Verwijzing gi Wi Kresten libi nanga a preikiwroko studie-buku
© 2022 Christian Congregation of Jehovah’s Witnesses
16-22 YANUARI
GUDU NA INI GADO WORTU | 1 KRONIKI 1-3
„Bijbel—Wan buku di e fruteri fa sani pasa trutru”
w09-O 1/9 14 ¶1
Adam nanga Eva ben de trutru sma?
Luku na eksempre fu den nen fu a famiri fu den Dyu, di skrifi na ini a Bijbel buku Wan Kroniki 1 te go miti 9 èn na ini na Evangelietori fu Lukas kapitel 3. Den lijst disi e taki fu sowan 48 nanga 75 bakapikin. Lukas e taki fu sma di ben de fu a famiri fu Yesus, ma Kroniki e taki fu den wan di ben e tiri leki kownu èn fu den prister fu Israel. Na ini ala den tu lijst disi yu kan feni a nen fu prenspari sma soleki Salomo, David, Yakob, Isaak, Abraham, Noa èn te fu kaba a di fu Adam. Ala den nen di de na ini den tu lijst disi, na nen fu sma di ben e libi trutru. Disi e sori taki Adam ben de wan trutru sma, bika en nen de fu feni tapu ala den tu lijst disi.
w09-O 1/9 14-15
Adam nanga Eva ben de trutru sma?
Wan eksempre fu wan Bijbel leri di prenspari gi furu sma di e go na kerki, na a lusu-paiman. A leri disi e sori taki Yesus Krestes gi en volmaakti libi leki lusu-paiman fu frulusu libisma (Mat 20:28; Yoh 3:16). Soleki fa wi sabi dan wan lusu-paiman na wan paiman di e pai fu sorgu taki wan sma kon fri noso fu bai wan sani baka. Fu dati ede Bijbel e kari Yesus „wan paiman di fiti” (1 Ti 2:6). Ma kande yu e aksi yusrefi, san a paiman disi fiti fu du? Bijbel e taki: „Neleki fa ala sma dede na ini Adam, na so ala sma sa kon na libi baka tu na ini Krestes” (1 Korentesma 15:22). A volmaakti libi fu Yesus di a gi leki ofrandi, ben de fanowdu fu bai a libi baka fu den sma di e gi yesi. A ben de fanowdu fu di Adam ben sondu na ini Eden èn a ben lasi a libi disi (Romesma 5:12). A de krin taki efu Adam no ben libi trutru, dan a lusu-paiman fu Yesus no ben de fanowdu srefisrefi.
Diki moro dipi
it-1-O 805 ¶4-5
Buku pe den ben skrifi a nen fu a famiri fu den difrenti lo
Nen fu umasma. Wan reide ben de fu san ede den ben skrifi a nen fu son uma na ini den buku pe den ben skrifi a nen fu a famiri fu den difrenti lo. Na ini Genesis 11:29, 30 den kari Sarai (Sara) fu di na en ben o kisi a pramisi siri. A no wan tra wefi fu Abraham ben o kisi a pikin disi. Kande na fu dati ede meki den kari Milka tu, fu di na en ben de a granmama fu Rebeka, a wefi fu Isaak. Dati ben sori taki Rebeka ben de wan famiri fu Abraham, bika Isaak no ben musu trow nanga wan trakondre uma (Ge 22:20-23; 24:2-4). Na ini Genesis 25:1 we e leisi a nen fu Ketura tu, wan wefi nanga san Abraham ben trow bakaten. Disi e sori taki baka di Sara dede, Abraham ben trow nanga wan tra wefi èn taki a wondru di Yehovah ben du so taki a ben kan kisi pikin, ben de na libi moro leki 40 yari langa (Ro 4:19; Ge 24:67; 25:20). Disi ben sori sortu banti den Midiansma nanga den tra lo fu den Arabirisma ben abi nanga Israel.
Bijbel e kari a nen fu Lea, Rakel, nanga den tra wefi fu Yakob makandra nanga den manpikin di den ben kisi (Ge 35:21-26). Disi e yepi wi fu frustan san Gado ben o du nanga den manpikin disi bakaten. Na fu den sortu sani disi ede meki wi e feni a nen fu tra umasma na ini den buku pe den ben skrifi a nen fu a famiri fu den. Te den ben musu prati wan famiri gudu, dan a kan taki den ben o kari a nen fu den tu (Nu 26:33). Ma dati no ben de so gi Tamar, Rakab nanga Rut. Na ini ibriwan fu den situwâsi disi, wan sani de di e sori fa iniwan fu den uma disi kon tron wan fu den afo fu a Mesias, Yesus Krestes (Ge 38; Ru 1:3-5; 4:13-15; Mt 1:1-5). Tra eksempre pe a nen fu umasma skrifi na ini den buku pe den ben skrifi a nen fu den famiri fu den, de fu feni na 1 Kroniki 2:35, 48, 49; 3:1-3, 5.
23-29 YANUARI
GUDU NA INI GADO WORTU | 1 KRONIKI 4-6
„San den begi fu mi e sori fu mi?”
w10-O 1/10 23 ¶3-7
Wan „sma di e arki begi”
Yabes ben de wan man di ben lobi begi. A aksi Gado fu blesi en fosi. Baka dati a aksi drie sani di e sori taki a ben abi bribi.
Leki fosi sani, Yabes begi Yehovah fayafaya fu ’meki a kontren fu en kon moro bigi’ (Vers 10). A prenspari man disi no ben wan teki wan pisi gron di no ben de fu en. A fayafaya fasi fa a begi Yehovah, ben kan abi fu du nanga a yepi di a ben wani yepi sma. A no fu di a ben abi a gron fanowdu gi ensrefi, ma a kan taki disi ben abi fu du nanga a pipel. Kande a ben aksi fu wan moro bigi pisi gron so taki moro anbegi fu a tru Gado ben kan tan drape.
A di fu tu sani, Yabes aksi Gado fu „horibaka” gi en. Na agersi anu fu Gado na a krakti fu en di a e gebroiki fu yepi den anbegi man fu en (1 Kroniki 29:12). Fu man kisi san en ati ben wani, Yabes luku go na a Gado di anu no syatu fu yepi den wan di e frutrow en.—Yesaya 59:1.
A di fu drie sani di Yabes aksi Gado na: „kibri mi, so taki ogri no miti mi. No meki sani pasa nanga mi di kan hati mi”. Den wortu „so taki ogri no miti mi” e sori taki Yabes no ben e begi fu kisi kibri gi orgi, ma fu no sari noso lasi-ati te ogri ben o miti en.
A begi fu Yabes e sori taki a ben e broko en ede nanga a tru anbegi, taki a ben abi bribi èn taki a ben e frutrow a sma di e arki begi. Fa Yehovah piki en? A syatu tori disi e kaba nanga den wortu: „Ne Gado du ala den sani di Yabes aksi en.”
6-12 FEBRUARI
GUDU NA INI GADO WORTU | 1 KRONIKI 10-12
„Meki na angri di yu abi fu du Gado wani kon moro tranga”
Diki moro dipi
it-1-O 962 ¶6-7
Ati
Anbegi en „nanga yu heri ati.” Wan trutru ati no musu prati fu man wroko bun, ma nanga na agersi ati fu wi a no abi fu de so. David ben begi: „Meki mi sori lespeki gi yu nen nanga mi heri ati.” Den wortu disi e sori taki David ben sabi taki na ati fu wan sma kan prati, fu di wan sani kan abi krakti na en tapu noso fu di a e frede (Ps 86:11). So wan sma no man dini Gado ’nanga en heri ati’, fu di a no o de fayafaya (Ps 119:113; Opb 3:16). Wan sma kan dini Gado nanga tu ati tu, te a e meki muiti fu anbegi tu masra noso a e taki wan sani aladi a e praksreri wan tra sani (1Kr 12:33; Ps 12:2). Yesus ben e krutu de sortu sma disi.—Mt 15:7, 8.
Wan sma di wani taki Gado breiti nanga en musu dini en nanga en heri ati. En ati no musu prati (1Kr 28:9). A o abi fu du tranga muiti fu man du a sani disi, fu di na ati fu wi lai nanga ogri prakseri (Yer 17:9, 10; Ge 8:21). Sani di kan yepi wi fu dini Gado nanga wi heri ati na: Te wi e begi Gado nanga wi heri ati (Ps 119:145; Sa 3:41), studeri Gado wortu doronomo (Esr 7:10; Odo 15:28), te wi e teki prati fayafaya na ini a preikiwroko (Luku Yer 20:9), èn te wi e tan abi demakandra nanga tra sma di e dini Yehovah nanga den heri ati tu.—Luku 2Kw 10:15, 16.