libi Saul, meki a ben gi pasi taki wan takru yeye di ben kon fu Yehovah bigin trobi en. A yeye disi ben abi krakti tapu den firi fu en, en prakseri, a fasi fa a ben e si sani èn a no ben abi wan korostu firi moro. Saul no ben gi yesi na Yehovah. Disi ben e sori taki en ati nanga den sani di a ben e prakseri no ben bun. Èn a yeye fu Yehovah no ben o tapu noso kibri en gi den prakseri dati. Fu di na Yehovah ben gi pasi taki a „takru yeye” disi bigin trobi Saul baka di en (Yehovah) yeye gowe libi en, meki wi kan taki dati a „takru yeye ben kon fu Yehovah.” Dati meki den futuboi fu Saul ben taki dati na wan „takru yeye fu Gado.” Wan fu den dinari fu Saul ben taigi en fu meki David wroko gi en leki pokuman. Te David ben e prei a harpu, dan a „takru yeye” ben e komoto na tapu Saul èn a ben e firi bun baka.​—1Sa 16:14-23; 17:15.

28 MAART–3 APRIL

GUDU NA INI GADO WORTU | 1 SAMUEL 18-19

Diki moro dipi

it-2-O 651

Profeiti

Aladi na a yeye fu Yehovah srefi ben e poti sma leki profeiti, toku a no de so taki na doronomo den ben e taki profeititori. Furu leisi a yeye fu Yehovah ben e kon na den tapu na wan spesrutu ten èn a ben e sori den san den ben musu taki (Ese 11:4, 5; Mik 3:8). A sani disi ben abi furu krakti na den tapu, èn a ben e pusu den fu taki (1Sa 10:10; Yer 20:9; Am 3:8). Den no ben e du bigi sani nomo, ma a fasi fa den ben e du den sani dati nanga a fasi fa den ben e tyari densrefi, ben e sori fa den ben e firi. A sani disi e meki wi frustan pikinso san a wani taki dati son sma ben e „tyari densrefi leki profeiti.” (1Sa 10:6-11; 19:20-24; Yer 29:24-32; luku sosrefi Tori 2:4, 12-17; 6:15; 7:55.) Fu di den ben abi deki-ati, den ben de fayafaya èn den ben e poti ala den prakseri tapu a wroko fu den, meki den sani di den ben e du ben kan skreki tra sma. Son leisi sma ben kan denki taki den ede no e wroko bun. Na dati wan tu legre-edeman ben prakseri fu a profeiti di ben kon salfu Yehu. Ma baka di den kon frustan taki a man ben de wan profeiti, den ben si a boskopu leki wan seryusu sani. (2Kw 9:1-13; luku sosrefi Tori 26:24, 25.) Wan leisi di Saul ben e suku David, a bigin ’tyari ensrefi leki wan profeiti,’ a puru en krosi na en skin èn a tan didon na gron „a heri dei èn a heri neti.” Kande disi ben meki taki David ben man lowe (1Sa 19:18–20:1). A sani disi no wani taki dati den profeiti ben abi a gwenti fu waka sososkin, fu di Bijbel no e taki dati. Na ini tu tra situwâsi den profeiti ben waka sososkin, fu di den ben musu tyari sani fu a profeititori fu den kon na krin na a fasi dati (Yes 20:2-4; Mik 1:8-11). A kan taki di Saul ben puru en kownu krosi èn de sososkin, dan disi ben e sori taki en na wan gewoon sma nomo èn taki a no ben abi makti te yu teki en gersi nanga a makti di Yehovah abi leki kownu. A kan de fu wan tra reide tu, ma Bijbel no e taki fu dati.