Verwijzing gi Wi Kresten libi nanga a preikiwroko studie-buku

14-20 NOVEMBER

GUDU NA INI GADO WORTU | 2 KOWNU 7-8

„Yehovah du wan sani di nowan sma ben fruwakti”

it-1-O 621-622

Elisa

Ma bakaten, Ben-Hadad II broko go na ini Samaria, a lontu Samaria èn a dwengi den sma fu gi densrefi abra. Den ben lontu a kondre so langa, taki a kownu kon yere taki wan uma ben nyan en eigi pikin, fu di nyan no ben de moro ini a kondre. Kownu Yoram wan bakapikin fu Akab, wan „manpikin fu wan kiriman” sweri taki a o kiri Elisa. Ma a no ben du dati moro. Di Yoram nanga en yepiman doro na a oso fu a profeiti, dan a taki dati a no ben e bribi moro taki Yehovah ben o yepi en. Elisa gi a kownu a dyaranti taki a dei baka dati, bun furu nyanyan ben o de. Ma a yepiman fu Yoram ben spotu nanga a profeititori di Elisa taki. Dati meki Elisa taigi en: „Nanga yu eigi ai yu o si a sani disi, ma yu srefi no o nyan nowan fu den sani di yu o si.” Yehovah ben meki den Siriasma yere wan babari di meki den bribi taki wan bigi legre ben e kon feti nanga den. Dati meki den lon gowe libi a heri kampu nanga ala den nyanyan-sani di den ben abi. Di Kownu kon yere san pasa, a taigi en yepiman fu hori wakti na a portu fu Samaria. Ma di den sma lon pasa na a portu fu go teki ala sani na ini a kampu fu den Siriasma, a yepiman fadon na gron èn den trapu en kiri. Na so a si den nyanyan-sani nanga en eigi ai, ma en srefi no nyan fu den.​—2Kw 6:24–7:20.

Diki moro dipi

it-2-O 149 ¶7

Lampu

Kownu di ben de bakapikin fu David. Yehovah Gado ben poti David leki Kownu fu Israel. Fu di Gado ben e sori David san a ben musu du, meki a ben de wan bun fesiman èn a ben man gi bun rai. Dati meki den ben kari en „a lampu fu Israel” (2Sa 21:17). Na ini a kownukondre frubontu di Yehovah ben meki nanga David a ben primisi en: „A kownukondre fu yu o tan fu ala ten. Noiti tra sma o teki a kownukondre disi abra” (2Sa 7:11-16). Te yu luku a famiri fu David, dan en manpikin Salomo ben de leki a „lampu” fu Israel tu.​—1Kw 11:36; 15:4; 2Kw 8:19; 2Kr 21:7.

28 NOVEMBER–4 DECEMBER

GUDU NA INI GADO WORTU | 2 KOWNU 11-12

„Wan ogri-ati uma di ben e denki ensrefi nomo kisi strafu”

Diki moro dipi

it-1-O 1301

Yoas

Solanga a Granpriester Yojada, di ben de leki wan papa gi Yoas ben de na libi èn a ben gi a yongu tirman disi rai, sani ben e go bun nanga en. Di a ben abi 21 yari a trow nanga tu wefi. Wan fu den ben nen Yohadan. Dan Yoas tron papa fu manpikin nanga umapikin. Na so a famiri fu David pe a Mesias ben o komoto, ben man kon tranga baka, aladi a famiri disi ben de fu lasi a kownumakti.​—2Kw 12:1-3; 2Kr 24:1-3; 25:1.

19-25 DECEMBER

GUDU NA INI GADO WORTU | 2 KOWNU 18-19

„Sani di den feanti fu wi e du fu meki wi lasi-ati”

yb75-O 176 ¶1

Deel 2​—Duitsland

Den SS srudati ben kon nanga ala sortu triki fu kisi wan sma so fara fu teken wan papira taki a no de wan Yehovah Kotoigi moro. Ma te sma ben du dati, dan nofo tron den srudati no ben e du san de ben pramisi. Na presi fu dati den ben e gi den moro strafu. Karl Kirscht e taki fu a sani disi: „Na ini den strafuman-kampu sma ben du ala sortu sani nanga Yehovah Kotoigi moro leki iniwan tra sma. Den SS srudati ben prakseri taki te den ben du dati, dan den Kotoigi ben o teken taki den no de wan Kotoigi moro. Doromono den tan aksi wi fu du a sani disi. Son sma teken, ma furu tron den ben musu wakti moro leki wán yari fu kon fri. Na ini a pisi ten dati den SS srudati ben gwenti kari den sma disi hoigriman nanga bobo na fesi ala sma. Fosi den srudati ben meki den sma di ben teken gowe libi a strafuman-kampu, dan den ben e dwengi den fu waka lontu den brada di ben tan getrow. A sani disi den ben e kari ’ereronde’.”

Diki moro dipi

it-1-O 156 ¶3

Sabiman

Fu eksempre, Bijbel e taki dati na Adrameilek nanga Sareiser kiri a papa fu den, Kownu Sanherib fu Asiria. Dan wan tra manpikin fu en, Esar-Hadon bigin tiri leki kownu (2Kw 19:36, 37). Ma wan historia buku fu den Babilonsma ben taki dati na wan manpikin fu Kownu Sanherib kiri en tapu 20 tebet (Wan mun ini a Dyu kalender). Berosus, wan priester fu Babilon di ben libi sowan 2300 yari pasa, nanga Nabonidus, wan kownu fu Babilon di ben libi sowan 2600 yari pasa ben taki tu dati na wán manpikin fu Sanherib nomo ben kiri en. Ma no solanga pasa sma feni wan pisi fu a bukulolo fu a prisma fu Esar-Hadon, a manpikin di tron kownu baka Sanherib. Drape Esar-Hadon srefi e taki dati den brada fu en (moro leki wán) ben opo densrefi èn kiri a papa fu den. Baka dati den lowe. Philip Biberfeld taki na ini wan buku: „A historia buku fu Babilon, Nabonidus, nanga Berosus no fruteri soifri fa a sani disi pasa, na Bijbel wawan e du dati. A prisma fu Esar-Hadon sori taki san Bijbel e taki fu a fasi fa Sanherib dede de tru. A e sori tu taki Bijbel e fruteri a tori disi moro fini leki den historia buku fu Babilon srefi. Disi na wan tumusi prenspari sani fu hori na prakseri te sma e ondrosuku historia buku fu owruten, srefi te den buku disi e fruteri sani tra fasi leki san skrifi ini Bijbel.”​—Universal Jewish History 1948, Vol. I, p. 27.

26 DECEMBER–1 YANUARI

GUDU NA INI GADO WORTU | 2 KOWNU 20-21

„Begi meki taki Yehovah du wan sani”

g01-O 7/22 13 ¶4

Fa begi kan yepi mi?

Na ini Bijbel ten son futuboi fu Gado kisi piki tapu den begi fu den wantewante èn na wan wondru fasi son leisi. Fu eksempre, di Kownu Heskia ben siki èn a yere taki a ben o dede, dan a begi Gado fu yepi en. Gado piki en: „Mi yere a begi fu yu èn mi si fa yu krei. Luku, mi o meki yu kon betre” (2 Kownu 20:1-6). Tra man nanga uma di ben anbegi Gado, si tu fa Gado piki a begi fu den.​—1 Samuel 1:1-20; Danièl 10:2-12; Tori fu den apostel 4:24-31; 10:1-7.

Diki moro dipi

it-2-O 1241 ¶2

Markitiki

Te sma e bow, dan den e gebroiki wrokosani soleki wan titei noso wan loto fu luku efu den skotu fu a gebow no kron. Yehovah ben taki fu den sma fu Yerusalem di ben e anbegi falsi gado: „Na a srefi fasi fa mi ben marki Samaria nanga wan titei èn fa mi ben marki a famiri fu Akab nanga wan loto, na so mi o marki Yerusalem tu.” Gado ben marki Samaria nanga a oso fu Akab èn a kon si taki den ben ogri srefisrefi. Dati meki den ben o kisi pori. Na a srefi fasi Gado ben o krutu Yerusalem nanga den tiriman drape tu. A ben o tyari kon na krin taki den ogri èn a ben o pori a foto. Den sani disi pasa ini a yari 607 Fosi Krestes (2Kw 21:10-13; 10:11). Yehovah meki Yesaya taigi den ogri-ati tiriman di ben e dyaf, taki a ben o strafu den èn taki ogri ben o miti den. A ben taki: „Mi o gebroiki retidu leki wan markitiki èn leki wan loto fu marki unu.” Te Yehovah ben o gebroiki retidu na so wan fasi, dan dati ben o sori suma ben de den trutru futuboi fu Gado èn suma no ben de dati. A sani disi ben o meki taki den ben tan na libi noso dede.​—Yes 28:14-19.