Verwijzing gi Wi Kresten libi nanga a preikiwroko studie-buku
19-25 SEPTEMBER
GUDU NA INI GADO WORTU | 1 KOWNU 13-14
„Fu san ede wi musu de tevrede èn abi sakafasi?”
Diki moro dipi
w10-O 1/7 29 ¶5
A e suku a bun na ini sma
Den wortu fu 1 Kownu 14:13 e leri wi wan moi sani fu Yehovah èn san a e suku na ini wi. Memre taki Yehovah ben „si wan bun sani na ini” Abia. Soleki fa a sori, dan Yehovah suku na ini Abia en ati teleki a feni wan bun sani na ini en. Wan sabiman taki dati te yu luku Abia nanga den ogri-ati famiriman fu en, dan Abia ben de leki wan parel „na mindri wan ipi ston.” Yehovah no frigiti den bun fasi fu Abia èn a sori sari-ati gi en aladi a ben de fu wan ogri-ati famiri.
26 SEPTEMBER–2 OKTOBER
GUDU NA INI GADO WORTU | 1 KOWNU 15-16
„Yu e sori deki-ati leki Asa?”
it-1-O 175
Asa
Son leisi Asa no ben handri nanga koni èn a no ala ten a ben si sani soleki fa Yehovah e si den. Ma fu di Asa ben abi bun fasi èn fu di a no drai baka gi a tru anbegi, meki Bijbel e taki dati a ben de wan fu den kownu fu Yuda di ben dini Yehovah nanga den heri ati (2Kr 15:17). Asa ben tiri 41 yari na ini Yuda. Na a ten dati, aiti difrenti kownu ben tiri a noordsei kownukondre fu Israel. Dati ben de Yerobeyam, Nadab, Bayesa, Ela, Simri, Omri, Tibni (di ben tiri wan pisi fu a noordsei fu Israel aladi Omri ben tiri wan tra pisi), nanga Akab (1Kw 15:9, 25, 33; 16:8, 15, 16, 21, 23, 29). Di Asa dede, dan en manpikin Yosafat bigin tiri leki kownu.—1Kw 15:24.
17-23 OKTOBER
GUDU NA INI GADO WORTU | 1 KOWNU 21-22
„Teki na eksempre fu Yehovah te yu e gebroiki yu makti”
it-1-O 1231
Yehovah di e tiri den legre
Di Yosua si wan engel krosibei fu Yerikow, dan a aksi en efu a ben de na a sei fu Israel noso na a sei fu den feanti. Na engel piki en: „Mi kon dya leki wan edeman fu a legre fu Yehovah” (Yos 5:13-15). A profeiti Mikaya ben taigi Kownu Akab nanga Yosafat taki: „Mi si Yehovah e sidon na tapu en kownusturu èn a heri legre fu hemel ben e tanapu na en reti-anusei èn na en kruktu-anusei” (1Kw 22:19-21). Te Bijbel e taki „Yehovah di e tiri den legre”, dan a fiti fu gebroiki a wortu „den”. Disi de so fu di den engel no prati nomo na ini kerub-engel, seraf nanga tra engel, ma den de na ini grupu tu di orga bun (Yes 6:2, 3; Ge 3:24; Opb 5:11). Dati meki Yesus Krestes ben taki dati a ben kan aksi en Tata „moro leki twarfu bigi legre engel” fu kon yepi en (Mt 26:53). Di Heskia ben e begi Yehovah fu yepi en, dan a kari en „Yehovah di e tiri den legre, Gado fu Israel, di e sidon na tapu den kerub-engel”. Nanga den wortu disi a ben sori go na a ark fu a frubontu èn den gowtu kerub-engel di ben de na tapu na ark. Disi ben prenki a kownusturu fu Yehovah na hemel (Yes 37:16; luku sosrefi 1Sa 4:4; 2Sa 6:2). Di a futuboi fu Elisa ben frede di srudati ben lontu a foto pe Elisa ben e tan, dan na wan wondru fasi Yehovah meki a futuboi si wan bigi grupu engel. A ben man si fa a bergikontren lontu a foto „ben lai nanga asi èn nanga fetiwagi” di ben de leki faya èn dati meki a no ben frede moro.—2Kw 6:15-17.
it-2-O 178
Lei
Yehovah Gado e gi pasi taki son sma e bedrigi trawan di no lobi san tru „so taki den kan bribi lei” na presi fu bribi a bun nyunsu fu Yesus Krestes (2Te 2:9-12). Wi kan si disi te wi e luku san ben pasa nanga Kownu Akab fu Israel. Falsi profeiti ben taigi Akab taki a ben o wini te a ben o go feti nanga den sma fu Ramot-Gilead, ma Mikaya a profeiti fu Yehovah ben taki dati den ben o lasi a feti. Mikaya ben si na ini wan fisyun taki Yehovah gi wan engel na okasi fu meki ala den profeiti fu Akab „taki soso lei”. Sobun, na engel gebroiki a krakti fu en fu meki den profeiti taki san densrefi ben wani èn san Akab ben wani yere. Aladi Mikaya ben warskow Akab, toku Akab arki den lei fu den profeiti èn a sani dati meki a lasi en libi.—1Kw 22:1-38; 2Kr 18.