Verwijzing gi Wi Kresten libi nanga a preikiwroko studie-buku
2-8 MEI
GUDU NA INI GADO WORTU | 1 SAMUEL 27-29
„A fasi fa David ben e feti”
it-1-O 51
Akes
Na tu leisi David ben go kibri na ini a kontren fu Kownu Akes di Saul ben e suku en. A fosi leisi di disi pasa, na di sma ben si en leki wan feanti. Den tyari en go na Akes, ma David ben du leki a law. Dati meki Akes seni en gowe (1Sa 21:10-15; Ps 34:Ede; 56:Ede). A di fu tu leisi, na di David ben de nanga 600 fetiman nanga den famiri fu den, ne Akes gi den wan presi fu tan na ini Siklak. Den tan drape wan yari nanga fo mun, èn Akes ben denki taki a heri pisi ten dati David nanga den man fu en ben e go feti nanga den foto na ini Yudea. Ma na presi fu dati, David ben e go feti nanga den Geisursma, den Girsietsma nanga den Amalèksma (1Sa 27:1-12). David ben e kori Akes, ma Akes ben e frutrow en so te taki di den Filisteasma ben e go feti nanga Kownu Saul, a poti David leki en eigi srudati. Ma syatu fosi den go na a feti, David nanga den man fu en ben musu drai go baka na Siklak, fu di „den Filistea kownu” ben de nomonomo fu seni den gowe (1Sa 28:2; 29:1-11). A sori leki David no kiri Akes baka di a tron kownu èn di a go feti nanga Gat. Akes ben de na libi ete di Salomo ben e tiri.—1Kw 2:39-41; luku GATH.
it-2-O 178 ¶7
Lei
Bijbel e sori wi krin taki wi no musu lei. Ma disi no wani taki dati wi fruplekti fu taigi ala sma ala sani, spesrutu efu a sma no abi a reti fu kon sabi a sani dati. Yesus Krestes ben gi wi a rai disi: „No gi den dagu santa sani èn no trowe den peri gi den agu, noso den o masi den peri nanga den futu èn den o drai kon baka fu priti unu na pisipisi” (Mt 7:6). Dati meki son leisi Yesus no ben e gi krin piki tapu aksi di sma ben e poti gi en, noso a no ben e taigi den ala sani te a ben si taki disi ben kan tyari problema kon (Mt 15:1-6; 21:23-27; Yoh 7:3-10). Na a sani disi Abraham, Isak, Rakab nanga Elisa ben du tu nanga sma di no ben e dini Yehovah, di den kori den noso di den no taigi den fa sani de trutru.—Ge 12:10-19; kap 20; 26:1-10; Yos 2:1-6; Yak 2:25; 2Kw 6:11-23.
Diki moro dipi
w10-O 1/1 20 ¶5-6
Den dedewan man yepi den wan di de na libi?
Prakseri a sani disi. Bijbel e taki dati te wan sma dede „a e drai go baka na a doti fu gron” èn taki „den prakseri fu en e lasi gowe” (Psalm 146:4). Saul nanga Samuel ben sabi taki Gado e tegu gi sma di e go na lukuman. Na fu a sani disi ede Saul ben puru ala den lukuman nanga bonuman na ini a kondre.—Lefitikus 19:31.
Denki a tori: Efu a getrow futuboi Samuel ben e libi ete leki wan yeye, a ben o trangayesi a wet fu Gado èn wroko makandra nanga wan lukuman so taki a ben kan taki nanga Saul? Yehovah no ben wani taki moro nanga Saul. Yu denki taki wan lukuman ben o man dwengi na Almaktiwan Gado fu taki nanga Saul nanga yepi fu a dede profeiti Samuel? Nôno. A de krin taki a „Samuel” di kari na ini a tekst disi no ben de a getrow profeiti fu Gado. A ben de wan ogri yeye di ben e du leki en na Samuel.
16-22 MEI
GUDU NA INI GADO WORTU | 2 SAMUEL 1-3
„San wi e leri fu ’A bo’?”
Diki moro dipi
it-1-O 387 ¶2
Brada
Den e gebroiki a wortu „brada” tu gi sma di abi den srefi marki noso di e du den srefi sani. Fu eksempre, Kownu Hiram fu Tirus ben kari Kownu Salomo en brada, fu di den ala tu ben o kisi wini te den ben o wroko makandra fu sreka udu nanga tra sani fu bow a tempel. A no ben taki en nomo soso fu di den ala tu ben de kownu (1Kw 9:13; 5:1-12). David ben skrifi: „Luku o bun èn o switi a de te brada e libi makandra leki wán famiri!” Nanga den wortu disi a ben sori taki freide nanga wánfasi na mindri trutru brada no e kon soso fu di den na famiri fu makandra (Ps 133:1). Na fu di David nanga Yonatan ben lobi makandra èn fu di den ben lobi den srefi sani, meki David ben kari Yonatan en brada, aladi den no ben abi a srefi papa nanga mama (2Sa 1:26). Nanga reti wi kan taki dati mati di lobi den srefi sani èn di abi den srefi maniri na brada fu makandra, awinsi na ogri den e du.—Odo 18:9.
23-29 MEI
GUDU NA INI GADO WORTU | 2 SAMUEL 4-6
„Lespeki Yehovah—No du sani di a no lobi”
Diki moro dipi
w96-O 1/4 29 ¶1
Trowe yu hebi tapu Yehovah ala ten
Leki kownu, David ben abi fu tyari frantwortu fu a sani disi tu. A fasi fa a du sani e sori taki, srefi den wan di abi wan bun matifasi nanga Yehovah kan handri na wan fowtu fasi te wan sari sani pasa. Na a fosi presi, David ben ati bron. Baka dati a kon frede (2 Samuel 6:8, 9). Disi ben de wan tesi di ben o sori efu a e tan frutrow tapu en mati Yehovah. A sori leki a no ben trowe ala en hebi tapu Yehovah na ini a situwâsi disi, fu di a no ben hori ensrefi na den komando fu Yehovah. A sani disi kan pasa nanga wi tu? Wi ati e bron son leisi tapu Yehovah te wi kisi problema fu di wi no du sani leki fa a wani?—Odo 19:3.
30 MEI–5 YUNI
GUDU NA INI GADO WORTU | 2 SAMUEL 7-8
„Yehovah meki wan frubontu nanga David”
Diki moro dipi
it-2-O 140 ¶3
Lasti dei
A profeititori fu Bileam. Fosi den Israelsma go na ini a Pramisi Kondre, a profeiti Bileam taigi Kownu Balak fu Moab: „Kon meki mi fruteri yu san a pipel disi [Israel] o du nanga yu pipel na ini den lasti dei . . . Wan stari sa komopo fu Yakob, èn wan kownutiki sa komopo na ini Israel. A o masi Moab na en sei-ede èn a o broko den edekrabasi fu ala den manpikin di e go na feti” (Nu 24:14-17). Na Kownu David ben de a „stari” a fosi leisi di a profeititori disi kon tru. En ben de a sma di ben wini Moab (2Sa 8:2). A sori leki di David tron kownu, a profeititori disi fu „a kaba fu den lasti dei” bigin kon tru. Fu di David e prenki Yesus leki a Mesias Kownu, meki a profeititori disi o kon tru tu te Yesus wini den feanti fu en.—Yes 9:7; Ps 2:8, 9.
6-12 YUNI
GUDU NA INI GADO WORTU | 2 SAMUEL 9-10
„David sori trutru lobi”
Diki moro dipi
it-1-O 215
Barba
Den Israelsma nanga furu pipel na ini owruten, ben e si a barba leki wan prenspari sani gi mansma. A wèt di Gado ben gi den Israelsma ben e taki dati den no ben musu koti a wiwiri na den „sei-ede,” so bun a wiwiri di e gro mindri den yesi nanga den ai èn den no ben mag skeer a lanki fu den barba (Le 19:27; 21:5). Seiker den no ben mag du disi fu di a gwenti disi ben abi fu du nanga falsi anbegi.
13-19 YUNI
GUDU NA INI GADO WORTU | 2 SAMUEL 11-12
„No meki takru lostu basi yu”
Diki moro dipi
it-1-O 480 ¶5
David
Ma Yehovah ben si na ogri di David du èn a tyari a heri tori kon na krin. Efu Yehovah ben meki libisma krutu a tori fu David nanga Batseiba soleki fa a wèt fu Moses ben e taki, dan den ala tu ben musu dede. Èn fu di Batseiba ben kon de nanga bere, meki a pikin dati ben o dede tu (De 5:18; 22:22). Ma Yehovah srefi krutu a tori èn a sori sari-ati gi David, fu di a ben meki a Kownukondre frubontu nanga en (2Sa 7:11-16). A du disi tu fu di David ben sori sari-ati gi tra sma (1Sa 24:4-7; luku sosrefi Yak 2:13) èn David nanga Batseiba ben sori berow tu (Ps 51:1-4). Toku den kisi strafu. Yehovah ben meki Natan taigi David: „Mi o meki ogri miti yu. Sma fu yu eigi osofamiri o tyari na ogri disi kon.”—2Sa 12:1-12.
20-26 YUNI
GUDU NA INI GADO WORTU | 2 SAMUEL 13-14
„Amnon denki ensrefi nomo èn dati tyari problema kon”
it-1-O 43
Absalom
Sma kiri Amnon. Fu di a sisa fu Absalom Tamar ben moi srefisrefi, meki en afu brada Amnon ben kisi lobi firi gi en. Amnon du leki a siki èn a aksi fu meki Tamar kon na en oso fu bori gi en. Ne a dwengi Tamar fu didon nanga en. Baka dati Amnon kisi sowan bita-ati gi Tamar taki a no ben wani si en moro srefisrefi, èn a meki sma poti en na strati. Tamar priti a langa strepistrepi dyakti fu en, di den umapikin fu kownu ben e weri fu sori taki den no didon nanga man ete. A poti asisi na tapu en ede èn na so Absalom kon miti en. Absalom frustan wantewante san ben pasa èn a sani di a taki syatu baka dati e sori taki a ben si taki en afu brada Amnon ben abi takru prakseri. Absalom taigi en sisa fu no taki fu a tori moro èn a teki en na ini en eigi oso.—2Sa 13:1-20.
it-1-O 44 ¶1
Absalom
Tu yari baka dati, di a ten doro di sma e koti a wiwiri fu den skapu, Absalom orga sani fu hori wan fesa na Bâal-Hasor di de sowan 22 km na noordnoord-oostsei fu Yerusalem. A kari David nanga den manpikin fu kownu fu kon tu. Ma en papa no ben wani go, dati meki a aksi David fu meki Amnon, a fosi manpikin fu en, fu go na en presi (Odo 10:18). Di Amnon „kon drungu,” Absalom taigi den futuboi fu en fu kiri en. Den tra manpikin fu David drai go baka na Yerusalem. Absalom lowe go na en granpapa, wan man fu Siria, di ben e tan na Geisur di de na a oostsei fu a Se fu Galilea (2Sa 13:23-38). A profeiti Natan ben taki dati, fu alaten sma na ini na „osofamiri” fu David ben o dede „na wan ogri-atifasi.” Èn na dati ben bigin pasa.—2Sa 12:10.
Diki moro dipi
g04-O 22/12 8-9
A moi di moro prenspari
Ma Absalom wan fu den manpikin fu David ben de tra fasi. A ben moi srefisrefi èn a ben e hari sma prakseri. Ma a no ben abi bunfasi. Bijbel e taki: „Na ini heri Israel nowan man ben moi so leki Absalom. Ala sma ben e taki fa a moi. Fu en futu te go miti en ede, noti no ben e mankeri en” (2 Samuel 14:25). Ma a bigifasi fu en meki taki a opo ensrefi teige en papa èn a suku fu tron kownu na en presi. A go didon srefi nanga den uma fu en papa. A bakapisi ben de taki Yehovah ati bron nanga en èn a dede na wan ogri-ati fasi.—2 Samuel 15:10-14; 16:13-22; 17:14; 18:9, 15.
Yu ben o wani de wan mati fu Absalom? Kwetikweti. A no ben de wan bun sma, a ben abi bigifasi èn a no ben e tai hori na trawan. A moi fu en no ben man tapu den fasi disi èn a no ben man kibri en fu no kisi pori tu. Ma Bijbel abi eksempre tu fu sma di ben koni èn di ben abi bunfasi, aladi a no e taki efu den ben moi. A de krin taki na a bunfasi di den ben abi ben moro prenspari.
27 YUNI–3 YULI
GUDU NA INI GADO WORTU | 2 SAMUEL 15-17
„Heimemre meki taki Absalom opo ensrefi”
it-2-O 1194
Man di ben e lon
Na ini den kondre na Oostsei a ben de a gwenti taki sma ben e lon fesi den asiwagi fu wan kownu. Den ben e du disi fu sori sma taki a kownu e kon èn fu du sani gi en te dati de fanowdu (1Sa 8:11). Absalom nanga Adonia ben meki 50 srudati lon na fesi den asiwagi fu den fu meki a gersi leki den du sani leki fa a wet e taki.—2Sa 15:1; 1Kw 1:5; luku HARDLOPERS.
it-1-O 992
Hebron
Wan tu yari baka dati, Absalom a manpikin fu David drai go baka na Hebron èn a suku fu puru en papa leki kownu èn fu teki en presi. Ma a no ben man du dati (2Sa 15:7-10). A kan taki Absalom go na Hebron fu du a sani disi fu di a foto disi ben de a mama foto fu Yuda fosi. A kan tu taki na fu di Hebron ben de wan prenspari foto, te yu luku a historia fu en èn na drape Absalom ben gebore. Bakaten, Kownu Rehabeyam, wan granpikin fu David bow Hebron baka (2Kr 11:5-10). Baka di Babilon tyari den sma fu Yuda gowe leki katiboman èn di den drai kon baka, son Dyu go tan na Hebron (Kiriat-Arba).—Ne 11:25.