Baka di Yesus nanga den disipel fu en gowe libi Yerikow, den tan dri neti na ini Betania. A de munde 10 Nisan now, èn frukufruku mamanten den e go na Yerusalem. Angri e kiri Yesus. Dati meki te a e si wan figabon, a e waka go na en. A bon sa abi figa?

A de a kabapisi fu a mun maart now, ma figabon e bigin gi froktu na ini yuni. Toku a figabon disi bigin gi wiwiri kaba. Dati meki Yesus e denki taki kande a bon abi froktu kaba. Ma te a e go luku, a e si taki a bon no abi nowan froktu. Fu di a bon abi wiwiri, meki sma kan denki taki a abi froktu. Fu dati ede Yesus e taigi a bon: „Noiti moro wan sma musu nyan wan froktu fu yu” (Markus 11:14). Wantewante a bon e bigin drei. A tra mamanten a e kon na krin san a sani di Yesus taigi a bon wani taki.

A no teki langa fosi Yesus nanga den disipel doro na ini Yerusalem. A neti na fesi a ben luku fa sani e waka na ini a tempel. Tide a no e luku nomo, ma a e du wan sani di a ben du kaba sowan dri yari pasa, na a Paskafesa fu a yari 30 (Yohanes 2:14-16). Disi leisi Yesus e yagi ’den sma go na dorosei di e seri èn e bai sani na ini a tempel’. Boiti dati, a e drai ’den tafra tapu fu den sma di e broko moni èn den bangi fu den sma di e seri doifi’ (Markus 11:15). A no e gi sma pasi srefi fu boro na tapu a dyari fu a tempel fu tyari wrokosani go na a tra sei fu a foto.

Fu san ede Yesus e du den sani disi nanga den sma di e broko moni èn nanga den sma di e seri meti na ini a tempel? A e taki: „A no de so, taki Gado Buku taki: ’Sma o kari mi oso, wan oso pe sma fu ala kondre e kon begi’? Ma unu meki a kon tron wan presi pe fufuruman e tan” (Markus 11:17). A e kari den man disi fufuruman fu di den e seri den meti tumusi diri gi den sma di musu bai den fu tyari leki ofrandi. Yesus feni taki den man disi na bigi bedrigiman noso fufuruman.

A no de fu taki dati den edeman fu den priester, den leriman fu Wet, nanga den heihei man fu a pipel e yere san Yesus du. Dati meki den e du moro muiti fu kiri en. Ma wan sani e tapu den. Den no sabi fa fu kiri Yesus fu di bun furu sma e kon fu teki leri fu en.

A no Dyu wawan kon na a Paskafesa, ma trakondre sma di teki a Dyu bribi de drape tu. Sonwan fu den sma disi na Grikisma di kon fu anbegi Gado. Den Grikisma disi e go na Filipus fu aksi en efu den kan miti Yesus. Kande den e aksi Filipus fu di a abi wan Griki nen. A kan taki Filipus no sabi seiker efu a ben o bun fu tyari den sma disi go na Yesus, èn dati meki a e taki nanga Andreas. Den tu man e go taki nanga Yesus di de na ini a tempel ete.

Yesus sabi taki a o dede baka wan tu dei. Sobun now a no a ten fu miti sma, soso fu di den wani si en. Now a no a ten tu fu suku grani. A e piki den apostel nanga yepi fu wan agersitori. A e taki: „A yuru doro taki a Manpikin fu libisma musu kisi glori. Fu tru, mi e taigi unu: Efu wan siri aleisi no fadon na gron èn a no dede, a e tan wán siri nomo. Ma efu a dede, a o gi furu nyanyan.”​—Yohanes 12:23, 24.

A kan gersi leki wán siri nomo no abi waarde. Ma efu wan sma e prani en èn a „dede”, dan baka wan pisi ten wan pransun e opo kon di e tron wan aleisibon di abi furu aleisi. Na so a de tu taki Yesus na wán man nomo di no abi sondu. Ma fu di a o tan gi yesi na Gado te na a dede fu en, meki furu sma o kisi têgo libi nanga yepi fu en. Fu man kisi têgo libi, den sma disi musu de leki Yesus di no ben teri ensrefi. Dati meki Yesus e taki: „A sma di lobi en libi, o lasi en, ma a sma di no lobi en libi na ini a grontapu disi, o kibri en fu kan kisi têgo libi.”​—Yohanes 12:25.

Yesus no e prakseri ensrefi nomo, bika a e taki: „Efu wan sma wani de mi futuboi, meki a waka na mi baka. Pe mi de, na drape mi dinari o de tu. Efu wan sma wani dini mi, dan a Tata o gi en grani” (Yohanes 12:26). Dati na wan bigi blesi! Den sma di a Tata e gi grani o tiri makandra nanga Yesus na ini a Kownukondre.

Yesus e prakseri a hebi pina di o miti en èn na ogri-ati fasi fa sma o kiri en. Dati meki a e taki: „Now a hebi gi mi trutru, ma san mi o taki? Mi Tata, grantangi, puru mi na ini a nowtu disi.” Ma Yesus no taki a sani disi fu di a e suku wan fasi fu no du a wani fu Gado. A e taki moro fara: „Toku mi musu pasa a muilek ten disi, bika na fu dati ede mi kon” (Yohanes 12:27). Yesus e agri nanga ala den sani di Gado o du, èn dati meki a de klariklari fu dede leki srakti-ofrandi.

Tapu munde 10 Nisan, Yesus de na a tempel èn a e taki fu a dede fu en. Fu di a e broko en ede taki Gado o kisi porinen, meki a e taki: „Mi Tata, gi yu nen glori.” Wan tranga sten e piki komoto fu hemel: „Mi ben gi mi nen glori kaba èn mi o du en baka.”​—Yohanes 12:27, 28.

Den sma di de drape e bruya. Sonwan fu den e denki taki den yere dondru. Trawan e taki: „Wan engel taki nanga en” (Yohanes 12:29). Ma fu taki en leti, na Yehovah sten den yere! Disi a no a fosi leisi di libisma yere a sten fu Gado taki wan sani fu Yesus.

Di Yesus teki dopu sowan dri nanga afu yari na fesi, Yohanes a Dopuman ben yere a sten fu Gado tu. A sten disi ben taki fu Yesus: „Disi na mi Manpikin, a lobiwan di mi feni bun.” Wan pisi ten baka dati, baka a Paskafesa fu a yari 32, Yesus ben kenki kon tron wan heri tra fasi na fesi Yakobus, Yohanes, nanga Petrus. Den dri man dati yere di Gado sten taki: „Disi na mi Manpikin, a lobiwan di mi feni bun. Un arki en” (Mateyus 3:17; 17:5). Now sma e yere a sten fu Yehovah fu a di fu dri leisi. Ma disi leisi a e taki na so wan fasi taki furu sma man yere en!

Yesus e taki: „A no fu mi ede a sten disi taki, ma na fu unu ede” (Yohanes 12:30). A sani disi e sori krin taki Yesus na Gado Manpikin trutru, iya, en na a Mesias di Gado ben pramisi.

Fu di Yesus ben e gi yesi na Gado ala ten, meki a sori sma fa den musu libi. A sori tu taki Satan Didibri, a tiriman fu grontapu, musu kisi pori. Yesus e taki: „Now Gado o krutu grontapu èn a o trowe a tiriman fu a grontapu disi go na dorosei.” Yesus no o lasi te a dede, ma a o wini. Fa so? A e taki: „Ma toku te mi opo gowe fu grontapu, mi o hari ala sortu sma kon na mi” (Yohanes 12:31, 32). Baka te Yesus dede na wan pina-postu, moro sma o tron disipel fu en. Na so den kan kisi têgo libi.

Te Yesus taki dati a o „opo gowe” fu grontapu, dan a pipel e taki: „A Wèt leri wi taki Krestes e tan fu têgo. We dan fa yu kan taki dati a Manpikin fu libisma sa opo gowe fu grontapu? Suma na a Manpikin disi fu libisma?” (Yohanes 12:34) Aladi den sma abi so furu buweisi èn aladi den yere Gado en eigi sten, toku furu fu den no wani bribi taki Yesus na a tru Manpikin fu libisma, noso a Mesias di Gado pramisi.

Soleki fa a ben du kaba wan leisi, Yesus e taki dati en na „a leti” (Yohanes 8:12; 9:5). A e gi a pipel a rai disi: „A leti o de nanga unu pikinso ete. Waka solanga unu abi a leti ete, so taki a dungru no o tapu unu. . . . Solanga a leti de nanga unu, un musu bribi na ini a leti, so taki unu tron manpikin fu a leti” (Yohanes 12:35, 36). Baka dati Yesus e gowe, fu di a no musu dede tapu 10 Nisan. Na a Paskafesa fu 14 Nisan den o „opo” en te den o spikri en na wan postu.​—Galasiasma 3:13.

Te yu e luku a pisi ten di Yesus ben e du a diniwroko fu en na grontapu, dan a de krin taki den Dyu no ben e bribi na ini en soleki fa den profeititori ben taki. Yesaya ben taki na fesi dati a pipel no ben o man si nanga den ai èn den ati ben o tranga so te, taki den no ben o man drai kon baka na Gado fu kon betre (Yesaya 6:10; Yohanes 12:40). Iya, furu fu den Dyu e weigri fu bribi den buweisi di e sori taki Yesus na a Frulusuman di Gado pramisi den èn a sma di kan meki den kisi têgo libi.

Nikodeimus, Yosef fu Arimateya, nanga furu tra tiriman e „bribi trutru” na ini Yesus. Ma kande sonwan fu den e frede taki sma o yagi den puru na ini a snoga èn kande trawan ’lobi fu kisi grani fu libisma’. Den o meki den sani disi tapu den fu sori taki den e bribi na ini Yesus?​—Yohanes 12:42, 43.

Yesus srefi e fruteri fa sma kan sori taki den e bribi na ini en: „A sma di e bribi na ini mi, no e bribi na ini mi wawan, ma a e bribi tu na ini a sma di seni mi kon. A sma di si mi, si a sma tu di seni mi kon.” Yesus e tan fruteri sma den sani di a leri fu Gado. Den sani disi prenspari so te, taki Yesus kan taki: „Wan sma di no abi lespeki gi mi èn di no e teki san mi taki, o kisi krutu. Na den sani di mi taki o krutu en na a lasti dei.”​—Yohanes 12:44, 45, 48.

Te fu kaba Yesus e taki: „Mi no taki san misrefi e prakseri. A Tata di seni mi kon, taigi mi san mi musu taki èn san mi musu leri sma. Mi sabi tu taki den komando fu en e meki sma kisi têgo libi” (Yohanes 12:49, 50). Yesus sabi taki heri esi a o dede leki wan srakti-ofrandi gi libisma di e bribi na ini en.​—Romesma 5:8, 9.